“Sakililenuña haYuma Yejima”
KOMANA mwasakililaña? Wejima wetu twatela kutoñojoka hanilu lwihu. Bayibolu yashimwineñahu dehi nawu antu amavulu akekala “abulaña kusakilila.” (2 Tim. 3:2) Hadaha mwawanahu dehi antu akeñaña nawu akwawu ayizatileña hela kuyinka hohu. Chinamwekani neyi awa antu atoñojokaña nawu atela kusakilila wanyi hayuma yayililañawu. Chakadi nikujina, munateli kwiteja nenu twatiyaña wanyi kuwaha kwikala nawantu amuchidiwu.
Kwambukaku, ambuña aYehova ayileja nawu: “Sakililenuña.” Dichi twatela ‘kusakililaña hayuma yejima.’ (Kol. 3:15; 1 Tes. 5:18) Chachiwahi kwikala namuchima wakusakilila. Kudi yuma yatela kutuleñela kwikala namuchima wakusakilila.
KUSAKILILA KWATUKWASHAÑA KWIKALA NAMUZAÑALU
Muloña wumu walema wutwatela kwikalila namuchima wakusakilila wudi wakwila nawu kwatukwashaña kwikala namuzañalu. Muntu wasakililaña wekalaña namuzañalu nimuntu wasakililañayi watiyaña kuwaha. Muloñadi kusakilila chikwatuzañaleshelaña hamu nimuntu wutunasakilili? Chakutalilahu, neyi muntu yafuukulahu kuyilila chuma chimu dikwila nawu namoni nindi chumochu chayitelela. Chumichi chamwekeshaña nawu wayakamenaña. Neyi mwiluka chumichi chikuyizañalesha. Dichatiyiliyi niLuti. Bowazi wamumwekesheleli chisambu. Dichi chelili Luti yamoni nindi Bowazi wamwakameneneña, chamuzañalesheli chikupu.—Luti 2:10-13.
Chalema nankashi kumusakilila Nzambi. Chakadi nikujina, mwatoñojokaña hayuma yayivulu yakuspiritu niyakumujimba yayililayi niyinakuyililayi. (Kuhit. 8:17, 18; Yil. 14:17) Chatela mwikali nakampinji kantesha kakutoñojoka hayuma yayililayi Nzambi, mwatela kwikala nampinji yeneni yakutoñojoka hayuma yayivulu yayinkañayi Nzambi hamu nawantaña jenu. Neyi mutoñojokaña nankashi hachisambu chaNleñi yenu chikuyikwasha kumusakilila nankashi nikutoñojoka chikupu chayikeñayi nichayilemeshayi.—1 Yow. 4:9.
Twatela kutoñojokaña nankashi hayuma yatwinkañayi Yehova nikumusakilila cheñi hakuwaha kwindi. (Mas. 100:4, 5) Antu ahoshaña nawu “kusakilila kwaleteshaña antu kwikala namuzañalu.”
WUBWAMBU WETU WAKOLAÑA NEYI TUSAKILILAÑA
Chuma chikwawu chawahila kusakilila chidi chakwila nawu wubwambu wetu wakolaña. Wejima wetu twakeñaña kutusakilila. Neyi musakilila muntu wunayilili chuma, chikuyikwasha kwikala amabwambu. (Rom. 16:3, 4) Kubombelahu, antu asakililaña ekala namuchima wakukwasha amakwawu. Neyi ayikwasha kudi akwawu chumichi chayileñelaña niwena kukwasha akwawu. Mwalala, kukwasha amakwawu kwaletaña muzañalu. Neyi chahosheliyi Yesu nindi: “Mukuhana mwekala muzañalu chikupu kubadika wekala mukutambwila.”—Yil. 20:35.
Robert Emmons, mukulumpi wahaUniversity yaCalifornia wadiza hakusakilila wahosheli nindi: “Hakwila nawu tusakilileña, twatela kwiluka netu twashindamena hadi akwetu. Mpinji yikwawu twahanaña nawa mpinji yikwawu twatambwilaña.” Hakwila nawu tuhandi nikwikala namuzañalu twashindamenaña hadi akwetu. Chakutalilahu, anateli kutwinka yakuda hela kutukwasha 1 Kor. 12:21) Muntu wasakililaña, wasakililaña yuma yejima yamwililañawu kudi akwawu. Komana ninenu mwasakililaña hayuma yayililaña akwenu?
neyi tunakati. (KUSAKILILA KUNATELI KUYIKWASHA KUMONA YUMA MUNJILA YAYIWAHI
Chuma chikwawu chatuleteshaña kusakilila chidi chakwila nawu chatukwashaña kusha maana hayuma yayiwahi kubadika hayuma yatama. Twashaña maana hayuma yayiwahi chatela tusheña maana hakukala kutwamonaña. Neyi musakililaña chikuyikwasha kumona yuma yayiwahi nawa chikuyileñeleña kusweja kusakilila. Neyi mutoñojokaña hohu hayuma yimunateli kusakilila chikuyikwasha kwila chuma chahosheliyi kapostolu Pawulu nindi: “Zañalelenuña mudi Mwanta mpinji yejima.”—Fwi. 4:4.
Neyi mwikala akwakusakilila chikuyikwasha kubula kutoñojoka hayuma yatama. Chekala chakala nankashi kwikala mukwakusakilila nawa hampinji yoyimu wunakutiya ichima, wunaneñi hela wunahili. Antu asakililaña hiyafwilaña kwikala nayuma yayivulu yakumujimbaku. Alemesha yuma yikwetiwu nawa hiyafwilaña kwikala namaheta amavuluku.—Fwi. 4:12.
TOÑOJOKENU HAYUMA YAYIWAHI YANAYILILIWU
Chineli mudi akwaKristu, muneluki nenu Satana wukukeñaña kuyineñesha nikuyizeyesha kuhitila muyihuñu yimunakumona munanu mafuku akukuminina. Yena watiyaña kuwaha neyi mwikala nayilwilu yatama nikutooba. Neyi mwikala muniyi njila, antu akuyitiyilila wanyi neyi munakuyishimwina nsañu yayiwahi. Hela chochu, kusakilila kwendelaña hamu nanyikabu yaNzambi yaspiritu, kushilahu nikuzañalala nayuma yayinkayi Nzambi nikukuhwelela muyikaninu yindi yejima.—Ñal. 5:22, 23.
Chineli mudi antu jaYehova, mukwiteja yuma yinahoshiwu muchinu chibaaba kutalisha hakusakilila. Ilaña, chapela wanyi kusakilila mpinji yejima nikwikala namuzañalu. Bayi mwiteja chumichi kuyizeyeshaku. Munateli kwikala nanichi chilwilu nikutwalekahu kuchimwekesha. Munjilanyi? Ifuku nifuku Ikalenuña nampinji yakutoñojoka hayuma yayiwahi yayililawu muchihandilu yimwatela kusakilila. Neyi mutwalekahu kwila mwenimu, mukwikala namuchima wakusakilila. Nawa mukwikala namuzañalu chikupu kubadika antu atoñojokaña hohu hakukala kwawu. Toñojokenuña hayuma yayiwahi yayikoñelayi Nzambi niantu amakwawu yayikoleshaña nawa yayizañaleshaña. Hadaha mwatela nikuyisoneka. Mwatela nikusoneka yuma yiyedi hela yisatu yayileteshaña kusakilila hefuku-hefuku.
Akwakusandujola awana nawu “neyi tusakililaña antu mpinji yejima, yitoñojoka yetu yahimpikaña nawa chatukwashaña kwikala namuzañalu muchihandilu.” Muntu wasakililaña wekalaña namuzañalu. Toñojokenu hayuma yayiwahi yejima yimunatambwili, diluñishenu nayuma yayiwahi yayimwekenaña nawa sakililenuña. Chatela mumoneña yuma yayiwahi nenu yamukunkulu, “musakililenu Yehova himuwahi.” Eña, “sakililenuña hayuma yejima.”—1 Kushi. 16:34; 1 Tes. 5:18.