1-2. Munjilanyi Yehova mwatwenzunwinayi njila yakwikala muchisaka chindi nawa muloñadi?

YEHOVA watuleta muchisaka chindi chawakwakudifukula. Kwosi mutambi wabadika neyi iwuku. Antu adi munichi chisaka hiyantu adihana kudi Nzambi nawa akuhwelela mumulambu wefutu danyiloña daMwanindi. Ichi chisaka chetu chikweti chamuzañalu. Tunakudiluñisha chayinu mpinji nawa twatiyaña kuwaha hakuchiñeja kutukweti kwawumi wahaya nyaaka, chili mwiwulu hela muParadisa hamaseki.

² Yehova watwenzunwina njila kulonda twikali muchisaka chindi muloña wakwila watukeña nankashi. Ilaña hakwila yeli mwenimu, Yehova wadihanini chikupu. (Yow. 3:16) “[Atulandili] nawuseya walema.” (1 Kor. 6:20) Kuhitila mwifutu danyiloña, Yehova watwenzunwina njila yakwikalilamu amabwambu jindi. Tunateli kumutena yena Muntu wabadika mukuleña kwejima netu Tata yetu. Nawa neyi chitwadizili muchibaaba chinafumihu, Yehova diyi Tata wabadika.

3. Malwihwinyi itunateli kudihula? (Talenu chikasha chinakwila nawu “ Komana Yehova Wañiluka?”)

³ Kufwana nsoneki wumu waBayibolu, tunateli kudihula netu: “Yehova nukumwinkadi nayuma yayiwahi yejima yanañiliyi?” (Mas. 116:12) Ñakwilu yidi yakwila nawu kwosi chuma chitunateli kumwinka Tata yetu wamwiwuluku. Hela chochu, kukeña kwindi kwatuleñelaña kumukeña. Kapostolu Yowanu wasonekeli nindi: “Etu twamwekeshaña kukeña, muloña yena diyi wasambilili kutukeña.” (1 Yow. 4:19) Jinjilanyi mutunateli kumumwekeshela Tata yetu wamwiwulu netu twamukeña?

4. Kwesekeja naYakoba 4:8, muloñadi chitwatela kuzatila nañovu kulonda tuswini kwakwihi naYehova?

⁴ Yehova nakukeña nindi tuswini kwakwihi nayena nawa tuhanjekeña nindi. (Tañenu Yakoba 4:8.) Watukonkomwenaña nindi “lombenuña chakadi kuzeya,” nawa watiyaña kulomba kwetu. (Rom. 12:12) Hakasikaku nawa hazeyañaku ilaña watutiyililaña. Dichi, twamutiyililaña kuhitila mukutaña Izu dindi, Bayibolu ninyikanda yikwawu yatukwashaña kutiyishisha Izu dindi. Twamutiyililaña cheñi neyi tunakutiyilila nakanañachima hakupompa kwawakwaKristu. Neyi anyana anakuhanjeka mpinji yejima nawanvwali jawu, wubwambu wawu wakolaña. Munjila yoyimu, neyi tuhanjekaña naYehova mpinji yejima tukuswina kwakwihi nayena.

5. Chumanyi chitwatela kwila hakwila kulomba kwetu akwakuli?

⁵ Toñojokenu hayuma yimwalombaña kudi Nzambi chiyidi. Yehova nakukeña nindi tuhuñunwineña nyichima yetu hadi yena mukulomba. (Mas. 62:8) Dichi twatela kudihula netu: ‘Komana kulomba kwami kwafumaña heshina damuchima tahindi kwekala kwakusoneka hela chakala hikulomba hohu?’ Chakadi nikujina, mwamukeña Yehova chikupu nawa munakukeña kukolesha wubwambu wenu nayena. Hakwila mwili mwenimu, mwatela kuhanjeka nindi mpinji yejima. Mulejenu chimunakutiya. Mulejenu yuma yayizañaleshaña niyayineñeshaña. Kuhwelelenu nenu mwatela kulomba wukwashu kudi yena.

6. Chumanyi chitwatela kwila hakwila nawu tuswini kwakwihi naTata yetu wamwiwulu?

⁶ Hakwila nawu tuswini kwakwihi naTata yetu wamwiwulu, twatela kwikala akwakusakilila. Tunateli kwiteja chasonekeliyi ñimbi yamasamu nindi: “Eyi Yehova Nzambi yami, nyidimu yeyi yakuhayama yiwuneli yinavuli, niyitoñojoka yeyi yiwatutoñojokaña, hiyakutwesha kukuchindilayuku, hela neyi nakeña kuyishimuna nakuyitena, yinasweji kuvula, kutwesha kuyichinda nehi.” (Mas. 40:5) Hitwakuminaña dakutiya hohu kuwahaku, ilaña twahoshaña nikwila yuma yamwekeshaña nawu twasakililaña kudi Yehova. Chumichi chamwekeshaña nawu twambukaku nawantu akwituña. Tunakushakama mwituña mudi antu abulaña kusakilila hayuma yejima yayililañayi Nzambi. Kafwampi, chuma chimu chinakumwekesha nawu tunakushakama “mumafuku akukuminina” chidi chakwila nawu antu hiyasakililañaku. (2 Tim. 3:1, 2) Bayi twikala nanichi chilwiluku!

7. Yehova nakukeña nindi twileñadi, nawa muloñadi?

⁷ Anvwali hiyakeñaña anyanawu kudihelaku, ilaña ekali adikeña wumu namukwawu. Munjila yoyimu, Yehova wakeñaña akwakudifukula indi kutiyañana wumu namukwawu. Dichi, kukeña kutwadikeña wumu namukwawu dichuma chamwekeshaña nawu tudi akwaKristu alala. (Yow. 13:35) Tukwiteja chasonekeliyi ñimbi yamasamu nindi: “O kuwaha o kutowala antu amwivumu dimu akushakama hamu nakutiyañana!” (Mas. 133:1) Neyi tukeña amanakwetu niahela tukumwekesha kudi Yehova netu twamukeña. (1 Yow. 4:20) Twatiyaña kuwaha hakwikala muchisaka chimu nawamanakwetu niahela ‘aditiyilaña luwi niwushona wumu namukwawu’!—Efwe. 4:32.

8. Kwesekeja na 1 Yowanu 5:3, chumanyi chalema chatuleteshaña tumwovwahileña Yehova?

⁸ Yehova wakeñaña nindi anyana ovwahileña anvwali jawu nawa wakeñaña nindi ninetu tumwovwahileña. (Efwe. 6:1) Twatela  kumwovwahila muloña diyi Nleñi, Watukiñaña nawa wukweti maana kubadika anvwali ejima. Hela chochu, kukeña dichuma chalema chatuleteshaña tumwovwahileña Yehova. (Tañenu 1 Yowanu 5:3.) Hela chakwila kudi yuma yayivulu yatuleteshaña kumwovwahila Yehova, yena hatukanjikijañaku. Yehova watwinka wuswa wakufuukulahu etu aweni, dichi watiyaña kuwaha neyi tumwovwahila muloña wakumukeña.

9-10. Muloñadi chichalemena kwiluka nshimbi jaNzambi nikujizatisha?

⁹ Anvwali akeñaña anyanawu kwikala akiñewa. Dichaleteshaña asheñaku nshimbi jakuyikiña nachu. Neyi anyana ovwahilaña iji nshimbi, chamwekeshaña nawu ayikuhwelela anvwali jawu nawa ayilemesha. Dichi, chalema nankashi kwiluka nikwovwahila nshimbi jashaku Tata yetu wamwiwulu. Neyi tujovwahila, tukumwekesha netu twamukeña Yehova nawa twamulemesha, cheñi jinateli kutukwasha. (Isa. 48:17, 18) Kwambukaku, antu amukaanaña Yehova ninshimbi jindi adiletelaña yihuñu aweni.—Ñal. 6:7, 8.

¹⁰ Neyi twilaña yuma yakeñaña Yehova, tukudikiña kuyuma yakisaña nyijimba, yitoñojoka niyuma yaluwañeshaña wubwambu wetu nayena. Yehova weluka yuma yatela kutukwasha. Aurora washakamaña kuUnited States, wahosheli nindi: “Neluka nami neyi tumwovwahilaña Yehova, chihandilu chetu chekalaña chachiwahi.” Mwahosheliyi dimu.  Yumanyi yayiwahi yinafumi mukumwovwahila Yehova?

11. Kulomba kwatukwasha ñahi?

¹¹ Hela chakwila chatukalilaña kwovwahila, kulomba kwatukwashaña. Mpinji yikwawu chatukalilaña kumwovwahila Yehova, ilaña twatela kuzata nañovu nikutondolwela nshidi kulonda tumwovwahili. Ñimbi yamasamu wamulembeleli Nzambi nindi: “Nkwashi kulonda nikali namuchima wakukwovwahila.” (Mas. 51:12. NWT) Denise payiniya wampinji yejima wahosheli nindi, “Neyi chinankalili kwovwahila lushimbi lumu lwaYehova, nalombaña kulonda yanyinki ñovu yakwila yuma yayiwahi.” Twatela kukuhwelela netu Yehova wukwakula kulomba kweniku.—Luka 11:9-13.

12. Kwesekeja naAefwesesa 5:1, chumanyi chitwatela kwila?

¹² Tañenu Aefwesesa 5:1. Chineli tudi “anyana akeñayi” Yehova, twadishañaku chikupu kulonda tumwimbujoli. Twembujolaña yilwilu yindi kuhitila mukwikala nakukeña, luwi nikwanakena akwetu. Antu abula kumwiluka Nzambi neyi amona yilwilu yetu yayiwahi, chikuyileñela niwena kukeña kumwiluka. (1 Pet. 2:12) Anvwali akwaKristu atela kumwimbujola Yehova hakwakamena anyanawu neyi chatwakamenañayi. Neyi amwimbujola, anyanawu niwena anateli kwikala amabwambu jaTata yetu wukweti kukeña.

13. Chumanyi chitwatela kwila hakwila twikali ahamuka?

 ¹³ Mwana wanyanya watiyaña kuwaha natata yindi nawa watiyaña kuwaha kuhosha nawakwawu hadi yena. Munjila yoyimu, ninetu twamutiyaña kuwaha Tata yetu wamwiwulu Yehova, nawa tunakukeña akwetu niwena amwiluki. Twatiyaña neyi chatiyiliyi Mwanta Davidi, wasonekeli nindi: “Muchima wami wukudisamba naYehova; muntu wawunda wakachitiya wakazañalala.” (Mas. 34:2. ) Indi neyi twatiyaña nsonyi? Tunateli kwikala ñahi ahamuka? Twekalaña ahamuka neyi tutoñojoka chazañalalañayi Yehova neyi tunakuhosha hadi yena niyuma yinateli kuyikwasha antu amakwawu neyi amwiluka. Yehova wukutukwasha kwikala ahamuka. Wakwashili amanakwetu mumafuku awapostolu kwikala ahamuka, ninetu wukutukwasha.—1 Tes. 2:2.

14. Yumanyi yalema yatela kutuleñela kushimwina nsañu yayiwahi?

¹⁴ Yehova hekala nachambuku, dichi watiyaña kuwaha neyi tuyikeña akwetu, hichikweti muloña nakwafumawuku. (Yilw. 10:34, 35) Njila yimu mutunateli kuyimwekeshela akwetu kukeña hikuyishimwina nsañu yayiwahi. (Mat. 28:19, 20) Yumanyi yinateli kufumamu? Ana akututiyilila akwikala namuzañalu nawa akwikala nakuchiñeja kwakushakama haya nyaaka kumbidi.—1 Tim. 4:16.

15-16. Yumanyi yinateli kutuleñela kwikala namuzañalu?

¹⁵ Yehova hiTata yawantu wukweti kukeña, dichi nakukeña chisaka chindi kwikala namuzañalu. (Isa. 65:14) Kudi yuma yayivulu yinateli kutuleñela kwikala namuzañalu chayinu mpinji, hela chakwila tunakumona kukala kwakuvulu. Chakutalilahu, tweluka chikupu netu Tata yetu wamwiwulu watukeña nankashi. Tweluka nsañu yayivulu yekala muBayibolu. (Yere. 15:16) Nawa twekala muchisaka chachiwahi mudi antu amukeña Yehova, akeña nshimbi jindi nawa adikeña wumu namukwawu.—Mas. 106:4, 5.

¹⁶ Mpinji yejima tunateli kwikala namuzañalu muloña tweluka chikupu netu chihandilu chikawaha kumbidi. Tweluka netu katataka Yehova yafumishihu kutama kwejima nawa Wanta windi wukafuntisha Paradisa. Cheñi twachiñejaña kusañuka kwawantu afwa dehi nawa twakekala nawu. (Yow. 5:28, 29) Twakazañalala hama! Chuma chasweja kubadika, tunakuhweleli netu katataka antu ejima mwiwulu nihamaseki atachiki kumulemesha Tata yetu wukweti kukeña nikudifukula kudi yena.