1-2. Lumbululenu yuma yamwekeni henohu Yesu kanda yahoshi mazu akukumishaku?

HIMPINJI yamwana, haNisani 14, 33 C.E. Hanyima yakumutwambila nikumwinka muloña wachuma chinabuli kukoñayi, Yesu anakumusupisha, kumukabisha nawa nkumininaku anamupopeli hamutondu wakuyandishila. Nyisumali yinamuhanuki kumakasa nikunyendu yindi. Mpinji yejima yinakwilayi nindi yooni nikuhosha chinakumukata. Ilaña watela kuhosha muloña wukweti nsañu yalema yatela kuhoshayi.

² Tuhanjekenu hamazu ahosheliyi Yesu hampinji yadiñayi hamutondu wakuyandishila niyuma yitunateli kudizila kumazu ahosheliyi. Munjila yikwawu, ‘tumutiyililenu.’—Mat. 17:5.

3. Yesu wateneneñanyi hampinji yahosheliyi nindi: “Tata, yanakeni”?

³ Yesu wahosheli nindidi? Hampinji yadiñayi Yesu hamutondu wakuyandishila, walombeli nindi: “Tata, yanakeni.” Kwanakena anyi? Tuneluki antu ateneneñayi munawa mazu ahosheliyi akwila nawu: “Hiyaneluki chuma chinakwilawuku.” (Luka 23:33, 34) Yesu wateneneña amashidika awaRoma amupopeli nyisumali kumakasa nikunyendu. Amwilukili wanyi. Hadaha wateneneña cheñi antu adiña mwizaza akeñeleña nawu amujahi nawa adi kamukuhwelela. (Yilw. 2:36-38) Yesu wateleli kufwa wanyi. Ilaña wahilili wanyi nawa hayishilili nkunyiku. (1 Pet. 2:23) Hela chochu, wamulombeli Yehova kulonda yayanakeni antu amujahili.

4. Chumanyi chitunateli kudizila kudi Yesu chanakeneneñayi akwakumudimbulula?

 ⁴ Yumanyi yitunateli kudizila kumazu aYesu? Kufwana Yesu, twatela kwanakenaña akwetu. (Kol. 3:13) Antu makwawu, kushilahu niantaña jetu, anateli kutudimbulula muloña eluka wanyi yuma yitwakuhwelela nichitwashakamaña. Anateli kututwambila, kutusawula hadi antu, kutukisila nyikanda yetu hela kutuchinisha nawu akutukatisha. Chatela tuyihembeleña nkunyi, twatela kumulomba Yehova yayikwashi antu atudimbululaña kulonda niwena ifuku dimu aketeji chalala. (Mat. 5:44, 45) Mpinji jikwawu, chinateli kutukalila kwanakena antu, sweje-e neyi anatwili chatama. Ilaña neyi tukutwalekahu kuhila nikubula kuyanakena akwetu, chikutukataña etu aweni. Muhela wumu wahosheli nindi: “Neluki nami kwanakena akwetu hikwatalisha mukwila nawu nitoñojokeña nami yuma yeliliwu yaloña hela nami innakwiteja ankabisheñaku. Chatalisha mukwila nawu innakukeña kuhemba nkunyi wanyi.” (Mas. 37:8) Neyi twanakena akwetu, dikwila nawu tunakukeña wanyi kwiteja yuma yatama yamwekana yitwalekihu kutuhilisha.—Efwe. 4:31, 32.

5. Yesu wamukanini nindidi ona kapondu apopeleliwu kwakwihi nayena nawa chumanyi chaletesheli yamukani?

⁵ Yesu wahosheli nindidi? Atupondu ayedi ayipopeleli kwakwihi naYesu wumu iku wumu iku. Hakusambila niwena amusupishileña. (Mat. 27:44) Ilaña chimwahitili mpinji, wumu walekeli. Welukili nindi Yesu, “hanakoñihu chuma chatamaku.” (Luka 23:40, 41) Chuma chasweja kulema, wakuhweleleli nindi Yesu akamusañula nawa wakayuula neyi Mwanta. Wamulejeli Yesu nindi: “Yesu, wakañanukaña neyi wuneñili dehi muWanta weyi.” (Luka 23:42) Iwu iyala wamwekesheli chikuhwelelu chikupu! Yesu wamwakwili nindi: “Inakukuleja chalala dalelu nami, wakekala nanami [bayi muWantaku, ilaña] muParadisa.” (Luka 23:43) Mazu aYesu amwekeshaña nawu waditeneneña yomwenindi hamukanineñayi ona kapondu. Chineli Yesu welukili nindi Tata yindi wukweti wushona, wahosheli mazu amuletesheli iwu kapondu kwikala nakuchiñeja.—Mas. 103:8.

6. Chumanyi chitwadizilaña kumazu aYesu amulejeliyi ona kapondu?

⁶ Yumanyi yitunateli kudizila kumazu aYesu? Yesu wekala neyi Tata yindi. (Heb. 1:3) Yehova nakufwila kutwanakena nikututiyila luwi neyi tuleka yuma yatama yitwelileña kunyima nawa tukuhwelela netu wukutwanakena nshidi jetu kuhitila mumashi apwekesheliyi Yesu Kristu. (1 Yow. 1:7) Amakwawu anateli kujinoka nawu Yehova hanateli kuyanakena nshidi jawu jakoñeliwuku. Neyi dichimwatoñojokaña mpinji yikwawu, toñojokenu hachumichi: Henohu Yesu kanda yafwi, wamutiyilili ona kapondu luwi watachikili kumukuhwelela. Dikwila nawu Yehova watiyilaña luwi akwakudifukula indi ashinshika, azataña ñovu kovwahila nshimbi jindi!—Mas. 51:1; 1 Yow. 2:1, 2.

7. Yesu wayilejeli nindidi aMariya naYowanu, neyi chashimunawu haYowanu 19:26, 27?

⁷ Yesu wahosheli nindidi? (Tañenu Yowanu 19:26, 27.) Yesu wakameneni chakahandañayi mama yindi wadiña nfwila. Hadaha amanakwindi adi kumwakamenaña nayuma yakeñekaña kumujimba. Hanu dinu, hinyi wadi kumukwasha kutwalekahu kwikala  washinshika kudi Yehova? Kwosi wunsahu wamwekeshaña nawu amanakwindi adiña dehi atumbanji twindi. Hela chochu, Yowanu wadiña kapostolu washinshika nawa wadiña ibwambu daYesu. Yesu wamweneña antu adifukwileña hamu nindi kudi Yehova nindi dichisaka chindi chakuspiritu. (Mat. 12:46-50) Hela chochu, muloña wakumukeña nikumwakamena Mariya, Yesu wamwinkeli Yowanu mudimu wakumwakamena Mariya, muloña welukili nindi wukumukwasha kwikala washinshika kudi Nzambi. Yesu wamulejeli mama yindi nindi: “Talaña! Mwaneyi iwu!” Nawa wamulejeli Yowanu nindi: “Talaña! Mama yeyi iwu!” Kufuma dina ifuku, Yowanu wekalili neyi mwana kaMariya  nawa wamwakameneneña tuhu neyi mama yindi. Yesu wamukeñeli chikupu iwu mumbanda wamukulishili kufuma tuhu mpinji yasemukiliyi nawa wadiña nindi hampinji yafwiliyi!

8. Yumanyi yitunateli kudizila kumazu aYesu amulejeliyi Mariya niYowanu?

⁸ Yumanyi yitunateli kudizila kumazu aYesu? Wubwambu wetu nawamanakwetu niahela watela kwikala wakola kubadika wubwambu wetu nawantaña jetu. Antaña jetu anateli kutudimbulula hela kutushiya, ilaña neyi chatukaniniyi Yesu, neyi tudikundaña naYehova nikuloñesha kwindi, tukutambwila “mapampa 100” kubadika yuma yitunajimbeshi. Amavulu akwikala anyanetu, amama jetu hela atata jetu. (Maku 10:29, 30) Mwatiyaña ñahi kwikala nawamanakwetu nihela akuhwelela yuma yoyimu, amukeña Yehova nawa adikeña wumu namukwawu?—Kol. 3:14; 1 Pet. 2:17.

9. Yumanyi yitunateli kudizila kumazu aYesu ekala haMatewu 27:46?

⁹ Yesu wahosheli nindidi? Kwakwihi nakufwa kwindi, Yesu wabidikili nindi: “Nzambi yami, Nzambi yami, wunanshiyilidi nkawami?” (Mat. 27:46) Bayibolu yalumbulula wanyi chaletesheli Yesu yahoshi awa mazu. Hela chochu, toñojokenu hayuma yitunateli kudizila kunawa mazu. Chuma chimu chitukudizilaku kunawa mazu, Yesu washikijileña wuprofwetu wekala haMasamu 22:1. * Cheñi, awa mazu amwekesheleña nawu Yehova hashili “ikoli kwi-ndo” dakumukiña nachu Mwanindiku. (Yoba 1:10) Yesu welukili nindi Tata yindi wamuhanini chikupu mumakasa awayilumbu jindi kulonda amweseki chikupu kushika nikukufwa, kwosi muntu esekawu dehi chamuchidiwuku. Kubombelahu, awa mazu amwekesheleña nawu wadiña wanyi namuloña wateleleliwu kumujahilahu.

10. Yumanyi yitunateli kudizila kumazu aYesu ahosheliyi kudi Tata yindi?

¹⁰ Yumanyi yitunateli kudizila kumazu aYesu? Chuma chimu chitwatela kudizilaku chidi chakwila nawu hitwatela kukuhwelela Yehova kutukiña kuyuma yinakweseka chikuhwelelu chetuku. Neyi chochamwesekeliwu Yesu, ninetu twatela kwikala ashinshika kushika nikukufwa. (Mat. 16:24, 25) Hela chochu, twatela kukuhwelela netu Nzambi hakutwiteja kuhita mukweseka kunabadiki muñovu jetuku. (1 Kor. 10:13) Tukudizilaku cheñi netu anateli kutukabisha chakadi muloña neyi Yesu. (1 Pet. 2:19, 20) Antu atudimbululaña atukabishaña muloña hitwekala amukanu kaayiku nawa twashimwinaña wunsahu wachalala bayi hamuloña wakuluwañeshaku. (Yow. 17:14; 1 Pet. 4:15, 16) Yesu welukili chaletesheli Yehova yamwiteji kukabakana. Akwakudifukula amakwawu ashinshika ehulaña mpinji yikwawu chetejelañayi Yehova yuma yatama yimwekaneña. (Hab. 1:3) Nzambi yetu waluwi nawa wadiwunjika weluka nindi awa antu bayi neyi abula chikuhweleluku, ilaña akeñaña yena yayikundejeña.—2 Kor. 1:3, 4.

11. Muloñadi Yesu chahosheleliyi mazu adi haYowanu 19:28?

¹¹ Yesu wahosheli nindidi? (Tañenu Yowanu 19:28.) Muloñadi Yesu chahosheleliyi nindi: “Natiyi mpwila.” Welili mwenimu “kulonda nsona yishikijewi,” wuprofwetu wekala haMasamu 22:15, wahosha nawu: “Ñovu  yami yinomi dehi chawu neyi chizanda; idimi dami dinakakeli kuyibaña yami.” Cheñi, chelili Yesu wakabakeni nankashi kushilahu nikuyeña kwatiyileñayi hamutondu wakuyandishila, watela watiyili mpwila nankashi. Wakeñeleña wukwashu kulonda mpwila yindi yimani.

12. Yumanyi yitunateli kudizila kumazu aYesu ahosheliyi nindi, “Natiyi mpwila”?

¹² Yumanyi yitunateli kudizila kumazu aYesu? Yesu watoñojokeli nindi chatama wanyi kushimuna chinakutiyayi, ninetu twatela kushimunaña chitunakutiya. Hadaha twakeñaña wanyi kulejaku akwetu yuma yitunakankili. Ilaña neyi chakwila yuma yinatukalili, twatela kuleja akwetu kulonda atukwashi. Chakutalilahu, neyi twakula dehi hela twakata twatela kulejaku mukwetu kulonda yatutwali nakulanda tuyuma hela nakudimona nandotolu. Neyi tunaneñi, twatela kulejaku mukulumpi wudi wejima hela mukwetu mukwaKristu wapama wunateli kututiyilila hela kutukolesha ‘nezu dadiwahi.’ (Yish. 12:25) Anukenuña nenu amanakwetu nihela atukeña nankashi nawa akeñaña kutukwasha ‘mumpinji yakala.’ (Yish. 17:17) Ilaña akwiluka wanyi yuma yitunakutoñojoka hela kutiya. Anateli kwiluka wanyi nawu tunakukeña wukwashu chiña neyi tuyileja.

13. Yumanyi yazatiliyi Yesu chatwalekeliyi kwikala washinshika kushika nikukufwa?

¹³ Yesu wahosheli nindidi? Kwadiña kuma 15 namwana, Yesu wabidikili nindi: “Yuma yejima yinazatikewi!” (Yow. 19:30) Henohu kanda yafwi, Yesu welukili nindi welili yuma yejima yakeñeleñayi Yehova nindi yeli. Chatwalekelihu kwikala washinshika nikukufwa kwindi, Yesu wazatili yuma yayivulu. Chatachi, wamumwekesheli nindi Satana hisakutwamba. Yesu wamwekesheli nindi muntu wawanina nateli kutwalekahu kwikala washinshika hela chakwila Satana wukwila yuma yamuchidinyi. Chamuchiyedi, Yesu wahanini wumi windi kwikala ifutu danyiloña. Chahaniniyi wumi windi chaletesheli antu abula kuwanina kwikala nawubwambu wawuwahi naNzambi nikwikala nakuchiñeja kwakwikala nawumi wahaya nyaaka. Chamuchisatu, Yesu wamwekesheli nindi Yehova hohu diyi nyuli waloña nawa wahakwililiku ijina daTata yindi kukasawuntu.

14. Twatela kushakamaña ñahi ifuku-niifuku? Lumbululenu.

¹⁴ Yumanyi yitunateli kudizila kumazu aYesu? Twatela kwikalaña ashinshika mafuku ejima. Talenu mazu ahosheliyi Manakwetu Maxwell Friend walombweleña mushikola yaShikola yaGileyadi. Hakupompa kweneni kwamatuña manakawetu Friend wahosheli mumpanji yindi hakwikala washinshika nindi: “Yuma yiwunakukeña kwila dalelu hela kuhosha dalelu bayi wila neyi nakayila kumadikiku. Mwalala wuneluki neyi kumadiki wukekalaku? Ifuku dejima dimonenuña nenu didu ifuku denu dakuhanda.” Dichi tumoneña ifuku-niifuku netu didu ifuku dakwikala ashinshika. Dichi, hela chakwila tukufwa tukutwesha kuhosha netu, “Yehova, nazati nañovu hakuhemba kashinshi kami, namwekeshi nami Satana hisakutwamba nawa najiliki ijina deyi nikuhakwilaku chiyuulu cheyi.”

15. Kwesekeja naLuka 23:46, Yesu wakuhweleleli nindidi?

¹⁵ Yesu wahosheli nindidi? (Tañenu Luka 23:46.) Yesu wahosheli nezu datiyakana nindi: “Tata, nashi wumi wami mumakasa  eyi.” Yesu welukili nindi wumi windi washindameni hadi Yehova nawa welukili chikupu nindi Tata yindi wakamwanuka.

16. Yumanyi yimunadizili kuchuma chamumwekeneni iwu Chinsahu wadiña nayaaka 15?

¹⁶ Yumanyi yitunateli kudizila kumazu aYesu? Ikalenuña ashinshika kudi Yehova hela chakwila wumi wenu wudi muwubanji. Hakwila mwili mwenimu, mwatela ‘kumukuhwelela Yehova namuchima wenu wejima.’ (Yish. 3:5) Talenu chakutalilahu chaJoshua, Chinsahu wadiña nayaaka 15 wakatili chikatu chafwana. Wakaanini kuzatisha njila yakuukilamu yikuletesha yafumpi nshimbi jaNzambi. Henohu kanda yafwa wamulejeli mama yindi nindi: “Mama Yehova wukuñakamena. . . . Nakuhweleli chikupu chumichi: Neluki nami Yehova wukansañula. Neluki yitoñojoka yami nichinatiyaña nawa namukeña nankashi.” Wejima wetu twatela kudihula netu: “Neyi chikuhwelelu chami chadiña mukweseka chakwila nifwa, komana nukutwalekahu kwikala washinshika kudi Yehova nakumukuhwelela nami wakañanuka neyi nifwa?

17-18. Yumanyi yitunadizi? (Talenu cheñi chikasha chinakwila nawu “ Yuma Yitwadizilaña kuMazu aYesu Akukumishaku.”)

¹⁷ Yumanyi yalema yitunateli kudizila kumazu akukumishaku ahosheliyi Yesu? Tunadiziliku netu twatela kwanakenaña akwetu nikukuhwelela netu Yehova nateli kutwanakena. Tukweti amanakwetu niahela amavulu muchipompelu atukwashaña, ilaña neyi tunakukeña atukwashi twatela kuyilejamu. Tuneluki netu Yehova wukutukwashaña kuumika kukala kudi kwejima. Nawa tumoneña ifuku-niifuku netu didu ifuku dakwikala ashinshika, nikukuhwelela netu Yehova wakatusañula ney tufwa.

¹⁸ Mwamweni, tunateli kudizilaku yuma yayivulu kumazu ahosheliyi Yesu hampinji yadiñayi hamutondu wakuyandishila. Neyi tuzatishaña yuma yitunadizi, tukwovwahilaña mazu ahosheliyi Yehova kutalisha hadi Mwanindi, nindi: “Mutiyililenu.”—Mat. 17:5.