1. Muloñadi chitwatela kudiloñeshela kumona makabisha?

HAWUFUKU wakwila Mwanta wetu Yesu kanda yafwi, welukili nindi ejima akafuukulahu kwikala atumbanji twindi akayihela. (Yow. 17:14) Kufuma tuhu yina mpinji kushika nimakonu, akwaKristu ashinshika aYinsahu jaYehova anakuyikabisha kudi antu adimbululaña kudifukula kwalala. (2 Tim. 3:12) Chinakuswina kukuma kwanshakaminu yamakonu kwakwihi, twatela kukuhwelela netu ayilumbu jetu akusweja kutukabisha.—Mat. 24:9.

2-3. (a) Yumanyi yitwatela kwiluka kutalisha hawoma? (b) Tukuhanjekadi muchinu chibaaba?

² Tunateli kudiloñesha ñahi chayinu mpinji kumona makabisha? Hitwatela kufwikija yuma yejima yikatumwekenaku. Neyi tutachika kutoñojokahu, tunateli kutiya woma nawa tukutachika kwakama. Tukutiya woma chakwila tukuleka kumukalakela Yehova henohu kanda tumoni makabisha. (Yish. 12:25; 17:22) Woma dichitwa chikweti ñovu chazatishañayi “mukwankunyi [netu] Diyabolu,” hadi etu. (1 Pet. 5:8, 9) Yumanyi yitwatela kwila kulonda twakomiki makabisha?

³ Muchinu Chibaaba, tukudiza chitunateli kukolesha wubwambu wetu naYehova nichichalemena kuwukolesha chayinu mpinji. Tukudiza cheñi yuma yitwatela kwila kulonda tusweji kwikala ahamuka. Nawa nkumininaku, tukushinshika chitwatela kwila neyi antu anatuheli.

4. Kwesekeja na Aheberu 13:5, 6, yumanyi yitwatela kwiluka chikupu, nawa muloñadi?

⁴ Ilukenu chikupu nenu Yehova wayikeña nawa hamba kayishiyaku. (Tañenu Aheberu 13:5, 6.) Yaaka yayivulu  yinahitihu, Kaposhi Kakutalila kahosheli nawu: “Muntu wamwiluka chiwahi Nzambi wamukuhwelelaña chikupu mumpinji yakweseka.” Mwamweni! Hakwila nawu tukomiki makabisha, twatela kumukeña Yehova nikumukuhwelela, nikubula kujinoka netu watukeña chikupu.—Mat. 22:36-38; Yak. 5:11.

5. Yumanyi yinateli kutukwasha kwiluka netu Yehova watukeña?

⁵ Tañenuña Bayibolu mafuku ejima nankeñelu yakukundama kwakwihi naYehova. (Yak. 4:8) Neyi munakutaña, shenu maana hayilwilu yaYehova. Toñojokenuña chayikeñayi muyuma yahoshañayi nawa yelañayi. (Kwid. 34:6) Chinateli kuyikalila antu amakwawu kukuhwelela nawu Nzambi wayikeña muloña kanda ayimwekesheleñahu dehi kukeña. Neyi mumona iku kukala, anukenu njila mwayimwekesheleliyi Yehova luwi niwushona. (Mas. 78:38, 39; Rom. 8:32) Chimukushinshikaña hayuma yimwamonaña nikutoñojoka chikupu hayuma yimunatañi Mwizu daNzambi, mukumona yuma yayivulu yayililayi Yehova. Neyi mwasakililaña hayuma yejima yayililañayi Yehova, wubwambu wenu nayena wukukola nankashi.—Mas. 116:1, 2.

6. Kwesekeja na Masamu 94:17-19, kulomba kwakufuma hamuchima kunateli kuyikwasha ñahi?

⁶ Lombenuña mpinji yejima. Fwikijenu hadi kansi weyala wudi mwibwambu datata yindi. Wukutiya nindi wakiñewa chakwila wukutiya wanyi woma kumulejamu tata yindi yuma yamumwekena chili yayiwahi chili yatama. Ninenu munateli kwikala nawubwambu wamuchidiwu neyi muswina kwakwihi naYehova mukulomba kwakufuma hamuchima mafuku ejima. (Tañenu Masamu 94:17-19.) Neyi munakulomba kudi Yehova, ‘mwañenu muchima wenu neyi menji’ nawa mulejenu Tata yenu wukukweti kukeña yuma yejima yinakuyitiyisha woma nikuyakamisha. (Mukeña 2:19) Yumanyi yikafumamu? Mukwikala nachuma chashimuna Bayibolu nawu “kuwunda kwaNzambi kwabadika kwiluka kwejima.” (Fwi. 4:6, 7) Neyi mulombaña chamuchidiwu, mukuditiya nenu munaswini kwakwihi naYehova.—Rom. 8:38, 39.

7. Muloñadi chimwatela kukuhwelela chikupu nenu yuma yakanayi Nzambi yikashikijewa?

⁷ Kuhwelelenu chikupu nenu nkisu jaWanta waNzambi jikashikijewa. (Kuch. 23:19) Neyi mukuhwelela nenu yikaninu yeniyi yikashikijewa wanyi, chikwikala chaswayi kuyichinisha kudi Satana niantu jindi. (Yish. 24:10; Heb. 2:15) Munateli kukolesha ñahi chikuhwelelu chenu muWanta waNzambi makonu? Ikalenu nampinji yakudiza hayikaninu yaNzambi nihaWanta windi nimuloña waweni wumunateli kukuhwelela chikupu nenu yikashikijewa. Chumichi chinateli kuyikwasha ñahi? Shinshikenu chuma chamumwekeneni Stanley Jones, akasiliwu yaaka 7 muloña wachikuhwelelu chindi. * Chumanyi  chamukwashili kuumika nakashinshi? Wahosheli nindi: “Chikuhwelelu chami chakoleli muloña nelukili chekala Wanta waNzambi niyuma yiwakela nawa hinajinokeleñaku, dichi kwosi muntu watwesheli kunfumisha kudi Yehovaku.” Neyi mwakuhwelela chikupu muyikaninu yaNzambi, mukuswina kwakwihi naYehova nawa himwakatiya womaku.—Yish. 3:25, 26.

8. Chamwekeshañadi neyi twayaña nakupompa hela nehi? Lumbululenu.

⁸ Pompenuña mpinji yejima. Kupompa kwatukwashaña kuswina kwakwihi naYehova. Neyi twayaña kukupompa hela nehi chinateli kumwekesha neyi chakwila twakatwesha kuumika makabi itukamona kumbidi hela nehi. (Heb. 10:24, 25) Tunahoshelidi mwenimu? Neyi twiteja kukala kwantesha kutukañesha kuya nakupompa, chakekala ñahi kumbidi mpinji yitwakashaña wumi wetu hakatoña kufwila kuya nakupompa hamu nawamanakwetu niahela? Munjila yikwawu, neyi tudikasa mumuchima nawa tupompaña, tuketeja wanyi antu atudimbululaña kutulekesha kupompa. Ayinu diyi mpinji yitwatela kukeña nankashi kupompa kwetu. Neyi tukeñesha kupompa, kwosi ikañesha, hela nshimbi janfulumendi jikatulekesha kumwovwahila Nzambiku.—Yil. 5:29.

9. Muloñadi kuhembela nsona kumutu chikunateli kutukwasha kwikala adiloñesha kumona makabisha?

⁹ Hembelenuña nsona jimwakeña kumutu. (Mat. 13:52) Munateli kuvulamena jinsona mpinji yikwawu muloña wakubula kuwanina, ilaña Yehova nateli kuzatisha spiritu yindi yajila kuyikwasha kwanuka jinsona. (Yow. 14:26) Talenu chahosheliyi manakwetu akasiliwu kuEast Germany mukaleya mwakwila kwosi kumona muntu, wahosheli nindi: “Nazañaleli nankashi muloña wakwila nahembeleli jinsona jajivulu kumutu! Hela chakwila nadiña kwankawami, nadiña nakutoñojoka haniji nsona mpinji yejima.” Nsona jelukiliyi jamukwashili manakwetu kukundama kwakwihi naYehova nikuumika nakashinshi.

10. Muloñadi chitwatela kuhembela tumina kumutu?

¹⁰ Hembelenu kumutu tumina twakumushimeka Yehova nikutwimba. Pawulu naSilasi chayikasiliwu mukaleya muFwilipi, embili tumina twakumushimeka Yehova twahembeleliwu kumutu. (Yil. 16:25) Munjila yoyimu, chelili amanakwetu niahela adiña muSoviet  Union kunyima ayitwali muwunkoli kuSiberia, adikolesheli ñahi? Muhela Mariya Fedun wanukili nindi: “Twembileña tumina, tumina twejima tutwelukili twamumukanda wakamina. Wahosheli nindi tumina twayikolesheli wonsu wawu nawa twayikwashili kuswina kwakwihi naYehova. Mwatiyaña ñahi neyi mwimba tumina tumwakeña nankashi? Dichi tachikenu kuhembela kumutu twenitu tumina.—Talenu chikasha chinakwila nawu “ Nkwashi Nihamuki.”

11-12. (a) Kwesekeja na 1 Samweli 17:37, 45-47, muloñadi Davidi chadiñileñayi wahamuka? (b) Chikumanyi chitwatela kudizila kudi Davidi?

¹¹ Hakwila nawu tuumiki makabisha, chiña twikala ahamuka. Munateli kwila ñahi neyi mumona nenu mwahamuka wanyi? Mwatela kwanuka nenu kuhamuka kwakweni hikwashindamena hammwekenu yenu, hañovu hela hawuswaku. Shinshikenu hadi Davidi hadiñayi kansi mpinji yazuñiliyi naGoliyati. Davidi wadiña wanyanya, wazeya nawa wabula kwiluka njita neyi tukumwesekeja naGoliyati. Davidi wadiña wanyi nampoku yakabali. Hela chochu wadiña wahamuka. Davidi wahamukili nakuya nakuzuña naGoliyati.

¹² Muloñadi Davidi chadiñileñayi wahamuka chikupu? Wakuhweleleli chikupu nindi Yehova wadiña nindi. (Tañenu 1 Samweli 17:37, 45-47.) Davidi hashili maana hakutaluka kwaGoliyatiku. Ilaña welukili nindi Goliyati wakeheli kudi Yehova. Yumanyi yitukudizila kuniyi nsañu? Tunateli kwikala ahamuka neyi tukuhwelela netu Yehova wudi nanetu nawa twiluka chikupu netu ayilumbu jetu akehelamu neyi tuyesekeja naNzambi Wañovu Jejima. (2 Kushi. 20:15; Mas. 16:8) Tunateli kwikala ñahi ahamuka yinu mpinji henohu makabisha kanda atumwekeni?

13. Tunateli kwikala ñahi ahamuka? Lumbululenu.

¹³ Twekalaña ahamuka neyi tushimwinaña nsañu yayiwahi yaWanta waNzambi. Muloñadi? Muloña kushimwina kwatukwashaña kumukuhwelela Yehova nikubula kutiya antu woma. (Yish. 29:25) Neyi chakolaña mujimba muloña wakudolojola, twekalaña ahamuka neyi tushimwinaña kwitala nikwitala, kumaluña kwawanikaña antu amavulu, wunsahu wamumpanji nikumaluña akulandishila.  Neyi tubula woma wakushimwina, tukwikala adiloñesha kutwalekahu kushimwina hela chakwila mudimu wetu anawulekeshi.—1 Tes. 2:1, 2.

14-15. Yumanyi yitwatela kudizila kudi muhela Nancy Yuen nimuhela Valentina Garnovskaya?

¹⁴ Tunateli kudizilaku yuma yayivulu kudi ahela ayedi ashinshika amwekesheli kuhamuka. Muhela Nancy Yuen wadiña wamulehi mamita 1.5, ilaña hadiña nawomaku. * Wakaanini kuleka kushimwina nsañu yayiwahi yaWanta waNzambi. Chafuminimu amukasili yaaka kubadika ha 20 muChina. Akwanshimbi amwihwileña ahosheli nawu “wadiña wakalisha” mwituña dawu.

¹⁵ Munjila yoyimu, muhela Valentina Garnovskaya amukasili muSoviet Union mapampa kasatu, neyi kuyibomba hamu yaaka 21. * Muloñadi? Wafuukwilihu kutwalekahu kushimwina chakwila akwanshimbi amuteneni nawu “wadiña mbanji chikupu.” Chumanyi chaletesheli awa ambanda ayedi ashinshika kwikala ahamuka chikupu? Elukili chikupu nawu Yehova wadiña nawena.

16. Tunateli kwila ñahi hakwila nawu twikali ahamuka chikupu?

¹⁶ Neyi chitunahanjekihu, hakwila twikali ahamuka chikupu bayi tudikuhwelela etu aweniku. Ilaña twatela kukuhwelela netu Yehova wudi nanetu nawa diyi watuzuñilañaku. (Kuhit. 1:29, 30; Zek. 4:6) Dichuma chinateli kutukwasha kwikala ahamuka.

17-18. Yesu watusoñamishili nindidi kwesekeja na Yowanu 15:18-21? Lumbululenu.

¹⁷ Twatiyaña kuwaha kutulemesha kudi antu amakwawu, ilaña bayi tutoñojokaña netu tudi amukunkulwayi neyi antu atuhelaku. Yesu wahosheli nindi: “Mudi namuzañalu enu neyi antu ayihela, kuyihaña hakachi kawu, kuyihosha kasawuntu nikuyitena kutama kukoola Mwana kamuntu.” (Luka 6:22) Watalishili mudihi?

¹⁸ Yesu hatalishili mukwila nindi akwaKristu  akatiyaña kuwaha kuyihelaku. Ilaña wadiña nakutusoñamisha hayuma yakatumwekena. Hitwekala antu amukanu kaayiku. Twashakamaña kwesekeja nantañishilu yaYesu nawa twashimwinaña nsañu yashimwinineñayi. Muloña wachumichi, kaayi katuhela. (Tañenu Yowanu 15:18-21.) Twakeñaña kumuzañalesha Yehova. Twaneñaña wanyi neyi antu atuhela muloña wakumukeña Tata yetu.

19. Tunateli kuyimbujola ñahi apostolu?

¹⁹ Bayi mwiteja chuma chikwilayi muntu hela kuhosha chiyitiyishi nsonyi muloña wakwikala Chinsahu chaYehovaku. (Mika 4:5) Tunateli kwikala nawoma wanyi neyi tutoñojokaña hachuma cheliliwu apostolu muYerusalema hanyima yakufwa kwaYesu. Elukili chayiheleliwu kudi anlomboli jansakililu yawaYudeya. (Yil. 5:17, 18, 27, 28) Hela chochu, atwalekelihu kuya kutembeli nawa adilumbulwileña hatooka nawu hiyatumbanji twaYesu. (Yil. 5:42) Etejeli wanyi woma kuyilekesha. Ninetu tukumwekeshaña netu hitukweti womaku neyi tudilumbululaña netu tudi aYinsahu jaYehova, kumudimu, kushikola nimwiluña mutwashakamaña.—Yil. 4:29; Rom. 1:16.

20. Muloñadi apostolu chazañaleleliwu hela chakwila ayiheleli?

²⁰ Muloñadi apostolu chazañaleleliwu? Elukili chuma chaletesheli ayiheli nawa amweni nawu chachiwahi kuyihela muloña wakwila nkeñelu yaYehova. (Luka 6:23; Yil. 5:41) Nkumininaku, kapostolu Petulu wasonekeli nindi: “Neyi mukabakana kukoola kuloña, mukweti muzañalu.” (1 Pet. 2:19-21; 3:14) Neyi twiluka netu anakutuhela muloña wakwila yuma yaloña, hitwakaleka kumukalakela Yehova muloña wakutiya womaku.

21-22. (a) Yumanyi yimunafuukuluhu kwila hakudiloñeshela chadimu namakabi imwakamona? (b) Tukahanjekadi muchibaaba chinalondelihu?

²¹ Tuneluki wanyi mpinji yakatachikawu kutukabisha hela mpinji yakalekeshawu kudifukula kwetu kudi akwanfulumendi. Hela chochu, tweluka netu tunateli kudiloñesha kuhitila mukukolesha wubwambu wetu naYehova, kwikala ahamuka chikupu nikwiluka chakumika neyi anatuheli. Neyi tudiloñesha chayinu mpinji, chikatukwasha kutwalekahu kumukalakela Yehova kumbidi.

²² Indi neyi alekesha kudifukula kwetu chayinu mpinji? Muchibaaba chinalondelihu, tukahanjeka hayishina yamuBayibolu yinateli kutukwasha kutwalekahu kumukalakela Yehova hela chakwila anatulekeshi.