1-2. (a) Muloñadi chitwatela kubulila kuhayama neyi mudimu wetu anawulekeshi? (b) Tukuhanjekadi muchinu chibaaba?

MU 2018, akwakushimwina ansañu yayiwahi kubadika ha 223,000 ashakamaña mumatuña mwalekeshawu nyidimu hela mwakanishawu nyidimu yikwawu. Chumichi hichatuhayamishañaku. Neyi chitwadizili muchibaaba chinafumihu, akwaKristu alala atela kukuhwelela kumona makabisha. (2 Tim. 3:12) Hichikweti muloña nakutwashakamañaku, nfulumendi yinateli kutulekesha mpinji yidi yejima kudifukula kudi Yehova Nzambi yetu wukweti kukeña.

² Neyi kwiluña kumwashakamaña nfulumendi yishimuna nawu muleki kudifukula kudi Yehova, mwatela kudihula nenu: ‘Neyi anakutukabisha komana chinakumwekesha nawu Yehova natuheli? Komana kulekesha mudimu wetu kukutukañesha kudifukula kudi Yehova? Komana natela kubuukila kwituña dacheñi kunatela kudifukula kudi Yehova mukukasunuka?’ Muchinu chibaaba tukuhanjeka hanawa malwihu. Tukuhanjeka cheñi chitunateli kutwalekahu kudifukula kudi Yehova neyi mudimu wetu anawulekeshi niyuma yitwatela kubula kwila.

3. Kwesekeja na 2 Akorinda 11:23-27, ikabishanyi damweniyi kapostolu Pawulu nawa chumanyi chitunateli kudizilaku kuchuma yeliliyi?

³ Neyi nfulumendi yilekesha kudifukula kwetu, hadaha tunateli kutoñojoka netu Yehova watuhela. Ilaña twatela kwanuka netu neyi anakutukabisha hichatalisha mukwila nawu Yehova watuhelaku. Chakutalilahu, toñojokenu  hadi kapostolu Pawulu. Nzambi wamukeñeli nankashi. Wadiña nakukoleka kwakusoneka nyikanda 14 yaNsona jawakwaKristu jachiGriki nawa wadiña kapostolu wawantu akunyuza. Hela chochu, wamweni ikabisha dasweja. (Tañenu 2 Akorinda 11:23-27.) Yuma yamumwekeneni kapostolu Pawulu yatudizishaña nawu Yehova wetejaña ambuña indi ashinshika kuyikabisha.

4. Kaayi katuheleladi?

⁴ Yesu walumbulwili muloña waweni wutwatela kukuhwelela kumona makabi. Wahosheli nindi akatuhela muloña wakwila hitwekala antu amukaayiku. (Yow. 15:18, 19) Neyi anakutukabisha hichinayi mukwila nawu Yehova watuhelaku. Ilaña chamwekeshaña nawu tunakwila yuma yayiwahi.

5. Komana antu anateli kulekesha chikupu mudimu wetu? Lumbululenu.

⁵ Antu kwila atulekesha kudifukula kudi Yehova Nzambi wañovu Jejima, nehi. Amavulu aneseki ilaña anakañanyi. Talenu chuma chamwekeni haNjita Yakaayi Yamuchiyedi. Haniyi mpinji, mumatuña amavulu antu jaNzambi ayikabishili nankashi kudi jinfulumendi. Mudimu wawaYinsahu jaYehova hiyawulekesheli kudi pati yaNazi muGermany hohuku, ilaña awulekesheli cheñi nikudi nfulumendi yakuAustralia, Canada nimumatuña amakwawu. Ilaña talenu yuma yamwekeni. Mu 1939 njita chiyatachikili, kwadiña hohu akwakushimwina 72,475 mukaayi kejima. Lipoti yamwekesheli nawu chamanini njita mu 1945, nawukwashu waYehova, akwakushimwina ashikili ku 156,299. Akwakushimwina avulililiku.

6. Chatela atutiyishi woma, yumanyi yayiwahi yinateli kufumamu neyi anakutukabisha? Shimunenu chakutalilahu.

⁶ Chatela atutiyishi woma, makabisha anateli kutukwasha kutwalekahu kumukalakela Yehova. Chakutalilahu, adisumbula adiña namwana weyala ashakamineña mwituña mwalekesheliwu kudifukula kwetu kudi nfulumendi. Chatela atiyi woma nikuleka kumukalakela Yehova, atachikili wupayiniya wampinji yejima. Mumbanda walekeli nimudimu windi wamali amavulu kulonda yashimwineña. Nfumwindi wahosheli nindi chelili alekeshi kudifukula kwetu antu amavulu  atachikili kwihula malwihu hadi aYinsahu jaYehova. Chafuminimu, chamupeleleli kutachika atudizi aBayibolu. Mwafumini yuma yayiwahi mukulekesha mudimu wetu. Mukulumpi wumu mwituña dodimu wahosheli nindi amavulu alekeli kumukalakela Yehova atachikili cheñi kumukalakela.

7. (a) Alevi 26:36, 37 yatudizishañadi? (b) Yumanyi yitwatela kwila neyi alekesha kudifukula kwetu?

⁷ Neyi ayilumbu jetu alekesha kudifukula kwetu, akeñaña kututiyisha woma kulonda tuleki kumukalakela Yehova. Anateli cheñi kutandisha nsañu yamakudi hadi etu, kutemesha antu jawu kulonda atalatali mumatala etu, kututwala kuyota nikukasa amakwawu hakachi ketu. Atoñojokaña nawu tukutiya woma neyi akasahu amakwawu mutuleya. Neyi tutachika kuyitiya woma, tukuleka kudifukula kudi Yehova. Tunakukeña wanyi kwikala neyi antu ashimunawu haAlevi 26:36, 37. (Tañenu.) Hitukwiteja woma kutulekesha kumukalakela Yehovaku. Twamukuhwelela chikupu Yehova nawa hitukutiya womaku. (Isa. 28:16) Twalombaña wukwashu kudi Yehova. Tweluka netu nawukwashu windi kwosi hela nfulumendi yikweti ñovu yinateli kutukañesha kudifukula kudi Nzambi yetuku.—Heb. 13:6.

8-9. (a) Chumanyi chatela kufuukulahu muntu yamweni hela nyitu yayisaka? (b) Chumanyi chinateli kumukwasha muntu kufuukulahu chiwahi?

⁸ Neyi nfulumendi yilekesha kudifukula kwetu, munateli kufuukulahu neyi chakwila mukuya nakumukalakela Yehova kwituña dacheñi, kwosi muntu wunateli kuyifuukwilaku. Antu amakwawu henohu kanda afuukulihu, anateli kusambila kushinshika yuma yeliliwu akwaKristu mumafuku awapostolu mpinji yamweniwu makabisha. Chelili ayilumbu amwasi Stefwanu malola nawa yafwi, atumbanji muYerusalema ejima apalañeneni muYudeya nimuSamariya nawa ayili nakushika kuFwenisiya, Kipirosi nikuAntiyoki. (Mat. 10:23; Yil. 8:1; 11:19) Hela chochu, amakwawu niwena, anateli kutoñojoka nawu chelili akwaKristu akusambila atachiki kuyiyandisha cheñi, kapostolu Pawulu wafukwilihu kubula kufuma mwiluña mwakaanishiliwu mudimu wakushimwina. Ilaña, washili wumi windi hakatoña kulonda yashimwini nsañu yayiwahi nikukolesha amanakwetu munyisumba mwadiña ikabisha dasweja.—Yil. 14:19-23.

⁹ Yumanyi yitwadizilaña kuniyi nsañu? Nyitu yayisaka yatela kufuukulahu neyi anakukeña kubuuka. Henohu kanda afuukulihu, atela kulombelahu chikupu nakumona chidi yisaka yawu nikutoñojoka hayuma yayiwahi niyatama yinateli kumwekana neyi abuuka. Hansañu yamuchidiwu, mukwaKristu wejima watela ‘kudisendela chiteli chindi yamweni.’ (Ñal. 6:5) Hitwatela kusompesha antu amakwawu neyi anafuukulihuku.

10. Nshimbinyi yakayilejawu kudi kasanji kamutaayi nikudi akulumpi?

¹⁰ Munateli kutwalekahu ñahi kudifukula kudi Yehova mpinji yinayilekeshiwu? Kasanji kamutaayi kakayileja akulumpi nshimbi nijinjila jakutambwilamu yakuda yakuspiritu, chakupompa nichakushimwina nsañu yayiwahi. Neyi kasanji kamutaayi kanahanjeki wanyi nawakulumpi, dichi akulumpi akayikwasha wejima wenu muchipompelu kutwalekahu kudifukula kudi Yehova. Akayileja chakwila kwesekeja nakufumba  kwekala muBayibolu nimunyikanda yetu yawakwaKristu.—Mat. 28:19, 20; Yil. 5:29; Heb. 10:24, 25.

11. Muloñadi chitwatela kukuhwelela netu twakekalaña nayakuda yakuspiritu mpinji yejima nawa chumanyi chimwatela kwila kulonda mukiñi yakuda yakuspiritu?

¹¹ Yehova washiika nindi ambuñindi akayidiishaña chiwahi yakuda yakuspiritu. (Isa. 65:13, 14; Luka 12:42-44) Dichi mwatela kukuhwelela nenu kuloñesha kwindi kwakazata nañovu yejima kulonda akayinki yakuda yakuspiritu. Yumanyi yimwatela kwila? Neyi anayilekeshi, monenu iluña dadiwahi kumwatela kusweka Bayibolu ninyikanda yimukweti. Ikalenu asoñama, bayi mushiya nyikanda hela yozelu hatookaku. Wejima wetu twatela kuzata nañovu kulonda tukoleshi chikuhwelelu chetu.

12. Akulumpi anateli kuloñesha ñahi kupompa chakadi antu kwiluka?

¹² Indi kupompa kwamukachi kamulungu? Akulumpi akaloñesha kupompa chakubula antu kwiluka. Anateli kuyileja kupompela mumazanvu-mumazanvu nawa kakavulu anateli kuhimpa mpinji nimaluña akupompela. Munateli kukiña amanakwenu kuhitila mukuhoshela mwishina hakwinza hela hakufuma kukupompa. Mwatela kuvwala neyi chimwavwalaña hamatala.

13. Yumanyi yitunateli kudizila kudi amanakwetu adiña muSoviet Union?

¹³ Kutalisha kumudimu wakushimwina, yuma yinateli kwambuka kwiluña dimu nadikwawu. Ilaña twamukeña Yehova nawa twatiyaña kuwaha kulejaku antu amakwawu haWanta windi, dichi twatela kuwana njila yakushimwinamu. (Luka 8:1; Yil. 4:29) Mukwakushimuna nsañu yakunyaka Emily B. Baran, wahosheli hamudimu wakushimwina wawaYinsahu jaYehova muSoviet Union, nindi: “Chelili nfulumendi yikaanishi mudimu wawu wakushimwina, aYinsahu atachikili kushimwina kudi akwawu muchituñilu, mwazatilileñawu niamabwambu jawu. Chumichi chayileñeleli ayikasi, hela chochu, aYinsahu atwalekelihu kushimwina antu awaniniwu mukaleya.” Hela chakwila ayilekesheli kuzata nyidimu yawu, amanakwetu muSoviet Union alekeli wanyi kushimwina.

14. Masamu 39:1 yatusoñamishaña nawudi?

¹⁴ Ikalenu ababala nansañu yimunakuleja antu. Mpinji yinalekeshiwu mudimu wetu, twatela kwiluka neyi ‘himpinji yakumwena.’ (Mukwa. 3:7) Twatela kuhemba nsañu yakujinda, yidi neyi kushimuna majina awamanakwetu niahela, maluña akupompela, chitwashimwinaña nichitwatambwilaña yakuda yakuspiritu.  Hitwatela kuyileja akwanshimbi, antaña jetu, amabwambu jetu amwituña detu hela amwituña dacheñi iyi nsañuku. Neyi tuyileja iyi nsañu, tukusha amanakwetu mukukala.—Tañenu Masamu 39:1.

15. Satana wafwilaña kutwiladi, nawa tunateli kutondolwela ñahi chumichi?

¹⁵ Bayi twiteja tunsañu twanyanya tutwambuliku. Satana weluka nindi neyi itala didaambula dadeni, odu itala dakolaña wanyi. (Maku 3:24, 25) Wukukeñaña nindi yatwambuli. Muniyi njila, wakuhwelelaña nindi tunateli kutachika kuzuña mulwetu chatela tuzuñeña nayena.

16. Yumanyi yitwatela kudizila kudi Muhela Gertrud Poetzinger?

¹⁶ AkwaKristu apama niwena atela kwikala asoñama kulonda abuli kufwa muniwu muhetu. Tuhanjekenu hayuma yayimwekeneni ahela ayedi awayishewa aGertrud Poetzinger niElfriede Löhr. Ayikasilili hamu nawahela amakwawu muchilombu chakuyandishila chaNazi. Muhela Gertrud watiyili ichima chahanineñayi muhela Elfriede mpanji jakukolesha kudi akwawu ahela muchilombu. Nkumininaku, muhela Gertrud watiyili kutama nawa walombeli kudi Yehova. Wasonekeli nindi, “Twatela kutiya kuwaha neyi akwetu akweti kukoleka hela akweti nyidimu yayivulu kubadika etu.” Walekeli ñahi kutiya ichima? Muhela Gertrud washili maana hayilwilu yayiwahi yadiña namuhela Elfriede. Chafuminimu, wubwambu wawu wakoleli. Wejima wawu afumini muchilombu chakuyandishila nawa amukalakeleli Yehova nakashinshi sampu nichamanishiliwu chihandilu chawu chamaseki. Neyi tuzata nañovu nikumanisha kukala kutukweti nawamanakwetu niahela, hitukwiteja chuma chidi chejima kutwambulaku.—Kol. 3:13, 14.

17. Muloñadi chitwatela kwovwahila wunlomboli?

¹⁷ Ovwahilenuña wunlomboli. Neyi twovwahilaña wunlomboli kufuma kudi amanakwetu enkawu mudimu, tukutondolwelaña kukala. (1 Pet. 5:5) Chakutalilahu, mumatuña mwakanishawu mudimu wetu, amanakwetu atondawu alejeli akwakushimwina kubula kuhana nyikanda mumudimu wakushimwina. Ilaña, manakwetu wumu payiniya munidi iluña wovwahilili wanyi mwayilejeliwu, dichi wahanini mukanda. Yumanyi yafuminimu? Hanyima yakwila yena niakwawu anamanishi dehi kushimwina wunsahu wamumpanji, atachikili kuyihujola kudi akapokola. Chinamwekani neyi, akapokola adiña nakuyilondela nawa atambwili mukanda wahaniniwu. Chumanyi chitunakudizilaku? Twatela  kwovwahila wunlomboli hela chakwila tunamoni netu anafuukuli chiwahi wanyi. Mpinji yejima Yehova watukiswilaña neyi tuzatila hamu nawamanakwetu atondayi kulombola mukachi ketu.—Heb. 13:7, 17.

18. Muloñadi chitwatela kutondolwela kutuña nshimbi jabula kushikilamu?

¹⁸ Bayi mutuñaña nshimbi jabula kushikilamuku. Neyi akulumpi atuñaña nshimbi jabula kushikilamu, chikuyikalila antu amakwawu. Manakwetu Juraj Kaminský wanukaña chuma chamwekeni chelili alekeshi mudimu wetu mwituña dateneneñawu nawu Czechoslovakia nindi: “Chelili amanakwetu alombweleña niakulumpi ayikasi, antu alombweleña muyipompelu nimuñinza atachikili kutuña nshimbi jayuma yatela kwilawu nikubula kwila akwakushimwina.” Yehova hatwinka wuswa wakuyituñila amanakwetu nshimbiku. Muntu watuñaña nshimbi jabula kushikilamu hanakukiña amanakwindiku, wafwilaña kwikala mwanta hachikuhwelelu chawamanakwindi.—2 Kor. 1:24.

19. Kwesekeja na 2 Kushindulula 32:7, 8, muloñadi chitwatela kwikalila ahamuka hichikweti muloña nayuma yikwilayi Satanaku?

¹⁹ Mukwankunyi netu, Satana Diyabolu, wukuleka wanyi kukabisha ambuña aYehova ashinshika. (1 Pet. 5:8; Chim. 2:10) Satana niantu jindi anateli kutulekesha kudifukula kudi Yehova. Hela chochu, hitwatela kutiya womaku. (Kuhit. 7:21) Yehova wudi kukabadi ketu nawa wukutwalekahu kutukwasha hela chakwila mudimu wetu anawulekeshi.—Tañenu 2 Kushindulula 32:7, 8.

20. Chumanyi chimunakufwila kwila?

²⁰ Dichi tudikasenu mumuchima neyi cheliliwu amanakwetu amumafuku awapostolu alejeli anyuuli mumafuku awu nawu: “Disompelenu enu aweni neyi chidi hohu chiwahi kumesu aNzambi kuyovwahila enu hela kwovwahila Nzambi. Ilaña etu, hitukutwesha kuleka kuhosha yuma yitunamoni nikutiyaku.”—Yil. 4:19, 20.