1. Chumanyi chinateli kuletesha twakameneña, nawa tunateli kutoñojoka netudi?

MWAKAMENAHU dehi hachuma chidi chejima? * Hadaha munakwakamena muloña wakwila ayineñesheli kudi mukwenu. Hela mwakamaña muloña wamazu imwahosheli hela yuma yimwelili. Chakutalilahu, hadaha mwaluwañesheli nawa mwakamenaña nenu Yehova hakayanakenaku. Chuma chinasweji kutama, munateli kutoñojoka nenu chineli munasweji kwakama, chikuhwelelu chenu chakola wanyi nawa mwatama. Komana dimu?

2. Yakutalilahwinyi yamuNsona yinakumwekesha nawu neyi tunakwakama hichinayi mukwila nawu hitukweti chikuhweleluku?

² Shinshikenu hayakutalilahu yantesha yamuNsona. Hana, mama yakaprofwetu Samweli, wadiña nachikuhwelelu chakola. Hela chochu, wadiña nakwakama chelili muntu wumu wamuchisaka yatachiki kumukabisha. (1 Sam. 1:7) Kapostolu Pawulu wadiña nachikuhwelelu chakola, ilaña wadiña nakukala ‘kwakwakamena yipompelu yejima.’ (2 Kor. 11:28) Mwanta Davidi wadiña nachikuhwelelu chakola nawa Yehova wamukeñeli chikupu. (Yilw. 13:22) Hela chochu, Davidi wakoñeli yiluwa yamuletesheli kwakama. (Mas. 38:4) Yehova wayikundejeli wejima wawu nikuyiwundisha. Tushinshikenu hayuma yitunateli kudizila kudi wena.

3. Indi nhoshelu yawantu amakwawu yinateli kutukojeja ñahi kwakama?

³ Neyi antu atuhoshela nezu dankalu hela chakadi luwi, tunateli kwakamena. Sweje-e neyi muntu wunatuneñeshi hibwambu itwadikunda nindi hela hintaña yetu. Tunateli kwakama netu hadaha wubwambu wetu wunateli kumana. Mpinji jikwawu muntu wunatuneñeshi nateli kuhosha chakadi kutoñojoka nawa tunateli kutiya tuhu neyi anatutapi nampoku yakabali! (Yish. 12:18) Hela muntu nateli kuhosha mazu anelukiyi nindi anateli kutukatisha. Dichuma chamumwekeneni muhela wakansi. Wahosheli nindi: “Yaaka yantesha yinahitihu, ibwambu dami inadikundili nindi watandishili nsañu yamakudi hadi ami haintaneti. Chankatili nawa nadakameneni. Nelukili wanyi chaleñeleli ibwambu dami yeli chuma chamuchidiwu.” Munateli kudizila kudi Hana neyi anayineñeshi kudi ibwambu denu imwadikunda nindi hela ntaña yenu.

4. Kukalanyi kweneni kwamweniyi Hana?

⁴ Hana wateleli kuumika kukala kwasweja chikupu. Hadi yaaka yayivulu havwelihu mwanaku. (1 Sam. 1:2) A Isarela amavulu atoñojokeleña nawu hinshinta, dikwila nawu washiñewa. Dichi chumichi chamutiyishileña Hana nsonyi. (Kutach. 30:1, 2) Chuma chaswejeli kutama kudi Hana chadiña chakwila nawu nfumwindi wadiña namumbanda mukwawu Penina, wamuvwalilileña nyana. Penina wamutiyilileña Hana ichima nawa “wamuvulokelaña nankashi kulonda kumutiyishaña kutama.” (1 Sam. 1:6) Hakusambila, Hana wakañenyi kuumika iku kukala. Waneñeleña chakwila “hakudilaña hohu [nikudaña] nawa nehi.” “Watiyili kumuchima bwi chikupu.” (1 Sam. 1:7, 10) Hanu dinu Hana wakundejeweli ñahi?

5. Kulomba kwamukwashili ñahi Hana?

⁵ Hana walombeli kudi Yehova nakumuleja chatiyileñayi. Hanyima yakwila nalombi dehi, wamulejeli Kapristu Muneni Eli kukala kwindi. Kuhiñahu Eli wamulejeli nindi: “Yaña kweyi chachiwahi, Nzambi yaIsarela akwinki chuma chiwunamulombi.” Chumanyi chafuminimu? Hana “hakudiyila kwindi, hakudya, nikuneña nawa cheñi kumesu indi nehi.” (1 Sam. 1:17, 18) Kulomba kwawundishili muchima waHana.

6. Yumanyi yitwatela kudizila kudi Hana nikumukanda waAfwilipi 46, 7 kutalisha hansañu yakulomba?

 ⁶ Tunateli kwikala cheñi nakuwunda neyi tutwalekahu nakulomba. Hana wahanjekeli hadi mpinji yayilehi naTata yindi wamwiwulu. (1 Sam. 1:12) Ninetu tunateli kuhosha naYehova hadi mpinji yayilehi nakumulejamu kwakama kwetu, yuma yinakututiyisha woma nikuzeya-zeya kwetu. Bayi neyi kulomba kwetu kwatela kwikala hohu kwaloña hela kwakuzañaleshaku. Mpinji yikwawu tunateli nikudila neyi tunakumulejamu Yehova yuma yinatwakamishi. Hela chochu, Yehova hakazeya kututiyililaku. Mpinji yitunakulomba hakukala kutukweti, twatela cheñi kwanuka kusoñamisha kwekala haAfwilipi 4:6, 7. (Tañenu.) Pawulu watulejeli nindi twatela kumusakilila Yehova mukulomba. Tukweti wunsahu wawuvulu wakumusakilila Yehova. Chakutalilahu, tunateli kumusakilila hakutwinka wumi, hayuma yayiwahi yaleñayi, hakukeña kwindi kwalala nawa nihakuchiñeja kwakuwahi kwatwinkayi. Yumanyi yikwawu yitwatela kudizila kudi Hana?

7. Chumanyi chelileña Hana nanfumwindi mpinji yejima?

⁷ Hela chakwila wadiña nakukala, Hana wayileña mpinji yejima nanfumwindi kwitala daYehova dakudifukwila kuShilo. (1 Sam. 1:1-5) Hampinji yadiñayi hatabanaka, Kapristu Muneni Eli wamulejeli nindi wakuhweleleli nindi Yehova wukwakula kulomba kwindi nawa awa mazu amukundejeli chikupu Hana.—1 Sam. 1:9, 17.

8. Kupompa kunateli kutukwasha ñahi? Lumbululenu.

⁸ Tunateli kwikala nakuwunda neyi tutwalekahu kuya nakupompa. Hakutachika kupompa kwetu, manakwetu walombaña spiritu yaNzambi kulonda yikali nanetu. Kuwunda kudi hakachi kanyikabu yakuspiritu. (Ñal. 5:22) Neyi tuya nakupompa hela chakwila tunakwakama, chekalaña chaswayi kudi Yehova niamanakwetu niahela kutukolesha nikutukwasha kwikala nakuwunda kwamuyitoñojoka nikwamumuchima. Kulomba nakupompa diyi njila yimu mwawundishilañayi Yehova nyichima yetu. (Heb. 10:24, 25) Tuhanjekenu hayuma yikwawu yitunateli kudizila kudi Hana.

9. Yumanyi yabulili kuhimpika muchihandilu chaHana, nawa yumanyi yahimpikili?

⁹ Kukala kwaHana hikwashikeneni dakumana hohenahanaku. Chelili Hana yafunti kwitala kufuma kutabanaka kwayiliyi nakudifukula, watwalekelihu kushakama mwitala dodimu naPenina. Nawa Bayibolu hiyashimuna nawu Penina wahimpiliku. Dichi Hana watwalekelihu kuumika makabisha amuhadika nindi. Ilaña Hana wekalili cheñi nakuwunda kwamumuchima. Chelili Hana yakuhweleli nindi Yehova wukwakula kulomba kwindi, wekalili nakuwunda. Wamwitejeli Yehova nindi yamukundeji nikumuwundisha. Chimwahitili mpinji, Hana amukiswilili nawa wavweli anyana.—1 Sam. 1:19, 20; 2:21.

10. Chuma chamumwekeneni Hana chatudizishañadi?

¹⁰ Tunateli kwikala cheñi nakuwunda hela chakwila kukala kunatwalekihu. Chuma chamumwekeneni Hana, chatudizishaña nawu kwosi chuma chinateli kumukañesha Yehova kuwundisha nyichima yetuku. Yehova hamba katuvulamenaku nawa chayinu mpinji hela kumbidi wakatukiswila hakubula kuzeya.—Heb. 11:6.

11. Yumanyi yamukojejeli Pawulu kwakama?

¹¹ Kudi yuma yayivulu yamukojejeli Pawulu kwakama. Chakutalilahu, chelili  wakeñeli amanakwindi niahela, kukala kwamweneñawu kwamuleñeleli kwakama. (2 Kor. 2:4; 11:28) Hampinji yadiñayi nakushimwina, akwakumudimbulula amweteleña kakavulu nikumukasa mukaleya. Nawa womikili cheñi kukala kwamwakamishileña kudi neyi “chakuhanda nayuma yantesha.” (Fwi. 4:12) Nawa chelili maatu amukisikilili hakaluñalwiji mapampa kasatu, hadaha wadiña nakwakama neyi yakandama muwatu. (2 Kor. 11:23-27) Chumanyi chamukwashili Pawulu hampinji yadiñayi nakwakama?

12. Chumanyi chamukwashili Pawulu kukeheshaku kwakama?

¹² Pawulu wakameneni chelili amanakwetu niahela amoni kukala, ilaña hesekeli kumanisha kukala kwawu kwejima nkawindiku. Pawulu wadiña wadizoza. Wenkeli amakwawu kukooleka kwakwakamena chipompelu. Chakutalilahu, wahanini mudimu kudi amayala akuhweleleliwu, aTimotewu niTitusa. Chakadi nikujina, mudimu wazatiliwu awa amayala wamukwashili Pawulu kukeheshaku kwakama.—Fwi. 2:19, 20; Tit. 1:1, 4, 5.

13. Akulumpi anateli kumwimbujola ñahi Pawulu?

¹³ Lombenu wukwashu kudi akwenu. Kufwana Pawulu, akulumpi amavulu makonu akweti kukeña akamenaña antu amuchipompelu anakumona kukala. Ilaña mukulumpi wumu hanateli kukwasha antu ejima muchipompeluku. Kudizoza kukumukwasha kwinkahu amayala anashikilimu kukooleka nikudizisha atwansi kushikahu kulonda adikwashi kwakamena nyikoku yaNzambi.—2 Tim. 2:2.

14. Chumanyi chabulili kwakamayi Pawulu, nawa tukudizilakwodi?

¹⁴ Itejenu kuyikundeja. Pawulu wadiña wadizoza nawa welukili nindi wakeñeleña kumukolesha kudi amabwambu jindi. Wadakameneni wanyi nindi antu amakwawu akumumonaña nawu wamukunkulwayi neyi amabwambu jindi amukwasha. Mumukanda wamusonekeleliyi Fwilemoni, Pawulu wahosheli nindi: “Nazañaleli chikupu nikukundejewa nankashi chinatiyili kukeña kuwukweti.” (Fwile. 7) Pawulu wateneni akwawu akalakeleñayi nawu amukolesheli hampinji yadiñayi nakwakama. (Kol. 4:7-11) Neyi tunakukeña kutukolesha, amanakwetu niahela akutukwasha.

15. Chumanyi cheliliyi Pawulu hampinji yamweniyi kukala kwasweja?

 ¹⁵ Shindamenenu Hezu daNzambi. Pawulu welukili nindi Nsona jikumukundeja. (Rom. 15:4) Welukili nindi jikumwinka cheñi maana akuumika kukala kunakumonayi. (2 Tim. 3:15, 16) Chamukasiliwu kamuchiyedi muRoma, Pawulu welukili nindi wadiña kwakwihi nakufwa. Haniyi mpinji yakala, Pawulu welili ñahi? Wamulejeli Timotewu kuya swayi kudi yena nakumutwalila “nyivuñilu.” (2 Tim. 4:6, 7, 9, 13) Muloñadi? Muloña muyina nyivuñilu mwadiña yibalu yaNsona jachiHeberu jadi kuzatishayi hakudiza Bayibolu kankawindi. Neyi tumwimbujola Pawulu kuhitila mukudiza Bayibolu mafuku ejima, Yehova wakazatisha Nsona kulonda yakatukundeji nachu hichidi namuloña nakukala kutunakumonaku.

16. Kukalanyi kwadileteleliyi Davidi kwamukojejeli kwakama?

¹⁶ Kudi chuma chakojejeli Davidi yakabakani nachinleji chamuchima. Welili wuvumbi naBatisheba, kumujahila nfumwindi nawa waswekeli nshidi jindi. (2 Sam. 12:9) Hakusambila, Davidi wadiwili chinleji chindi. Chafuminimu, wakabakeni bayi hohu kuspirituku ilaña muyitoñojoka nikumujimba. (Mas. 32:3, 4) Chumanyi chamukwashili Davidi hakwila yaleki kwakama nakukala kwadileteleliyi, nawa chumanyi chinateli kutukwasha neyi tunakoñi chiluwa chasweja?

17. Nsona yaMasamu 51:1-4 yamwekeshaña ñahi nawu Davidi wabalumukili mumuchima chikupu?

¹⁷ Lombenu kwanakena. Davidi walombeli kudi Yehova. Wadanakeneni chikupu nakusolola nshidi yindi yejima kudi Yehova. (Tañenu Masamu 51:1-4.) Chumichi chamukwashili kwikala nakuwunda nimuzañalu. (Mas. 32:1, 2, 4, 5) Neyi mukoña nshidi, bayi muswekaku. Ilaña lombenu kudi Yehova nawa mulejenumu yuma yejima yimwelili. Kuhiñahu, mukutiya muchima wukuwunda nawa himukudakamenaña cheñiku. Dichi neyi munakukeña kwikala cheñi ibwambu daYehova, mwatela kwila yuma yikwawu kubombela hakulomba.

18. Davidi welili ñahi chamufumbiliwu?

¹⁸ Tambwilenu kufumba. Chelili Yehova yatemeshi kaprofwetu Natani kuya nakusolola  nshidi yakoñeliyi Davidi, Davidi hadikañili hela kudiwula nshidi jindiku. Wetejeli nindi wamuvulumwini nfumwa Batisheba, sweje-e dinu Yehova. Davidi wetejeli mwamufumbiliwu kudi Yehova nawa Yehova wamwanakeneni. (2 Sam. 12:10-14) Neyi tunakoñi nshidi yeneni, twatela kulejamu atubiña atondayi Yehova. (Yak. 5:14, 15) Nawa twatela kutondolwela chaaku chakudikaña. Neyi twiteja nikuzatisha kufumba swayi chikatukwasha kwikala mukuwunda nimuzañalu.

19. Chumanyi chitunakufwila kwila?

¹⁹ Bayi mufuntishañahu yiluwa yoyimuku. Mwanta Davidi welukili nindi wakeñekeleña wukwashu waYehova hakwila chimukwasheñaku kubula kukoña nshidi yoyimu. (Mas. 51:7, 10, 12) Hanyima yakwila Davidi anamwanakeni dehi kudi Yehova, wadikasili nindi hakekalahu cheñi nayitoñojoka yatamaku. Chafuminimu, wekalili mukuwunda.

20. Tunateli kumwekesha ñahi netu twasakililaña hakwanakena kwaYehova?

²⁰ Twamwekeshaña netu twasakililaña chanakenañayi Yehova neyi tumulomba netu yatwanakeni, twiteja kufumba nawa tuzata nañovu nakubula kufuntishahu yiluwa yoyimu. Neyi twila mwenimu, tukwikala mukuwunda kwamuyitoñojoka. Manakwetu James wakoñeli nshidi yahamesu bwi-i, wetejeli chumichi. Wahosheli nindi: “Chelili nishimuni nshidi yami kudi akulumpi, natiyili neyi ananfumishi chiteli chalema hamafwiji. Natachikili kwikala cheñi nakuwunda kwamuyitoñojoka.” Chatukoleshaña hama kwiluka netu, “Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.”—Mas. 34:18.

21. Tunateli kumwiteja ñahi Yehova kutuwundisha?

²¹ Chineli tunakuswina kwakwihi nakukuma, yuma yatwakamishaña yikuswejelaku chikupu. Neyi mutachika kwakama, nyakalenuña kumulejamu Yehova. Dizenuña Bayibolu nankashi. Dizilenuña kudi Hana, Pawulu niDavidi. Mulombenu Tata yenu wamwiwulu yayikwashi kwiluka yuma yinakuletesha mwakameña. (Mas. 139:23) Itejenu yayikwashiku kusenda yisenda yenu, sweje-e yisenda yimunakukañanya kusenda. Neyi mwila yumiyi, mukwikala neyi ñimbi yamasamu wembili kudi Yehova nindi: “Chinaswejeli kwakama mumuchima wami, eyi wankundejeli nikunwundisha.”—Mas. 94:19. NWT.