1. Chumanyi cheliliyi Yehova hanyima yakwila Adama naEva anavulumuni? (Kutachika 3:15)

 HANYIMA yakwila Adama naEva anavulumuni, Yehova wayinkeli anyanindi kuchiñeja kuhitila muwuprofwetu. Mazu ahosheliyi ekala haKutachika 3:15.—Tañenu.

2. Yumanyi yayiwahi kutalisha haniwu wuprofwetu?

² Iwu wuprofwetu wekala mumukanda watachi wamuBayibolu. Munjila yimu hela yikwawu, nyikanda yejima yinashali yamuBayibolu yinakundami kuniwu wuprofwetu. Neyi chabombañawu yipapilu hamu nakutuña mukanda, mazu ekala haKutachika 3:15 abomba nsañu yekala munyikanda yamuBayibolu kwikala nsañu yimu yanuñañaña, dikwila nawu, Chamwinu akamutemesha kulonda akajilumuni Diyabolu niantu jindi ejima atama. * Antu amukeña Yehova akatambwila nkisu!

3. Yumanyi yitukuhanjekahu muchinu chibaaba?

³ Muchinu chibaaba tukwakula awa malwihu kutalisha hawuprofwetu wekala haKutachika 3:15: Anyi ashimunawu muniwu wuprofwetu? Wuprofwetu wunakushikijewa ñahi? Nawa wunakutukwasha ñahi?

4. “Kapela” hinyi, nawa tuneluki ñahi?

⁴ Antu atenawu haKutachika 3:14, 15 munabombeli, “kapela,” ‘Anyana’ kakapela, “mumbanda,” ‘nimwana’ kamumbanda. Bayibolu yatukwashaña kuyiluka wejima wawu. *  Tutachiki kuhanjeka hadi “kapela.” Neyi kadiña kapela kakeni, hikadi kutiya yuma yahosheliyi Yehova mwitempa daEdeniku. Dikwila nawu Yehova wakunjikileña iwu wunsompeshi kudi chileñaleña wukweti maana. Hinyi yenowu? Chimwekeshu 12:9 yamushimuna hatooka. Haniyi nsona “kapela wakushankulu” amushimuna hatooka nawu Satana Diyabolu. ‘Anyana’ kakapela anyi?

5. Anyana kakapela hiyanyi?

⁵ Neyi Bayibolu yihosha hadi anyana muchifwikija, yatenaña antu atoñojokaña nikwila yuma neyi tata yawu wachifwikija. Dichi anyana kakapela hiyileñaleña yatama yakuspiritu niantu, chidi neyi Satana, adikañaña naYehova Nzambi nawa adimbululaña antu Jindi. Munabombeli añelu ashili nyidimu yawu mwiwulu mumafuku aNowa niantu atama elaña yuma neyi tata yawu Diyabolu.—Kutach. 6:1, 2; Yow. 8:44; 1 Yow. 5:19; Yuda 6.

6. Muloñadi chitukuhoshela netu “mumbanda” kwila ekala Eva nehi?

⁶ Ichi tuhanjekenu hadi “mumbanda.” Kwila ekala Eva nehi. Muloñadi? Toñojokenu hanichi chuma. Wuprofwetu washimuna nawu mwana kamumbanda “wakachika” mutu wakapela. Neyi chitunashimuni dehi, kapela hiSatana chileñaleña wakuspiritu, nawa kwosi mwana kaEva wabula kuwanina wunateli kumuchika kapelaku. Kwatela kwikala muntu wacheñi.

7. Neyi chinamwekeshiwu haChimwekeshu 12:1, 2, 5, 10, mumbandanyi ashimunawu haKutachika 3:15?

⁷ Mumbanda ashimunawu haKutachika 3:15 anamulumbululi mumukanda wakukumishaku wamuBayibolu. (Tañenu Chimwekeshu 12:1, 2, 5, 10.) Iwu bayi neyi  himumbanda itwelukaku! Wukweti kakweji mwishina danyendu yindi nichibaaba chatutumbwa 12 kumutu windi. Navwali mwana wambukaku chikupu: Wanta waNzambi. Iwu Wanta wamwiwulu, dichi mumbanda niyena watela kwikala wamwiwulu. Nakwimenaku chibalu chakuloñesha kwaYehova chamwiwulu munabombeli yileñaleña yindi yakuspiritu yashinshika.—Ñal. 4:26.

8. Mwana watachi waniwu mumbanda hinyi, nawa wekalili mpinjinyi? (Kutachika 22:15-18)

⁸ Izu daNzambi cheñi datukwashaña kwiluka mwana kaniwu mumbanda. Iwu mwana wateleleli kuvwalika muchisaka chaAbarahama. (Tañenu Kutachika 22:15-18.) Neyi chahosheli wuprofwetu, eña Yesu wafumini muchisaka chanona nkakulula washinshika. (Luka 3:23, 34) Ilaña iwu mwana kwila ekala muntu hohu nehi muloña watela kumuchika Satana Diyabolu nakumufumishahu chikupu. Yesu chashikijiliyi yaaka kwakwihi na 30, amuwayishili nakwikala Mwana kaNzambi wakeñewa wakuspiritu. Hamuwayishileñawu Yesu, wekalili mwana watachi waniwu mumbanda. (Ñal. 3:16) Chelili Yesu afwi nawa amusañuli, Nzambi “wamuvwikili chibañula chakulema nimpuhu” nawa wamwinkeli “wuswa wejima mwiwulu niheseki,” kushilahu niwuswa wakukisañana “nyidimu yaDiyabolu.”—Heb. 2:7; Mat. 28:18; 1 Yow. 3:8.

9-10. (a) Anyana kamumbanda amakwawu hiyanyi, nawa mpinjinyi yekalañawu anyana? (b) Yumanyi yitukuhanjekahu cheñi?

⁹ Ilaña kwatela kwikala cheñi anyana amakwawu. Kapostolu Pawulu wayiteneni hampinji yayilejeliyi akaKristu awayishewa aYudeya niabula kwikala aYudeya nindi: “Neyi mudi antu jaKristu, dikwila nawu mudi anyana kaAbarahama chikupu, answana kwesekeja nachikaninu.” (Ñal. 3:28, 29) Neyi Yehova awayisha mukaKristu naspiritu yajila, iwu muntu wekalaña mwana kamumbanda. Dikwila nawu mwana munabombeli Yesu Kristu nia 144,000 akayuulañayi nawu. (Chim. 14:1) Wejima wawu amwekeshaña yilwilu yaTata yawu, Yehova Nzambi.

¹⁰ Chineli tuneluki dehi antu ashimunawu haKutachika 3:15, tuhanjekenu chantesha Yehova chinakushikijayi chovu-chovu wuprofwetu nichiwunakutukwasha.

11. Munjilanyi mwamusumininiwu mwana kamumbanda “kukatutu”?

¹¹ Kwesekeja nawuprofwetu wudi haKutachika 3:15, kapela wakamusuma mwana kamumbanda “kukatutu.” Chumichi chamwekeni chelili Satana ayikojeji aYudeya niaRoma amujahi Mwana kaNzambi. (Luka 23:13, 20-24) Neyi chilonda chidi kukatutu chichamukañeshaña muntu kwenda, kufwa kwaYesu nikwena kwamuletesheli kubula kuzata mudimu wudi wejima nawa wakaamani mwijamu hadi mafuku asatu.—Mat. 16:21.

12. Munjilanyi nawa mpinjinyi yakakamuchikawu kapela kumutu?

¹² Neyi wuprofwetu wekala haKutachika 3:15 wateleli kushikijewa, Yesu hateleli kutwalekahu mwijamuku. Muloñadi? Muloña wuprofwetu washimuna nawu mwana wakamuchika kapela kumutu. Dikwila nawu chilonda chakukatutu kaYesu chatela kukusuka. Nawa mwamweni chakusukili! Hefuku damuchisatu hanyima yakufwa kwindi, Yesu amusañwili namujimba wakuspiritu wakafwaña. Hampinji yatoñolayi Nzambi,  Yesu wakamuchika Satana nakumufumishahu lwejima. (Heb. 2:14) Ejima akayuula naKristu akazataku mudimu wakufumisha ayilumbu jaNzambi hamaseki, anyana kakapela.—Chim. 17:14; 20:4, 10. *

13. Kushikijewa kwaniwu wuprofwetu kunakutukwasha ñahi?

¹³ Neyi mudi kambuña Yehova wadihana, kushikijewa kwaniwu wuprofwetu wunakuyikwasha. Yesu wenjili hamaseki nakwikala muntu. Wamwekesheli yilwilu yaTata yindi. (Yow. 14:9) Dichi, kuhitila mudi yena tunamwiluki nikumukeña Yehova Nzambi. Cheñi tunadizili kuyuma yatañishileñayi nichinakulombolayi chipompelu chawakaKristu makonu. Natudizishi chitwatela kuhanda munjila yinateli kuletesha Yehova atutiyi kuwaha. Hamuloña wakwila Yesu amusumini kukatutu nawa wafwili, wejima wetu tunakumwenamu yuma yayiwahi. Munjilanyi? Yesu chamusañwiliwu, wahanini mashi indi “atutookeshaña kunshidi jejima” kwikala mulambu wawanina—1 Yow. 1:7.

14. Komana muchidi wamuntu wateleleli kukuhwelela nawu wuprofwetu wamuEdeni wateleli kushikijewa hohenohu? Lumbululenu.

¹⁴ Mazu ahosheliyi Yehova muEdeni amwekeshaña nawu hatela kuhita mpinji hakwila wuprofwetu wejima wukashikijewi. Hatela kuhita mpinji hakwila mumbanda avwali mwana akanawu, hakwila Diyabolu apompeshi akakumulondela nawa hekali wulumbu (hela kuhelañana) hakachi kanawa mazanvu ayedi. Kwiluka iwu wuprofwetu kwatukwashaña muloña chatusoñamishaña nawu kaayi kanakuyuulawu kudi Satana kakahela akakudifukula aYehova. Chimwahitili mpinji Yesu wayisoñamishili atumbanji twindi chuma chochimu. (Maku 13:13; Yow. 17:14) Tunamoni chinashikijewi chibalu chaniwu wuprofwetu sweje-e hayaaka 100 yinahitihu. Munjillanyi?

15. Muloñadi kaayi chikanaswejeli kutuhela, ilaña muloñadi chitwatela kubulila kumutiya Satana woma?

¹⁵ Chelili hohu Yesu amuswanishi Wanta wawuMesiya mu 1914, Satana amufumishili mwiwulu. Ichi wudi hamaseki, nakuhembelela kumujilumuna. (Chim. 12:9, 12) Bayi neyi nakuhembelela iku washakamaku. Satana nazuwi nawa nasukwili ndulu yindi hadi antu jaNzambi. (Chim. 12:13, 17) Hamuloña wachumichi, kaayi kanaswejeliku kuyihela antu jaNzambi. Hela chochu, kwosi chuma chikuletesha tumutiyi woma Satana niantu jindiku. Ilaña, tukweti chikuhwelelu neyi chadiña nakapostolu Pawulu, wasonekeli nindi: “Neyi Nzambi wudi nanetu, hinyi wukutwimakena?” (Rom. 8:31) Twatela kumukuhwelela chikupu Yehova muloña tunamoni wuprofwetu wawuvulu wasonekawu haKutachika 3:15 wunashikijewi dehi.

16-18. Kutiyishisha nsona yaKutachika 3:15 kunayikwashi ñahi aCurtis, Ursula, niJessica?

¹⁶ Chuma chashiikayi Yehova haKutachika 3:15 chinateli kutukwasha kuumika kukala kudi kwejima. Curtis, mishonali muGuam, wahosheli nindi: “Mpinji yikwawu, namonaña kukala nikweseka kwakojejaña kubula kumukalakela chiwahi Yehova. Ilaña kutoñojoka chikupu hawuprofwetu wekala haKutachika 3:15 kwankwashaña kutwalekahu kumukuhwelela Tata yami wamwiwulu.” Curtis watalilaña ifuku dakamanishayi Yehova kukala kwejima kutwamonaña.

 ¹⁷ Muhela Ursula wakuBavaria wahosheli nindi kutiyishisha nsona yaKutachika 3:15 kwamukwashili kukuhwelela nindi Bayibolu ayonena kudi Nzambi. Wamweni wuprofwetu wukwawu chiwanuñañana naniwu wuprofwetu nawa chumichi chamutiyishili kuwaha. Wahosheli cheñi nindi: “Natiyili kuwaha cheñi chinelukili nami Yehova wazatililihu hayoyina mpinji kulonda muchidi wamuntu wiikali nakuchiñeja.”

¹⁸ Jessica, wakuMicronesia, wahosheli nindi: “Inakwanuka chinatiyili hampinji yinelukili nami nawani chalala! Wuprofwetu wekala haKutachika 3:15 wadiña nakushikijewa. Chinankwashi kwanuka nami yuma yitunakumona makonu ichi hichihandilu chacheniku. Iwu wuprofwetu wunankwashi cheñi kukuhwelela nami mukumukalakela Yehova munakufuma yuma yayiwahi makonu nikumbidi.”

19. Yumanyi yikuletesha tukuhweleli netu chibalu chakukumishaku chawuprofwetu chakashikijewa?

¹⁹ Neyi chitunamoni, Kutachika 3:15 yinakushikijewa. Mwana kamumbanda nianyana kakapela anayilumbululi hatooka. Yesu, mwana watachi waniwu mumbanda, chilonda chindi chakukatutu chinakusuki nawa ichi hiMwanta walema wakafwaña. Anyana amakwawu amumbanda keña amanishi kuyitonda. Chineli chibalu chatachi chaniwu wuprofwetu chinashikijewi dehi, twatela kukuhwelela netu chibalu chakukumishaku, chakumuchika kapela kumutu, nichena chikashikijewa. Chumichi chakawaha nankashi chikela Satana anamufumishihu dehi! Henohu chumichi kanda, bayi muzeyaku. Twatela kumukuhwelela chikupu Nzambi yetu. Kuhitila mudi mwana kamumbanda, wakaleta yuma yayiwahi kudi “nyuza yejima yahanu hamaseki.”—Kutach. 22:18.