1. Yehova nakukeña nindidi makonu?

 MAKONU Nzambi nakukeña nindi nsañu yayiwahi yaWanta ayishimwini mwahita iseki dejima. (Maku 13:10; 1 Tim. 2:3, 4) Iwu himudimu waYehova nawa walema nankashi chakwila wamwinka Mwanindi akeñayi nindi awulomboleña. Twatela kwiluka netu chineli Yesu diyi wunakulombola iwu mudimu, mudimu wakushimwina wakamana chikupu henohu kukuma kanda kwesekeja nachakeñañayi Yehova.—Mat. 24:14.

2. Tukuhanjekadi muchinu chibaaba?

² Muchinu chibaaba, tukumona Yesu chinakuzatishayi “nduñu wamaana nikashinshi” kuloñesha yakuda yakuspiritu nikukwasha akakumulondela kudiloñesha kushimwina chikupu. (Mat. 24:45) Tukudiza cheñi chuma chitunateli kwila hamuntu-hamuntu kulonda tumukwashi Yesu ninduñu washinshika.

3. Wuswanyi wamwinkawu Yesu?

³ Yesu nakulombola mudimu wakushimwina. Tuneluki ñahi chumichi? Chelili kunashali dehi mpinji yantesha nakuya mwiwulu, Yesu wadiña nawakakumulondela ashinshika hampindi yaÑaliliya. Wayilejeli nindi: “Ananyinki wuswa wejima mwiwulu niheseki.” Talenu mazu ahosheliyi cheñi: “Dichi, yenu mwakelishi antu akunyuza yejima ekali atumbanji.” (Mat. 28:18, 19) Hakachi kayuma yikwawu, Yesu  amwinkeli wuswa wakulombola mudimu wakushimwina.

4. Tuneluki ñahi netu Yesu wuchidi kulombola mudimu wakushimwina?

⁴ Yesu washimwini nindi mudimu wakushimwina niwakwilisha atumbanji akawuzata ‘munyuza yejima’ nawa nindi wukwikalaña nawakakumulondela “mafuku ejima kushika nikukukuma kwanshakaminu yamakonu.” (Mat. 28:20) Awa mazu anakumwekesha nawu mudimu wakushimwina akutwalekahu kuwulombola kudi Yesu kushika tuhu nimunanu mafuku.

5. Tunakushikija ñahi wuprofwetu wekala haMasamu 110:3?

⁵ Yesu hakameneni nindi akakuzata mudimu akakeha kumakumishilu anshakaminu yamakonuku. Welukili nindi mazu awuprofwetu añimbi wesamu akashikijewa. Akwila nawu: “Antu jeyi akadihana namuchima wumu hefuku diwakalombola mashidika eyi añovu kunjita.” (Mas. 110:3) Neyi munakuzata mudimu wakushimwina, munakumukwasha Yesu ninduñu washinshika nawa munakushikija iwu wuprofwetu. Mudimu wunakuzatika, ilaña kudi kukala.

6. Kukalanyi kumu kunakumona akakushimwina aWanta makonu?

⁶ Kukala kumu kunakumonawu akakushimwina aWanta hiikañesha. Akakusekesha, akulumpi jakwitiya niakamatuña nachiyuulu ayilejaña antu nsañu yakutwamba hamudimu wetu. Neyi antaña jetu, antu itweluka niakwetu mutwazatilaña ayiluwañesha nanawa makudi, hadaha anateli kutukanjikija nawu tuleki kumukalakela Yehova nikushimwina. Mumatuña amakwawu ikañesha denzaña kuhitila mukutuchiinisha, kutukasa nikutumbila mutuleya. Twahayamaña wanyi neyi anakutwila yumiyi. Yesu washimwineñahi dehi nindi: “Akayihela kudi nyuza yejima kukoola ijina dami.” (Mat. 24:9) Chuma chaleteshaña atuheli himuloña wakwila tudi nawuselewa waYehova. (Mat. 5:11, 12) Diyabolu diyi wunakuletesha yuma yejimiyi. Ilaña hakwesekana naYesuku! Chineli Yesu nakutukwasha, nsañu yayiwahi yinakushika kudi antu akunyunza yejima. Talenu wunsahu wunakumwekesha.

7. Wunsahwinyi wumunakumona nenu Chimwekeshu 14:6, 7 yinakushikijewa?

⁷ Etu akakushimwina aWanta, twamonaña cheñi kukala muloña antu ahoshaña madimi ashiyashana. Muchimwekeshu chamulejeliwu Yowanu, Yesu washimwini nindi munanu mafuku nsañu yayiwahi yikashinda iku kukala. (Tañenu Chimwekeshu 14:6, 7.) Munjilanyi? Tunakukwasha antu amavulu kulonda eteji nsañu yaWanta. Makonu, antu mukaayi kejina anateli kutaña nyikanda yashindamena haBayibolu hawebusayiti ya jw.org, muloña hadi nsañu mumadimi kubadika 1,000. Izanvu Dalombolaña detejeli kubalumuna mukanda waMunateli Kwikala naMuzañalu Haya Nyaaka!, mumadimi kubadika ha 700, mukanda wakwilisha nachu atumbanji. Yakuda yakuspiritu anakuyidisha cheñi mumavidiyo awatumama ninyikanda yawamputamesu. Tunakumona wuprofwetu wamuBayibolu chiwunakushikijewa. Antu “kufuma kumadimi ejima amunyuza” anakudiza kuhosha “idimi ditooka” dachalala chamuBayibolu. (Zek. 8:23; Zef. 3:9) Mudimu wejimiwu wunakuzatika muloña Yesu Kristu diyi wunakulombola.

8. Yumanyi yinafumi mumudimu wetu wakushimwina?

⁸ Makonu, antu akubadika ha 8,000,000 mumatuña 240 adi mukuloñesha kwaYehova nawa chaaka nichaaka makumi  amakombakaji anakupapatishewa. Hela chochu, chuma chinabadiki kulema hakuvula, hiyilwilu yawakaKristu, “wuntu wawuha,” wunakumwekeshawu awa atumbanji amaha. (Kol. 3:8-10) Amavulu aleka yilwilu yatama, madombu, chaambu nijamatuña. Wuprofwetu wasonekawu haIsaya 2:4 wunakushikijewa; hiyanakudiza “cheñi njitaku.” Hamuloña wakwila tunakuzata nañovu kuvwala wuntu wawuha, tunakukwasha antu kwinza mukuloñesha kwaYehova nawa tunakumwekesha netu tunakuzatilamu hamu nanlomboli yetu Kristu Yesu. (Yow. 13:35; 1 Pet. 2:12) Yuma yejimiyi yinakudimwekena yayeni wanyi. Yesu diyi wunakutukwasha.

9. Kwesekeja naMatewu 24:45-47, chumanyi chashimwineñawu dehi kutalisha hamafuku akukumnina?

⁹ Tañenu Matewu 24:45-47. Yesu washimwineñahu dehi nindi kumafuku akukuminina wakatonda “nduñu wamaana nikashinshi” kulonda akaloñesheña yakuda yakuspiritu. Dichi twatela kwiluka netu iwu nduñu watela kuzata nañovu munanu mafuku. Dichuma chitunakumona. Yesu nakuzatisha izanvu danyanya dawawayishewa kwinka antu jaNzambi niadi nampwila yayakuda yakuspiritu “hampinji yatelela.” Awa amayala hiyadimonaña nawu hiyanyanta hachikuhwelelu chawakwawuku. (2 Kor. 1:24) Ilaña, eluka nawu Yesu Kristu diyi “Nlomboli nawa mukulumpi kunyuza.”—Isa. 55:4.

10. Mukanda wudihi wunamwekeshiwu hamwevulu wayikwashili kwenda munjila yaya kuwumi wahaya nyaaka?

¹⁰ Kufuma tuhu mu 1919, nduñu washinshika naloñeshi nyikanda yashiyashana yinakwashi antu akweti mpwila kudiza chalala. Mu 1921 iwu nduñu wedishili mukanda waThe Harp of God kulonda wukwashi adi nampwila kudiza chalala chamuBayibolu.  Mukuhita kwampinji edishili nyikanda yikwawu. Mukanda wudihi wayikwashili kumwiluka nikumukeña Tata yetu wamwiwulu? wadiña “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Chumanyi Chacheni Chatañishaña Bayibolu? Yumanyi Yinateli Kutudizisha Bayibolu?, hela mukanda wetu wawuha waMunateli Kwikala naMuzañalu Haya Nyaaka!? Iyi nyikanda yejima ayisonekeli kulonda yikwashi antu hanoyu mpinji yayidishiliwu.

11. Chalemenadi wejima wetu kudiza chikupu hadi Yehova niBayibolu?

¹¹ Antu anakudiza chalala hidiwu hohu anakukeñeka kumwiluka chikupu Yehova niBayiboluku. Wejima wetu tunakukeñeka. Kapostolu Pawulu wasonekeli nindi: “Yakuda yakola yawantu apama dehi.” Pawulu wabombelelihu nindi neyi tuzatishaña yuma yitunakudiza chikutukwasha “kwaambula yuma yayiwahi nayatama.” (Heb. 5:14) Muyinu mpinji yakala muneli yilwilu yatama yinasweji, chinateli kutukalila kulondela nshimbi jaYehova. Ilaña Yesu nakutwinka yuma yinateli kutukwasha kukolesha chikuhwelelu chetu. Iyi yuma yekala mwiIzu daNzambi donenewa, Bayibolu. Nduñu washinshika amulombolaña kudi Yesu kutuloñeshela nikutwinka iyi yakuda.

12. Kufwana Yesu, twalemesha ñahi ijina daNzambi?

¹² Kufwana Yesu, twalemesha chikupu ijina daNzambi kwesekeja nachichatela kwikala. (Yow. 17:6, 26) Chakutalilahu, mu 1931 twaditumbili ijina damuNsona dakwila nawu aYinsahu jaYehova, chumichi chamwekeshaña chitwalemesha ijina Tata yetu wamwiwulu. (Isa. 43:10-12) Kufuma tuhu muOctober muchina chaaka, idi ijina damwekanaña hakava yamagazini. Kubombelahu, Bayibolu  yaNsona jaKaayi Kakaha yinafuntishi ijina daNzambi hejima hidatela kwikala MwiIzu dindi. Hadi chaambu nankashi namachechi awaKristendomu afumisha ijana daYehova mumaBayibolu abalumunawu.

13. Chumanyi chinaleteshi mukuhweleli nenu Yesu nakuzatisha “nduñu wamaana nikashinshi” makonu? (Yowanu 6:68)

¹³ Kuhitila mudi “nduñu wamaana nikashinshi,” Yesu washaku kuloñesha hanu hamaseki kulonda tutiyakesheña kudifula kwalala. Mwakumonaña ñahi iku kuloñesha? Hadaha mwatiyaña neyi chatiyiliyi kapostolu Petulu wamulejeli Yesu nindi: “Mwanta, tukuya kudinyi? Eyi yeyi wukweti mazu awumi wahaya nyaaka.” (Yow. 6:68) Twadi kwikala kudihi makonu neyi chakwila twadiña wanyi mukuloñesha kwaYehova? Kuhitila muniku kuloñesha, Kristu watwinkaña yakuda yakuspiritu. Watudizishaña cheñi chakushimwina chiwahi. Kubombelahu, watukwashaña “nikuvwala wuntu wawuha,” kulonda tumuzañalesheña Yehova.—Efwe. 4:24.

14. Kwikala mukuloñesha kwaYehova kunayikwashi ñahi mumpinji yaCOVID-19?

¹⁴ Yesu watwinkaña nshimbi yitwatela kulondela mumpinji yakala. Tunamoni yuma yayiwahi yinafumimu hakulondela iyi nshimbi chelili chipupu chaCOVID-19 chitachiki. Antu amavulu mukaayi elukili wanyi chatela kwilawu, ilaña Yesu watwinkeli nshimbi kulonda twikali akiñewa. Atulejeleña kudibuta hakanwa natumahina neyi tudi kudi antu amavulu nikudishila yintampu. Akulumpi ayilejeli kuhanjekaña mpinji yejima nawantu amuchipompelu kulonda eluki chadiwu kumujimba nikwiluka chidi wubwambu wawu naYehova. (Isa. 32:1, 2) Atulejeleña  cheñi chakwila nikutukolesha kuhitila mumaLipoti Kufuma Kudi Izanvu Dalombolaña.

15. Nshimbinyi yatwinkeliwu kutalisha hakupompa nihakushimwina mumpinji yachipupu, nawa yumanyi yinafumimu?

¹⁵ Mumpinji yachipupu atulejeli cheñi chitwatela kupompa nikushimwina. Hashimbwili wanyi, twatachikili kupompa kwachipompelu, kwanyanya nikweneni kuzatisha mavidiyo nikudisokankesha. Twatachikili cheñi kushimwina kuhitila mukusoneka nyikanda nimafoni. Yehova wakiswilili nyidimu yetu. Tusanji tunashimuni nawu akakushimwina anavuliliku nankashi. Kafwampi, amavulu amweni yuma yayiwahi muniyi mpinji.—Talenu chikasha chinakwila nawu “ Yehova Wakiswilaña Mudimu Wetu Wakushimwina.”

16. Chumanyi chitwatela kwiluka chikupu?

¹⁶ Antu amakwawu hadaha atoñojokeleña nawu kuloñesha kunasweji kukolesha nshimbi kutalisha hachipupu. Ilaña mumpinji nimpinji, chamwekesheleña hatoooka nawu nshimbi jatwinkeliwu jatukwashili. (Mat. 11:19) Nawa chitukutoñojokaña njila yayiwahi munakulombwelayi Yesu antu jindi, tuneluki chikupu netu hela kumbidi kukekala kukalanyi, Yehova niMwanindi akeñayi akekala nanetu.—Tañenu AHeberu 13:5, 6.

17. Mwatiyaña ñahi kuyilombola kudi Yesu?

¹⁷ Twazañalaña chikupu chineli Yesu diyi nlomboli yetu. Twekala mukuloñesha kwabula chaambu chachisema, matuña ninyichidi. Nzambi diyi watwinkaña nshimbi kuhitila Mwizu dindi nawa atudizishaña chakushimwina. Wejima wetu hamuntu-hamuntu atukwashaña chakuvwala wuntu wawuha nawa tunakwiluka chitwatela kudikeña wumu namukwawu. Tukweti yuma yayivulu yikutuletesha kudisambila mudi nlomboli yetu Yesu!