1-2. Tunateli kulondela ñahi muntampu jaYesu? Lumbululenu.

FWIKIJENU munakwenda muchinkalampata mudi wusekulula hamu nawakwenu. Nawa anakuyilombola kudi muntu welukamu. Chinakwendayi, nakushiya yintampu muwusekulula. Dichi yayishiyamu nawa muleka nikumumona. Ilaña mukwakama wanyi. Dichi, enu niantu amakwawu mukulondelaña muyintampu yindi munayileñayi.

² Kaayi katama kitunakushakamamu makonu kadi neyi chinkalampata nawa etu akwaKristu tudi neyi izanvu dawantu dinakwendamu. Twakooleka muloña Yehova watwinka nlomboli wamuwahi, Mwanindi Yesu Kristu, itwatela kulondela chikupu muntampu jindi. (1 Pet. 2:21) Neyi chahosha mukanda wumu wahosha haBayibolu, Petulu wamwesekejeli Yesu namukwakulombola. Kufwana ona muntu wunakushiya mahaji, Yesu niyena washiya yintampu yitwatela kulondelañamu. Ichi tuhanjekenu hamalwihu asatu anakuhosha hakulondela muntampu jindi. Kulondela muntampu jaYesu kwatalisha mudihi? Muloñadi chitwatela kulondelamu? Nawa tunateli kulondelamu ñahi?

3. Kulondela muntampu jamuntu kwatalisha mudihi?

³ Kulondela muntampu jamuntu kwatalisha mudihi? MuBayibolu, mazu akwila nawu ‘kwenda’ ‘ninyendu’ mpinji yikwawu atalisha kuyuma yelañayi muntu muchihandilu. (Kutach. 6:9; Yish. 4:26) Yuma yelañayi muntu anateli kuyesekeja nayintampu hela namahaji, ashiyañayi neyi nakwenda. Kulondela muyintampu yamuntu kwatalisha mukwimbujola yilwilu yindi.

4. Kulondela muntampu jaYesu kwatalisha mudihi?

 ⁴ Hanu dinu, kulondela muntampu jaYesu kwatalisha mudihi? Kwatalisha mukumwimbujola. Haniyi nsona hanashindameni chinu chibaaba, kapostolu Petulu wahosheleña hachakutalilahu chachiwahi chaYesu chakuumika makabi. Hela chochu, kudi njila jajivulu mutunateli kumwimbujolela Yesu. (1 Pet. 2:18-25) Dichi, twatela kwimbujola chihandilu chaYesu chejima, dikwila nawu yuma yejima yahosheleñayi niyelileñayi.

5. Komana antu abula kuwanina anateli kulondela yuma yelileñayi Yesu? Lumbululenu.

⁵ Twawanina wanyi, komana chalala tunateli kulondela yuma yelileñayi Yesu? Eña, tunateli. Anukenu nenu Petulu watulejeli ‘kulondela chikupu muntampu jaYesu.’ Neyi tulondelaña chikupu muntampu jindi, kuzata hanakumini ñovu jetu hela chakwila twawanina wanyi, tukumwekeshaña netu tunakovwahila mazu akapostolu Yowanu ahosheliyi nindi: ‘Twalekenuhu kwenda neyi chendeliyi Yesu.’—1 Yow. 2:6.tth.

6-7. Muloñadi chitukuhoshela netu kulondela chikupu muntampu jaYesu kukutuswija kwakwihi naYehova?

⁶ Neyi tulondelaña chikupu muntampu jaYesu tukuswina kwakwihi naYehova. Tunahoshelidi mwenimu? Chatachi, mpinji yejima Yesu welileña yuma yamutiyishileña Nzambi kuwaha. (Yow. 8:29) Dichi neyi tulondelaña muntampu jaYesu, tukumuzañaleshaña Yehova. Nawa twatela kwiluka netu Tata yetu wamwiwulu wukuswina kwakwihi nawantu azataña nañovu kulonda ekali amabwambu jindi.—Yak. 4:8.

⁷ Chamuchiyedi, Yesu wamwimbujoleleña chikupu Tata yindi. Dichaletesheli yahoshi nindi: “Muntu wejima wunamoni ami, dikwila nawu namoni niTata.” (Yow. 14:9) Chakutalilahu, neyi twimbujola yilwilu yindi nichahandileñayi nawantu; chidi neyi chamutiyililiyi wushona mukwambumba, chamutiyililiyi luwi mumbanda wadiña namusoñu wafwana,  niwushona watiyilileñayi antu afwishileña antaña jawu, dikwila nawu tunakumwimbujola cheñi Yehova. (Maku 1:40, 41; 5:25-34; Yow. 11:33-35) Neyi tumwimbujolaña Yehova, wubwambu wetu nayena wukukola.

8. Lumbululenu kulondela muntampu jaYesu chikunateli kutukwasha “kwimika kaayi mushindu.”

⁸ Neyi tulondelaña chikupu muntampu jaYesu kaayi hikakutuluwañeshaku. Hawufuku wakukumishaku hanu hamaseki, Yesu wahosheli nindi: “Ami kaayi nakimiki mushindu.” (Yow. 16:33) Watalishili mukwila nindi wakaanini kumuluwañesha nayitoñojoka, yuma yafwilañawu niyilwilu yamukanu kaayi. Yesu washili muchima hakwila chuma chamutemesheleliwu hanu hamaseki, kumuhakwilaku Yehova. Indi etu? Mukanu kaayi mudi yuma yayivulu yinateli kutuluwañesha. Ilaña neyi tusha muchima hakwila nkeñelu yaYehova neyi Yesu, ‘tukwimika kaayi mushindu.’—1 Yow. 5:5.

9. Yumanyi yitwatela kwila hakwila twakekali nawumi wahaya nyaaka?

⁹ Neyi tulondelaña muntampu jaYesu chikupu twakashakama haya nyaaka. Chelili mukwenzi nyuli samaheta yehuli yuma yateleli kwilayi hakwila yakekali nawumi wahaya nyaaka, Yesu wamwakwili nindi: “[Inzaku] wiikali mukwakunlondela.” (Mat. 19:16-21) Yesu walejeli aYudeya amakwawu abulili kumukuhwelela nawu hiKristu nindi: “Anyikoku ami . . . anlondelaña. Nayinkaña wumi wahaya nyaaka.” (Yow. 10:24-29) Yesu wamulejeli Nikodemu membala wamuchota chaSanihedilini, wakeñeli yuma yatañishileñayi nindi antu ‘amukuhwelelaña akekala nawumi wahaya nyaaka.’ (Yow. 3:16) Twamwekeshaña netu twamukuhwelela Yesu neyi tuzatishaña yuma yatulejeliyi nikwimbujola yuma yelileñayi. Neyi twilaña yumiyi, twakekala nawumi wahaya nyaaka.—Mat. 7:14.

10. Yumanyi yitwatela kwila hakwila ‘tumwiluki’ Yesu chiwahi? (Yowanu 17:3)

¹⁰ Henohu kanda tulondeli chikupu muntampu jaYesu, twatela kusambila kumwiluka. (Tañenu Yowanu 17:3.) ‘Kumwiluka’ Yesu hichuma chitwatela kutwalekahu kwila. Twatela kutwalekahu kudiza yuma yayivulu yahosha hadi yena chidi neyi yilwilu yindi, yuma yatoñojokañayi ninshimbi jindi. Hela chakwila tunamukalakeli Yehova hadi yaaka yayivulu, twatela kutwalekahu ‘kumwiluka’ Yehova niMwanindi.

11. Yumanyi yekala munyikanda yaNsañu Yayiwahi yiwana?

¹¹ Hakwila tumwiluki Mwanindi, Yehova watushila Mwizu dindi nyikanda yaNsañu Yayiwahi yiwana. Munyikanda yaNsañu Yayiwahi mwekala nsañu yachihandilu ninyidimu yazatiliyi Yesu. Iyi nyikanda yatulejaña yuma yahosheleñayi Yesu, yuma yelileñayi nawa yamwekeshaña chatiyileñayi. Iyi nyikanda yiwana  yatukwashaña ‘kutoñojoka chikupu’ hayuma yeliliyi Yesu. (Heb. 12:3) Munjila yikwawu, mwekala yintampu yashiliyi Yesu. Neyi tudizaña nyikanda yaNsañu Yayiwahi, tukumwiluka chikupu Yesu. Chikufumamu, tukulondelaña chikupu muntampu jindi.

12. Yumanyi yitwatela kwila hakwila nawu nyikanda yaNsañu Yayiwahi yitukwashi?

¹² Hakwila nawu nyikanda yaNsañu Yayiwahi yitukwashi, hitwatela kukumina dakuyitaña hohuku. Twatela kwikalaña cheñi nampinji yakudiza nikutoñojokahu chikupu. (Esekejenu Yoshuwa 1:8.) Tuhanjekenu hayuma yiyedi yinateli kutukwasha kutoñojoka hanyikanda yaNsañu Yayiwahi yiwana nichitunateli kuzatisha nsañu yitwatañañamu.

13. Munateli kufwikija ñahi kulonda mumoneña yuma yamwekeneña yashimunawu munyikanda yaNsañu Yayiwahi?

¹³ Chatachi, fwikijenuña chikupu neyi munakumona yuma yasonekawu munyikanda yaNsañu Yayiwahi. Fwikijenuña munakumona, munakutiya, nawa munakutiya chichatiyakeneña. Hakwila mwili mwenimu, sandujolenuña munyikanda yaloñeshawu kudi kuloñesha kwaYehova. Ilukenu nsañu yejima chiyinakuhosha, yuma yamwekeni henohu oyu nsañu yimunakudiza kanda hela yuma yalondelelihu hanoyu nsañu yimunakudiza. Ilukilenuhu nsañu yayivulu yinakuhosha hadi owu antu nimaluña anashimuniwu munoyu nsañu. Esekejenu nsañu yimunakudiza nansañu yikwawu yadifwana nanoyu nsañu munyikanda yikwawu yaNsañu Yayiwahi. Mpinji yikwawu, mukwakusoneka Nsañu Yayiwahi wumu nateli kusoneka nsañu yabula kusonekayi mukwawu.

14-15. Tunateli kuzatisha ñahi Nsañu Yayiwahi muchihandilu chetu?

¹⁴ Chamuchiyedi, zatishenuña yuma yasonekawu muNsañu Yayiwahi muchihandilu chenu. (Yow. 13:17) Neyi munadizi dehi nyikanda yaNsañu yayiwahi, dihulenu nenu: ‘Kudihu yuma yinateli kuzatisha haniyi nsañu muchihandilu chami? Nateli kuzatisha ñahi iyi nsañu kulonda nikwashiku akwetu?’ Toñojokenu hadi muntu  imweluka, nawa wanenu mpinji yayiwahi yimwatela kuhanjeka nindi nsañu yimunadizi.

¹⁵ Tuhanjekenu hachakutalilahu chinakumwekesha chitwatela kuzatisha iji njila jiyedi. Tukushinshika nsañu yamumbanda nfwila wamweniyi Yesu mutembeli.

16. Tañenu Maku 12:41 nawa lumbululenu yuma yimunafwikijeña yenda yimwekana.

¹⁶ Fwikijenuña yuma yamwekeneña. (Tañenu Maku 12:41.) Fwikijenu yuma yamwekeni. Idi ifuku hiNisani 11, 33 C.E, kunashali mafuku antesha hakwila Yesu yafwi. Yesu natañisheña mutembeli mwana wejima. Akulumpi jansakililu anamudimbululeña. Hakusambila, amakwawu amwihulaña malwihu kutalisha hawuswa wazatishañayi. Amakwawu amwihulaña malwihu atoñojokañawu nawu wukukañanya kwakula. (Maku 11:27-33; 12:13-34) Ichi Yesu nayi kukabadi kakwawu katembeli. Hadaha kwiluña kwateneneñawu nawu ibulu dakwitala dawambanda, namoni yikasha yamali yidi kwakwihi nambañu. Nashakami nawa nakutala antu chinakumbilawu mali muyikasha. Nakumona antu aheta anakumbilamu mawayawaya amavulu. Hadaha nashakami kwakwihi nawa nakutiya chinakudilawu mawayawaya anakumbilawu muyikasha.

17. Chumanyi cheliliyi mumbanda nfwila kazweñi washimunawu haMaku 12:42?

¹⁷ Tañenu Maku 12:42. Chimunahiti mpinji, Yesu namoni mumbanda wumu. Hikazweñi, “mumbanda nfwila wakaankila.” (Luka 21:2) Chihandilu chamukolela, wudana mali akulandamu yuma yakudikwashamu nachu. Hela chochu, nayi kuyikasha nawa nombilimu tumawayawaya twanyanya tuyedi, hadaha tunatiyakani wanyi nawu anatumbili muchikasha. Yesu neluki tumawayawaya tunombiliyi muchikasha, hitumawayawaya twanyanya twapela wuseya twazatishileñawu haniyi mpinji. Tunashikilimu wanyi kulanda nzwimba wumu, kada kakehelamu wuseya.

18. Kwesekeja naMaku 12:43, 44, Yesu wahosheli nindidi hayawana yamumbanda nfwila?

¹⁸ Tañenu Maku 12:43, 44. Yesu namutiyi kuwaha iwu mumbanda nfwila. Natambiki atumbanji twindi, nakuyila nindi munamumoni ona nfwila nawa nahoshi nindi: “Iwu mumbanda nfwila kazweñi nombilimu mali amavulu kubadika ejima.” Kuhiñahu nalumbululi nindi: “Muloña wejima wawu [sweje-e asamaheta] anombilimu mali anafumishiwu hamaheta awu, ilaña iwu mumbanda hela chakwila hikazweñi, nombilimu mali ejima adiñayi nawu akuhandilamu.” Ona nfwila washinshika chombililimu mali ejima adiñayi nawu, wamukuhweleleli Yehova nindi wukumwakamenaña.—Mas. 26:3.

19. Chumanyi chalema chitunateli kudizila kumazu aYesu ahosheliyi kutalisha hadi iwu mumbanda nfwila kazweñi?

¹⁹ Zatishenu iyi nsañu muchihandilu chenu. Dihulenu nenu, ‘Yumanyi yinatela kudizila kumazu aYesu ahosheliyi kutalisha hadi iwu mumbanda nfwila kazweñi?’ Toñojokenu hadi iwu nfwila. Chakadi nikujina, watoñojokeleña nindi wadi kumwinka Yehova yawana yayivulu. Hela chochu, wazatili nañovu kumwinka Yehova yuma yadiñayi nayu. Nawa Yesu welukili nindi yawana yahaniniyi yadiña yalema kudi Tata yindi. Ichi dichuma chalema chitunateli kudizilaku: Yehova watiyaña kuwaha neyi tumwinka hanakumini ñovu yetu, tumukalakela namuchima wetu wejima nawa nawumi wetu wejima. (Mat. 22:37; Kol. 3:23) Yehova wazañalalaña neyi yamona tunakuzata hanakumini ñovu yetu. Chumichi chinakundami kumpinji niñovu yitwazatishaña kukudifukula, mumudimu wakushimwina nihakupompa.

20. Munateli kuzatisha ñahi nsañu yahosha hadi mumbanda nfwila? Shimunenu chakutalilahu.

 ²⁰ Tunateli kuzatisha ñahi nsañu yahosha hadi iwu mumbanda nfwila? Toñojokenu hadi muntu imwatela kukolesha nenu Yehova watiyaña kuwaha nanyidimu yindi. Chakutalilahu, mwelukahu muhela wakula dehi wunakutiya kutama hela kuneña nindi nakukañanya kushimwina neyi chashimwinineñayi muloña wakukatakata nikubula ñovu? Hela manakwetu wakata chikatu chafwana hela chabulaña kumana nawa wunakuneña muloña wakañanyaña kuya nakupompa Hetala daWanta? Kwashenu antu amuchidiwu kuzatisha mazu ‘anateli kuyituña.’ (Efwe. 4:29) Yikoleshenu nansañu yitwadizaña hadi mumbanda nfwila kazweñi. Mazu enu akukolesha anateli kuyanukisha nawu Yehova watiyaña kuwaha neyi tumuzatilaña hanakumini ñovu yetu. (Yish. 15:23; 1 Tes. 5:11) Neyi muhamekaña antu anakumuzatila Yehova hanakumini ñovu jawu, hela chakwila mudimu wawu wukukeha ñahi, munakulondela chikupu muntampu jaYesu.

21. Chumanyi chimunakufwila kwila?

²¹ Twatiyaña kuwaha hakwiluka netu munyikanda yaNsañu Yayiwahi mwekala nsañu yayivulu yahosha hachihandilu chaYesu, chitunateli kumwimbujola nichitunateli kulondela chikupu muntampu jindi. Dizenuña halwenu hela haKudifukula kwaChisaka nsañu yekala munyikanda yaNsañu Yayiwahi. Twatela kwanuka netu hakwila nsañu yitunakudiza yitukwashi, twatela kuyifwikijaña neyi yinakumwekana nikuyizatisha muchihandilu chetu. Kubombela hakwimbujola yuma yeliliyi Yesu, twatela nikutiyilila kuyuma yahosheliyi. Muchibaaba chinalondelihu, tukahanjeka yuma yitunateli kudizila kumazu aYesu akukumishaku ahosheliyi henohu kanda yafwi.