MUNJILA yikwawu, atudizi aBayibolu amwovu nyichima adi neyi antu akeñaña wuru. Awa atudizi atela kuzata nañovu nikutwalekahu kukeñakeña maana asweja muNyikanda yajila. Yumanyi yitukudiza hakushinshika njila jisatu munateli kuwaninawu wuru?

Fwikijenu munakwenda kuchikumu chakaloña nawa mumona chuma chinakukejima hamaseki. Chakadi nikujina, mukuyaku lufuchi nakutala neyi hiwuru kulonda muyinoni. Yekala yanyanya kubadika diyamondi. Hela chochu, mukutalatala nakumona neyi kukumwekana wuru yikwawu.

Munjila yoyimu, kunyima ifuku dimu mwatiyili kuwaha chelili kambuña aYehova wumu yenzi kwitala denu nakuhanjeka hansañu yakuchiñeja yekala muBayibolu. Hadaha mwanukaña mpinji yimwawanini wuru yakuspiritu. Chamwekeni hampinji yimwamweni ijina daNzambi dakwila nawu Yehova muBayibolu katachi. (Mas. 83:18) Indi kwiji himwelukili nenu mwatela kwikala ibwambu daYehova. (Yak. 2:23) Mwelukili chikupu nenu mwawanini chuma chalema kubadika wuru! Nawa munakufwila kuwana wuru yayivulu yakuspiritu.

Nkuku yawuru mpinji yikwawu yavulaña mutuloña. Chihahita tukweji twantesha, akwakukeñakeña wuru adikita anateli kuwana wuru yayivulu, yinateli kufwika mali amavulu.

Chimwatachikili kudiza Bayibolu naChinsahu chaYehova, hadaha mwatiyili neyi chatiyañayi mukwakukeñakeña wuru neyi nayiwani. Kutoñojoka hamavasi amuBayibolu kwayikwashili kwiluka yuma yayivulu, yuma yayikwashili kuyilaku hambidi kuspiritu. Chimwatoñojokeli chikupu hanichi chalala chamuBayibolu, mwelukili chimwatela kukundama kwakwihi naYehova nikushakama mukukeña kwindi iku munakutoñojoka hawumi wahaya nyaaka.—Yak. 4:8; Yuda 20, 21.

Kufwana mukwakukeñakeña wuru, hadaha mwadiña nakuzata nañovu kukeñakeña maheta  alema akuspiritu. Chimwadizili chalala chamuBayibolu, chakadi nikujina mwadihanini nikupapatishewa.—Mat. 28:19, 20.

Mukwakukeñakeña nateli kuwana wuru yantesha mukachi kamalola. Malola amakwawu ekalaña nawuru yayivulu yakwila anateli kuyimba nikuyichika nakufumishaku wuru. Hatachi, wuru yinateli kumwekana wanyi mumalola. Muloñadi? Muloña ilola dadiwahi dekalaña hohu nawuru yantesha yakushika ku 10 g. Hela chochu, mukwakukeñakeña watwalekañahu kwimba.

Muntu wakeñekaña kuzata nañovu neyi natachiki dehi kuhosha “nsañu jaKristu.” (Heb. 6:1, 2) Mwatela kuzata nañovu kulonda mwiluki yikuma nikwila yuma yimunakudizi muBayibolu. Hanu dinu, mukwila ñahi kulonda mutwalekihu kudiza Bayibolu halwenu, hela chakwila munadizi Nyikanda yajila hadi yaaka yayivulu?

Ikalenu nampwila yakudiza. Shenu kashinshi kuyuma yakunama. Twalekenuhu kuzata nañovu, kulonda muwani wuru yalema yamuNyikanda yajila yamaana aNzambi niwukwashu. (Rom. 11:33) Hakwila nawu mwiluki Nyikanda yajila, zatishenu nankashi yitwa yakusandujola nachu yidi mwidimi denu. Twalekenuhu kukeñakeña ñakwilu yamalwihu mukweti amuBayibolu. Ihulenu akwenu ayileji nsona hela yibaaba yinawaniwu yinateli kuyikwasha nikuyikolesha. Lejenuku akwenu yikuma yimwawana hampinji yimwadiña nakudiza Izu daNzambi.

Hela chochu, nkeñelu yenu hiyidi yakukeña kwikala namaana hohuku. Kapostolu Pawulu wasoñamishili nindi, “kwiluka kwaletaña kudinka wanta.” (1 Kor. 8:1) Dichi, zatenu nañovu kulonda mwikala adizoza nawa achikuhwelelu chakola. Neyi mukwikalaña nakudifukula kwachisaka nikudiza Bayibolu mpinji yejima kukuyikwasha kwikala nanshakaminu yakumutiyisha Yehova kuwaha nawa kukuyiletesha mukwashi amakwawu. Kubombela hayumiyi, mukutiya kuwahi muloña munawani chuma chalema kubadika wuru.—Yish. 3:13, 14.