1-2. (a) Jubili hichumanyi? (Talenu chikasha chinakwila nawu “ Jubili Yadiña hiChumanyi?”) (b) Yesu wahosheli hachumanyi kwesekeja naLuka 4:16-18?

MUMATUÑA amakwawu mwekala ntanjikilu yakwanakana yaaka 50 yakuyuula kwamwanta weyala hela wamumbanda. Yaaka 50 yakuyuula kakavulu ayitenaña nawu jubili. Ifuku dakwanakana jubili dekalaña dimu, mulungu wumu hela kubadikahu, ilaña denzaña nakukuma nawa muzañalu wekalañaku watwalekañahu wanyi.

² Tukuhanjeka hajubili yasweja kuwaha, kubadika yanakeneñawu aIsarela neyi munahiti dehi yaaka 50. Ichi chidika chayikwashileña aIsarela kwikala asubuka. Muloñadi chitwatela kudizila iyi nsañu makonu? Muloña Jubili yawaIsarela yatwanukishaña njila yayiwahi yatuloñeshelayi Yehova. Yikatukwasha kwikala nakusubuka kwahaya nyaaka nawa tunakudiluñishaku nimakonu. Yesu wahosheli haniku kusubuka kwakuwahi.—Tañenu Luka 4:16-18.

3. Kwesekeja na Alevi 25:8-12, aIsarela adiluñishileña ñahi nachidika chaJubili?

³ Tukutiyishisha chiwahi mwatalishiliyi Yesu chahosheliyi hakusubuka chitukuhanjeka hajubili yaloñesheleliyi Nzambi antu jindi akunyima. Yehova wayilejeli aIsarela nindi: “Mwakajilikaña mwaka wamakumi atanu, akabideki mwahita ituña, akayishimwini antu ejima ashakamamu kufuma muwuduñu kunenzi dehi; wakekalaña mwaka wenu wajubili, mwakafuntafuntaña wejima wenu, iwu kumpata yindi yaheteliyi, iwu kuchisaka chindi.” (Tañenu Alevi 25:8-12.) Muchibaaba chinafumuhu, twahanjekeli hadi aIsarela chadiluñishileñawu nachidika chaSabata. Hanu dinu, aIsarela  adiluñishileña ñahi nachidika chaJubili? Chakutalilahu, kaIsarela neyi wudi namukudi weneni walandishileña mpata yindi kulonda yafweti kumukudi. Neyi ashika hamwaka waJubili, amufuntishilileña mpanta yindi. Chafumineñamu, “wafuntileña kumpata yindi yaheteliyi” nawa iseka dawanyanindi dajimbeleña wanyi. Munjila yikwawu, muntu wadiña namukudi weneni neyi yamona nindi wukutwesha kufuntisha wanyi wadihanineñaku yomweni hela mwanindi kulonda yekali nduñu. Hamwaka waJubili nduñu wafuntileña “kuchisaka chindi.” Dichi antu ejima adiña muwuduñu akuhweleleli nawu akafunta kuyisaka yawu. Iyi ntanjikilu yamwekesheleña nawu Yehova wadiña nakwakamena antu jindi.

4-5. Muloñadi chitwatela kwilukila nsañu yahosha haJubili makonu?

⁴ Kuwahanyi kukwawu kwadiña muJubili? Yehova walumbulwili nindi: “Kudeyi hikwakekala atuzweñuku; muloña Yehova wakabadika kukukoolekesha mwituña dakukwinkayi Yehova Nzambi yeyi dawuswana wakuheta.” (Kuhit. 15:4) Chumichi chinambukiku chikupu nachidi yuma makonu, tunakumona aheta anakuhetelaku nawa atuzweñi niwena wuzweñi wunakuswejelaku.

⁵ Etu akwaKristu hitwekala muNshimbi jaMosiku. Dichi, hitwalondelaña lushimbi lwaJubili lwakumbaku anduñu, kwanakena nyikudi, nikufuntisha jimpata jawantuku. (Rom. 7:4; 10:4; Efwe. 2:15) Hela chochu, twatela kwiluka nsañu yahosha haJubili. Muloñadi? Muloña tunateli kudiluñisha nakusubuka hela kukuulika, kwatwanukishaña ntanjikilu yashiliku Yehova hadi aIsarela.

6. Antu anakukeña kwikala asubuka kuchumanyi?

⁶ Wejima wetu tunakukeña kwikala asubuka muloña tudi muwuduñu wanshidi, dikwila nawu wuduñu watama. Chineli tudi akwanshidi, twashinakajaña, twakataña nikufwa. Amavulu elukaña chumichi neyi aditala muchibanjilu hela aya kudi ndotolu nakuyuuka.  Cheñi twaneñaña neyi tunavulumuni. Pawulu wahosheli nindi amutwalili “muwunkoli walushimbi lwanshidi [lwadiña mumujimba windi].” Wabombelelihu nindi: “Yayo-o, ami nshona! Hinyi wukuñamwina kuniwu mujimba wunakuntwala kuniku kufwa?”—Rom. 7:23, 24.

7. Isaya waprofweteli nindidi kutalisha hakusubuka?

⁷ Nzambi washaku ntanjikilu yakutupulwisha hela kutukuula kunshidi. Yesu diyi watupeleshelaku njila yakwikalilamu asubuka. Yaaka 700 yahitilihu henohu Yesu kanda yenzi hamaseki, kaprofwetu Isaya waprofweteli nindi kumbidi antu akekala nakusubuka kwakweni kubadika kwadiña nawaIsarela muchaaka chaJubili. Wasonekeli nindi: ‘Spiritu yaMwanta Yehova yidi hadami; muloña Yehova nanwayishi dehi manji nishimwini atuzweñi nsañu yayiwahi; nantemeshi kulonda nikasakasi chachiwahi abaluka nyichima ankoli niyibidiki jakusubuka.’ (Isa. 61:1) Iwu wuprofwetu wahoshaña hadi anyi?

8. Wuprofwetu waIsaya wahosha hakusubuka wakundama kudi anyi?

⁸ Iwu wuprofwetu wakusubuka watachikili kushikijewa mpinji yatachikiliyi Yesu mudimu windi wakushimwina. Chayiliyi musinagogi yamuNazareta mumukala windi, Yesu wayitañilili aYudeya apompeli mazu aIsaya awuprofwetu. Yesu wahosheli awa mazu kutalisha kudi yomweni nindi: “Spiritu yaYehova yidi hadi ami, muloña wanwayishili kulonda nishimwini nsañu yayiwahi kudi atuzweñi. Wantemesheli nakuleja ankoli nsañu yakuyisubula nikutonesha amputamesu nikuumbaku antu akabishañawu. Wantemesheli cheñi kulonda niyileji mpinji yakayikiswilawu cheñi kudi Yehova.” (Luka 4:16-19) Yesu washikijili ñahi wuna wuprofwetu?

9. Kusubuka kwamuchidinyi kwakeñeleñawu antu amavulu amumafuku aYesu?

⁹ Mazu akukuulika hela kusubuka ashimwiniyi Isaya atañiliyi Yesu, atachikili kushikijewa mumafuku awapostolu. Tunakuhweleli chumichi muloña Yesu wabidikili nindi: “Dalelu, iyi nsona yimunatiyi yinashikijewi.” (Luka 4:21) Antu amavulu atiyili mazu atañiliyi Yesu atoñojokeli nawu wukuyisubula kumakasa awaRoma. Hadaha atiyili neyi chatiyiliwu ana amayala ayedi ahosheli nawu: “Tunakuhweleli netu iwu muntu diyi  wadi kwamwina aIsarela.” (Luka 24:13, 21) Ilaña Yesu halejeli akwakumulondela nindi adikañi nachiyuulu chawaRomaku. Ilaña wayilejeli nindi, “yuma yaKesari, mwinkenu Kesari.” (Mat. 22:21) Dichi Yesu waleteli ñahi kusubuka hayina mpinji?

10. Yesu wakwashili antu kwikala asubuka kuyumanyi?

¹⁰ Mwana kaNzambi wenjili nakukwasha antu kulonda ekali akuulewa hela asubuka munjila jiyedi. Njila yatachi, Yesu wakwashili antu kwikala asubuka kuntañishilu yakutwamba yawakulumpi jansakililu. A Yudeya amavulu yina mpinji adiña muwuduñu wakulondela mwaya yisemwa yawantu niyuma yamakudi. (Mat. 5:31-37; 15:1-11) Ana akwashileña akwawu kulonda amukalakeleña Nzambi, hiyadiña nakumukalakela chiwahiku, dichi adiña neyi amputamesu. (Yow. 9:1, 14-16, 35-41) Yesu wayimwekesheleli antu adizoza chiyatela kwikala asubuka kuntañishilu yakutwamba kuhitila muyuma yadizishileñayi niyelileñayi.—Maku 1:22; 2:23–3:5.

11. Njilanyi yamuchiyedi mwakwashililiyi Yesu antu kwikala asubuka?

¹¹ Njila yamuchiyedi mwakwashililiyi Yesu antu kwikala asubuka hikuyifumisha muwuduñu wanshidi waswaniniwu. Kuhitila mumulambu waYesu, Nzambi wanakenaña nshidi jawantu akweti chikuhwelelu nawa etejaña ifutu danyiloña Dahaniniyi. (Heb. 10:12-18) Yesu wahosheli nindi: “Neyi Mwana yayifumisha muwuduñu, mwakafuma muwuduñu chikupu.” (Yow. 8:36) Iku kusubuka kwabadika chikupu kusubuka kwadiña nawaIsarela hamwaka waJubili. Chakutalilahu, muntu wafumineña muwuduñu hamwaka waJubili, wekalileña cheñi nduñu nawa wafwileña.

12. Anyi atachi kudiluñisha kusubuka kwashimwiniyi Yesu?

¹² HaPentekosta 33 C.E.,Yehova wayiwahishili apostolu, amayala niambanda ashinshika naspiritu yindi yajila. Wayitondeli kwikala anyanindi kulonda akasañuki kumbidi nakuyuula hamu naYesu mwiwulu. (Rom. 8:2, 15-17) Awa diwu adiña atachi kudiluñisha kusubuka kwashimwiniyi Yesu musinagogi yamuNazareta. Awa antu hiyadiña cheñi muwuduñu wantañishilu yakutwamba yawanlomboli awaYudeya nitushidikilu twawu twabulili kwikala munsonaku. Nzambi niyena wamweni  nindi anasubuki kunshidi yatwalaña kukufwa. Jubili yachifwikija yatachikili mpinji yayiwahishiliwu akwakumulonda Kristu muchaaka cha 33 C.E. yikamana kumakumishilu aChiyuulu chaKristu chaYaaka Ikombakaji. Yumanyi yikamwekana haniyi mpinji?

13-14. Kubombela hadi awayishewa, anyi amakwawu anateli kudiluñisha kusubuka kwashimwiniyi Yesu?

¹³ Makonu, antu amavulu kufuma kunyuza yejima ekala mudi “anyikoku amakwawu.” (Yow. 10:16) Hiyayitonda kudi Nzambi kuya nakuyuula hamu naYesu mwiwuluku. Ilaña, Bayibolu yashimuna nawu akweti kuchiñeja kwakushakama hanu hamaseki haya nyaaka. Komana dikuchiñeja kumukweti?

¹⁴ Chayinu mpinji munakudiluñisha yuma yayiwahi yadiluñishañawu ana akekala kukabadi kaWanta waNzambi wamwiwulu. Chineli mwakuhwelela mumulambu waYesu, munateli kumulomba Yehova kulonda yayanakeni nshidi yenu. Chikufumamu, mukwikala nawubwambu wawuwahi naNzambi nawa mukwikala nachinleji chitooka. (Efwe. 1:7; Chim. 7:14, 15) Toñojokenu cheñi hankisu yimwadiluñishaña muloña wakusubuka kuntañishilu yakutwamba. Yesu wahosheli nindi: “Mukwiluka chalala, chalala nichena chikuyifumisha muwuduñu.” (Yow. 8:32)  Owu muzañalu wutukweti hakwikala naniku kusubuka!

15. Kusubuka kwamuchidinyi ninkiswinyi yitunakutalila kumbidi?

¹⁵ Kuhwelelenu nenu kusubuka kwakweni kunakwinza. Katataka Yesu yajilumuni ntañishilu yakutwamba ninfulumendi jawantu jatama. Nzambi wakakiña “izaza deneni” damukalakelaña, kuhiñahu wakayiteja kudiluñisha nkisu muparadisa hanu hamaseki. (Chim. 7:9, 14) Antu amavulu akayisañula nawa akekala nakukooleka kwakwikala asubuka kuyuma yatama yejima yafuma munshidi jaAdama.—Yil. 24:15.

16. Kusubukanyi kukatambwilawu antu kumbidi?

¹⁶ MuChiyuulu chaYaaka Ikombakaji, Yesu niantu akayuulañayi nawu akakwasha antu kwikala akola kumujimba nikwikala nawubwambu wawuwahi naNzambi. Iyi mpinji yakusubuka yikekala neyi Jubili yadiña muIsarela. Chumichi chinayi mukwila nawu, ejima amukalakelaña Yehova nakashinshi akekala awanina nawa akavulumunaña wanyi.

17. Isaya 65:21-23 yashimuna nawudi hadi antu jaNzambi? (Talenu mwevulu wudi hakava.)

¹⁷ Nsañu yawuprofwetu yakundama kuchihandilu chawantu hamaseki yekala haIsaya 65:21-23. (Tañenu.) Chihandilu hichakekala chakadi nyidimuku. Ilaña Bayibolu yamwekeshaña nawu antu jaNzambi hayina mpinji akazataña nyidimu yayivulu yayiwahi. Twatela kukuhwelela netu kumakumishilu aChiyuulu chaYaaka Ikombakaji daKristu, “yileñaleña niyena akayisubula kuwuduñu wakutoka nakwikala yasubuka mukulema kwawanyana kaNzambi.”—Rom. 8:21.

18. Muloñadi chitunateli kukuhwelela netu twakekala namuzañalu kumbidi?

¹⁸ Neyi chocheliliyi Yehova nawaIsarela, wayilejeli kwikala nampinji yakuzata niyakunooka, dichakelayi nawantu jindi muChiyuulu chaYaaka Ikombakaji daKristu. Kwakela nyidimu yakuspiritu yayivulu. Chalema kudifukula kudi Nzambi muloña kwatuletelaña muzañalu, nimwituña dadiha twakadifukulaña. Antu ejima ashinshika akekala namuzañalu muChiyuulu chaYaaka Ikombakaji daKristu muloña twakazataña nyidimu yayivulu yayiwahi nawa wejima wetu twakamukalakelaña Nzambi.