1. Chumanyi chitweluka, nawa muloñadi?

 NEYI mumona yuma chiyidi mukaayi, komana chayikalilaña kumona yuma munjila yayiwahi? Yisaka yinakutiyañana wanyi. Antu anaswejeliku kwikala namadombu, kudikeña aweni nikuzuwa. Amavulu chayikalilaña kukuhwelela akawuswa. Ilaña iyi yuma yinakumwekana yinateli kuyikwasha kwikala nachikuhwelelu. Muloñadi? Muloña antu anakwila yuma yashimwineñawu dehi muwuprofwetu kutalisha “mumafuku akukuminina.” (2 Tim. 3:1-5) Kushikijewa kwaniwu wuprofwetu, kunateli kubula kukaanawu kudi muntu washinshika, kunakumwekesha nawu Kristu Yesu hiMwanta wunatachiki dehi kuyuula muWanta waNzambi. Ilaña iwu hiwuprofwetu wumu hohu hawuprofwetu wawuvulu wahosha haWanta. Chikutukwasha kwikala nachikuhwelelu chakola neyi tushinshika hawuprofwetu wukwawu wunashikijewi hayaaka yinahitihu.

2. Yumanyi yitukuhanjekahu muchinu chibaaba, nawa muloñadi? (Hoshenu hamwevulu wudi hakava.)

² Muchinu chibaaba tukuhanjeka (1) hawuprofwetu watukwashaña kwiluka netu Wanta wunatachiki kuyuula, (2) wuprofwetu watukwashaña kwiluka netu Yesu nekali Mwanta waWanta waNzambi, (3) niwuprofwetu wunakumwekesha nawu ayilumbu jaWanta waNzambi akayijilumuna. Tukumona iwu wuprofwetu chiwunesekani kulonda chitukwashi kwiluka hitunashiki kwesekeja nachatanjikayi Yehova, neyi yikunku-yikunku (jigsaw) yinanuñiwu hamu.

3. Indi wuprofwetu wudi haDanyeli 7:13, 14 watulejañadi hadi Mwanta waWanta waNzambi?

³ Wuprofwetu wekala haDanyeli 7:13, 14 watulejaña nawu Kristu Yesu wakekala Nyuuli watelela waWanta waNzambi.  Antu akunyuza yejima ‘akamukalakelaña’ namuzañalu, nawa hiyakamusisaku. Wuprofwetu wukwawu wamumukanda waDanyeli washimwineñahu dehi nawu Yesu wukatambwila Wanta hakukuma kwampinji 7 yawuprofwetu. Komana chaswayi kwiluka hamwekeni iyi mpinji yamuzañalu?

4. Lumbululenu Danyeli 4:10-17 chiyatuleja mpinji yekaliliyi Kristu nañovu haWanta. (Talenu cheñi tumazu twaheshina.)

⁴ Tañenu Danyeli 4:10-17. “Mpinji 7” yinakwimenaku yaaka 2,520. Iyi mpinji yatachikili mu 607 B.C.E. helili aBabiloni afumishi mwanta wakukumishaku hetanda daYehova muYerusalema. Yamanini mu 1914 C.E. helili Yehova namuswanyiki dehi Yesu, muntu “wukweti wuswa,” kwikala Mwanta waWanta waNzambi. *—Ezek. 21:25-27.

5. Munjilanyi wuprofwetu ‘wampinji 7’ muwukutukwashila?

⁵ Iwu wuprofwetu wunateli kutukwasha ñahi? Kwiluka “mpinji 7” kwatukwashaña kwiluka netu Yehova washikijaña yikaninu yindi mumpinji. Neyi chashiliku mpinji yakwikalaku Wanta windi, wakashikija cheñi wuprofwetu wejima kwesekeja nampinji yashaku. Eña, ifuku daYehova ‘hidakalabaku!’—Hab. 2:3.

6. (a) Chinjikijilwinyi chitunakumona chinakumwekesha nawu Kristu nakuyuula? (b) Chumichi anachimwekeshi ñahi muwuprofwetu wekala haChimwekeshu 6:2-8?

⁶ Kukamwihi nakumanisha mudimu windi wahamaseki, Yesu washimwineñahu dehi nindi yuma yikamwekanaña mukaayi yikakwasha atumbanji twindi kwiluka nawu natachiki dehi kuyuula mwiwulu. Hakachi kayuma yateneniyi, wateneni njita, nzala yakapwelendendi ninyitentanshi. Washimwini cheñi nindi kwakekala yipupu, hela nyisoñu, “mumaluña ashiyashana,” neyi makonu tukutena chipupu chaCOVID-19. Iyi yuma yinakumwekana diyashimwini Bayibolu nawu ‘chinjikijilu’ chakwikalahu kwaKristu. (Mat. 24:3, 7; Luka 21:7, 10, 11) Chimwahitili yaaka kubadika ha 60 hanyima yakwila nafwi nawa nafunti dehi mwiwulu, Yesu wamumwekesheleli cheñi kapostolu Yowanu chimwenu chamwekesheleña nawu iyi yuma yikamwekana. (Tañenu Chimwekeshu 6:2-8.) Yuma yejima iyi yinamwekani kufuma tuhu hampinji Yesu yekaliliyi nañovu haWanta mu 1914.

7. Muloñadi kuyuula kwaYesu chikwaletela yihuñu hamaseki?

⁷ Muloñadi yuma mukaayi chiyaswejeleliku kutama chelili Yesu ekali Mwanta? Chimwekeshu 6:2 yalumbulula nawu Yesu chekalililiyi Mwanta wasambilili kuzuña njita. Wazuñili nanyi? NaDiyabolu niandemoni jindi. Kwesekeja naChimwekeshu kapetulu 12, Satana amushindili nawa yena niandemoni jindi ayinatilili hamaseki. Satana wahilili, watachikili kusukwila ndulu hamuchidi wamuntu, chuma chinafumimu ‘hiyihuñu hamaseki.’—Chim. 12:7-12.

8. Chitunakumona wuprofwetu wahosha haWanta wunakushikijewa, chinakutukwasha ñahi?

⁸ Iwu wuprofwetu wunateli kutukwasha ñahi? Yilwilu yinakumwekeshawu antu yikutukwasha kwiluka netu Yesu nekali Mwanta. Dichi chatela tuhileña neyi tumona antu anakumwekesha yilwilu yatama, twatela kwanukaña netu yuma yinakwilawu yinakushikija wuprofwetu wamuBayibolu. Wanta  wunakuyuula! (Mas. 37:1) Nawa twatela kwiluka netu yihuñu yikuvulilaku chineli Amagedoni yidi kwakwihi. (Maku 13:8; 2 Tim. 3:13) Komana kwila tumusakilila Tata yetu wamwiwulu wukweti kukeña hakutukwasha kwiluka mpinji yakala yitudimu nehi?

9. Wuprofwetu wudi haDanyeli 2:28, 31-35, wunalumbululi ñahi wanta wakaayi wakukumishaku nawa wekaliliku mpinjinyi?

⁹ Tañenu Danyeli 2:28, 31-35. Tunakumona iwu wuprofwetu chiwunakushikijewa makonu. Chilota chaNebukaneza chashimuna yuma yikamwekana “mumafuku akukuminina,” neyi Kristu natachiki dehi kuyuula. Ayilumbu jaYesu ahamaseki munabombeli wanta wañovu mukaayi wakukumishaku washimunawu muBayibolu, wemenañaku “madatilu achikuñu nindambu.” Iwu wanta wañovu mukaayi wekala dehi kwoku. Wekaliliku hampinji yaNjita Yakaayi Yatachi helili Britain naUnited States adikwati hamu nakwikala Anglo-America. Chilota chamukishi wamweniyi Nebukaneza muchilota nichena chashimwineñahu dehi yuma yiyedi haniwu wanta wañovu mukaayi yikawambulaku kumawanta amakwawu anafumiku.

10. (a) Indi wuprofwetu waDanyeli washimuna ñahi choloka hadi Anglo-America? (b) Wubanjinyi wutwatela kutondolwela? (Talenu chikasha chinakwila nawu “ Ikalenu Asoñama naNdambu!”)

¹⁰ Chatachi, kwambukaku namawanta amakwawu añovu amunichi chilota, Anglo-America ayesekeja, bayi nachikuñu chakola chidi neyi wuru hela silivaku, ilaña nachikuñu nindambu. Ndambu yemenañaku “anyana kawantu,” hela antu hohu. (Dan. 2:43, tth.) Chumichi chinakumwekana  makonu, chadiñijañawu munsañu jakutonda anyuuli, makampeni akwikala asubuka, mujamaprotesiti nijakwikala akasunuka hanyidimu jamanishaña ñovu yaniwu wanta wañovu mukaayi yakuzatisha nshimbi jawu.

11. Indi kwikalaku kwaAngo-America Wanta waÑovu Mukaayi kunatukwashi ñahi kwiluka netu tunakushakama mumafuku akukuminina?

¹¹ Chamuchiyedi, neyi chamwesekejawu nanyendu yamukishi weneni, Anglo-America diwanta wakukumishaku wañovu washimunawu muBayibolu. Hiyakawusinsa kudi wanta wukwawuku. Ilaña, wukamana neyi mukulabula kwadisu haAmagedoni neyi Wanta waNzambi wunawuhumuni dehi ninfulumendi jikwawu jawantu. *—Chim. 16:13, 14, 16; 19:19, 20.

12. Wunsahwinyi wukwawu washimwiniyi Danyeli wunatukundejaña nikutwinka kuchiñeja?

¹² Iwu wuprofwetu wunateli kutukwasha ñahi? Wuprofwetu waDanyeli washimuna wunsahu wukwawu nawu tunakushakama mumafuku akukuminina. Kubadika hayaaka 2,500 yinahitihu, Danyeli washimwineñahu dehi nindi hanyima yaBabiloni, mawanta amakwawu awaana akakabisha antu jaNzambi. Kubombelahu, washimwini nindi, Anglo-America Wanta waÑovu Mukaayi, wakekala wakukumishaku. Chumichi chatukundejaña nikuchiñeja netu katataka Wanta waNzambi wufumishihu chiyuulu chawantu kulonda wena wuyuuleña iseki dejima.—Dan. 2:44.

13. Indi “mwanta wamu 8” “nianyanta 10,” ashimunawu haChimwekeshu 17:9-12, anakwimenaku anyi, nawa iwu wuprofwetu wunashikijewi ñahi?

¹³ Tañenu Chimwekeshu 17:9-12. Yuma yakisañeniwu muNjita Yakaayi Yatachi yashikijili wuprofwetu wukwawu wamuBayibolu wahosha hamafuku akukuminina. Anlomboli amukaayi akeñeleña nawu kumbidi mukaayi mukekali kuwunda. Dichi muJanuary 1920, ashiliku mutaayi waLeague of Nations, wasinsiliwu kudi United Nations muOctober 1945. Iku kuloñesha akutena nawu “mwanta wamu 8.” Ilaña hiwanta wamukaayi wañovuku. Ñovu niwuswa wawu washindamena hamatuña añovu awukwashaña. Bayibolu yashimuna iji ñovu muchifwikija nawu “anyanta 10.”

14-15. (a) Indi Chimwekeshu 17:3-5 yashimuna nawudi hadi “Babiloni Muneni”? (b) Chumanyi chinakwilawu antu ahakwilañaku kwitiya kwakutwamba?

¹⁴ Tañenu Chimwekeshu 17:3-5. Chamoneneniwu, kapostolu Yowanu wamweni chivumbi, “Babiloni Muneni.” Wunakwimenaku wanta wakaayi wakwitiya kwakutwamba. Ichi chimwenu chinakutulejadi? Makuloñesha akwitiya kwakutwamba anazatili hamu namatuña añovu mukaayi nawa ayikiswilaña. Hela chochu, katataka Yehova achishi munyichima yawanyuuli akaayi “kulonda akoñi mwaya nkeñelu yindi.” Chumanyi chikafumamu? Awa anlomboli akaayi, “anyanta 10,” akabalumukilamu makuloñesha akwitiya kwakutwamba nakuyijilumuna.—Chim. 17:1, 2, 16, 17.

¹⁵ Tuneluki ñahi netu kukuma kwaBabiloni Muneni kudi mukamwihi? Hakwila twakuli ilu lwihu, chikuwaha neyi twanuka netu musumba waBabiloni awukiñili kudi menji amavulu aKaloña Yufurati. Mukanda waChimwekeshu wesekeja antu amavulu ahakwilañaku Babiloni Muneni ‘namenji amavulu.’ (Chim. 17:15) Ilaña wamwekeshaña cheñi nawu menji ‘akooma,’ chinakumwekesha nawu wanta wamukaayi wakwitiya  kwakutwamba wukajimbesha antu amavulu awuhakwilañaku. (Chim. 16:12) Iwu wuprofwetu wunakushikijewa, muloña antu amavulu anakufuma mukwitiya kwakutwamba nawa anakuya kwacheñi nakukeña wukwashu.

16. Kwiluka wuprofwetu wahosha hakumwekana kwaUnited Nations nikukuma kwaBabiloni Muneni kunateli kutukwasha ñahi?

¹⁶ Iwu wuprofwetu wunateli kutukwasha ñahi? Kumwekana kwaUnited Nations niantu chinakukaanawu kuhakwilaku kwitiya kwakutwamba chinakumwekesha nawu mwamweni tunakushakama mumafuku akukuminina. Hela chakwila antu amavulu anakuleka kuhakwilaku Babiloni Muneni, kunesekejiwu namenji anakuuma, chumichi hichinayi mukwila nawu dichakajilumuna makuloñesha akwitiya kwakutwambaku. Neyi chitwashimuna dehi, Yehova wakachisha munyichima ‘yawanyata 10,’ mawanta añovu akwashaña United Nations, “kulonda akoñi mwaya nkeñelu yindi.” Nyuza yakajilumuna kwitiya kwakutwamba mukukasumwisha,  chumichi chikahayamisha kaayi. * (Chim. 18:8-10) Neyi Babiloni Muneni anamujilumuni dehi kaayi kakanyinkesha nawa chikaleta yihuñu, ilaña antu jaNzambi akazañalala muloña wayuma yiyedi. Iwu chilumbu chaYehova Nzambi wunashimbuli akamufumishahu haya nyaaka, nawa twakeluka netu katataka atwamwini kunshakaminu yatama yakaayi kamakonu!—Luka 21:28.

17-18. (a) Tunateli kutwalekahu ñahi kukolesha chikuhwelelu chetu? (b) Tukadizadi muchibaaba chinalondelihu?

¹⁷ Danyeli washimwineñahu dehi nindi “kwiluka kwalala kwakavula.” Nawa mwamweni kunavuli! Tuneluki wuprofwetu wahosha hampinji yitudimu. (Dan. 12:4, 9, 10) Iwu wuprofwetu woloka nawa chatukwashaña kumukuhwelela Yehova niIzu dindi. (Isa. 46:10; 55:11) Twalekenuhu kukolesha chikuhwelelu chenu kuhitila mukudiza Bayibolu nikukwasha antu ekali nawubwambu wawuwahi naYehova. Wukuyikiña antu amushindamenaña nawa wukuyinka “kuwunda kwabulaña kumana.”—Isa. 26:3.

¹⁸ Muchibaaba chinalondelihu, tukahanjeka hawuprofwetu wahosha hachipompelu chawakaKristu amumafuku akukuminina. Neyi chitukudiza, iwu wuprofwetu wunakumwekesha nawu tunakushakama mumafuku akukumina. Tukamona wunsahu wukwawu wunakumwekesha nawu Yesu, Mwanta wetu wunakuyuula, nakukwasha antu amulondelaña.