1, 2. (a) Mukanda waIsaya 60:22 wunakushikijewa ñahi munanu mafuku akukuminina? (b) Mukuloñesha kwaYehova kwahamaseki mudi kukaankilanyi?

“KAKEHELAMU kakabalumuka ikombakaji, wadiñi wanyanya wakekala muza wañovu.” (Isa. 60:22) Awa mazu awuprofwetu anakushikijewa munanu mafuku akukuminina. Chaaka chamudimu cha 2015 mukaayi kejima mwadiña akwakushimwina aWanta azataña mpinji yejima, 8,220,105. Mazu akukumishaku amuniwu wuprofwetu akundama mukwaKristu wejima, muloña Tata yetu wamwiwulu wahosha nindi: “Ami Yehova yami nakachinyakisha hamwaka wachu.” Neyi chochelukañayi muntu wudi mumotoka nindi motoka yinakutemuka, ninetu twelukaña iwu mudimu wakwilisha atumbanji chiwunakuyilaku hambadi. Tunakutiya ñahi halwetu nachinakuyilaku mudimu hambidi? Tunakuzata neyena chineli tudi akwakushimwina aWanta? Amanakwetu niahela amavulu anakusonekeshaku wupayiniya wakukwasha hela wampinji yejima. Tunakuzañalala wanyi chitunakumona antu amavulu anakuya nakuzatila kudi kukankila hela kuzataku nyidimu yikwawu yakuspiritu?

 ² Hela chochu, kudi kukankila kwawakwakuzata amavulu. Chaaka nichaaka yipompelu kushika ku 2,000 ayituñaña. Neyi chakwila chipompelu nichipompelu chikwikala nawa eluda 5, dikwila nawu chaaka nichaaka ankoñi akuzatila 10,000 atela kushikahu kuzata neyi aeluda. Chumichi chinakumwekesha nawu amanakwetu amavulu atela kushikija yuma yakeñekaña kulonda ekali ankoñi akuzatila. Kubombelahu, hela tudi amanakwetu hela ahela twatela ‘kusweja kukalakala mumudimu waMwanta.’—1 Kor. 15:58.

3, 4. Kuyilaku hambidi kwatalisha mudihi kudi enu?

³ Tañenu 1 Timotewu 3:1. Mazu achiGiriki abalumunawu nawu ‘muntu nakeñi mudimu’ atalisha mukwila nawu muntu wunakufwila nankashi kuzata mudimu. Chazatishililiyi awa mazu, kapostolu Pawulu wakonkomweneni nindi, hakwila nawu muntu yayiliku hambidi kuspiritu watela kuzata nañovu. Fwikijenu manakwetu nakutoñojoka hanyidimu yikazatañayi muchipompelu kumbidi. Hadaha chayinu mpinji hinkoñi wakuzatila wanyi, ilaña neluki nindi watela kuzata nañovu kwikala nayilwilu yakuspiritu. Chatachi, wukuzata nañovu kulonda ekali nkoñi wakuzatila. Mukuhita kwampinji, nakufwila kushikahu kuspiritu kulonda yekali eluda. Muniyi yakutalilahu yejima, nakuzata nañovu kulonda yashikiji yuma yakeñekaña hakuzata nyidimu yamuchipompelu.

⁴ Munjila yoyimu, amanakwetu niahela akeñaña kuzata wupayiniya, kuzatila haBeteli, hela kukwasha mudimu wakutuña Matala aWanta atela kuzata nañovu kulonda eli munakukeñawu. Tushinshikenu Izu daNzambi chidakoleshaña ejima kuyilaku hambidi mukudifukula kwalala.

5. Atwansi anateli kuzatisha ñahi ñovu jawu mumudimu waWanta?

⁵ Atwansi akweti ñovu yakukoña yuma yayivulu mumudimu waYehova. (Tañenu Yishimu 20:29.) Atwansi amakwawu haBeteli azataña mudimu wakupulinta maBayibolu ninyikanda yashindamena haBayibolu. Amanakwetu niahela amavulu achinyiki azataña mudimu wakutuña nikuwahisha Matala aWanta. Neyi kunamwekani wubanji wadimwekenaña waweni, atwansi amavulu azatilaña hamu nawaYinsahu akuluka yitembi kukwasha adi muwumbanji. Nawa apayiniya amavulu achinyiki atwalaña nsañu yayiwahi kumatuña acheñi nimumaluña mwahoshañawu madimi acheñi.

6-8. (a) Kansi wumu weyala wahimpili ñahi chazatileñayi nyidimu yaNzambi, nawa yumanyi yafuminimu? (b) Tunateli ‘kutompa ñahi nakutiya chawahayi Yehova’?

⁶ Chakadi nikujina, mweluka nenu twatela kumukalakela Nzambi namuchima wejima. Indi neyi mutiya neyi chatiyiliyi manakwetu Aaron hampinji yimu? Hela chakwila wakulili muchisaka chawakwaKristu, wahosheli nindi, “Nadiluñishileña wanyi kupompa nikushimwina.” Wakeñeleña kumukalakela Nzambi namuzañalu ilaña welukili wanyi chaletesheli yabuli kwikala namuzañalu. Welili ñahi?

⁷ Aaron watachikili kwila yuma yakuspiritu yabombelelimu, kutaña Bayibolu, kuloñesha kupompa nikwakulahu. Nawa watachikili kulomba mpinji yejima. Chaswejeliyi kumukeña Yehova, watachikili kuyilaku hambidi kuspiritu. Kufuma tuhu hayina mpinji, Aaron watachikili kuzata wupayiniya nimudimu wakukwasha kunamwekani wubanji nikushimwina kwituña dacheñi. Chayinu mpinji Aaron nakuzatila haBeteli nawa hieluda. Wamonaña ñahi njila yatondeliyi? “‘Namutompi nawa natiyi chawahayi  Yehova.’ Muloña wankisu jindi, natiyaña neyi nidi namukudi kudi yena nawa nakeñaña kuzata nañovu mumudimu windi, chumichi chaletaña nkisu jajivulu nankashi.”

⁸ Ñimbi yamasamu wembili nindi: “Amukeñakeñaña Yehova hiyakabula chuma chachiwahi nichimuku.” (Tañenu Masamu 34:8-10.) Mwalala, Yehova hakatiyisha nsonyi antu amukalakelaña neyenaku. Chitwazataña nañovu jetu jejima mumudimu windi, ‘twatompaña nakutiya chawahayi Yehova.’ Nawa neyi tudifukulaña kudi Nzambi nawumi wetu wejima, tukwikalaña namuzañalu weneni.

9, 10. Muloñadi ‘kuchiñilila’ chikwalemena?

⁹ Hampinji yimunakuzatila hayuma yimunakufwila, ‘chiñililenuña.’ (Mika 7:7) Yehova wakwashaña ambuñindi ashinshika hela chakwila wukuyiteja kuchiñilila kukoleka kwakumbidi. Wamukanini kumwinka Abarahama mwana, dichi wakuhwelela nikudiwunjika. (Heb. 6:12-15) Hela chakwila wahembeleli hadi yaaka yayivulu hakwila nawu Isaka yavwaliki, Abarahama wakuhweleleli nawa Yehova wamutiyishili nsonyi wanyi.—Kutach. 15:3, 4; 21:5.

¹⁰ Kuchiñilila kwakala. (Yish. 13:12) Neyi tukutoñojokaña hakukala kutudi naku, tukukañanya kuchiñilila. Ilaña twatela kuzatisha mpinji yetu kulonda tumwekeshi yilwilu yakuspiritu. Tushinshikenu yuma yisatu yikutukwasha kwila mwenimu.

11. Yilwilwinyi yakuspiritu yitwatela kwikala nayu, nawa yalemenadi?

¹¹ Ikalenu nayilwilu yakuspiritu. Kutaña Izu daNzambi nikutoñojokahu kukutukwasha kwikala nayilwilu yidi neyi, maana, wuñaji  wawuwahi, kwiluka, kutoñojokela mwakashinshi, nikuwundisha mumesu. Iyi yilwilu yinateli kukwasha antu anakulombola kudifukula kwalala. (Yish. 1:1-4; Tit. 1:7-9) Nawa neyi tukutañaña nyikanda yashindamena haBayibolu tukwiluka chatoñojokañayi Nzambi hayuma yayivulu. Mpinji yejima, twamonaña kukala kudi neyi yisela, nvwalilu nimwekenu, chakuhemba mali nichakuhanda nawakwetu. Neyi tukuzatisha yuma yitwadizaña muBayibolu, tukwila yuma yikumutiyisha Yehova kuwaha.

12. Antu amuchipompelu anateli kumwekesha ñahi nawu ashinshika?

¹² Ikalenu ashinshika. Chili tudi amanakwetu hela ahela, twatela kuzata nañovu nyidimu yakuspiritu yinatwinkiwu. Chineli wadiña nguvulu, Nehemiya watondeli antu akuzata nyidimu hadi antu jaNzambi. Watondeli anyi? Watondeli antu amwakamineña Nzambi, alala nawa ashinshika. (Nehe. 7:2; 13:12, 13) Nimakonu, “akuhwelelaña atulama nawu chiña ayimoni kushinshika.” (1 Kor. 4:2) Nyidimu yayiwahi ayimonaña.—Tañenu 1 Timotewu 5:25.

13. Munateli kwimbujola ñahi Yosefu neyi anayili katama?

¹³ Itejenu Yehova yayitookeshi. Mukwila ñahi neyi ayila katama kudi akwenu? Hadaha munateli kuyilumbulwila swayi chimunakutiya. Hela chochu mpinji yikwawu, kukala kukuswejelaku neyi mukudamwina. Yosefu amwilili katama kudi amanakwindi, ilaña wahembeli ndulu wanyi. Kuhiñahu, Yosefu amutwambilili nawa amushili mukaleya. Hela chochu, wetejeli Yehova yamukwashi mukukala kwamweneñayi. Yumanyi yafuminimu? “Izu daYehova damwesekeli.” (Mas. 105:19) Chikwamanini kweseka, Yosefu washikilihu kuzata mudimu walema. (Kutach. 41:37-44; 45:4-8) Hampinji yimukumona kukala kweneni, lombenu maana, ilenu nikuhosha munjila yayiwahi nawa lombenu Nzambi yayikoleshi. Yehova wukuyikwasha.—Tañenu 1 Petulu 5:10.

14, 15. (a) Muloñadi wutwatelela ‘kusha maana’ hanjila yitwashimwinañamu? (b) Munateli kuhimpa ñahi njila yakushimwinamu? (Talenu mwevulu wudi hefu datachi nawa talenu chikasha chinakwila nawu “Kwila Muzatishaku Njila Yacheñi Nehi?”)

¹⁴ Pawulu wakolesheli Timotewu nindi: “Shaku muchima kukutañila amakwawu nikukukonkomwena, nikukuleja. . . Dihembi eyi aweni, wuhembi kuleja kuwalejaña akwenu.” (1 Tim. 4:13, 16) Timotewu wadiña weluka dehi mudimu wakushimwina. Hela chochu, mudimu windi wakushimwina wukwikala chiwahi neyi ‘wukuhemba’ kuleja kwindi. Wakuhweleleli wanyi nindi antu akwiteja yuma yayilejeliyi. Hakwila nawu yayishiki hanyichima, watela kuhimpa ntañishilu yindi kwesekeja nayuma yakeñeleñawu. Chineli tudi akwakushimwina aWanta, twatela kwila mwomumu.

¹⁵ Kakavulu twawanaña wanyi antu hamatala neyi tunakushimwina kwitala nikwitala. Mumaluña amakwawu, twatweshaña wanyi kwiñila mumatala amakwawu hela mujimpwembu. Neyi chumichi chamwekanaña mwiluña denu, kwila muzatishaku njila yacheñi yakushimwinamu nsañu yayiwahi nehi?

16. Muloñadi wutukuhoshela netu kushimwina kudi antu amavulu kwazatikaña chikupu?

¹⁶ Kushimwina kudi antu amavulu hinjila yimu yayiwahi yakutandishilamu nsañu yayiwahi. A Yinsahu amavulu anakushimwina kuzatisha iyi njila. Ekalaña nampinji yakushimwina antu kuyitesheni yamasuwa niyamabasi, kuyisankanu, kwahembelañawu atunyama nikumaluña amakwawu kwawanikaña antu amavulu. Kuhitila mukuzatisha wuñaji wawuwahi, Chinsahu nateli kutachika kuhanjeka namuntu kuhitila mukuhosha hansañu yabidikawu hachisanji, kumuhamekela anyanindi hela kumwihula chinakwenda nyidimu yindi. Chakutwalekahu  nakuhanjeka, mukwakushimwina wukuhosha chikuma chamuNsona nakumwihula lwihu. Ñakwilu yamuntu kakavulu yaleteshaña mwakatwalekihu kuhanjeka haBayibolu.

17, 18. (a) Munateli kwikala ñahi ahamuka kushimwina kudi antu amavulu? (b) Mukudizila kwodi kudi Davidi chamuhamekeliyi Yehova hampinji yimunakushimwina?

¹⁷ Neyi kushimwina kudi antu amavulu kwayikalilaña, bayi mulekaku. Eddie, payiniya wamuMusumba waNew York, wadiña nakujinoka neyi wukutwesha kuhanjeka nawantu hadi antu amavulu. Ilaña chimwahitili mpinji, watwesheli. Chumanyi chamukwashili? Wahosheli nindi: “Hampinji yitwadiña nakudifukula kwachisaka, ami nañodami twadiña nakusandujola ñakwilu yansañu niyuma yahosheleñawu antu. Nawa twehwili Chinsahu wumu kutukwasha.” Chayinu mpinji Eddie nakutalila mpinji yakashimwinayi kudi antu amavulu.

¹⁸ Neyi mukwikala ahamuka nikwiluka chakushimwina nsañu yayiwahi, mukumwekesha nenu munakuyilaku hambidi. (Tañenu 1 Timotewu 4:15.) Kubombelahu, mukumuhameka Tata yetu wamwiwulu neyi cheliliyi Davidi wembili nindi: “Nukumukiswilaña Yehova nkisu mafuku ejima, kukanwa kami kukwikala yowu kumushimeka hohu. Muchima wami wukudisamba naYehova; muntu wawunda wakachitiya wakazañalala.” (Mas. 34:1, 2) Hadaha mudimu wenu wakushimwina wunateli kuletesha muntu wawunda kuzañalala mukudifukula kwalala.

19. Muloñadi kambuña aYehova washinshika chatelayi kwikala namuzañalu hela chakwila wudi mukukala kweneni?

¹⁹ Davidi wembili nindi: “Nyidimu yeyi yejima yakakusakilila, eyi Yehova; antu eyi ajila akakukiswila, nkisu. Akatena kulema kwawanta weyi, akashimuna ñovu yeyi, kulonda kutiyakesha kudi anyana kawantu niyelañayi yañovu, nimpuhu yakulema kwawanta windi.” (Mas. 145:10-12) Awa mazu amwekeshaña chatoñojokañawu aYinsahu ejima ashinshika aYehova. Indi neyi yikatu nikukula kwamujimba kunakuyikañesha kuzata mudimu wakushimwina? Mpinji yejima ilukenu nenu chimukushimwina nsañu yayiwahi kudi antu anakuyihemba, mudimu wenu wajila wunakumuhameka Nzambi yetu. Neyi mudi mukaleya muloña wachikuhwelelu chenu, nawa muhoshaña hachalala neyi chinatwesheki, chumichi chamutiyishaña Yehova kuwaha. (Yish. 27:11) Nawa neyi mukweti chisaka chambokelamu munsakililu ilaña mutwalekahu kwila yuma yakuspiritu mpinji yejima mukumutiyisha Yehova kuwaha. (1 Pet. 3:1-4) Munateli kumuhameka Yehova nikuyilaku hambidi kuspiritu nimumpinji yakala.

20, 21. Neyi anayinki nyidimu yayivulu mukuloñesha kwaYehova, munateli kukwasha ñahi amakwawu

²⁰ Yehova wukuyikiswila neyi mukutwalekahu kuyilaku hambidi kuspiritu. Hadaha munateli kuhimpaku chihandilu chenu kulonda mwikala nampinji yeneni yakushimwina chalala chaNzambi chakuchiñeja. Kubombelahu, neyi mukuyilaku hambidi nikudihana mukukwasha amanakwenu niahela. Nawa neyi mukuzataña nakudizoza muchipompelu, amanakwenu niahela amukeña Yehova akuyihameka, akuyikeña nawa akuyikwasha.

²¹ Hela chakwila tunazati yaaka yayivulu indi kwiji tukweji twantesha mumudimu waYehova, wejima wetu tunateli kuyilaku hambidi mukudifukula kwindi. Hanu dinu akwaKristu apama anateli kukwasha ñahi amaha kuyilaku hambidi kuspiritu? Tukadiza iyi nsañu muchibaaba chinalondelihu.