1. Yumanyi yafuminimu chelili Yosefu amutiyili ichima kudi amanakwindi?

YAKOBA wakeñeli anyanindi ejima, ilaña waswejeli kukeña mwanindi Yosefu wadiña nayaaka 17. Amana kwaYosefu elili ñahi? Amutiyilili ichima nawa ichima didaletesheli kumuhela. Kwosi chuma chatama cheliliyi Yosefu chaletesheli amanakwindi amuheliku. Hela chochu, Yosefu amulandishili muwuduñu nawa atwambili kudi tata yawu nawu mwanindi akeñayi anamudi kudi kanyama chisumi. Ichima daletesheli muchisaka mubuli kwikala kuwunda nawa tata yawu waneñeli nankashi.—Kutach. 37:3, 4, 27-34.

2. Kwesekeja naAñalija 5:19-21, ichima dataminadi?

² MuBayibolu ichima *didi hakachi ‘kanyidimu yamujimba wanshidi’ yinateli kuletesha muntu yakabuli kuswana Wanta waNzambi. (Tañenu Añalija 5:19-21.) Ichima didasañumunaña yilwilu yafwana yidi neyi kuhelañana, yikonkojola nikuzuwa.

3. Yumanyi yitukuhanjeka muchinu chibaaba?

³ Chuma chamwililiwu Yosefu kudi amanakwindi chinakumwekesha nawu ichima dinateli kuluwañesha kunuñañana nikuwunda kwekalaña muchisaka. Hela chakwila hitunateli kwila chuma cheliliwu amanakwa Yosefuku, wejima wetu twawanina wanyi nawa tukweti muchima wadimbanaña. (Yere. 17:9) Diyi yuma yaleteshaña mpinji yikwawu kutiyila akwetu ichima. Tushinshikenu yakutalilahu  yatusoñamishaña yidi muBayibolu yinateli kutukwasha kwiluka ichima chidinateli kutanda munyichima yetu. Nkumininaku, tukudiza yuma yitwatela kwila kulonda tutondolweli ichima nikuleta kuwunda.

4. Muloñadi aFwilistinu chamutiyililiwu Isaka ichima?

⁴ Neyi mukwetu waheta. Isaka wadiña waheta, ilaña aFwilistinu amutiyilili ichima muloña wamaheta indi. (Kutach. 26:12-14) Ashiikilili mashima mwadiña nakunwishilayi Isaka yimuna yindi. (Kutach. 26:15, 16, 27) Makonu antu amakwawu atiyilaña antu akweti maheta ichima neyi cheliliwu aFwilistinu. Afwilaña yuma yawakwawu, cheñi hiyakeñaña akwawu kwikala nayuma yikwetiwuku.

5. Muloñadi akulumpi jakwitiya chamutiyililiwu Yesu ichima?

⁵ Neyi muntu amukeña kudi antu amavulu. Akulumpi jawaYudeya amutiyilili Yesu ichima muloña amukeñeli nankashi kudi antu amavulu. (Mat. 7:28, 29) Yesu wadiña nakumwimenaku Nzambi nawa wadizishileña chalala. Hela chochu, akulumpi jakwitiya atandishileña makudi kulonda amutamishili Yesu ijina. (Maku 15:10; Yow. 11:47, 48; 12:12, 13, 19) Kusoñamishanyi kutunateli kudizila kuniyi nsañu? Neyi amanakwetu ayikeña nankashi muchipompelu muloña wayilwilu yawu yayiwahi, bayi tuyitiyilaña ichimaku. Ilaña twatela kwimbujola yilwilu yawu yayiwahi.—1 Kor. 11:1; 3 Yow. 11.

6. Diyotefwesi watiyili ñahi ichima?

⁶ Neyi mukwetu amwinka mudimu wakuzata muchipompelu. Mumafuku awapostolu, Diyotefwesi watiyilili ichima ana adiña nakulombola muchipompelu chawakwaKristu. Wakeñeleña “kwikala watachi” hakachi kawantu adiña muchipompelu, dichi watandishileña nsañu yamakudi hadi Yowanu niamanakwetu adiña nakulombola kulonda antu aleki kuyilemesha. (3 Yow. 9, 10) Hela chakwila hitukwila neyi chelili Diyotefwesiku, ninetu tunateli kutachika kutiyila akwetu akwaKristu ichima neyi anayinki mudimu wutwakeña, sweje neyi twiluka netu ninetu tweluka kuzata owu mudimu hadaha nikuyibadika.

7. Ichima dinateli kutuleñela kwiladi?

⁷ Ichima didi neyi matahu avumbishaña. Neyi ichima ditachika tuhu mumuchima wetu, chinateli kwikala chakala kudifumishamu. Ichima dasañumunaña yilwilu yikwawu yidi neyi lwisu, kudinka wanta, nikudikeña. Neyi matahu chakañeshañawu mbutu kukula chiwahi, ichima nidena dinateli kukañesha yilwilu yayiwahi yidi neyi kukeña, wushona niluwi. Neyi ichima ditachika kutaanda mudi etu, twatela kudifumisha swayi-swayi mumuchima wetu. Tunateli kutondolwela ñahi ichima?

8. Yilwilwinyi yinateli kutukwasha kutondolwela ichima?

⁸ Tunateli kutondolwela ichima neyi twikala adizoza nawa tuzañalalaña nayuma yitukweti. Neyi twikala naniyi yilwilu, hitukwikala nechimaku. Kudizoza kunateli kutukwasha kubula kusweja kutoñojoka netu twabadika akwetu. Muntu wadizoza hatoñojokaña nindi yena hohu diyi watelela yuma yejimaku. (Ñal. 6:3, 4) Muntu wazañalalaña nayuma yikwetiyi, hadesekejaña nawakwawuku. (1 Tim. 6:7, 8) Muntu wadizoza nawa wazañalalaña nayuma yikwetiyi, wazañalalaña neyi yamona mukwawu anamwinki chuma chachiwahi.

9. Kwesekeja naAñalija 5:16 niAfwilipi 2:3, 4, spiritu yajila yinateli kutukwasha kwiladi?

 ⁹ Tunakukeñeka wukwashu waspiritu yajila yaNzambi kulonda yitukwashi kutondolwela ichima nakwikala adizoza nikuzañalala nayuma yitukweti. (Tañenu Añalija 5:16; Afwilipi 2:3, 4.) Spiritu yaYehova yinateli kutukwasha kwiluka chidi yitoñojoka niyilwilu yetu. Nawukwashu waNzambi, tunateli kufumisha yitoñojoka yafwana mudetu nikuhiñishamu yayiwahi. (Mas. 26:2; 51:10) Tuhanjekenu hadi awamayala atondolweleli ichima, aMosi naPawulu.

10. Chumanyi chadi kumuleñela Mosi kutiya ichima? (Talenu mwevulu wudi hakava.)

¹⁰ Mosi wadiña nawuswa hadi antu jaNzambi, ilaña hakañesheli akwawu kwikala naniku kukoolekaku. Chakutalilahu, Yehova wafumishili ñovu jikwawu mudi Mosi nakwinka izanvu dawakulumpi amuIsarela emeni kwakwihi netenti dakubulakena. Hanyima yachumichi, Mosi watiyili nawu akulumpi ayedi abulili kwinza kwitenti dakubulakena niwena atambwilili spiritu yajila nawa atachikili kuprofweta. Hanu dinu welili ñahi chelili Yoshuwa yamuleji nindi yalekeshi ana akulumpi ayedi? Mosi hayitiyilili ichima hachawaana chayinkeliwu kudi Yehovaku. Ilaña wadizozeli nawa watiyili kuwaha chaprofweteleñawu. (Kuch. 11:24-29) Chumanyi chitwatela kudizila kudi Mosi?

11. Akulumpi anateli kumwimbujola ñahi Mosi?

¹¹ Neyi mudi akulumpi, ayilejahu dehi nawu mudizishi muntu mudimu wumwakeñesha muchipompelu? Chakutalilahu, hadaha mwakeña nankashi kulombola Kaposhi Kakutalila mulungu nimulungu. Ilaña neyi mwadizoza neyi Mosi, himukwakama nenu manakwenu wakayitambula mudimu neyi ayileja nawu mumudizishiku. Ilaña, mukutiya kuwaha kumudizisha.

12. AkwaKristu amavulu makonu amwekeshaña ñahi kudizoza nikuzañalala nayuma yikwetiwu?

¹² Talenu cheñi kukala kwamonañawu amanakwetu amavulu akula dehi. Hadi yaaka yayivulu yinahitihu, adiña anloñeshi amazanvu awakulumpi. Ilaña neyi anashikiji dehi yaaka 80, alekaña mudimu wawu mukudikeñela. Ankoñi añinza anashikiji yaaka 70 alekaña mudimu wawunkoñi nawa etejaña mudimu wacheñi. Nawa yaaka yinahitihu, antu amakwawu amuchisaka chaBeteli mukaayi kejima anakuyileja kufuma haBeteli nakutachika mudimu wukwawu wamukuloñesha. Awa amanakwetu niahela ashinshika hiyatiyilaña ichima antu azataña nyidimu yazatileñawuku.

13. Chumanyi chadi kuletesha Pawulu yatiyili apostolu 12 ichima?

¹³ Kapostolu Pawulu niyena wazañaleli nayuma yadiñayi nayu nawa wadiña wadizoza. Pawulu hetejeli ichima kwikala mudi yenaku. Wazatili nankashi mudimu wakushimwina, ilaña wadizozeli nakuhosha nindi: “Ami yami nakehelamu hakachi kawapostolu, nawa ami nateleli wanyi kuntena nawu kapostolu.” (1 Kor. 15:9, 10) Apostolu 12 adiña nakuzatila hamu naYesu mpinji yadiñayi hamaseki, ilaña Pawulu wekalili mukwaKristu hanyima yakumusañula Yesu. Hela chakwila amutondeli kwikala “kapostolu wawantu akunyuza,” Pawulu wadiña hakachi kawapostolu 12 wanyi. (Rom. 11:13; Yilw. 1:21-26) Chatela Pawulu yatiyili ichima ana amayala 12 muloña wawubwambu wadiñawu nawu naYesu, watwalekelihu kuzañalala namudimu windi.

14. Chumanyi chitukwila neyi tuzañalalaña nayuma yitukweti nawa tudizoza?

¹⁴ Neyi twazañalalaña nayuma yitukweti  nawa twadizoza, tukwikala neyi Pawulu nawa tukulemeshaña antu enkawu wuswa kudi Yehova. (Yilw. 21:20-26) Wayinka amayala atondawu mudimu wakulombola muchipompelu chawakwaKristu. Hela chakwila awanina wanyi, Yehova wayimonaña nindi ‘hiyawaana.’ (Efwe. 4:8, 11) Neyi tulemeshaña awa amayala atondewa nikwila yuma yinakutulejawu, tukuswina kwakwihi naYehova nawa tukwikala mukuwunda nawakwetu akwaKristu.

15. Chumanyi chitwatela kwila?

¹⁵ Neyi mukachi ketu mudi ichima, hitunateli kwikala mukuwundaku. Twatela kubwita ichima munyichima yetu kulonda tukwashi akwetu abuli kwikala nechima. Twatela kwila iyi yuma yalema kulonda twovwahileña lushimbi lwaYehova hakwila nawu “tufwileña yuma yaletaña kuwunda niyuma yatuleñelaña kudikolesha wumu namukwawu.” (Rom. 14:19) Chumanyi chitwatela kwila hakwila nawu tukwashi akwetu kulonda atondolweleña ichima, nawa tunateli kuleta ñahi kuwunda?

16. Tunateli kukwasha ñahi akwetu kubula kwikala nechima?

¹⁶ Yilwilu yetu niyuma yitwelaña yinateli kukwasha hela kuluwañesha akwetu. Kaayi kanakukeña nawu ‘tudisambeña’ nayuma yitukweti. (1 Yow. 2:16) Chilwilu chamuchidiwu chaleteña ichima. Twatela kutondolwela kuhosha hayuma yitukweti hela yitunakukeña  kulanda kulonda antu akwetu abuli kwikala nechima. Njila yikwawu yitunateli kukañeshelamu ichima, hikwikala adizoza nakukooleka kutukweti muchipompelu. Neyi tuhoshaña hayuma yitunakwila, tunateli kuleñela akwetu kwikala nechima. Kwambukaku, neyi twikala namuchima wakwakamena akwetu nikumona yuma yayiwahi yelañawu, tukuyikwasha kuzañalala nayuma yikwetiwu nawa tukwikala anuñañana nikuleta kuwunda muchipompelu.

17. Chumanyi cheliliwu amana kwaYosefu, nawa muloñadi?

¹⁷ Tunateli kushinda ichima. Talenu cheñi chuma cheliliwu amana kwaYosefu. Hanyima yakwila munahiti dehi yaaka kufuma hamukabishiliwu Yosefu, amuwanini muEjipitu. Henohu kanda yadilumbululi kudi amanakwindi nindi diyi Yosefu, wayesekeli kulonda yamoni neyi ahimpa yilwilu yawu. Waloñesheli yakuda nindi yadiili nawu hamu, dichi wamwinkeli manakwawu wakansi Benjamini yakuda yayivulu kubadika wena. (Kutach. 43:33, 34) Hela chochu, kwosi wunsahu wamwekeshaña nawu amanakwindi amutiyilili Benjamini ichimaku. Ilaña, amwakameneni manakwawu nitata yawu Yakoba. (Kutach. 44:30-34) Chelili amana kwaYosefu aleki ichima, aleteli cheñi kuwunda muchisaka chawu. (Kutach. 45:4, 15) Munjila yoyimu, neyi tubwita ichima munyichima yetu, tukukwasha chisaka chetu nichipompelu kwikala mukuwunda.

18. Kwesekeja naYakoba 3:17, 18, chumanyi chinateli kumwekana neyi tuletaña kuwunda?

¹⁸ Yehova nakukeña nindi tuleki ichima nawa tuleti kuwunda. Twatela kuzata nañovu kulonda twili iyi yuma. Neyi chitunahanjeki, twatiyaña lwisu. (Yak. 4:5) Nawa twashakamaña mukaayi munenzali ichima. Dichi neyi twikala adizoza, tuzañalalaña nayuma yitukweti nikusakilila, hitukwikala nechimaku. Ilaña, tukuleta kuwunda kulonda twikali nayilwilu yayiwahi.—Tañenu Yakoba 3:17, 18.