Kilukenu muyi hansañu yimunakukeña

Kilukenu muyi hachipapilu chayuma yidimu

CHIBAABA CHAKUDIZA 16

Mukwikala naMuzañalu Neyi Mumukalakela Yehova naÑovu Jenu Jejima

Mukwikala naMuzañalu Neyi Mumukalakela Yehova naÑovu Jenu Jejima

“Muntu-himuntu ashinshiki yilwilu yindi yomweni.”​—ÑAL. 6:4.

KAMINA 37 Kumukalakela Yehova naWumi Wejima

NSAÑU YIDI MUCHIBAABA *

1. Chumanyi chatuletelaña muzañalu nankashi?

 YEHOVA wakeñaña nindi twikali namuzañalu. Tuneluki chumichi muloña muzañalu himukaabu waspiritu yajila. (Ñal. 5:22) Chineli mukuhana mwekala muzañalu chikupu kubadika wekala mukutambwila, twekalaña namuzañalu nankashi neyi tuzataña chikupu mumudimu wakushimwina nikuyikwasha amanakwetu niahela munjila jambokamboka.—Yilw. 20:35.

2-3. (a) Neyi chinamwekeshiwu haAñalija 6:4, yumanyi yiyedi yikutukwasha kutwalekahu kwikala namuzañalu mumudimu waYehova? (b) Tukuhanjekadi muchinu chibaaba?

2 Neyi chinasonekiwu haAÑalija 6:4, kapostolu Pawulu nashimunihu yuma yiyedi yinateli kutuletesha kutwalekahu kwikala namuzañalu. (Tañenu.) Chatachi, twatela kumuzatila Yehova hanakumini ñovu jetu. Neyi tunakumukalakela hanakumini ñovu jetu, twatela kuzañalalaña. (Mat. 22:36-38) Chamuchiyedi, bayi tudesekejaña nawakwetuku. Hichikweti muloña nachitunakuzataku, muloña wakukatakata, yuma yitwadiza hela yuma yitweluka, twatela kumusakililaña Yehova. Muloña yuma yejima yitukweti yafuma kudi yena. Munjila yikwawu neyi akwetu anakuzata nankashi munjila jikwawu jakushimwinamu kubadika chitunakuzata, twatela kuzañalala chinakuzatishawu yawaana yawu hakumushimeka Yehova, bayi kuditiyisha awenawu kuwaha hela kuditumbakesha aweniku. Chatela tudibecheña nawu, twatela kudizila kudiwena.

3 Muchinu chibaaba, tukumona chuma chinateli kutukwasha neyi tunakuneña hamuloña wakwila tunakutwesha wanyi kuzata neyi chitunakukeña. Tukuhanjeka cheñi chitunateli kuzatisha chiwahi waana wutukweti niyuma yitunateli kudizila kudi akwetu.

NEYI TUNAKUTOÑOJOKA NETU TUNAKUZATA WANYI NEYI CHITWAZATILEÑA

Neyi tuzata hakumina ñovu yetu muchihandilu chetu tukumuzañalesha Yehova (Talenu paragirafu 4-6) *

4. Yumanyi yinateli kumuletesha muntu kuneña? Shimunenu chakutalilahu.

4 Ambuña aYehova amakwawu aneñaña hamuloña wakwila anakutwesha wanyi kuzata neyi chazatileñawu mumudimu waYehova hamuloña wakukula hela yikatu. Dichuma chamumwekeneni muhela Carol. Wadiña nakuzatila kwadiña kukankila. Haniyi mpinji walombweleña atudizi aBayibolu 35 nawa wakwashili amavulu kudihana nikupapatishewa. Carol wadikitileña hama! Nkumininaku watachikili kukatakata, nawa wadiña hohu kwitala. Carol wahosheli nindi: “Neluki nami hamuloña wakukatakata innakutwesha kuzata wanyi neyi chinakuzatawu akwetu, nawa innakutoñojoka nami nashinshika wanyi neyi chashinshikawu wena. Innakukañanya kwila yuma yinnakufwila kwila nawa chinakunneñesha.” Carol wakeñaña kumuzatila Yehova hanakumini ñovu yindi. Hichuma chachiwahi nankashi! Twatela kwiluka netu Nzambi yetu wukweti wushona watiyaña kuwaha nanyidimu yazatañayi Carol.

5. (a) Chumanyi chitwatela kwanukaña neyi tunakutoñojoka netu tunakuzata wanyi kwesekeja nachitwatela kuzata? (b) Neyi chinamwekeshiwu mumwevulu, manakwetu natwalekihu ñahi kumukalakela Yehova hakumina ñovu jindi?

5 Neyi mpinji yikwawu mwaneñaña hamuloña wakukala kumukweti, dihulenu nenu, ‘Yehova nakukeña nindi nilidi?’ Yehova nakukeña nindi muzati hakumina ñovu jenu kwesekeja nakukala kumukweti. Toñojokenu hachumichi: Muhela wudi nayaaka yamuma 80 waneñaña muloña nakutwesha wanyi kuzata mudimu wakushimwina neyi hadiñayi nayaaka yamuma 40. Nakutoñojoka nindi hela chakwila nakuzata hanakumini ñovu yindi hanakumuzañalesha Yehovaku. Komana chalala dimu? Toñojokenuhu. Neyi iwu muhela wazatileña hakumina ñovu yindi hadiñayi nayaaka yamuma 40 nawa natwalekihu kuzata hanakumini ñovu yindi hadiyi nayaaka yamuma 80, dikwila nawu naleki wanyi kuzata hanakumini ñovu yindi. Neyi tutachika kutoñojoka netu hitunakuzata hakumina ñovu jetu kulonda tumuzañalesheña Yehovaku, twatela kwanukaña netu Yehova yomweni diyi wafuukulaña chuma chinateli kumuzañalesha. Neyi tuzataña hanakumini ñovu jetu Yehova yomweni wakatwila nindi: “Wuzataña!”—Esekejenu Matewu 25:20-23.

6. Chumanyi chitunakudizila kudi Maria?

6 Tukwikala namuzañalu neyi tusha muchima hayuma yitunateli kuzata chatela tusheña muchima hayuma yitukubula kuzata. Toñojokenu hadi muhela Maria, wunakukabakana nachikatu chamukañeshaña kuzata nankashi mudimu wakushimwina. Hakusambila, waneñeleña nankashi nawa watoñojokeleña nindi washikilamu wanyi. Ilaña nkumininaku watoñojokeli hadi muhela wamuchipompelu chawu wakaamaña hohu mukadidi muloña wayikatu nawa wafuukwilihu nindi amukwashi. Maria wahosheli nindi: “Naloñesheli nami twakashimwini hamu nayena kuzatisha foni nikusoneka nyikanda. “Mpinji yejima yitwazatileña nayena nenjileña kwitala iku nazañalali muloña namukwashileña muhelami.” Ninetu tunateli kwikala namuzañalu nankashi neyi tushaña muchima hayuma yitukutwesha kuzata bayi yitukukañanyaku. Indi neyi twazataña nankashi hela twazataña chiwahi nyidimu yikwawu yaYehova?

NEYI MUKWETI CHAWAANA, “CHIZATISHENUÑA”!

7. Kufumbanyi kwayilejeliwu akaKristu kudi kapostolu Petulu?

7 Mumukanda windi wonenawu watachi, kapostolu Petulu wayilejeli amanakwindi kuzatisha yawaana yawu niyuma yelukawu kulonda akoyilesheña nachu akwawu akakwitiya. Petulu wasonekeli nindi: “Kwesekeja nachawaana chatambulayi muntu-himuntu, achizatisheña hakudikalakela wumu namukwawu nanochu chimudi añamba amawahi aluwi lwaNzambi lwasweja.” (1 Pet. 4:10) Twatela kuzataña hanakumini ñovu jetu hakuzatisha yawaana niwuswa wutukweti nawa bayi tutoñojokaña netu antu amakwawu akutiya ichima hela akutiya kutamaku. Neyi tutoñojokaña netu amakwawu akuzeya hela kutiya ichima, dikwila nawu hitunakumuzatila Yehova hanakumini ñovu yetuku.

8. Kwesekeja na 1 AKorinda 4:6, 7, muloñadi chitwatela kutondolwela kudisamba?

8 Twatela kuzatisha chawaana chetu nankashi, ilaña twatela kwikala ababala kulonda tubuleña kudivwimba. (Tañenu 1 AKorinda 4:6, 7.) Chakutalilahu, munateli kwikala nachawaana chakulombola nankashi atudizi aBayibolu. Mwatela kuzatisha nankashi ichi chawaana chenu! Muntu nateli kuzatisha chawaana chikwetiyi nawa nateli cheñi kutachika kudivwimba muloña wachawaana chikwetiyi. Twili netu katataka kudi chuma chachiwahi chamwekeni mumudimu wakushimwina chakwila mwatachikili kumudizisha muntu Bayibolu. Munakufwila nankashi kulejaku akwenu amwizanvu denu dakushimwina. Hampinji yimunabulakani nezanvu denu dakushimwina, muhela mukwawu atachika kulumbulula chuma chamwekeni chaletesheli ahani magazini. Yena wahanini hohu magazini; ilaña enu mwatachikili kudiza namuntu. Mukwila ñahi? Muneluki nenu izanvu dikutiya kuwaha nachuma chayimwekeneni, dichi, mwatela kuhembelelaku ifuku dikwawu kulonda mwakashimuni chuma chamwekeni kulonda mubuli kumuzeyesha muhela wahanini magazini. Mukwila chuma chachiwahi nankashi. Ilaña bayi muleka kutachika atudiziku. Mukweti chawaana, chizatishenuña!

9. Twatela kuzatisha ñahi yawaana yetu?

9 Twanukeña netu wuswa wejima wutukweti hiyawaana yafuma kudi Nzambi. Tuzatisheña iyi yawaana kulonda tukolesheña chipompelu, bayi kuditumbakeshelamuku. (Fwili. 2:3) Neyi tuzatishaña ñovu niwuswa wutukweti kulonda twilileñamu nkeñelu yaNzambi, tukwikala namuzañalu, bayi hamuloña wakwila tunakuzata nankashi kubadika akwetu hela kumwekesha netu twayibadikaku, ilaña hamuloña wakwila tunakuzatisha yawaana yetu kumushimeka Yehova.

10. Muloñadi chichatamina kudesekeja nawakwetu?

10 Neyi kubabala nehi muntu nateli kutachika kwesekeja yuma yelukayi nayuma yabula kwilukawu akwawu. Chakutalilahu, manakwetu wahanaña chiwahi mpanji yawantu amavulu. Dichuma chelukishayi. Mumuchima windi, nateli kutachika kudiwula manakwetu wakananyaña kuhana mpanji yawantu amavulu. Ilaña iwu manakwetu wukweti chisambu nankashi, wayidizishaña chiwahi anyanindi hela washimwinaña nankashi. Twasakililaña hama muloña tukweti amanakwetu niahela amavulu azatishaña yawaana yawu kumukalakela Yehova nikukwasha akwawu.

DIZILENUÑA KUDI AKWENU

11. Muloñadi chitwatela kwimbujolela chakutalilahu chaYesu?

11 Hela chakwila twatela kutondolwela kudesekeja nawakwetu, tunateli kudizilaku yuma yayivulu kudi antu ashinshika. Hakwila tulumbululi chumichi, tuhanjekenu hadi Yesu. Hela chakwila wadiña wawanina, tunateli kudizilaku yuma yayiwahi kuyilwilu yindi niyuma yeliliyi. (1 Pet. 2:21) Neyi tuzata hakumina ñovu jetu nawa tulondela chakutalilahu chindi, tukwikala ambuña aYehova amawahi nawa tukuzataña chiwahi mudimu wetu wakushimwina.

12-13. Chumanyi chitunateli kudiziladi kudi Mwanta Davidi?

12 Mwizu daNzambi, ashimunamu amayala niambanda ashinshika itwatela kwimbujola hela chakwila adiña awanina wanyi. (Heb. 6:12) Toñojokenu hadi Mwanta Davidi, ateneniwu kudi Yehova nindi “iyala innatiyi kuwaha mumuchima wami” hela neyi chashimunawu mumutapu waBayibolu yikwawu nawu, “Muntu wanzañaleshaña nankashi.” (Yilw. 13:22) Hela chochu, Davidi wadiña wawanina wanyi. Kafwampi wakoñeli yiluwa yamaneni. Hela chakwila waluwañesheli, twatela kumwimbujola. Muloñadi? Muloña hamufumbileñawu hesekeli kudiyiñishaku. Ilaña wetejeli kufumba kwamufumbiliwu nawa wadanakeneni chikupu hayiluwa yakoñeliyi. Chafuminimu, Yehova wamwanakeneni.—Mas. 51:3, 4, 10-12.

13 Tunateli kudizila kudi Davidi kuhitila mukudihula netu: ‘Nelaña ñahi neyi ananfumbi? Nashikenaña kwiteja mwinaluwañeshi tahindi, nafwilaña kudiyiñisha? Komana nayitwikaña akwetu nyiloña? Komana nazataña nañovu kulonda nibuli kufuntila chiluwa chochimu?’ Munateli kudihula malwihu yowamu hampinji yimunakutaña nsañu yawamayala niambanda ashinshika ashimunawu muBayibolu. Kukala kumunakumona dikwamweniwu niwena? Yilwilwinyi yayiwahi yamwekesheliwu? Hansañu yejima dihulenu nenu: ‘Nateli kwikala ñahi neyi iwu kambuña aYehova washinshika?’

14. Tunateli kudizilaku ñahi kudi akwetu akakwitiya?

14 Cheñi tunateli kudizila kudi akwetu akakwitiya atwansi hela akulumpi. Chakutalilahu, kwila mutoñojokahu muntu wumu muchipompelu chenu, wunakuumika kweseka hamwaha ikakeja dawakwawu atwansi, ikañesha damuchisaka hela kukatakata kumujimba nehi? Kudihu yilwilu yayiwahi yimunamoni mudi yena yimukukeña kwikala nayu? Neyi mwimbujola yilwilu yindi yayiwahi, mukudizilaku njila mumunateli kuumikila kukala kwenu. Twasakililaña muloña tukweti awa amanakwetu niahela ashinshika itwatela kwimbujola. Atuzañaleshaña hama!—Heb. 13:7; Yak. 1:2, 3.

ZAÑALALENUÑA NAMUDIMU WUMUNAKUKALAKELA YEHOVA

15. Kufumbanyi kwashimwiniyi kapostolu Pawulu kunateli kutukwasha kutwalekahu kumukalakela Yehova namuzañalu?

15 Hakwila tuleti kuwunda nikunuñañana muchipompelu, ejima wetu twatela kuzata hanakumini ñovu jetu. Toñojokenu hadi akaKristu akusambila. Adiña nayawaana yashiyashana ninyidimu. (1 Kor. 12:4, 7-11) Ilaña chumichi hichayiletesheleña kudibecha nikuleta chaambuku. Ilaña Pawulu wayilejeli ejima wawu, kwila chuma chakeñekeleña kulonda ‘atuñi mujimba waKristu.’ Pawulu wayisonekeleli aEfwesesa nindi: “Neyi chiidi-hichiidi chizata mudimu wachu chiwahi, chumichi chakwashaña mujimba kukula chachiwahi kulonda mujimba wejima wudituñi mukukeña.” (Efwe. 4:1-3, 11, 12, 16) Antu azatishili iku kufumba aleteli kuwunda nikunuñaña, yilwilu yitunakumona muyipompelu yetu makonu.

16. Chumanyi chitunakufwila kwila? (AHeberu 6:10)

16 Tondolwelenuña kudesekeja nawakwenu. Ilaña dizilenuña kudi Yesu nawa fwilenuña kwimbujola yilwilu yindi. Dizilenuña kudi antu ashimunawu muBayibolu niamakonu adi nachikuhwelelu. Chimunakutwalekahu kuzata hakumina ñovu jenu, ilukenu chikupu nenu, Yehova “waloña nawa hakavulamena mudimu [wenuku].” (Tañenu AHeberu 6:10.) Twalekenuhu kuzañalala mumudimu wumunakumukalakela Yehova nakwiluka nenu wasakililaña chimwamukalakelaña nawumi wenu wejima kulonda mumuzañaleshi.

KAMINA 65 Twalekenuñahu!

^ para. 5 Wejima wetu tunateli kudizila kuyuma yelaña antu amakwawu. Ilaña bayi tudesekejaña nawakwetuku. Achinu chibaaba chikutukwasha kwikala namuzañalu nikubula kudivwimba hela kuneña hamuloña wakwesekeja yuma yinakwilawu akwetu nayuma yitunakwila.

^ para. 49 KULUMBULULA MWEVULU: Manakwetu wazatilileña haBeteli hadiñayi mukwenzi. Nkumininaku wasumbwili nawa yena niñodindi azatileña wupayiniya. Chavwaliliwu anyana ayidizishili chakushimwina. Hampinji yinashinakajiyi natwalekihu kuzata hakumina ñovu yindi nakushimwina kuhitila mukusoneka nyikanda.