1. Yumanyi yinahimpiki mumaluña amakwawu muyaaka yinafumihu?

HADI yaaka yayivulu yinahitihu, antu amavulu mukaayi adiña akundama kunsakililu. Ilaña hadi yaaka yinahitihu yuma yinahimpiki. Antu amavulu adana nsakililu kwakundamawu. Mumatuña amakwawu antu ahoshaña nawu adana nsakililu kwakundamawu. *—Mat. 24:12.

2. Yumanyi yinakumwekesha nawu antu amavulu adana nsakililu kwakundamawu?

² Muloñadi antu amavulu chahoshelañawu nawu akundama wanyi kunsakililu yidi yejima? * Amakwawu ashaña maana hayuma yachiseki hela hakukala kukwetiwu. (Luka 8:14) Amakwawu adiña mujinsakililu ichi ahoshaña nawu kwekala Nzambi wanyi. Amakwawu amukuhwelela Nzambi ilaña atoñojokaña nawu nsakililu hiyuma yakunyaka, hichuma chamukunkulwayi nawa nawu yaditejaña wanyi najasayansi. Anateli kuyiluwañesha kudi akwawu, antañishi hela hayisanji hahoshañawu nawu wumi wadileñeli waweni, ilaña kwosi wunsahu watiyañawu wukuletesha akuhweleli mudi Nzambi. Amakwawu ayineñeshaña kudi akulumpi jamachechi afwa hamali niyifulu. Kumaluña amakwawu, nfulumendi yashaku nshimbi yakañeshaña jinsakililu.

3. Achinu chibaaba chikutukwashadi?

³ Yesu watulejeli “[kwilisha] antu akunyuza yejima ekali atumbanji.” (Mat. 28:19) Tunateli kuyikwasha ñahi antu abula  kukundama kunsakililu kutachika kumukeña Nzambi nikwikala atumbanji twaKristu? Twatela kwiluka netu yilwilu yikumwekeshayi muntu mpinji yitunakumushimwina, yinateli kushindamena neluña kwakulilayi. Chakutalilahu, antu afuma kuEurope hiyanateli kutiyilila kunsañu yitukuyishimwina neyi chatela kutiyililawu antu afuma kuAsiaku. Muloñadi? Muloña muEurope, antu amavulu elukaku Bayibolu nawa atiyahu dehi nawu Nzambi diyi waleñeli yuma yejima. Ilaña muAsia, antu amavulu eluka wanyi Bayibolu nawa amukuhwelela wanyi Nleñi. Nkeñelu yachinu chibaaba yidi yakutukwasha kushika antu ejima itwawanaña mumudimu wakushimwina hanyichima, hichidi namuloña nakwafumawu hela yuma yakuhwelelawuku.

4. Muloñadi chitwatela kwikalila nanmwenu yayiwahi?

⁴ Ikalenu nanmwenu Yayiwahi. Chaaka nichaaka, antu amavulu abula kumwiluka Nzambi anakwikala aYinsahu jaYehova. Amavulu adiña nayilwilu yayiwahi nawa amakwawu ayineñesheli nayuma yamweneñawu munsakililu mwadiñawu. Amakwawu hiyadiña nayilwilu yayiwahiku nawa amavulu yilwilu yawu yadiña yatama dichi akeñeleña kuleka. Nawukwashu waYehova, tunateli kukuhwelela netu tukuwanaña antu ejima “[adi] nanyichima yashinshika yakukeña kwikala nawumi wahaya nyaaka.”—Yil. 13:48; 1 Tim. 2:3, 4.

5. Chumanyi chaleteshaña antu kwiteja nsañu yitunakuyishimwina?

⁵ Ikalenu naLuwi nawa ababala. Kakavulu, bayi neyi antu etejaña nsañu yitwashimwinaña muloña wayuma yitwahoshañaku, ilaña muloña wanjila yitwahoshelañamu. Atiyaña kuwaha neyi tunakumwekesha luwi, twikala ababala nikumwekesha nawu twayikeña. Hitwayikanjikijaña kutiyilila kuyuma yitunakuhoshaku. Ilaña, twakeñaña kwiluka chatoñojokañawu hansakililu. Chakutalilahu, amakwawu hiyakeñaña kuhosha nsañu yakundama kunsakililu namuntu wabula kwilukawuku. Amakwawu atoñojokaña nawu chaluwa nawa himaana atama kumwihula muntu chatoñojokañayi hadi Nzambi. Hela chochu, amakwawu atiyaña nsonyi neyi ayimona kudi akwawu anakuyidizisha Bayibolu, sweje-e kudi aYinsahu jaYehova. Hichikweti muloña nayuma yitunahoshihuku, twayitoñojokelañaku kwesekeja nachinakutiyawu.—2 Tim. 2:24,tth.

6. Kapostolu Pawulu wazatileña ñahi hakuhanjeka nawantu, nawa tunateli kumwimbujola ñahi?

⁶ Yumanyi yitunateli kwila neyi tumona netu antu amavulu hiyakeña kuzatisha mazu adi neyi “Bayibolu,” “kuleña,” “Nzambi,” hela ‘nsakililuku’? Tunateli kumwimbujola kapostolu Pawulu nikuhimpa njila yakuhanjekelamu nawu. Chahanjekeleñayi nawaYudeya, Pawulu wahanjekeleña nawu kuzatisha Nsona. Hela chochu, hakuhanjeka nawaGriki akwamaana Ariyopagasi, wateneni Nsona wanyi. (Yil. 17:2, 3, 22-31) Tunateli kuzatisha ñahi chakutalilahu chaPawulu? Neyi muwana muntu wabula kukuhwelela Bayibolu, chinateli kuwaha kubula kuyizatisha hakuhanjeka nindi. Neyi mwiluka nenu muntu imunakuhanjeka nindi wakeña wanyi kumumona kudi akwawu nakutaña Bayibolu nanenu, mulejenu nsona munjila yakwila amakwawu akwiluka wanyi, chidi neyi kutañila hafoni hela hatabuleti.

7. Kwesekeja na 1 Akorinda 9:20-23, hakwila nawu tumwimbujoli Pawulu, yumanyi yitwatela kwila?

⁷ Ilukenu chekalawu niKuyitiyilila. Twatela kwiluka yuma yaleteshaña antu itwawanaña kutoñojoka munjila yambukaku. (Yish. 20:5) Toñojokenu cheñi hachakutalilahu chaPawulu. Wakulili nawaYudeya. Wateleleli kuhimpa njila yakuyishimwinamu akwanyunza, muloña hiyelukili yuma yayivulu hela yuma yidi yejima hadi Yehova niNsonaku. Hakwila twiluki  chatoñojokaña nichatiyañawu antu adi mwiluña detu dakushimwina, twatela kusandujola hela kwihulaku antu apama dehi muchipompelu kulonda atukwashi.—Tañenu 1 Akorinda 9:20-23.

8. Njilanyi yimu yitwatela kutachikilamu kuhanjeka nsañu yamuBayibolu nawantu?

⁸ Mudimu wetu wudi wakukeñakeña antu ‘atelela.’ (Mat. 10:11) Hakwila twili mwenimu, twatela kuyihula antu chinakutoñojokawu nikuyitiyilila nakanañachima neyi anakulumbulula. Manakwetu wakuEngland wehulaña antu chatoñojokañawu kutalisha hachinateliwu kwikala namuzañalu muwulu, chakukulisha anyana hela chitunateli kuumika wuñanji waheña. Hanyima yakutiyilila kuyitoñojoka yawu, wayihulaña nindi, “Munakutoñojokahu nenudi hawukwashu wasonekeliwu kwakwihi nayaaka 2,000 yinahitihu?” Kuhiñahu chakadi kutena “Bayibolu,” wanonaña foni nakuyitalisha nsona jatondayi.

9. Tunateli kukwasha ñahi antu akanaña kuhosha hadi Nzambi?

⁹ Tunateli kuyishika hanyichima antu abulaña kukeña kuhosha hadi Nzambi kuhitila mukuhanjeka nawu hayuma yinakumonawu. Chakutalilahu, amakwawu atiyaña kuwaha hayileñaleña. Dichi tunateli kuhosha netu: “Nakuhweleli muneluki chikupu nenu yuma yayivulu yitwamonaña yatuñaña asayantisiti embujolaña yuma yekala mwiwulu nihamaseki. Chakutalilahu, akwakutuña yihoshelu adizaña chekala matu nawa akwakutuña jakukwata nyevulu adizaña chekala mesu. Hanu dinu, mwatoñojokañahu hodi hayuma yekala heseki? Komana mwatoñojokaña nenu yadileñeli yayeni, muntu diyi wayileñeli tahindi hiyuma yacheñi?” Hanyima yakutiyilila nakanañachima, tunateli kubombelahu netu: “Neyi akwakutuñatuña anakwimbujola chatuñawu matu hela mesu, tunateli kudihula kwafumishañawu awa maana. Nahayamini nayuma yasonekeli mukwakusoneka nkumbu wakunyima nindi: ‘Watumbili itu, abuli kutiya? Wawumbili disu, abuli kumona? . . . Diyi welejaña antu maana!’ Asayantisiti amakwawu etejaña nawu mwalala.” (Mas. 94:9, 10) Kuhiñahu tunateli kumutalisha vidiyo yidi ha jw.org^® hanasonekiwu nawu “Interviews and Experiences” hadi kamutu kanakwila nawu “Viewpoints on the Origin of Life” (Talenu hanasonekiwu nawu PUBLICATIONS > VIDEOS.) Hela tunateli kuyinka buloshuwa yaWas Life Created? Hela yaThe Origin of Life, Five Questions Worth Asking.

10. Tunateli kutachika kuhanjeka ñahi namuntu wabulaña kukeña kuhosha hadi Nzambi?

¹⁰ Antu amavulu akeñaña kwikala nawumi  wawuwahi kumbidi. Hela chochu, amavulu achiinaña nawu iseki akadijilumuna hela nawu kwosi muntu wakashakamahuku. Nkoñi wendaña wakuNorway wahosheli nindi antu abulaña kukeña kuhosha hadi Nzambi, akeña nankashi kuhosha hayuma yinakumwekana mukaayi. Hanyima yakwimusha antu, wayihulaña nindi: “Mwatoñojokañadi hachihandilu chachiwahi chitwachiñejaña kumbidi? Komana kuchiñeja kwetu kwashindamena hadi akwamapolitiki, asayantisiti, tahindi hadi muntu wacheñi?” Hanyima yakutiyilila nakanañachima chinakutoñojokayi muntu, watañaña hela kuhosha hansona jahoshaña hachihandilu chachiwahi chakumbidi. Amakwawu atiyaña kuwaha nayikaninu yamuBayibolu yakwila nawu ituña dikatwalekahu haya nyaaka nawa antu amawahi akashakamahu haya nyaaka.—Mas. 37:29; Mukwa. 1:4.

11. Muloñadi chitwatela kuzatishila njila jambokamboka hakuhanjeka nawantu, nawa tunateli kumwimbujola ñahi Pawulu kwesekeja na Aroma 1:14-16?

¹¹ Twatela kuzatisha njila jambokamboka hakuhanjeka nawantu itwawanaña. Muloñadi? Muloña antu ambuka. Yuma yikukeñayi muntu wumu, mukwawu hakuyikeñaku. Amakwawu akeñaña kuhosha hadi Nzambi hela haBayibolu, ilaña amakwawu akeñaña ntahi kuhanjeka hayuma yikwawu. Hichikweti muloña nachuma chinakukeñawuku, twatela kwikala nampinji yakuhanjeka nawantu ejima. (Tañenu Aroma 1:14-16.) Hela chochu, twatela kwanukaña netu Yehova diyi wakulishaña chalala munyichima yawantu akeña yuma yaloña.—1 Kor. 3:6, 7.

12. Antu amakwawu akuAsia ayiluwañeshaña ñahi nayuma yayidizishañawu kumatala nikumashikola?

¹² Kunyeñumuka kaayi kejima, akwakushimwina amavulu awanaña antu afuma kuAsia, kubombelahu niantu afuma kumaluña kwalekeshawu nyidimu yansakililu kudi akwanfulumendi. Mumatuña amavulu muAsia, antu amavulu kanda atoñojokeñahu dehi nawu kwekala Nleñi. Amakwawu akeñaña kwiluka nawa ashikenaña kwiteja kudiza Bayibolu, ilaña amakwawu hakutachika akeñaña wanyi kudiza. Tunateli kwila ñahi hakwila tuyishiki hanyichima? Akwakushimwina amakwawu akuluka yitembi awana njila yakutachikilamu kuhanjeka namuntu, kuhanjeka neyi amabwambu, nikumwekesha nawu ayakamenaña nawa neyi mpinji yinashikili dehi, ahanjekaña yishina yamuBayibolu chiyayikwashili muchihandilu chawu.

13. Yumanyi yinateli kusañumuna antu kukeña kudiza Bayibolu? (Talenu mwevulu wudi hakava.)

¹³ Antu amavulu ayikokolaña namaana ekala muBayibolu. (Mukwa. 7:12) Muhela wendelaña antu ahoshaña idimi daMandarin muNew York wahosheli nindi: “Nafwilaña kumwekesha kukeña kudi antu nikuyitiyilila. Neyi niluka nami dihu hanabukiwu kufuma kwiluña dacheñi, nayihulaña nami: ‘Munakushakama ñahi? Munatachiki kuzata? Munakuhanda ñahi nawantu muchituñilu?’” Mpinji yikwawu chamukwashaña kutachika kudizisha antu Bayibolu. Neyi chinatwesheki, muhela wabombelañahu nindi: “Munakutoñojoka nenu chumanyi chalema chitwatela kwila hakwila nawu tutachiki kudikunda nawantu? Niyilejiku chishimu chimu chamuBayibolu? Chahoshaña nawu: ‘Kutachika yikonkojola chafwana neyi muntu najikuli mwajikawu [menji]; dichi dinu lekenu kufwilañena hachidi ndombu kanda.’ Komana ichi chishimu chinateli kutukwasha kudikunda nawantu?” (Yish. 17:14) Mpanji yamuchidiwu yinateli kutukwasha kwiluka antu anakukeña kudizilahu nsañu yayivulu.

14. Manakwetu wekala kwakulehi kumusela wakwashaña ñahi antu ahoshaña nawu amukuhwelela wanyi Nzambi?

¹⁴ Tunateli kuhanjeka ñahi nawantu ahoshaña nawu amukuhwelela Nzambi wanyi? Manakwetu washimwinaña nankashi antu ekala kwakulehi kumusela abula kumukuhwelela Nzambi walumbulwili nindi: “Akunu, neyi muntu  yahosha nindi, ‘nakuhwelela wanyi mudi Nzambi,’ watalishaña mukwila nindi hakuhwelela mukudifukula kudi anzambi achisemwaku. Dichi netejaña chikupu nami anzambi amavulu akutuña kudi antu nawa akutwamba. Kakavulu natañaña Yeremiya 16:20, yahoshaña nawu: ‘Muntu asoñi akishi akadi kwikala Nzambi tahindi?’ Kuhiñahu nayihulaña nami: ‘Tunateli kwiluka ñahi nzambi walala ninzambi wakutuña kudi antu?’ Nayitiyililaña nakanañachima, kuhiñahu natañaña Isaya 41:23: ‘Shimunenu yuma yakenza nkumininaku kulonda twiluki netu muyanzambi.’ Kuhiñahu nayilejaña chakutalilahu chayuma yatukanayi Yehova kumbidi.”

15. Yumanyi yitunateli kudizila kudi manakwetu wakumusela waAsia?

¹⁵ Manakwetu wekala kumusela waAsia wazatishaña iyi njila hakuhanjeka kulonda yakafuntiliku. Wahoshaña nindi: “Nayilejaña yakutalilahu yamaana amuBayibolu, wuprofwetu wamuBayibolu washikijewa ninshimbi yayuulaña yuma yamuluzwizu. Kuhiñahu nayitalishaña yuma yejimiyi chiyamwekeshaña nawu Nleñi yetu wekalaku wukweti maana. Neyi muntu yatachika kutoñojoka nindi Nzambi wekalaku wanyi, natachikaña kumuleja chahoshaña Bayibolu hadi Yehova.”

16. Kwesekeja na Aheberu 11:6 muloñadi atudizi chiyatela kumuhwelelawu Nzambi nimuBayibolu nawa tunateli kuyikwasha ñahi kulonda ekali nachikuhwelelu?

¹⁶ Neyi tunakudizisha Bayibolu antu abulili kumukuhwelela Nzambi, twatela kuyikwasha kukolesha chikuhwelelu chawu nikukuhwelela nawu Nzambi wekala kwoku. (Tañenu Aheberu 11:6.) Nawa twatela kuyikwasha kulonda akuhweleli muBayibolu. Chumichi chikukeñekaña etu kukonkomwena hayikuma kapampa kakavulu. Mpinji yejima yitunakuyidizisha, twatela kuhanjeka hawunsahu wunakumwekesha nawu Bayibolu hiIzu daNzambi. Yumiyi munabombeli kuhanjeka hawuprofwetu wamuBayibolu washikijewa, ninsañu yinakumwekesha nawu Bayibolu yahosha choloka hansañu yasayansi ninsañu yakunyaaka hela chatukwashaña Bayibolu muchihandilu chetu.

17. Yumanyi yinateli kufumamu neyi tuyimwekeshela antu kukeña?

¹⁷ Twakwashaña antu kwikala atumbanji twaKristu kuhitila mukuyimwekeshela kukeña, chili amukuhwelela Nzambi hela nehi. (1 Kor. 13:1) Mpinji yitunakuyidizisha, twatela kumwekesha netu Nzambi watukeña nawa nakukeña nindi ninetu tumukeñi. Chaaka nichaaka antu amavulu abulili kukundama kunsakililu yidi yejima ichi anakupapatishewa muloña wakwila anamukeñi Nzambi. Dichi ikalenu nanmwenu yayiwahi nawa mwekeshenuña kukeña kudi antu ejima. Yitiyililenuña. Esekenu kutiya chinakutiyawu. Yidizishenu kwikala atumbanji twaKristu kuhitila muyilwilu yenu.