1. Antu amavulu amonaña ñahi nyidimu?

ANTU amonaña ñahi nyidimu kwiluña kumwashakamaña? Mumatuña amavulu antu anakudikita chikupu kubadika chazatileñawu kunyima. Antu azataña nankashi ekalaña wanyi nampinji yakunooka, kushakama nayisaka yawu hela kudiza yuma yakuspiritu. (Mukwa. 2:23) Munjila yikwawu antu amakwawu akeñaña wanyi kuzata nawa akeñaña mwakuleyela kulonda abuleña kuzata.—Yish. 26:13, 14.

2-3. Yumanyi yitwatela kwimbujola kudi Yehova niYesu?

² Kwambukaku, antu amavulu mukaayi azataña nankashi hela nehi, ilaña talenu chamonañayi Yehova niYesu mudimu. Tweluka netu Yehova wakeña kuzata. Yesu wahosheli hachumichi nindi: “Tata yami wuchidi kuzata kushika niyinu mpinji, ninami nawa nichidi kuzata.” (Yow. 5:17) Toñojokenu hamudimu wejima wazatiliyi Yehova hampinji yaleñeliyi añelu amavulu, tutumbwa kushilahu nimapulaneti. Twabanjilaña cheñi yuma yayivulu yayiwahi yaleñayi Nzambi hanu hamaseki. Ñimbi yamasamu wahosheli nindi: “Eyi Yehova, o nyidimu yeyi o kuvula! Wunayili yejima namaana; iseki dinenzali to-o namaheteyi.”—Mas. 104:24.

³ Yesu wamwimbujoleli Tata yindi. Mwana wamukwashiliku Nzambi “haloñesheliyi mawulu.” Wadiña naYehova hamu nawa wadiña “mukalawenu.” (Yish. 8:27-31) Nawa, chelili Yesu yenzi hamaseki wazatili mudimu walema chikupu. Yesu wahosheli nindi iwu mudimu wadiña neyi yakuda kudi yena nawa mudimu wazatileñayi wamwekesheli nawu Nzambi diyi wamutumini.—Yow. 4:34; 5:36; 14:10.

4. Yumanyi yitunateli kudizila kudi Yehova niYesu kutalisha hakunooka?

 ⁴ Komana chazatañayi Yehova niYesu nañovu chinayi mukwila nawu twatela kunooka wanyi? Inehi mwani. Yehova hazeyañaku, dichi hakeñaña kunooka hanyima yakuzata mudimuku. Ilaña Bayibolu yahoshaña nawu hanyima yakwila Yehova naleñi dehi mawulu nimaseki, “hakunooka, hakutiya nihi-i.” (Kwid. 31:17) Hela chochu, chumichi chaya mukwila nawu Yehova walekeli kuleña nawa wadiña nampinji yakudiluñisha nayuma yaleñeliyi. Cheñi, hela chakwila Yesu wadikitileña nankashi hadiñayi hamaseki, wadiña nampinji yakunooka nikudila hamu nawamabwambu jindi.—Mat. 14:13; Luka 7:34.

5. Chumanyi chayikalilaña antu amavulu?

⁵ Bayibolu yakoleshaña antu jaNzambi kudiluñisha nanyidimu. Ambuña indi atela kwikala adikita bayi ankopiku. (Yish. 15:19) Hadaha mwazataña mudimu wakumujimba kulonda mwakameneña chisaka chenu. Nawa atumbanji twaKristu ejima akweti mudimu wakushimwina nsañu yayiwahi. Ilaña atela kwikala cheñi nampinji yakunooka. Komana mpinji yikwawu chayikalilaña kwambulaku mpinji yakuzata nyidimu, yakushimwina nimpinji yakunooka? Tweluka ñahi mpinji yitwatela kuzata nikunooka?

6. Maku 6:30-34 yinakumwekesha ñahi nawu Yesu wambwili mpinji yakuzata nimpinji yakunooka?

⁶ Chalema kwambulaku mpinji yakuzatilamu nyidimu. Mwanta Solomoni amoneneni kusoneka nawu: “Yuma yejima yikweti yilaaka yayu.” Wateneni kuuka, kutuña, kudila, kuseha ninyidimu yikwawu. (Mukwa. 3:1-8) Chakadi nikujina, yuma yalema nankashi muchihandilu chamuntu hikuzata nikunooka. Mpinji yimu yafumineñawu atumbanji nakushimwina azeyeli chikupu muloña “hiyadiña nampinji yakunooka hela kudaku.” Yesu wayilejeli nindi: “Tuyenu kwakankawetu kulonda tunookihu chanti.” (Tañenu Maku 6:30-34.) Hela chakwila yena niatumbanji twindi hiyekalileña nampinji yeneni yakunookaku, Yesu welukili nindi atela kunooka.

7. Kwiluka nshimbi yahosha haSabata kukutukwasha ñahi?

⁷ Mpinji yikwawu twatela kwikala nampinji yakunooka hela kuhimpa nzatilu yetu. Tunateli kudizila kunshimbi yalema yashiliku Nzambi hadi antu jindi kunyima, nshimbi yakuhemba Sabata. Hitudi muNshimbi jaMosiku; ilaña tunateli kudizilaku neyi twiluka chiyahosha hansañu yaSabata. Yuma yitwadizaña yinateli kutukwasha kumona neyi chakwila twambulaña mpinji yakuzata nimpinji yakunooka.

8. Kwesekeja na Kwidika 31:12-15, Sabata yadiña ifuku danka?

⁸ Izu daNzambi dashimuna nawu Nzambi walekeli kuleña yuma hamaseki, hanyima ‘yamafuku’ 6. (Kutach. 2:2) Hela chochu, Yehova wakeña kuzata nawa munjila yikwawu “wuchidi kukalakala.” (Yow. 5:17) Yehova wazatili hadi “mafuku” 6 nawa wanokeli hefuku damu 7. Kuhiñahu wayilejeli aIsarela kwila chochimu. Nzambi wahosheli nindi Sabata yadiña chinjikijilu hakachi kayena nawaIsarela. Dadiña hifuku “[dakunooka] kwalema, dajila dambala daYehova hohu.” (Tañenu Kwidika 31:12-15.) Antu ejima ayikaanishileña kuzata kushilahu  anyana, anduñu niyimuna. (Kwid. 20:10) Yaletesheleña antu kusha maana kuyuma yakuspiritu.

9. Yitoñojokanyi yaheña yadiña nawantu kutalisha haSabata?

⁹ Ifuku daSabata dadiña hifuku dadiwahi kudi antu jaNzambi; hela chochu, anlomboli amumafuku aYesu atuñili nshimbi jakala kutalisha hakwovwahila nshimbi yaSabata. Ahosheleña nawu chadiña chaluwa hela kunona tidiku nakuda hefuku daSabata hela kuuka muntu wakata. (Maku 2:23-27; 3:2-5) Ilaña dichakeñeleñayi Nzambi wanyi, nawa Yesu wayilumbulwilileña antu adiña nakumutiyilila.

10. Kwesekeja na Matewu 12:9-12, Yesu wamweneña ñahi ifuku daSabata?

¹⁰ Yesu niatumbanji twindi aYudeya adiña nakunooka haSabata muloña adiña muNshimbi yaMosi. * Ilaña Yesu wamwekesheli mumazu nimuyilwilu nindi hichadiña chaluwa kwila yuma yayiwahi nikukwasha antu amakwawu hefuku daSabataku. Wahosheli hatooka nindi: “Nshimbi yeteja kwila chuma chachiwahi haSabata.” (Tañenu Matewu 12:9-12.) Hatoñojokeli nindi chadiña chaluwa kwila yuma yayiwahi hefuku daSabataku. Yuma yeliliyi Yesu yamwekesheli nawu welukili chikupu muloña waweni Nzambi chalejeleliyi antu jindi kunooka hefuku daSabata. Chineli antu jaNzambi adiña nakunooka hefuku daSabata, ashileña maana kuyuma yakuspiritu. Yesu wakulilili muchisaka  chadiña nakudifukula kudi Nzambi hefuku daSabata. Tweluka chumichi muloña dichitwatañaña hadi Yesu hadiñayi mumukala windi waNazareta nawu: “[Yesu] weñilili musinagogi nawa wemeni kulonda yatañi Nsona neyi chochelileñayi hefuku daSabata niSabata.”—Luka 4:15-19.

11. Hinyi wadiña nakwimbujolayi Yesu kutalisha hanyidimu?

¹¹ Yosefu wamudizishili Yesu mudimu wakusoña nawa wamulejeli chamonañayi Nzambi mudimu. (Mat. 13:55, 56) Yesu wamweneña Yosefu chadikitileñayi ifuku nifuku kulonda yakameni chisaka chindi. Chasweja kulema, Yesu walejeli niatumbanji twindi nindi: “Mukwakukalakala watelela kumwinka wufwetu windi.” (Luka 10:7) Mwamweni, Yesu wadiña wadikita chikupu.

12. Nsonanyi jinakumwekesha chahosha Bayibolu kutalisha kukuzata chikupu?

¹² Kapostolu Pawulu niyena wadiña wadikita. Mudimu windi wadiña wakuleja antu kulonda amwiluki Yesu niyuma yadizishileñayi. Hela chochu, Pawulu wadizatilileña kulonda yadikwasheña yomweni. Antu amuTesalonika elukili “nyidimu [yindi] yakola nikukabakana” kwindi, chazatileñayi “wufuku nimwaana” kulonda yabuli kwinka “muntu hela wumu chiteli.” (2 Tes. 3:8; Yil. 20:34, 35) Chasonekeliyi Pawulu kutalisha kumudimu windi, hadaha wahosheleña hamudimu windi wakuchima matenti. Hadiñayi muKorinda washakamini kwitala daAkwila naPrisila nawa “wazatilileña hamu nawu muloña elukili mudimu wakuchima matenti.” Chahosheliyi Pawulu nindi wazatileña “wufuku nimwaana” hatalishili mukwila nindi wazatileña chakadi kunookaku. Hefuku daSabata wachimineña wanyi matenti. Hanidi ifuku, wadiña nampinji yakuyishimwina aYudeya abulileña kuzata haSabata.—Yil. 13:14-16, 42-44; 16:13; 18:1-4.

13. Yumanyi yitukudizila kudi Pawulu?

¹³ Tunateli kudizila kuyuma yeliliyi kapostolu Pawulu. Wazatileña mudimu wakumujimba, ilaña wakalakeleña mafuku ejima “mudimu wajila wakushimwina nsañu yayiwahi yaNzambi.” (Rom. 15:16; 2 Kor. 11:23) Wakolesheli amakwawu kwila chochimu. Hela chochu, Akwila naPrisila adiña “akwakukalakala hamu [nindi] mudi Kristu Yesu.” (Rom. 12:11; 16:3) Pawulu wayilembeleli akwaKorinda kwikala nayuma “yayivulu yakuzata mumudimu waMwanta.” (1 Kor. 15:58; 2 Kor. 9:8) Yehova wamoneneni kapostolu Pawulu kusoneka nindi: “Neyi muntu nakukeña kuzata wanyi, bayi yadaku.”—2 Tes. 3:10.

14. Yesu watalishili mudihi chahosheliyi mazu ekala haYowanu 14:12?

¹⁴ Mudimu wasweja kulema wutwatela kuzata makonu hikushimwina nikwilisha atumbanji. Yesu wahosheli nindi atumbanji twindi akakoña nyidimu yayivulu kubadika yazatiliyi yena! (Tañenu Yowanu 14:12.) Hatalishili mukwila nindi ninetu tukakoñaña yihayamisha neyi yenaku. Ilaña nindi akwakumulondela akashimwinaña nikutañisha mumaluña amavulu, kudi antu amavulu nikuzata mpinji yayilehi kubadika yena.

15. Malwihwinyi itwatela kudihula, nawa muloñadi?

¹⁵ Neyi mwazataña mudimu wakumujimba dihulenu nenu: ‘Komana añiluka nawu nekala wadikita chikupu? Namanishaña mudimu wami mumpinji nikuzata hakumina ñovu jami?’ Neyi mwakula nenu eña, dikwila nawu mukulumpi wenu wamudimu wukuyikuhwelela. Nawa niantu kumudimu kumwazataña akukeñaña kutiya nsañu  yayiwahi. Dihulenu awa malwihu kutalisha kumudimu wakushimwina nenu: ‘Komana añiluka nawu nashimwinaña chikupu? Naloñeshaña chiwahi chakushimwina halwendu lwatachi? Nafuntilaña kudi antu anamwekeshi mpwila? Nawa komana mpinji yejima nazatishaña njila jamboka-mboka jakushimwinamu?’ Neyi mukwiteja, dikwila nawu mukwikala namuzañalu mumudimu wenu wakushimwina.

16. Yesu niapostolu amweneña ñahi kunooka, nawa chumichi chinambukiku ñahi nachakwimonañawu antu makonu?

¹⁶ Yesu welukili nindi kudi mpinji yateleleliyi kunooka hamu nawapostolu. Hela chochu, antu amavulu akunyima niamakonu adi neyi iyala samaheta wamuchishimu chaYesu. Iwu iyala wadeteli hantulu nindi: “Ichi dinu dinookeleña kweyi, daña, nwaña nawa diluñisheña eyi aweni.” (Luka 12:19; 2 Tim. 3:4) Watoñojokeleña nindi yuma yalema muchihandilu hikunooka nimaheta. Kwambukaku, Yesu niapostolu hiyashili maana hakudizañalesha aweniku.

17. Twazatishaña ñahi mpinji yetu mumafuku etu akunooka?

¹⁷ Makonu, twamwimbujolaña Yesu kuhitila mukuzatisha mafuku etu akunooka, kuya nakushimwinamu nsañu yayiwahi kudi antu nikuya nakupompa. Mwalala, twalemesha nankashi kwilisha atumbanji nikuya nakupompa. Dichi twazataña hakumina ñovu yetu kulonda tumukalakeli Yehova muniyi njila. (Heb. 10:24, 25) Hela chakwila tunayi nakunooka, twapompaña kwejima kutwayaña nawa twashimwinaña antu itwawanaña.—2 Tim. 4:2.

18. Mwanta wetu Yesu Kristu nakukeña nindi twilidi?

¹⁸ Twazañalalaña kwiluka netu Mwanta wetu Yesu Kristu hakeñaña nindi tuzateña kubadika muñovu jetuku, ilaña watukwashaña kwambulaku mpinji yakuzata niyakunooka. (Heb. 4:15) Wakeñaña nindi tunookeña. Wakeñaña cheñi nindi tuzateña nañovu kulonda tudakameneña kumujimba nikuzataku mudimu wakwilisha atumbanji. Muchibaaba chinalondelihu, tukahanjeka hayuma yelayi Yesu hakutukuula kuwuduñu.