1. Yehova wamonañadi mudi antu jindi?

YEHOVA NZAMBI “watiyaña kuwaha nawantu indi.” (Mas. 149:4) Chumichi chatuzañaleshaña nankashi. Yehova wamonaña yilwilu yetu yayiwahi; weluka nindi tunateli kwikala antu amawahi nawa watukokelaña kudi yena. Neyi twikalaña ashinshika kudi yena, wukuswina kwakwihi nanetu haya nyaaka.—Yow. 6:44.

2. Muloñadi antu amakwawu chichayikalilaña kwiteja nawu Yehova wayikeña?

² Amakwawu anateli kuhosha nawu, ‘Neluka nami Yehova wakeña antu jindi hamu neyi izanvu, nateli kukuhwelela ñahi nami Yehova wankeña?’ Chumanyi chikuletesha muntu yehuli ilu lwihu? Oksana *, wakabakeni hampinji yadiñayi kansi, wahosheli nindi: “Natiyili kuwaha chinapapatisheweli nichinatachikili wupayiniya. Ilaña chimwahitili yaaka 15, natachikili kwanuka kukala kunamweneña kuwansi. Natachikili kutoñojoka nami Yehova nañumbi nawa hankeñaku.” Muhela Yua payiniya niyena wamweni kukala kwakuvulu hadiñayi kansi, wahosheli nindi: “Nadihanini kudi Yehova muloña nakeñeleña kumutiyisha kuwaha. Ilaña nenjili nakukuhwelela nami Yehova wankeña wanyi.”

3. Tukuhanjekadi muchinu chibaaba?

³ Neyi awa akwaKristu ashinshika itunateni, ninenu mwamukeña Yehova chikupu, ilaña munateli kujinooka neyi chakwila wayikeña. Muloñadi chimwatela kwilukila chikupu nenu wayakamenaña? Nawa yumanyi yinateli kuyikwasha neyi mutachika  kutoñojoka nenu Yehova wayikeña wanyi? Twayenu twakuli awa malwihu.

4. Muloñadi chichatamina kutoñojoka netu Yehova watukeña wanyi?

⁴ Kukeña kwasañumunaña chikupu. Neyi twiluka netu Yehova watukeña nawa watukwashaña, tukumuzatilaña chakufuma hamuchima hichikweti muloña nakukala kutunakumonaku. Ilaña neyi tutoñojokaña netu Nzambi watwakamenaña wanyi, ‘ñovu jetu jikukeha.’ (Yish. 24:10) Neyi tuzeya nawa tuleka kukuhwelela netu Nzambi watukeña, tukatwesha wanyi kushinda neyi Satana natweseki.—Efwe. 6:16.

5. Chumanyi chayimwekeneni amanakwetu ajinokeleña nawu Nzambi wanyi?

⁵ AkwaKristu amakwawu ashinshika wubwambu wawu naNzambi wunakehi muloña wakujinooka nawu wayikeña wanyi. Mukulumpi wejina daJames wahosheli nindi: “Hela chakwila nazatilileña haBeteli nawa nadikitileña chikupu mudimu wakushimwina muchipompelu chahoshaña idimi dacheñi, najinookeleña neyi chakwila Yehova watiyileña kuwaha nanyidimu yinazatileña. Mpinji yimu najinookeleña neyi chakwila Yehova watiyileña kulomba kwami.” Eva niyena wekala mumudimu wampinji yejima wahosheli nindi: “Nenjili nakwiluka nami chatama kutoñojoka netu Yehova hatukeñaku, muloña chikutukalilaña kumukalakela. Chikuletesha mpwila yakumuzatila Yehova kukeha.” Michael, payiniya wampinji yejima nawa mukulumpi, wahosheli nindi: “Neyi wubula kukuhwelela neyi Nzambi wakwakamenaña, wukuluwankana.”

6. Tunateli kwila ñahi neyi tutachika kutoñojoka netu Nzambi hatukeñaku?

⁶ Iyi yakutalilahu yinakumwekesha nawu chikuhwelelu chetu chinateli kuzeya neyi tutoñojokaña netu Yehova hatukeñaku. Hanu dinu tunateli kwila ñahi neyi tutachika kutoñojoka netu Nzambi hatukeñaku? Twatela kuleka kutoñojokahu swayi-swayi. Mulombenu Yehova kulonda yayikwashi kufumisha “yitoñojoka [yakwakama]” nakuhiñishamu ‘kuwunda kwaNzambi kwabadika kwiluka kwejima kukuhemba nyichima yenu niyitoñojoka yenu.’ (Mas. 139:23; Fwili. 4:6, 7) Nawa anukenuña nenu himudi nkawenuku. Amanakwetu niahela amakwawu niwena dichinakutiyawu. Ambuña aYehova akunyima  niwena dichatiyileñawu. Talenu chuma chitunateli kudizila kudi kapostolu Pawulu.

7. Kukalanyi kwamweneñayi Pawulu?

⁷ Komana mpinji yikwawu mwatoñojokaña wanyi nenu mukweti nyidimu yayivulu nawa nenu mukukañanya kuyizata? Neyi dimu, mukwiluka chatiyileñayi Pawulu. Hakameneneña chipompelu chimu hohuku ilaña “yipompelu yejima.” (2 Kor. 11:23-28) Komana munakuhita muyikatu yinakuletesha mubuleña kwikala namuzañalu? Pawulu wakabakeneña ‘namwiña mumujimba,’ dikukala kwamweneñayi nawa wakeñeleña nindi kumani. (2 Kor. 12:7-10) Komana mwaneñaña hamuloña wakubula kuwanina? Pawulu niyena waneñeleña mpinji yikwawu. Waditeneni nindi “yayo-o, ami nshona” muloña walwishileña hamuloña wakubula kuwanina kwindi.—Rom. 7:21-24.

8. Chumanyi chamukwashili Pawulu kuumika kukala kwamweneñayi?

⁸ Pawulu watwalekelihu kumukalakela Yehova hela chakwila wamweneña kweseka nikukala kwamboka-mboka. Chumanyi chamwinkeleña ñovu? Hela chakwila welukili nindi wawanina wanyi, wakuhweleleli nankashi mwifutu danyiloña. Welukili chikaninu chaYesu chakwila nawu “muntu wejima wukumukuhwelela [Yesu] . . . [wakekala] nawumi wahaya nyaaka.” (Yow. 3:16; Rom. 6:23) Pawulu wadiña hakachi kawantu akuhweleleli mwifutu danyiloña. Welukili chikupu nindi Yehova wadiloñesha kwanakena antu anavulumuni nshidi yasweja neyi abalumuka.—Mas. 86:5.

9. Yumanyi yitwadizilaña kumazu aPawulu ekala haAÑalija 2:20?

⁹ Pawulu wakuhweleleli cheñi nindi Nzambi wamukeña muloña wakukeña kwamwekesheliyi Kristu. (Tañenu AÑalija 2:20.) Talenu mazu akukolesha kumakumishilu aniyi vasi. Pawulu wahosheli nindi: “Mwana kaNzambi, wankeñeli nawa wadihanini yomweni kukoola ami.” Pawulu watoñojokeleña wanyi nindi Nzambi hamukeñaku, neyi kwiji nakuhosha nindi, ‘Neluki muloña waweni Yehova chakeñelayi amanakwami hohu, ilaña ami hankeñaku.’ Pawulu wayanukishili aRoma nindi: “Hampinji yitwadiña akwanshidi, Kristu watufwilili.” (Rom. 5:8) Kwosi chuma chinateli kukañesha kukeña kwatukeñayi Nzambiku.

10. Yumanyi yitwadizilaña kumukanda waARoma 8:38, 39?

 ¹⁰ Tañenu ARoma 8:38, 39. Pawulu welukili chikupu nindi kukeña kwaNzambi kukweti ñovu. Wasonekeli nindi kwosi chuma “[chinateli] kutwambula kukukeña kwaNzambi.” Pawulu welukili nindi Yehova wadiwunjikili namuza waIsarela. Welukili cheñi Yehova chamutiyililiyi luwi. Munjila yikwawu Pawulu wahosheleña nindi, ‘Chineli Yehova watemesheli Mwanindi kulonda yanfwili ami, natela kukuhwelela chikupu nami wankeña.’—Rom. 8:32.

11. Hela chakwila Pawulu wakoñeli nshidi yashimunawu ha 1 Timotewu 1:12-15, muloñadi chakuhweleleliyi nindi Nzambi wamukeña?

¹¹ Tañenu 1 Timotewu 1:12-15. Mpinji yikwawu Pawulu waneñeleña neyi yanuka yuma yakoñeleñayi kunyima. Twahayamaña wanyi nachaditeneniyi yomweni nindi nidi “mukwanshidi chikupu.” Henohu kanda yadizi chalala, Pawulu wakabishileña nankashi akwaKristu mumusumba nimusumba, amakwawu kuyisha mutuleya nikufukejela amakwawu nindi ayijahi. (Yilw. 26:10, 11) Fwikijenu chatiyileñayi Pawulu neyi yabulakana mukwaKristu wakansi wukweti anvwali jindi ajahiliwu muloña walusesa lwahaniniyi. Pawulu waditoñesheleña nayiluwa yakoñeliyi, ilaña welukili nindi hakutwesha kuhimpa yuma yamwekeniku. Wakuhweleleli nindi Kristu wamufwilili nawa wasonekeli nindi: “Ilaña hamuloña waluwi lwaNzambi lwasweja, dilu lunanleñeli niikali ichi chinidi.” (1 Kor. 15:3, 10) Chumanyi chitunakudizilaku? Itejenu chikupu nenu Kristu wayifwilili enu nawa wayenzunwinini njila yakwikalilamu nawubwambu naYehova. (Yilw. 3:19) Chuma chalema kudi Nzambi hichuma chitunakwila yinu mpinji nichitwakela kumbidi,  bayi yiluwa yitwakoñeli kunyimaku hela chakwila twadiña dehi aYinsahu jaYehova hayina mpinji hela nehi.—Isa. 1:18.

12. Mazu adi ha 1 Yowanu 3:19, 20 akutukwasha ñahi neyi tunakutoñojoka netu twalema wanyi hela atukeña wanyi?

¹² Neyi mutoñojoka hakufwa kwaYesu kwakubuta hanshidi yenu, munateli kuhosha nenu, ‘Ami hinatelela ichi chawana chalemaku.’ Munateli kutoñojokeladi muniyi njila? Muchima wetu wabula kuwanina wunateli kutudimba nakutoñojoka netu twalema wanyi hela atukeña wanyi. (Tañenu 1 Yowanu 3:19, 20.) Neyi tutachika kutoñojoka muniyi njila, twatela kwanukaña netu “Nzambi wabadika nyichima yetu.” Twatela kwiluka chikupu netu Tata yetu wamwiwulu watukeña nankashi nawa nakukeña kutwanakena. Hakwila nawu tutiyishishi chatumonañayi, twatela kutañaña Izu dindi mpinji yejima, kumulomba mpinji yejima nikudikundaña nawantu amukalakelaña. Kwila yumiyi kwalemenadi?

13. Kudiza Bayibolu kunateli kutukwasha ñahi? (Talenu cheñi chikasha chinakwila nawu “ Izu daNzambi Chidinayikwashi.”)

¹³ Dizenuña Izu daNzambi ifuku niifuku, nawa mukwiluka nenu Yehova wukweti yilwilu yayiwahi yayivulu. Mukwiluka nenu wayikeña nankashi. Neyi mutoñojokaña chikupu Hezu daNzambi ifuku niifuku, chikuyikwashaña kutoñojoka chiwahi, “kwolola nachu” yitoñojoka yenu nimuchima wenu. (2 Tim. 3:16) Kevin nawa mukulumpi, watoñojokeleña nindi wamukunkulwayi wahosheli nindi: “Kutaña Masamu 103 nikutoñojoka kunankwashi kuhimpa yitoñojoka yami nikwiluka Yehova chammonañayi.” Eva itwashimuna hakusambila wahosheli nindi: “Hakwila ifuku dimani natoñojokaña Yehova chatiyañayi. Chankwashaña kwikala nakuwunda nikukolesha chikuhwelelu chami.”

14. Kulomba kunateli kutukwasha ñahi?

¹⁴ Lombenuña mpinji yejima. (1 Tes. 5:17) Wubwambu wawantu wakolaña neyi anakuhanjeka mpinji yejima nikudileja chinakutiyawu. Wubwambu wetu naYehova niwena dichiwekala. Neyi tumulejamu mukulomba chitunakutiya nichitunakutoñojoka, twamwekeshaña netu twamukuhwelela cheñi netu watukeña. (Mas. 94:17-19; 1 Yow. 5:14, 15) Yua, itwatena wahosheli nindi: “Neyi inakulomba, hinamulejañamu hohu yuma yammwekena hanodu ifukuku. Namulejaña Yehova chinnakutiya nichinnakutoñojoka. Ichi namumonaña Yehova nami hiTata wakeña anyanindi nankashi, bayi neyi mukulumpi wamudimuku.—Talenu chikasha chinakwila nawu “ Komana Mwawutaña?”

15. Yehova wamwekeshaña ñahi nindi watukeña?

¹⁵ Dikundenuña nawamabwambu jenu ashinshika; hiyawaana yatwinkayi Yehova. (Yak. 1: 17) Tata yetu wamwiwulu wamwekeshaña nindi watukeña chatwinkayi amanakwetu niahela “[atukeña] mpinji jejima.” (Yish. 17:17) Mumukanda wayisonekeleliyi aKolosi, Pawulu watenenimu akwaKristu amukwashileña nindi ‘amukundejeleña chikupu.’ (Kol. 4:10, 11) Kristu Yesu niyena wayisakilileña amabwambu jindi amukwashileña, añelu niantu.—Luka 22:28, 43.

16. Amabwambu ashinshika anateli kutukwasha ñahi kuswina kwakwihi naYehova?

¹⁶ Komana mwayilejañamu amabwambu jenu ayinkayi Yehova nikutambwila wukwashu kudi wena? Kulejamu amabwambu jetu apama kukala kwetu kwamwekeshaña nawu twazeya wanyi, ilaña kunateli kutukwasha. Talenu chashimwiniyi James itwatena dehi, wahosheli nindi: “Kwikala nawamabwambu apama kunankwashi nankashi. Neyi naneñi hamuloña wayitoñojoka yatama, awa amabwambu antiyililaña nankashi nawa anlejaña nawu ankeña. Kuhitila mudi wena, nelukaña nami Yehova wankeña nawa wañakamenaña.” Dichi chalema nankashi kwikala nawubwambu nawamanakwetu niahela apama.

17-18. Hinyi itwatela kutiyilila nawa muloñadi?

¹⁷ Satana wakeñaña nindi tuleki kwila yuma yayiwahi. Wakeñaña tukuhweleli netu Yehova watukeña wanyi nawa nindi tudi amukunkulwayi. Ilaña neyi chitunamoni, iyi yitoñojoka yakutwamba.

¹⁸ Yehova wayikeña. Mwalema kudi yena. Neyi mumwovwahilaña, mukutwalekahu “kushakama mukukeña kwindi” neyi Yesu. (Yow. 15:10) Dichi bayi mumutiyililaña Satana hela muchima wenuku. Ilaña mutiyililenuña Yehova wamonaña yayiwahi mudi etu. Kuhwelelenu chikupu nenu “watiyaña kuwaha nawantu indi,” kushilahu ninenu.