Navwalikilili muMusumba waQuebec, muCanada mwahoshañawu idimi daFrench. Anvwali jami aLouis niaZélia ankeñeli nankashi. Atata adiña nansonyi nawa akeñeli nankashi kutaña. Nakeñeli nankashi kusoneka nawa nafwilileña nami ifuku dimu nakekali kamba nsañu.

Hinadiña nayaaka 12, aRodolphe Soucy azatileña nawatata enjili hetala detu nebwambu dawu. Adiña aYinsahu jaYehova. Hinelukili yuma yayivulu hadi aYinsahuku nawa nadiwili kudifukula kwawu. Hela chochu, natiyileña kuwaha chazatishileñawu Bayibolu hakwakula malwihu. Anvwali jami niwena atiyili kuwaha, dichi twatachikili kudiza Bayibolu.

Hayina mpinji, natañilileña hashikola yawaKatolika. Mpinji yikwawu, nahanjekeleña nawakwetu mutwatañilileña yuma yinadizileña muBayibolu. Nkumininaku, antañishi, adiña atupristu atiyili yuma yitwahanjekeleña. Chatela azatishi Nsona hakutadika yuma yinahosheleña, wumu hakachi kawu wanteneni nindi mukwakudikaña hamesu awakwetu ejima. Hela chakwila naneñeli, ilaña mwafumini yuma yayiwahi muloña nelukili nami nsañu jakwitiya jatañishileñawu kushikola jadiña nakuditeja wanyi nachatañishaña Bayibolu. Nafukwilihu kuleka kutañila hayina shikola. Chelili anvwali jami añiteji, nayili hashikola yacheñi.

Natwalekelihu kudiza Bayibolu, ilaña hinadiña nakupama kuspirituku muloña nadiña nawoma wakushimwina kwitala nikwitala. Chechi yaKatolika yadiña nakuluwañesha nikukañesha mudimu  wetu wakushimwina. Maurice Duplessis, nlomboli wansañu jamatuña nachiyuulu muQuebec, wazatilileña hamu nachechi. Chineli wadiña nakuyikwasha, izanvu dawakwamadombu dadiña nakukabisha nikulukuka aYinsahu. Hayina mpinji, aYinsahu akeñekeleña kwikala ahamuka hakwila nawu ashimwini.

Manakwetu wankwashili kuleka kutiya woma wadiña John Rae wamanishili Shikola yaGileyadi yanamba 9. John wadiña wakuluka yitembi muniwu mudimu, wadiña wadikehesha nawa waswayi kusolomoka. Mpinji yikwawu wanfumbileña chakadi kuhita mumbadi, ilaña nadizili yuma yayivulu kujelileñayi. Chamukalilileña John kuhosha French, dichi kakavulu nayileña nindi nakushimwina kulonda nimukwasheñaku. Mpinji yinawanikileña naJohn yankwashili kufukulahu kwikala Chinsahu chaYehova. Napapatisheweli haMay 26, 1951, hanyima yayaaka 10 kufuma hinatachikili kudiza nawaYinsahu.

Chipompelu chetu chanyanya chamuMusumba waQuebec mwavulili apayiniya. Iyena dawu dansañumwini kutachika wupayiniya. Hayina mpinji, twazatishileña hohu Bayibolu hakushimwina kwitala nikwitala. Chakadi kuzatisha nyikanda, twazatishileña Nsona kakavulu. Hela chochu, nazatili nañovu kuhembela jinsona kumutu kulonda nihakwiliku chalala. Amavulu akaanineña kutaña Bayibolu neyi yidana chinjikijilu chakumwekesha nawu anayiteji kudi Chechi yaKatolika.

Mu 1952, nasumbwili Simone Patry, muhela washinshika wamunidi iluña. Twabukilili kuMontreal nawa chaaka chamanini wanyi twekalili namwana wamumbanda, Lise. Hela chakwila nalekeli wupayiniya kwakwihi nakudisumbula, twafukwilihu kupeleshaku chihandilu chetu naSimone kulonda tutwesheña kukalakalaku nyidimu yikwawu muchipompelu hamu neyi chisaka.

Mwahitili yaaka 10 chakadi kutoñojokahu cheñi kutachika kuzataku wupayiniya. Mu 1962, hinadiña kuShikola yaMudimu waWanta yawakulumpi yakakweji kamu kuKasanji kamuCanada, atwishili mukapeka kamu kakukaama namanakwetu Camille Ouellette. Iyena daCamille dakushimwina dantiyishili kuwaha muloña wadiña mutu wachisaka. Hayina mpinji, amanakwetu niahela antesha hohu muQuebec diwu atwesheleña kuzataku wupayiniya hampinji yoyimu nikukulisha mwana; ilaña, niCamille dichafwilileñayi.  Hitwadiña hamu, wankwashili kutoñojoka hayuma yammwekeneneña. Chimwahitili tukweji twantesha hohu, natoñojokeli nami natela kutachika cheñi wupayiniya wampinji yejima. Amakwawu ahosheleña nawu nafukwilihu chiwahi wanyi, ilaña natachikili cheñi wupayiniya muloña nelukili nami Yehova wukankwasha kushimwina chikupu.

Mu 1964, ami niSimone atutondeli kwikala apayiniya adimena muMusumba waQuebec, mutwakalakeleli hadi yaaka yayivulu. Haniyi mpinji, akehesheliku kukañesha mudimu wetu.

Ifuku dimu Hamposu namwaana, ankwatili muSainte-Marie, mbaka yanyanya yadiña kwakwihi naMusumba waQuebec. Kapokola wankwatili nawa anshili mukaleya muloña nadiña nakushimwina kwitala nikwitala chakadi kutambula lusesa. Nkumininaku, antwalili kudi nsompeshi ateneneñawu nawu Baillargeon, iyala watiyishileña woma. Wañihwili muntu wunateli kunhakwilaku muchota. Chinamulejeli nami Glen How, * Chinsahu elukiliwu nankashi mujakuhakula nsañu, wakameneni nakuhosha nindi: “Inehi! Bayi onaku!” Glen How amwilukili nawu wadiña ihaku wakuluka yitembi wahakwilileña aYinsahu Yehova. Chota chanlejeli hohenohu nawu muloña weyi wunamani.

Ikañesha dadiña muQuebec datukañesheli cheñi kuwana iluña dadiwahi dakusonkela mutwatela kupompela. Dichi twawanini hohu chikuluku mwadiña mutuuta. Dichi hakwila nawu tutiyiku iyena mumpinji yachishika, amanakwetu ambwileña kadikina kamanji kakutatisha nachu mukapeka. Kakavulu twaswinineña kunaka kadikina hadi maora antesha henohu kanda tutachiki kuhanjeka nsañu yakudikolesha.

Nidi namuzañalu hakumona mudimu wakushimwina chiwunayiluku hambidi hadi yaaka yayivulu. Mu 1960 muMusumba waQuebec mwadiña hohu yipompelu yanyanya yantesha, yadiña kwiluña daCôte-Nord region, nidaGaspé Peninsula. Makonu kunawa maluña kudi jiñinza jinabadiki ajiyedi nawa amanakwetu apompelaña muMatala aWanta amawahi.

Atutumini naSimone mumudimu wawunkoñi wañinza muchaaka cha 1970. Kuhiñahu mu 1973, atwinkeli mudimu wawunkoñi wankambi. Muyina yaaka, nadizililiku yuma yayivulu kudi amanakwetu akuluka yitembi adi neyi aLaurier Saumur * niaDavid Splane, * azatilili mumudimu wakwenda. Hanyima yakupompa kwejima kutwekalileña naku ami niDavid twahanjekeleña chakuwahishaku ntañishilu yetu. Inakwanuka chanlejeliyi David ifuku dimu nindi: “Léonce, nadiluñisha mpanji yeyi yakukumishaku. Yawaha nankashi, ilaña neyi ami nadi kufumishamu  jimpanji jisatu mumpanji yeyi.” Nazatishili mazu amavulu mujimpanji jami. Nateleli kwiluka chakuzatisha mazu antesha.

Ankoñi ankambi adiña namudimu wakukolesha ankoñi añinza. Hela chochu, akwakushimwina amavulu muQuebec añilukili chikupu. Akeñeleña kuzatila hamu nanami neyi nendeli jiñinza jawu. Hela chakwila nadiluñishileña kuzata nawu, hinekalileña nampinji yeneni yakwikala nankoñi wañinzaku. Mpinji yimu nkoñi wañinza wañanukishili nindi: “Chachiwahi kwikala nawamanakwetu, ilaña bayi wuvulamena neyi wunu himulungu wamiku. Ninami innakukeña kunkolesha!” Nadizililiku yuma yayivulu kunawa mazu anfumbiliwu.

Mu, 1976 kwamwekeni chuma chakadi kukuhwelela nawa chakuneñesha. Iñodami Simone wakatili nankashi nawa wafwili. Wadiña mumbanda wamuwahi wabulili kudikeña yomweni nawa wamukeñeli Yehova nankashi. Chineli mpinji yeneni nekalileña mumudimu wakushimwina, chankundejeleña nawa namusakililaña Yehova chankwashiliyi hayina mpinji yakala. Chimwahitili mpinji, nasumbwili Carolyn Elliott payiniya wadikita wahosheleña idimi daEnglish wenjili kuQuebec nakuzatila kwadiña kukankila. Carolyn wakasunuka nawa wakeña kukwasha nankashi antu, sweje-e adi nansonyi. Wankwashili chikupu chatachikiliyi kuzata nanami mumudimu wakwenda.

Mu January 1978, anlejeli kutañisha Shikola yaMudimu yawaPayiniya yatachi muQuebec. Natiyili woma chikupu, chineli yuma yinatañishileña muniyi shikola yadiña yayiha kudi ami nikudi atudizi. Kukooleka, muniyi shikola mwadiña apayiniya amavulu akuluka yitembi. Hela chakwila nadiña ntañishi, nadizili yuma yayivulu kudi atudizi.

Nkumininaku, mu 1978 mwadiña Kupompa kwaMatuña kwadiña namutu nawu “Victorious  Faith” Mwibulu daYisela daMontreal. Iku diku kupompa kweneni kutwadiña naku muQuebec kutwapompeli antu akubadika ha 80,000. Nazatilileña kuDipatimenti Yatalaña Mudimu waNsañu. Nahanjekeli nawakwakutiyakesha nsañu amavulu nawa natiyili kuwaha hakumona nawu anasoneki nsañu yayiwahi hadi etu. Adiña nakutwihujola hamuvwimbimbi nikuyitiyakesha nsañu yetu hayisanji kubadika hamaora 20 nawa ayidishili hayipapilu yansañu yayivulu. Nsañu yayiwahi yatiyakeni kwejima.

Mu 1996 yuma yahimpikili chikupu. Hanyima yakuzatila mwiluña mwahoshañawu French muQuebec kufuma hampapatishiliwu, antumini munkambi yaToronto mwahoshañawu English. Natoñojokeleña nami nukutwesha wanyi nawa natiyileña woma wakuhana jimpanji muEnglish yakotoka. Nateleli kulomba chikupu nikushindamena nankashi hadi Yehova.

Kuhosha hohu chalala, nazatili chiwahi nankashi muToronto hadi yaaka yiyedi. Ñodami Carolyn wankwashileña kuhosha English chakadi kutiya woma nawa amanakwetu niwena ankwashileña chikupu nikunkolesha. Hashimbwili wanyi twekalili nawamabwambu amavulu.

Kubombela hanyidimu yikwawu nikudiloñesha jakuya nakupompa kunsa yamulungu, kakavulu Hachitanu namelela nashimwinineña ora yimu kwitala nikwitala. Hadaha antu atoñojokeleña nawu, ‘Muloñadi chinakuyilayi nakushimwina henohu nyidimu yinavuli hakupompa?’ Ilaña, nelukili nami kushimwina kwankwashileña kuwundisha yitoñojoka. Niyinu mpinji, nazañalalaña chikupu neyi nayi nakushimwina.

Mu 1998, ami niCarolyn atutemesheli kuMontreal nakuzata cheñi wupayiniya wadimena. Hadi yaaka yayivulu, mudimu wami wabombelelimu kutala mudimu wakushimwina kudi antu amavulu nikuzatila hamu nawakwayikuzulemba kulonda nololi nsañu yayitwambilañawu aYinsahu jaYehova. Ichi dinu ami niCarolyn twatiyaña kuwaha kushimwina matunduka anakwinza muCanada nawa anakufwila kudiza Bayibolu.

Namoni Yehova chinankiswiliyi neyi nitoñojoka hayaaka 68 yinamukalakeli. Nazañalalaña muloña nadizili chakwikala namuchima wakushimwina nawa nakwashi antu amavulu kudiza chalala. Hanyima yakwila mwanami, Lise yasumbuki, yena nimfumwindi atachikili kuzata wupayiniya wampinji yejima. Chanzañaleshaña kumona chanatwalekiyi kudikita mumudimu wakushimwina. Inakusakilila chikupu kudi akwetu akwaKristu anankwashi kupaminaku kuspiritu nakushikahu kukalakala nyidimu yamboka-mboka yamukuloñesha. Nawa neluki chikupu nami tunateli hohu kutwalekahu kumukalakela Yehova nakashinshi kuhitila mukushindamena hañovu yindi yabadika, spiritu yajila. (Mas. 51:11) Namusakililaña Yehova hakunyinka kukooleka kwakuhameka ijina dindi!—Mas. 54:6.