“MAJITA ejima akunyima . . . amwekeneña kulema wanyi henohu kukala kweneni kanda kutachiki muEurope.” Dichi Kaposhi Kakutalila kaSeptember 1, 1915, kalumbulwili njita yakaayi yatachi yadiña mumatuña 30. Muloña wamanjita adiñaku, Kaposhai Kakutalila kahosheli nawu: “Mudimu [waWanta] awikañesheleña nankashi sweje-e muGermany nimuFrance.”

Chineli mukaayi kejima mwadiña yikonkojola, Atudizi aBayibolu elukili wanyi chikupu nshimbi jahosha hadi akwaKristu kubula kudiñija mujamatuña nachiyuulu. Hela chochu, adiña nakufwila kutandisha nsañu yayiwahi. Chineli wafwilileña kuzata mudi waWanta, Wilhelm Hildebrandt wakeñeleña nyikanda (yawaAtudizi aBayibolu) The Bible Students Monthly yamuFrench. Wadiña muFrance bayi neyi (mukwakushiwmina wampinji yejima) wanyi, ilaña wadiña mushidika wawaGerman. Iwu wakeñeli kwikala chilumbu, wavwalileña yakuvwala yawushidika, nakubidika nsañu yakuwunda kudi antu ahoshaña idimi daFrench adiña nakuhita.

Nyikanda yaprintileñawu muKaposhi Kakutalila yamwekeshaña nawu Atudiza aBayibolu amakwawu amuGerman asañumukili nakushimwina nsañu yayiwahi yaWanta iku adi muwushidika. Manakwetu Lemke, wadiña mushidika, washimwina hampwila yamwekesheliwu akwawu mwazatilileñawu. Wasonekeli nindi, “Inakwila yuma yejimiyi kulonda nimuhameki Yehova hela nidi muwushidika.”

Georg Kayser wayili kuwushidika, wafuntila nekali kambuña aYehova. Chumanyi chamwekeni? Watambwili nyikanda yawaTudizi aBayibolu, nikwiteja chalala chaWanta namuchima wejima nawa walekeli kuzuña. Watachikili kuzata mudimu wawuwahi. Chamanini njita, wazatali wupayiniya hadi yaaka yayivulu.

Hela chakwila awa Atudizi aBayibolu elukili wanyi chakutondolwela nsañu jamatuña nachiyuulu, yilwilu nimwekenu yawu yambukili chikupu nawantu  adiña nakukeña njita. Hampinji yadiñawu akapolitiki niakulumpi jamacheni nakukwasha jamajita, Atudizi aBayibolu ahakwililiku “Kalamba wakuwunda.” (Isa. 9:6) Hela chakwila antu amakwawu atwalekelihu wanyi kubula kudiñija mujamatuña nachiyuulu, atwalekelihu kumwekesha yilwilu yadiña nakadizi waBayibolu Konrad Mörtter wahosheli nindi, “Neluki chikupu Mwizu daNzambi nami mukwaKristu watela kujaha muntu wanyi.”—Kwid. 20:13. *

MuGermany mwabulili nshimbi yahosha hayuma yatela kwilayi muntu, Atudizi aBayibolu kubadika 20 akaanini kwiñila wushidika. Amakwawu ayimweneña neyi akata munyitu, chidi neyi Gustav Kujath, watwaliliwu kwahembelañawu antu akata munyitu. Hans Hölterhoff, wakanini wushidika amutwalili mukaleya, mwakaniniyi nyidimu yejima yakundama kuwushidika. Atulama amukasili chakwila nyendu nimakasa indi elili wujinji. Chineli wabulili kufumpa kashinshi kindi, atulama amweteli chakwila wakeñeli nikufwa. Hela chochu, Hans wadiñijili wanyi munjita.

Amanakwetu amakwawu atwaliliwu muwushidika akaanini kwikala amashidika nawa akeñilu mudimu wawuwahi. * Johannes Rauthe niyena womikili amutwalili nakuzatila kukampani yazatilaña hajinjanji jamasuwa. Konrad Mörtter amwinkeli mudimu wawundotolu, nawa Reinhold Weber wazatileña wunasi. August Krafzig watiyili kuwaha namudimu wakubula kuzuña njita. Awa Atudizi aBayibolu niamakwawu amukalakele Yehova muloña wakukeña nikwikala ashinshika.

Chineli akaanini kudiñija munjita, Atudizi aBayibolu ayitalileña kudi akwanshimbi. Chihahitili yaaka, Atudizi aBayibolu ayitwalili kuyota yanyiloña muloña wamudimu wawu wakushimwina. Hakwila nawu ayikwashi, kasanji kamutayi kakuGerman katuñili dipatimenti haBeteli yatalaña hanyiloña yayinkañawu akwaKristu muMagdeburg.

A Yinsahu jaYehova atachikili kwiluka chovu-chovu nawu akwaKristu atela wanyi kudiñija munsañu jamatuña nachiyuulu. Chiyatachikili njita yakaayi yamuchiyedi, atwalekelihu kubula kudiñija mujamatuña nachiyuulu kuhitila mukukaana kwiñila wushidika. Dichi, ayimweneña neyi hiyayilumbu jawaGerman nawa ayikabishili nankashi. Iyi nsañu yinambuki nansañu yamwekeni muchibaaba chinakwila nawu “Kufuma Munkalaña Jetu.”—Kufuma munkalaña jetu muCentral Europe.