Muloñadi Yesu chahosheleliyi mazu aDavidi ekala haMasamu 22:1 henohu kanda yafwi?

Hakachi kamazu akukumishaku ahosheliyi Yesu henohu kanda yafwi amakwawu ekala haMatewu 27:46 nawu: “Nzambi yami, Nzambi yami, wunanshiyilidi nkawami?” Chahosheliyi awa mazu, Yesu washikijili mazu añimbi yamasamu Davidi ekala haMasamu 22:1. (Maku 15:34) Chinateli kwikala chaluwa neyi tukunkulula netu Yesu wahosheli awa mazu muloña wakwila Yehova wamukwashili wanyi hela muloña wakwila chikuhwelelu chindi chamukeheli haniyi mpinji. Yesu welukili muloña waweni wateleleli kufwilayi nawa wadihanini kwila mwenimu. (Mat. 16:21; 20:28) Welukili cheñi nindi haniyi mpinji yakufwa kwindi, Yehova wakafumisha “ikoli kwi-ndo” dakumukiña nachu. (Yoba 1:10) Yehova walekeli kumukiña, kulonda Yesu yamwekeshi nindi hela chakwila nakuhita mukukala kwamuchidinyi wakatwalekahu kwikala washinshika.—Maku 14:35, 36.

Muloñadi Yesu chahosheleliyi mazu aniwu ñimbi yamasamu? Hela chakwila tuneluki wanyi yuma yayivulu, tukuhanjeka hayuma yikwawu. *

Chahosheliyi awa mazu, komana Yesu wakonkomweneña nindi Yehova hakumukañesha kufwa haniyi mpinjiku? Yesu wateleli kufweta ifutu danyiloña chakubula kumukwasha kudi Yehova. Wadiña namujimba wawuntu  nawa wateleli kufwa kulonda yatweshi “kutompela antu ejima kufwa.”—Heb. 2:9.

Chahosheliyi mazu antesha amumasamu, komana Yesu wakeñeleña nindi antu atoñojoki hansañu yejima yekala munidi isamu? Munana mafuku aYudeya amavulu ahembeleleña kumutu nsañu yamumasamu. Neyi atiya anateni vasi yimu yamumasamu adiña nakushikena kwanuka nsañu yejima yamumukanda wamasamu. Neyi dichakeñeleñayi Yesu, wadi kuyikwasha aYudeya amulondeleleña kwanuka wuprofwetu wawuvulu wekala munidi isamu dahosheleña hayuma yakundamini kukufwa kwindi. (Mas. 22:7, 8, 15, 16, 18, 24) Cheñi, mavasi akukumishaku munidi isamu, amushimeka Yehova nawa amulumbulula nawu hiMwanta weseki dejima.—Mas. 22:27-31.

Komana Yesu chahosheliyi awa mazu aDavidi, wamwekesheleña nindi wadihakwilileñaku yomweni? Henohu kanda yafwi, Yesu womikili kukala nawa amwinkeleña muloña wakwila nawu nakuhosha kasawuntu. (Mat. 26:65, 66) AkwaSanihedirini apompeli swayi-swayi nawufuku, nawa amutwambilileña nyiloña yakutwamba chakadi kulondela nshimbi. (Mat. 26:59; Maku 14:56-59) Chahosheliyi awa mazu nindi: “Nzambi yami, Nzambi yami, wunanshiyilidi nkawami?” Hadaha watalishileña mukwila nindi hakoñelihu muloña wakumujahilahuku.

Komana Yesu wayanukishileña cheñi antu amakwawu nindi hela chakwila Davidi, nsoneki yanidi isamu wakabakeni, watalishili mukwila nindi wubwambu waDavidi naYehova wamanini? Lwihu lwehwiliyi Davidi hilwamwekesheli nawu halekeli kumukuhwelela Nzambiku. Hanyima yakwila nehuli dehi lwihu, wahosheli nindi wamukuhweleleli Yehova nindi wukwamwina antu jindi nawa wukumukiswilaña. (Mas. 22:23, 24, 27) Munjila yoyimu, hela chakwila Yesu, “Mwana kaDavidi,” wakabakeni hamutondu wakuyandishila, hichatalishili mukwila nawu wubwambu windi naYehova wamaniniku.—Mat. 21:9.

Komana Yesu wamwekesheli chineñi nindi Yehova naleki kumukiña kulonda yamwekeshi kanshinshi kindi? Hiyadiña nkeñelu yaYehova yakwila nawu Mwanindi yakakabakani nawa yakafwiku. Chumichi chekaliliku chelili Adama naEva avulumuni. Yesu helilihu chuma chatamaku, ilaña wateleli kukabakana nikufwa kulonda yakuli lwihu lwehwiliyi Satana nikuhana ifutu danyiloña dakukula nachu cheñi chuma chajimbesheliwu antu. (Maku 8:31; 1 Pet. 2:21-24) Chumichi chadi kuzatika hohu neyi Yehova walekeli kumukiña Yesu katachi muchihandilu chindi hakampinji kantesha.

Komana Yesu wakeñeleña atumbanji twindi atoñojokeña hansañu yaletesheli Yehova yamwiteji kufwila hamutondu wakuyandishila? * Yesu welukili nindi kufwa kwamuchidiwu kwakufwa neyi kapondu hamutondu wakuyandishila kwadi kuhukesha antu amavulu. (1 Kor. 1:23) Neyi atumbanji twindi atoñojokeleña nankashi hansañu yafwililiyi, adi kwiluka chaletesheli yafwi. (Ñal. 3:13, 14) Adi kwiluka nawu hiChamwinu bayi kaponduku.

Hichikweti muloña nachuma chaletesheli Yesu yahoshi awa mazuku, welukili nindi yuma yelileñayi yadiña nkeñelu yaYehova. Hanyima yakuhosha awa mazu ekala munidi isamu, Yesu wahosheli nindi: “Yuma yejima yinazatikewi!” (Yow. 19:30; Luka 22:37) Mwamweni, chelili Yehova yaleki kumukwasha Yesu hakampinji kantesha chamuletesheli Yesu yazati yuma yejima yamutuminiwu hamaseki. Chamuletesheli cheñi kushikija yuma yejima yasonekeliwu hadi yena “muNshimbi jaMosi, mumazu awaTuprofwetu nimuMasamu.”—Luka 24:44.