1, 2. Twatela kudizishiladi amakwawu kuzata nyidimu yamukuloñesha?

YESU wadiña namudimu wakushimwina nsañu yayiwahi yaWanta mpinji yejima. Hela chochu, wadiña cheñi nampinji yakudizisha amakwawu kwikala atubiña niantañishi. (Mat. 10:5-7) Fwilipu niyena wadiña namudimu wakushimwina nsañu yayiwahi mpinji yejima, ilaña wakwashili anyanindi awaana awambanda kwikala adikita mukushimwina chalala chamuNyikanda yajila kudi akwawu. (Yil. 21:8, 9) Iwu mudimu wakudizisha walema nimakonu, muloñadi?

² Mukaayi kejima, antu anakutambwila nsañu yayiwahi anakuvulilaku. Amaha achidi kanda apapatishewi atela kwiluka kulema kwakwikala nakudiza Bayibolu kwahalwawu. Atela cheñi kuyidizisha chakushimwina nsañu yayiwahi nikuyidizisha chalala. Muyipompelu yetu, amanakwetu anakukeñeka kuyikwasha azati nañovu kulonda ashikihu kwikala ankoñi akuzatila niaeluda. AkwaKristu apama atela kuzatisha “kuleja  kwakuwahi” hakwila nawu akwasha amaha kuyilaku hambidi kuspiritu.—Yish. 4:2.

3, 4. (a) Pawulu wamwekesheli ñahi nindi kudiza Nyikanda yajila halwetu kunateli kutukwasha mumudimu wakushimwina? (b) Twatela kwilañadi henohu kanda tukwashi atudizi etu kudizaña Bayibolu halwawu?

³ Kudiza muNyikanda yajila halwetu kwalemenadi? Twawanaña ñakwilu mumazu aPawulu asonekeleliyi akwaKristu amuKolose. Wasonekeli nindi: “Hitwalekaña kuyilombelaku. Tunakeñi netu musweji kwiluka mwakeñayi Nzambi namaana aspiritu ejima nakashinshi; kulonda mwendi nakumutelela Mwanta, nakumutiyisha kuwaha kwakweni, nakusoña nyikabu munyidimu yayiwahi yejima, nakukula mukwiluka Nzambi.” (Kol. 1:9, 10) Iku kumwiluka Nzambi kwayikwashili akwaKolose ‘kwenda nakumutelela Yehova, nakumutiyisha kuwaha kwakweni.’ Ichi chayikwashili kutwalekahu “kusoña nyikabu munyidimu yayiwahi yejima,” nankashi dinu mumudimu wakushimwina nsañu yayiwahi. Hakwila nawu azati chiwahi, akwakudifukula aYehova atela kutañaña Bayibolu mpinji yejima. Tukwila chiwahi neyi tukukwasha atudizi aBayibolu kwiluka chalala.

⁴ Henohu kanda tukwasha amakwawu kuhetela mukudiza Bayibolu kwahalwawu, etu aweni twatela kwiluka kulema kwakudiza Bayibolu. Twatela kwikala nachaaku chakudiza Bayibolu mpinji yejima. Munateli kudihula nenu: ‘Neyi mwiniitala yahosha mazu ambuka kwesekeja nachahosha Nsona hela yehula lwihu lwakala, nikutwesha kumwakula kuzatisha Bayibolu? Neyi natañi hadi Yesu, Pawulu niamakwawu atwalekelihu kushimwina, natoñojokaña hakutatakena kwawu kwakushimwina chikunateli kunkwasha mumudimu waYehova?’ Wejima wetu twatela kuzatisha maana nikufumba kwaMwizu daNzambi. Nawa neyi tukuleja antu yuma yitunaheteli mukutaña Bayibolu kwahalwetu, tunateli kuyikolesha niwena kutañaña Bayibolu kulonda akahetelimu.

5. Njilanyi yimukuzatisha hakukwasha wamuha kwikala nakudiza Bayibolu halwindi mpinji yejima.

⁵ Munateli kudihula nenu, ‘Nikumudizisha ñahi kadizi wami waBayibolu kudizaña Bayibolu mpinji yejima?’ Njila yayiwahi, hikumuleja chimwaloñeshaña neyi munakumudizisha. Munateli kumuleja kutaña yibalu yaapendikisi mukanda Chumanyi Chacheni Chatañishaña Bayibolu? nikutaña nsona jinasonekiwu. Mukwashenu yaloñesheña kupompa kulonda yakuleñahu. Mukwashenu yatañeña Kaposhi Kakutalila niAwake! Neyi Watchtower Library hela  Watchtower ONLINE LIBRARY yidi kwoku mwidimi dindi, munateli kumuleja chakuyizatisha kwakula malwihu amuBayibolu. Neyi mukumukwasha muniyi njila, chakadi nikujina kadizi wenu waBayibolu wukutiyaña kuwaha kudiza Izu daNzambi halwindi.

6. (a) Munateli kukwasha ñahi kadizi wenu kukeña kudiza Bayibolu namuchima wejima? (b) Kadizi waBayibolu watela kwiladi neyi natachiki kukeña kudiza Bayibolu halwindi?

⁶ Hela chochu, bayi tukanjikija muntu kutaña nikudiza Bayiboluku. Ilaña, twatela kuzatisha yitwa yatuloñeshelawu mukuloñesha kwaYehova kulonda tukwasha kadizi wetu yakeñi kudiza Bayibolu. Mukuhita kwampinji, kadizi washinshika nateli kutiya neyi chatiyiliyi ñimbi yamasamu wembili nindi: “Ami kwami chachiwahi kukundama kwakwihi naNzambi: namwila dehi Mwanta Yehova nami dimu mwami mwakubatamina.” (Mas. 73:28) Spiritu yaYehova yikumukwasha kadizi waBayibolu washinshika kukundama kudi yena.

7. Yesu wadizishili ñahi akwakushimwina nsañu yayiwahi? (Talenu mwevulu wudi hefu datachi.)

⁷ MuMatewu kapetulu 10, mwekala nshimbi jenkeliyi Yesu apostolu indi 12. Chatela yayileji nsañu jajivulu, wayilejeli hayikuma yatela kwilawu. ^[1] Apostolu adiña nakutiyilila hampinji yadiñayi Yesu nakuyidizisha chakushimwina chiwahi. Kuhiñahu wejima wawu ayili mwiha. Chineli azatisheleña njila jayilejeliyi Yesu, ashikililimu kutañisha chalala chamuNsona. (Mat. 11:1) Tunateli kudizisha atudizi etu aBayibolu kwiluka akwakushimwina nsañu yayiwahi neyena. Tushinshikenu njila jiyedi jakuyikwashilamu.

8, 9. (a) Yesu wahosheleña ñahi nawantu mumudimu wakushimwina? (b) Tunateli kukwasha ñahi amaha kuhanjeka nawantu neyi cheliliyi Yesu?

⁸ Hanjekenuña nawantu. Kakavulu Yesu wadiña nakuleja antu nsañu yaWanta hamuntu hamuntu. Chakutalilahu, wahanjekeli chachiwahi namumbanda heshima daYakoba kwakwihi namusumba waSika. (Yow. 4:5-30) Wahanjekeli cheñi naMatewu kaLevi, wadiña mukwakutambula nyisonku. MuNyikanda yaNsañu Yayiwahi asonekamu nsañu yantesha jahanjekeliwu, ilaña Matewu wetejeli chamutambikiliwu kudi Yesu kwikala kambanji kindi. Matewu niamakwawu amutiyili Yesu chahosheliyi hampinji yayilehi hikwadiña chawija mwitala daMatewu.—Mat. 9:9; Luka 5:27-39.

⁹ Yesu wahosheli cheñi munjila yayiwahi naNataneli waheleli antu akuNazareta. Hela chochu, Nataneli wahimpili yitoñojoka yindi. Wadizili yuma yayivulu yamudizishiliwu kudi Yesu, muntu wafumini muNazareta. (Yow. 1:46-51) Dichi twatela kudizisha akwakushimwina amaha kulonda ahanjekeña nawantu munjila yayiwahi. ^[2] Antu tukukwasha muniyi njila akutiya kuwaha kumona antu anyichima yayovu chinakwakulawu malwihu anakuyihulawu.

10-12. (a) Yesu wakwashili ñahi antu amwekesheli mpwila yansañu yayiwahi? (b) Tunateli kukwasha ñahi akwakushimwina amaha kwiluka chakulumbulula chalala chamuBayibolu?

¹⁰ Mwekeshenu iyena. Yesu wadiña nakushimwina mpinji yejima. Hela chochu, wadiña nampinji yakukwasha antu amwekesheleña mpwila yansañu yayiwahi. Chakutalilahu, Yesu wadizishili izaza dawantu, iku nemani muwatu. Haniyi mpinji, wamwinkeli Petulu mudimu wakukwata nshi nakumuleja nindi: “Kufumisha hanu wukwikala chibinda chawantu.” Mazu ahosheliyi Yesu niyuma yeliliyi mwafuminidi?  Petulu nialunda nindi ‘chashikijiliwu maatu awu kuchikumu, hiyakushiya yuma yejima nakumulonda Yesu.’—Luka 5:1-11.

¹¹ Nikodemu, wadiña wamuchota chanyiloña chaSanihedirini, watiyili kuwaha chatañishileñayi Yesu. Wakeñeleña kudiza nsañu jajivulu, ilaña watiyileña woma wawakwawu neyi wukuhosha naYesu mukachi kawantu. Yesu wazatishileña mpinji yindi chiwahi chakwila ayili nakumuwana kudi Nikodemu nawufuku. (Yow. 3:1, 2) Yumanyi yitunateli kudizila kuniyi nsañu? Mwana kaNzambi washiyileñaku mpinji yakukolesha chikuhwelelu chawantu. Kwila tuzata nañovu kufuntila kudi antu anamwekeshi mpwila nikuyidizisha Bayibolu nehi?

¹² Akwakushimwina amaha elukaña swayi chakulumbulula chalala chamuBayibolu neyi tuzataña nawu mwiha. Tunateli kuyikwasha kusha maana nikudi antu amwekeshili mpwila yanti. Twatela kuzata nawakwakushimwina amaha neyi tunakufuntila hela tunakuya nakudizisha antu Bayibolu. Neyi tuyidizisha nikuyikolesha muniyi njila, akwakushimwina amaha akwikala nampwila yakukwasha antu nikulombola atudizi aBayibolu nkawawu. Akudiza kwikala adiwunjika nikutwalekahu kushimwina mwiha.—Ŋal. 5:22; talenu chikasha chinakwila nawu “Kutatakena Kwalema.”

13, 14. (a) Yakutalilahu yawantu amuBayibolu adihanini kukwasha akwawu yinakutudizishadi? (b) Munateli kukwasha ñahi atwansi niakwakushimwina amaha kukeña amanakwawu niahela?

¹³ Yakutalilahu yamuBayibolu yamwekeshaña kukooleka kutukweti ‘kwakukeña amanakwetu’ nikudikalakela wumu namukwawu. (Tañenu 1 Petulu 1:22; Luka 22:24-27.) Mwana kaNzambi wahanini yuma yindi yejima kushilahu niwumi windi hakushimwina antu. (Mat. 20:28) Dokasi “waswejeli nyidimu yayiwahi, niyuma yaluwi.” (Yil. 9:36, 39) Mariya, muhela washakamineña kuRoma, ‘wakabakeni’ antu amuchipompelu. (Rom. 16:6) Tunateli kukwasha ñahi amaha kwiluka kulema kwakukwasha amanakwawu nawahela?

¹⁴ A Yinsahu apama anateli kuya nawamaha nakuhempula akata niatushinakaji. Anvwali niwena anateli kuya nawanyanawu neyi chinatwesheki. Aeluda nateli kuzata hamu nawamaha kwinka atushinakaji yakuda nikuyiwahishila matalawu. Muniyi njila, atwansi niamaha akwiluka chakutiyila antu luwi. Hampinji yashimwinineñawu, eluda wumu wayileña nakuhempula aYinsahu ashakamaña munyikala. Manakwetu wakansi wayileñayi nindi wadizili kukeña antu ejima muchipompelu.—Rom. 12:10.

15. Muloñadi chichalemena neyi aeluda ashaña maana hakukwasha antu muchipompelu?

¹⁵ Chineli Yehova wazatishaña amayala kutañisha muchipompelu, amanakwetu atela kwiluka chakutañisha. Neyi mudi aeluda, kwila mutiyilila kudi nkoñi wakuzatila hampinji yinakuhitulukayi mumpanji yindi nehi? Neyi mukumukwasha, wukwiluka chakutañisha Izu daNzambi.—Nehe. 8:8. ^[3]

16, 17. (a) Pawulu wamudizishili ñahi Timotewu? (b) Aeluda anateli kudizisha ñahi atubiña akabiñaña chipompelu kumbidi?

¹⁶ Kudi kukankila kweneni kwawatubiña awakwaKristu muchipompelu, nawa antu atela kuzata iwu mudimu kumbidi atela kutwalekahu kuyidizisha. Pawulu walumbulwili chatela kudizishawu chamulejeliyi Timotewu nindi: “Eyi mwanami, dikoleshi muluwi lwekala mudi Kristu Yesu. Nsañu jiwatiyili kudami mukachi kawayinsahu amavulu, jikunjiki antu ashinshika akatwesha  kuleja akwawu nawa.” (2 Tim. 2:1, 2) Timotewu wadizili muloña wadiña nakuzatila hamu nakapostolu wachikulumpi. Nawa Timotewu wazatishili njila jamulejeliwu kudi Pawulu mumudimu wakushimwina nimunyidimu yikwawu yajila.—2 Tim. 3:10-12.

¹⁷ Pawulu wamudizishileña Timotewu mpinji yejima. Wazatileña nindi munyidimu yejima. (Yil. 16:1-5) Aeluda atela kwimbujola chakutalilahu chaPawulu kuhitila mukusendaña akoñi akuzatila ashikahu neyi anakuya nakubiña. Dichi aeluda neyi akwila mwenimu akukwasha amanakwetu kwiluka chakutañisha, kwikala nachikuhwelelu, kukaba kabe-e nikwikala nakukeña kwatela kwikala namukwaKristu mukwakukalakela akwawu. Iyi ntanjikilu yinabombelimu kudizisha atubiña akabiñaña “mukanka wanyikoku yaNzambi” kumbindi.—1 Pet. 5:2.

18. Twatela kulemesheladi mudimu wakudizisha amakwawu mumudimu waYehova?

¹⁸ Kudizisha amakwawu kwalema muloña wakukankila kwanyidimu yidi mukuloñesha kwaYehova. Chalema kudizisha amaha neyi cheliliyi Yesu naPawulu. Yehova nakukeña ambuñindi amakonu kuyidizisha chiwahi kulonda azateña nyidimu yamukuloñesha. Nzambi watwinka kukooleka kwakukwasha amaha kwikala nañovu yakuzata nyidimu yakeñekaña muchipompelu. Yuma yinakutaminaku mwituña nawa mudimu wakushimwina wunakukeñeka nankashi, mudimu wakudizisha walema nawa wunakukeñeka mukunyakashana.

19. Chumanyi chikuletesha mukukuhwelela nenu mukutwesha kuzata mudimu wakudizisha amakwawu mumudimu waYehova?

¹⁹ Hela chochu, kudizisha antu kwakeñekaña mpinji niñovu. Ilaña Yehova niMwanindi akeñayi akutukwasha nikutwinka maana akudizisha amakwawu. Twakazañalala chitwakamona antu itwadizishili anakutwalekahu ‘kuzata nañovu’ kuzatisha yuma yitwayidizishili. (1 Tim. 4:10) Nawa tutwalekenuhu kuyilaku hambidi kuspiritu hakuzata nyidimu yajila yaYehova.