CHIBAABA CHAKUDIZA 51
Komana Mwamwiluka Yehova Chikupu?
“Awa eluka ijina deyi akakukuhweleleyi; muloña akukeñakeñañeyi, eyi Yehova, hiwunayumbuku.”—MAS. 9:10.
KAMINA 56 Itejenu Chalala Kwikala Chenu
NSAÑU YIDI MUCHIBAABA *
1-2. Yuma yamumwekeneni Angelito yinakutudizisha kwiladi?
KOMANA anvwali jenu hiyaYinsahu jaYehova? Neyi dimu, mwatela kwiluka nenu kwila mwikala ibwambu daYehova muloña wakwila wena hiyamabwambu jindi nehi. Hela chakwila anvwali jetu amukalakelaña Nzambi hela nehi, muntu-himuntu watela kwikala ibwambu daYehova halwindi.
2 Toñojokenu hayuma yamumwekeneni manakwetu Angelito. Wakulilili muchisaka chawaYinsahu. Hela chochu, hampinji yadiñayi kansi wadimweneña nindi washikilamu wanyi kwikala ibwambu naNzambi. Wahosheli nindi: “Nadiña nakumukalakela Yehova muloña dichelileña nichisaka chami.” Hela chochu, Angelito wafukwilihu kutañaña Izu daNzambi nikutoñojokahu chikupu nawa watachikili kulomba mpinji yejima kudi Yehova. Yumanyi yafuminimu? Angelito wahosheli nindi, “Nadizili nami njila yimu yinatela kuswininamu kwakwihi naTata yami Yehova, hikumwiluka.” Yuma yamumwekeneni Angelito yikutuletesha kutoñojoka hanawa malwihu alema: Chambwinyi chidi hakachi kakwiluka yuma yantesha hadi Yehova nikumwiluka chikupu? Nawa tunateli kumwiluka ñahi Yehova chikupu?
3. Chambwinyi chidi hakachi kakwiluka yuma yantesha hadi Yehova nakumwiluka chikupu?
3 Tunateli kutoñojoka netu twamwiluka Yehova muloña tweluka ijina dindi hela tweluka yuma Yahoshayi hela yelayi. Ilaña mukumwiluka Yehova mwabombela yuma yayivulu. Twatela kwikalaña nampinji yakudiza hadi Yehova nihayilwilu yindi yayiwahi. Neyi twila mwenimu dihu
hitukutachika kwiluka chaleteshaña yahoshi nikukoñamu. Chumichi chikutukwasha kwiluka neyi Yehova neteji yuma yitunakutoñojoka niyitunakwila. Neyi twiluka yuma yakeñañayi Yehova nindi twileña, chikutukwasha kuzatila hayuma yitunadizi.4. Kushinshika hayakutalilahu yamuBayibolu kukutukwasha ñahi?
4 Antu amakwawu anateli kutusekesha muloña wakukeña kumukalakela Yehova nawa anateli nikutukaanisha neyi tutachika kudikunda nawantu jindi. Ilaña neyi tumukuhwelela Yehova, hakatushiya kankawetuku. Tukutuña wubwambu wetu wahaya nyaaka naNzambi. Komana tunateli kumwiluka Yehova chikupu? Eña, tunateli! Yuma yelili amayala abula kuwanina adi neyi Mosi niMwanta Davidi, yamwekeshaña nawu tukutwesha. Chitukushinshikaña hayuma yeliliwu, tukwakula awa malwihu ayedi: Amwilukili ñahi Yehova? Nawa yumanyi yitukudizila kuyuma yeliliwu?
MOSI WAMWENI “OWU ABULAÑA KUMONAWU”
5. Mosi watondelihu kwiladi?
5 Mosi wafukwilihu kumukalakela Nzambi. Hadiñayi kwakwihi nayaaka 40, Mosi watachikili kudikunda nawantu jaNzambi, Aheberu, chatela amwiluki nawu “mwana kamwana wamumbanda waFwaru.” (Heb. 11:24) Mosi wakaanini kuya mpuhu. Mosi chakwashileñayi aIsarela adiña anduñu muEjipitu, welukili nindi wukumuhilisha Fwaru. Fwaru wadiña mwanta wañovu nankashi nawa aEjipitu amumweneña neyi nzambi. Chumichi chamwekesheli nawu Mosi wadiña nachikuhwelelu chakola. Mosi wakuhweleleli mudi Yehova. Chikuhwelelu chamuchidiwu dichaletesheli Mosi kwikala nawubwambu wakola naYehova muwumi windi wejima.—Yish. 3:5.
6. Yumanyi yitunateli kudizila kudi Mosi?
6 Chumanyi chitukudizilaku? Kufwana Mosi, wejima wetu twatela kufuukulahu: Komana tukutondahu kumukalakela Nzambi nikudikunda nawantu jindi? Twatela kudihana hakwila nawu tumukalakeli Nzambi nawa antu abula kumwiluka Yehova anateli kutukañesha. Ilaña neyi tumukuhwelela Tata yetu wamwiwulu, yena wukutukwasha.
7-8. Mosi watwalekelihu kudizadi?
7 Mosi watwalekelihu kudiza hayilwilu yaYehova nikwila nkeñelu Yindi. Chakutalilahu, Mosi chamulejeliwu kulombola muza waIsarela nakuwufumisha muwuduñu, wadikuhweleleli wanyi nawa watwalekelihu kumuleja Yehova nindi hanashikilimuku. Mazu ahosheliyi Nzambi kudi Mosi amwekesheli nawu wamutiyilili wushona, dichi wamukwashili. (Kwid. 4:10-16) Chafuminimu, Mosi watwesheli kushimuna nsañu yawunsompeshi kudi Fwaru. Dichi Mosi wamweni Yehova chazatishiliyi ñovu Yindi hakwamwina aIsarela nikumujilumuna Fwaru niamashidika indi haKaluñalwiji Kachinana.—Kwid. 14:26-31; Mas. 136:15.
8 Hanyima yakwila Mosi nayifumishi dehi aIsarela muEjipitu, atachikili kutooba. Hela chochu, Mosi wamweni Yehova chadiwunjikiliyi nawantu Afumishiliyi muwuduñu. (Mas. 78:40-43) Mosi wamweni cheñi chadikehesheliyi Yehova chelili yahimpi yitoñojoka Yindi hanyima yakumuleja kudi Mosi nindi yabuli kuyikoña antu jindi mwatama.—Kwid. 32:9-14
9. Kwesekeja na Aheberu 11:27, wubwambu waMosi naYehova wadiña ñahi?
9 Hanyima yakufuma mwituña daEjipitu, Aheberu 11:27.) Bayibolu yamwekeshaña nawu wubwambu wawu wadiña wakola chikupu, chiyahosha nawu: “Yehova wahosheli naMosi mesu namesu, neyi chahoshañayi muntu nebwambu dindi.”—Kwid. 33:11.
wubwambu waMosi naYehova wakoleleliku chakwila watiyileña neyi kwiji wadiña nakumumona Tata yindi wamwiwulu. (Tañenu10. Chumanyi chitwatela kwila, hakwila nawu tumwiluki Yehova chiwahi?
10 Chumanyi chitukudizilaku? Hakwila nawu tumwiluki Yehova chiwahi, twatela kwiluka yilwilu yindi ninkeñelu yindi. Nkeñelu yaYehova yidi yakwila nawu “antu ejima ayamwini nawa nindi ekali nakwiluka kwalala kwakwiluka chalala.” (1 Tim. 2:3, 4) Twelaña nkeñelu yaNzambi kuhitila mukudizisha antu kulonda amwiluki Yehova.
11. Twamwilukaña ñahi Yehova nankashi neyi tunakudizisha akwetu?
11 Mpinji yejima yitwadizishaña akwetu hadi Yehova, diyi mpinji yitwamwilukaña nankashi. Chakutalilahu, twamonaña Yehova chatumwekeshelañayi wushona neyi yatukwasha kuwana antu adi nanyichima yashinshika yakukeña kwiluka chalala. (Yow. 6:44; Yil. 13:48) Tweluka netu Izu daNzambi dikweti ñovu, muloña dakwashaña atudizi etu aBayibolu kuleka yilwilu yatama nakuvwala wuntu wawuha. (Kol. 3:9, 10) Nawa twamonaña chadiwunjikayi Nzambi nawantu itwashimwinaña mwiluña detu muloña watutemeshaña kakavulu kuya nakuyikwasha.—Rom. 10:13-15.
12. Kwesekeja na Kwidika 33:13, chumanyi chalombeliyi Mosi nawa muloñadi?
12 Mosi walemesheli wubwambu windi naYehova. Nihanyima yakuzata nyidimu yañovu mwijina daNzambi, Mosi walombeli kudi Yehova nindi yamukwashi kulonda yamwilukishi. (Tañenu Kwidika 33:13.) Mosi wadiña nayaaka kubadika ha 80 halombeliyi chumichi, ilaña welukili cheñi nindi kwadiña yuma yayivulu yateleliyi kudiza hadi Tata yindi wamwiwulu wukweti kukeña.
13. Njilanyi yimu mutwatela kumwekeshela netu twalemesha wubwambu wetu naNzambi?
13 Chumanyi chitukudizilaku? Hela chakwila tunamukalakeli Yehova hadi yaaka yayivulu, twatela kukolesha chikupu wubwambu wetu. Njila yimu mutwatela kumwekeshela netu twalemesha wubwambu wetu naNzambi hikuhanjeka nindi mukulomba.
14. Kulomba kwatukwashaña ñahi kwiluka yuma yayivulu hadi Nzambi?
14 Neyi munakukeña kudikunda namuntu, mwatela kuhanjeka nindi kakavulu. Dichi swinenuña kwakwihi naNzambi kuhitila mukulomba mpinji yejima, bayi mutiyaña woma kumulejamu yuma yidi kumuchima wenuku. (Efwe. 6:18) Muhela Krista, washakamaña kuTurkey, wahosheli nindi: “Naswejaña kumukeña Yehova nikumukuhwelela neyi nimulejamu mukulomba chinnakutiya nawa namonaña chankwashañayi. Neyi nimona Yehova chakulañayi kulomba kwami, chankwashaña kumumona Yehova neyi Tata yami nawa Ibwambu dami.”
IYALA WATIYAÑAYI YEHOVA KUWAHA KUMUCHIMA
15. Yehova wamuteneni Mwanta Davidi nidindi?
15 Mwanta Davidi wavwalikilili mumuza wadihanini kudi Yehova Nzambi. Ilaña Davidi hamukalakeleleña Yehova muloña wachisaka chindiku. Wakolesheli wubwambu Yil. 13:22) Davidi waswinini ñahi kwakwihi naYehova?
windi naNzambi nawa Yehova wamukeñeli chikupu. Yehova wamuteneni Davidi nindi “iyala innatiyi kuwaha mumuchima Wami.” (16. Yumanyi yelukiliyi Davidi hadi Yehova kuhitila mukubanjila yileñaleña?
16 Davidi wamwilukili Yehova kuhitila muyileñaleña. Hadiñayi kansi wavulileña kuya mumasaña hadi mpinji yayilehi nakuhemba nyikoku yatata yindi. Hadaha diyi mpinji yatachikiliyi kutoñojoka hayuma yaleñayi Yehova. Chakutalilahu, Davidi chatalileñayi mwiwulu nawufuku, wamweneña tutumbwa twatuvulu nawa watoñojokeleña cheñi hayilwilu yaMuntu watuleñeli. Chumichi chamuletesheli kusoneka nindi: “Mawulu ashimunaña kulema kwaNzambi, luzwizu lwamwekeshaña wukalawenu windi.” (Mas. 19:1, 2) Chelili Davidi yatoñojoki hachaleñawu antu, welukili chawahayi Yehova. (Mas. 139:14) Chatoñojokeleñayi hayuma yaleñayi Yehova, Davidi wadikehesheli chikupu.—Mas. 139:6.
17. Yumanyi yitukwiluka neyi tutoñojokaña chikupu hayileñaleña?
17 Chumanyi chitukudizilaku? Shinshikenuña chikupu yileñaleña. Ikalenuña nampinji yakubanjila iseki dadiwahi daleñayi Yehova. Toñojokenuña yileñaleña yayinyeñumuka yidi neyi nkenu, anyama niantu chiyayidizishaña hadi Yehova muchihandilu chenu. Dikwila nawu ifuku nifuku mukwilukaña yuma yayivulu hadi Tata yenu wukweti kukeña. (Rom. 1:20) Nawa mukumonaña chimukuswejelañaku kumukeña mpinji yejima.
18. Neyi chinamwekeshiwu mu Masamu 18, Davidi welukili nindidi?
18 Davidi welukili nindi Yehova wadiña nakumukwasha. Chakutalilahu, chelili Davidi yakiñi nyikoku yatata yindi kudi mutupa nibera, welukili nindi Yehova diyi wamukwashili kujaha ana anyama ayisumi. Davidi chamushindiliyi Goliyati iyala wasweja kutaluka, welukili nindi Yehova diyi wamukiñileña. (1 Sam. 17:37) Nawa hampinji yamutemukiliyi Mwanta watama Sawulu, Davidi welukili nindi Yehova diyi wamukiñili. (Mas. 18, tumazu twahewulu) Muntu wadivwimba wadi kutoñojoka nindi wadiña nakwila yumiyi yomweni. Ilaña Davidi wadiña wadizoza, dichi welukili nindi Yehova diyi wamukwashileña muchihandilu chindi.—Mas. 138:6.
19. Yumanyi yitunateli kudizila kudi Davidi?
19 Chumanyi chitukudizilaku? Twatela kuzata nañovu chatela tulombeña hohu wukwashu kudi Yehova. Twatela cheñi kwiluka chatukwashañayi nimpinji yatukwashañayi. Neyi twadizoza, tukwiluka netu hitukutwesha kwila yuma muñovu yetuku, chiña nawukwashu waYehova. Nawa neyi tumona chatukwashañayi Yehova wubwambu wetu nayena wakolaña mpinji yejima. Manakwetu Isaac washakamaña kuFiji wunamukalakeli Yehova yaaka yayivulu weteja chumichi. Wahosheli nindi: “Kufuma tuhu mpinji yinatachikili kudiza Bayibolu namoni Yehova chinankwashiyi muchihandilu chami. Chinafumimu, neluki chekalayi Yehova.”
20. Yumanyi yitunateli kudizila kuwubwambu waDavidi naNzambi?
20 Davidi wembujoleli yilwilu yaYehova. Yehova watuleñeli nawuswa wakwimbujola yilwilu yindi. (Kutach. 1:26) Neyi tudizaña mpinji yejima hayilwilu yaYehova, chikutukwasha kumwimbujola chikupu. Davidi wamwilukili chiwahi Tata yindi wamwiwulu, dichi wadiña naKumwimbujola chakushakama nawantu. Shinshikenu hanichi chakutalilahu. Davidi wamuvulumwini Yehova mpinji yeliliyi wuvumbi naBatisheba nichamujahililiyi nfumwindi. (2 Sam. 11:1-4, 15) Ilaña Yehova wafukwilihu kumutiyila luwi muloña niyena watiyilileña amakwawu luwi. Muloña wakwila Davidi wadiña nawubwambu wawuwahi naYehova, aIsarela amukeñeli nankashi nawa Yehova wamuzatishili kwikala chakutalilahu kudi anyanta awaIsarela.—1 Anya. 15:11; 2 Anya. 14:1-3.
21. Kwesekeja na Aefwesesa 4:24 ni 5:1, yumanyi yafumañamu neyi twikala “akwakwimbujola Nzambi”?
21 Chumanyi chitukudizilaku? Twatela kwikala “akwakwimbujola Nzambi.” Neyi twila mwenimu, chikutukwasha nawa tukumwiluka chiwahi. Neyi twimbujola yilwilu yaNzambi, chikutukwasha cheñi kwiluka netu tudi anyanindi.—Tañenu Aefwesesa 4:24; 5:1.
FWILENUÑA KUMWILUKA CHIWAHI YEHOVA
22-23. Chumanyi chikamwekana neyi tuzatishaña yuma yitwadizaña hadi Yehova?
22 Neyi chitunamoni, Yehova wadimwekeshaña kudi etu kuhitila muyileñaleña niMwizu dindi Bayibolu. MuBayibolu mwekala yakutalilahu yawambuña aNzambi ashinshika itwatela kwimbujola, adi neyi Mosi naDavidi. Yehova nazati dehi lubadi lwindi. Chidi kudi etu, kuzata nañovu nikudiza hanakumini ñovu yetu hakwila nawu tumwiluki.
23 Tukaleka wanyi kudiza hadi Yehova. (Mukwa. 3:11) Bayi neyi yuma yitweluka hadi yena diyi yuma yasweja kulema hohuku, ilaña nichitwazatishaña yuma yitweluka. Dichi neyi tuzatishaña yuma yitunakudiza nikumwimbujola Tata yetu wukweti kukeña, wukatwalekahu kuswina kwakwihi nanetu. (Yak. 4:8) Watukana kuhitila mwizu dindi nindi hamba kashiya chisayikila ana amukeñakeñañaku.
KAMINA 80 “Tompenu Mutiyi Chawahayi Yehova”
^ para. 5 Antu amavulu akuhwelela nawu Nzambi wekala kwoku, ilaña hiyamwilukaku. Kumwiluka Yehova kwatalisha mudihi, nawa yumanyi yitukudizila kudi Mosi niMwanta Davidi kutalisha hakukolesha wubwambu wetu naYena? Achinu chibaaba chikwakula awa malwihu.