Chawushona, chinashikijili yaaka 13, wubwambu wami naYehova watachikili kumana. Akwetu akashikola adiña asubuka chikupu nawa ninami nakeñeleña kwikala wasubuka neyi wena. Namweni nami nshimbi jawanvwali ninshimbi jalondelañawu akwaKristu jadiña jakala. Hela chakwila nakuhweleleli nami Yehova wekala kwoku, hinaswinini kwakwihi nayenaku.

Nalekeli kushimwina wanyi ilaña nashimwinineña nakukilokela. Hinnaloñesheleña henohu kanda niyi nakushimwinaku, dichi chankalilileña kutachika hela kutwalekahu kuhanjeka namuntu. Chafuminimu, nadiña wanyi nakwakufuntila hela nakadizi nawa chumichi chanletesheli kuhela mudimu wakushimwina chikupu. Nadihwileña nami, ‘Muntu nateli kutwalekahu ñahi kushimwina mulungu nimulungu hela kakweji nikakweji?’

Chinashikijili yaaka 17, ninami nakeñeleña kwikala wadimena. Dichi naloñejekeli yuma yami nakufuma hetala nawa nayili kuAustralia. Anvwali jami aneñeli nankashi chinafumini  hetala. Adakameneni ilaña atoñojokeleña nawu nikatwalekahu kumukalakela Yehova.

MuAustralia, nazatileña nankashi mudimu waYehova wanyi. Natachikili kujiña-jiña kukupompa. Nadikundileña nawakwetu atwansi ankeñeli nawa ayileña nakupompa mpinji yikwawu ilaña ayileña cheñi nakunwa nikuhañana nawufuku. Neyi nanuka chadiña chihandilu chami, nelukaña nami nadiña muchalala hampinji yoyimu nimukaayi, ilaña kwosi chuma chanzañalesheleña.

Chimwahitili yaaka kwakwihi nayiyedi, nadiwanini namuhela wankwashili kutoñojoka chadiña chihandilu chami. Nashakamineña nawahela atanu ajiki nawa twamutambikili nkoñi wañinza niñondidi Tamara kushikena kwitala detu hadi mulungu wumu. Neyi anfumwawu anakasiki nanyidimu yamuchipompelu, aTamara twashakamineña nawu nakuhanjeka. Natiyileña kuwaha nankashi. Adiña aswayi kuhanjeka nawu nawa akwatileña nsañu mukunyakashana. Nahayamini hakuwana nawu muntu wapama kuspiritu chochichi nateli kwikala wakasunuka muniyi njila.

Amuhela Tamara ahosheleña neyena chikupu. Akeñeli nankashi chalala nimudimu wakushimwina. Atiyileña kuwaha chamuzatilileñawu Yehova hakwila ami naneñeleña nachinamuzatilileña Yehova. Yilwilu yawu yayiwahi nimuzañalu wadiñawu nawu wankwashili muchihandilu chami. Yuma yelileñawu yanletesheli kutoñojoka hachalala chalema: Yehova wakeñaña nindi wejima wetu tumukalakeleña “nakuzañalala” nawa “nakwimba tumina.”—Mas. 100:2.

Nakeñeleña kwikala namuzañalu neyi wadiña nawaTamara, ilaña hakwila nikali nawu, nateleli kuhimpa chikupu. Mwahitili mpinji, ilaña natachikili kuhimpa chovu-chovu. Natachikili kuloñesha henohu kanda niyi nakushimwina nawa nazatileñaku wupayiniya wakukwasha mumpinji-mumpinji. Chumichi  chankwashili kubula kusweja kutiya woma nikwikala wahamuka chikupu. Natiyileña kuwaha nankashi kuzata mudimu wakushimwina muloña nazatishileña Bayibolu nankashi. Hashimbwili wanyi, natachikili kuzataku wupayiniya wakukwasha kakweji nikakweji.

Natachikili kudikunda nawamabwambu akweti yaaka yashiyashana adiña muchalala nawa akeñeli kuzata nyidimu yaYehova. Yuma yayiwahi yelileñawu yankwashili kutoñojoka hayuma yalema yinatela kulemesha muchihandilu chami nikutachika kutaña Bayibolu ifuku nifuku. Natachikili kutiya kuwaha mudimu wakushimwina nawa nkumininaku nekalili payiniya wampinji yejima. Ichi dichaaka chinatiyili kuwaha nawa nekalili wakasunuka chikupu muchipompelu.

Chimwahitili chaaka chimu, twadiwanini naAlex, muntu wamukeña Yehova nimudimu wakushimwina. Wadiña nkoñi wakuzatila nawa wazatili wupayiniya hadi yaaka 6. Alex wakalakeleliku nimuMalawi kwakwihi natukweji 8 kwadiña kukankila. Kuna kuMalawi, wadiwanini nawamishonali amukwashili nawa amukolesheli kutwamijaku Wanta waNzambi muchihandilu chindi.

Twadisumbwili mu 2003, nawa kufuma tuhu yinampinji tunatwalekihu kuzata mumudimu wampinji yejima. Tuneluki yuma yayivulu nawa Yehova natukiswili chikupu.

Mu 2009, atutambikili kuya nakuzatila wumishonali kuTimor-Leste, ituña danyanya dekala muIndonesian archipelago. Hampinji yoyimu, twahayamini, twazañaleli nawa twatiyili woma. Chimwahitili tukweji tutanu, twayili mumusumba waDili.

Iku kubuuka kwatuletesheli kuhimpa yuma yayivulu. Twahimpili chisemwa, idimi, yakuda nichakushakama. Hitwayileña nakushimwina,  twawanineña atuzweñi, antu abula kwilukisha kutaña hela abula kutaña nawa akabishileñawu. Nawa twamweneña antu amavulu akabakeneña muloña wamajita nimadombu. *

Chakalili nankashi kuzata mudimu wakushimwina! Chakutalilahu, nabulakeni kansi wamumbanda wayaaka 13, ijina dindi diyi Maria. * Hashimbwili wanyi kufuma hafwiliwu amama yindi nawa hayimweneña atata yindi kakavuluku. Neyi chadiña anyana amavulu, Maria welukili wanyi yuma yatela kwilayi muchihandilu chindi. Innakwanuka mpinji yimu wadilileña hanlejeleñayi chatiyileñayi. Hela chochu, natiyileña wanyi chahosheleñayi muloña nadiña kanda nilukishi idimi dahosheleñayi. Namulombeli Yehova nakumuleja nami yankwashi kulonda nimukoleshi Maria nawa namutañilili jinsona jakumukundeja. Chimwahitili yaaka yantesha, namweni chalala chichahimpili yilwilu yaMaria, mmwekenu yindi nichihandilu chindi. Wapapatisheweli nawa ichi nakulombola atudizi indi aBayibolu. Chayinu mpinji, Maria wukweti chisaka cheneni chamukeña Yehova nawa wudi namuzañalu.

Yehova nakukiswila mudimu wakushimwina muTimor-Leste. Hela chakwila akwakushimwina amavulu anapapatishewi muyaaka 10 yinahitihu, amavulu anakuzata neyi apayiniya, ankoñi akuzatila hela akulumpi. Amakwawu azatilaña hatusanji twanyanya nawa abalumunaña nyikanda yashindamena haBayibolu mumadimi awu. Chanzañaleshaña nankashi hakumona anakwimba hakupompa, adi namuzañalu nawa anakupama kuspiritu.

Chihandilu muTimor-Leste, chambukiliku chikupu nachamuAustralia, ilaña twadiña namuzañalu chikupu. Mpinji yikwawu, twakandamineña mukamotoka mudi antu amavulu, mwadiña inshi joma nimafu afumineña kuchisankanu. Mafuku amakwawu, twalombweleña atudizi munkanza nimutumatala mwadiña majilu nitusumbi twahitañeneña. Hela chakwila, twamweneña iku kukala, ‘Nadiña namuzañalu.’

Neyi nanuka, nayisakililaña anvwali jami andizishili nshimbi jaYehova nikunkwasha mumpinji jakala. Yishimu 22:6 yinashikijewi hadi ami. Amama niaTata atiyaña kuwaha hakumona ami niamwanta wami aAlex, tunatwalekihu kumukalakela Yehova. Kufuma tuhu mu 2016, tunakalakali mumudimu mwiluña datalaña kasanji kamutayi kamuAustralia.

Chankalilaña kukuhwelela nami kunyima naheleli mudimu wakushimwina. Ichi nawukeña chikupu! Ichi neluki nami muzañalu walala wafumaña mukumukalakela Yehova namuchima wejima, hichikweti muloña nayuma yamwekanaña muchihandiluku. Mwamweni, hadi yaaka 18 yitunamukalakeli Yehova nawamwanta wami aAlex, nekali namuzañalu chikupu muchihandilu chami. Ichi natiyishishi chikupu mazu añimbi yamasamu Davidi hamwililiyi Yehova nindi: “Ejima akubatama mudeyi azañalali, adikuwi kwawu namuzañalu. . . . Niwena akeña ijina deyi aluñi mudeyi.”—Mas. 5:11.