1-2. (a) Kwesekeja nalushimbi lwaYesu lwekala haMatewu 28:18-20, mudimwinyi wukweti chipompelu chawakwaKristu? (b) Malwihwinyi itukuhanjeka muchinu chibaaba?

APOSTOLU atela azañaleli hampinji yapompeleliwu kumpidi. Hanyima yakwila Yesu nasañuki dehi, wayilejeli kuya nakubulakana nindi kunidi iluña. (Mat. 28:16) Hadaha diyi mpinji [yamwekeniyi] kudi anakwetu akubadika ha 500 hampinji yoyimu.” (1 Kor. 15:6) Muloñadi Yesu chalejeleliyi atumbanji twindi kuya nakubulakana nindi kunidi iluña? Kulonda yayinki lushimbi nindi: “Dichi, yenu mwakelishi antu akunyuza yejima ekali atumbanji.”—Tañenu Matewu 28:18-20.

² Atumbanji atiyili mazu aYesu ekalili hakachi kawantu atachikili chipompelu chawakwaKristu chakusambila. Mudimu wanichi chipompelu wadiña wakwilisha atumbanji amavulu aKristu. * Makonu kudi yipompelu yayivulu yawakwaKristu alala kunyeñumuka kaayi kejima nawa iyi yipompelu yazataña mudimu wowumu. Muchinu chibaaba tukuhanjeka hamalwihu awana: Muloñadi chichalemena kwilisha atumbanji? Yumanyi yinabombelimu? Komana akwaKristu ejima akweti mudimu wakwilisha atumbanji? Muloñadi chichakeñekelaña kudiwunjika hakwilisha atumbanji?

3. Kwesekeja na Yowanu 14:6 ni 17:3, muloñadi mudimu wakwilisha atumbanji chiwalemena?

³ Muloñadi chichalemena kwilisha atumbanji? Muloña atumbanji twaKristu hohu diwu anateli kwikala  amabwambu jaNzambi. Kubombelahu, antu amulondelaña Kristu ekalaña namuzañalu chayinu mpinji nawa akweti kuchiñeja kwakwikala nawumi wahaya nyaaka kumbidi. (Tañenu Yowanu 14:6; 17:3) Chakadi nikujina, Yesu watwinka mudimu walema, ilaña hitwawuzataña nkawetuku. Kapostolu Pawulu wasonekeli kutalisha hadi yomweni niakwawu nindi: “Etu tudi akwakukalakala hamu naNzambi.” (1 Kor. 3:9) Yehova niKristu ayinka antu abula kuwanina kukooleka kwakweni!

4. Chumanyi chitunateli kudizila kuyuma yamweniyi manakwetu Ivan niñodindi Matilde?

⁴ Mudimu wakwilisha atumbanji wunateli kutuletela muzañalu chikupu. Toñojokenu hayuma yamumwekeneni manakwetu Ivan niñondidi, Matilde, muColombia. Amushimwinini Davier mukwenzi weyala wayilejeli nindi: “Inakukeña kuhimpa yilwilu yami, ilaña chinakunkalila.” Davier wadiña mukakwasa jinkonyi nawa wazatishileña yitumbu yashetana, washeteleña nawa washakamineña nakajila kindi Erika. Ivan walumbulwili nindi: “Twatachikili kumwendela kumukala wawu kwakulehi namakinga, hadiña hakwenda maora amavulu nawa njila yadiña yamalowa chikupu. Chelili Davier yatachiki kuhimpa yilwilu yindi, Erika niyena watachikili kudiza Bayibolu.” Mukuhita kwampinji, Davier walekeli kunwa yitumbu yashetana, walwa nawa walekeli chisela chakwasa nkonyi. Nawa wamusumbwili Erika. Matilde wahosheli nindi: “Chelili Davier naErika apapatishewi mu 2016, twanukileña chahosheleñayi Davier nindi, ‘Inakukeña kuhimpa yilwilu yami, ilaña chinakunkalila.’ Twatiyili kuwaha chakwila twadilili.” Chakadi nikujina, twazañalalaña neyi tukwasha antu kwikala atumbanji twaKristu.

5. Chumanyi chatachi chitwelaña hakwilisha atumbanji?

⁵ Chuma chatachi chitwelaña hakwilisha atumbanji ‘hikukeñakeña’ antu akweti nyichima yatelela. (Mat. 10:11) Twamwekeshaña netu tudi aYinsahu jaYehova kuhitila mukushimwina antu ejima itwawanaña. Twamwekeshaña netu tudi akwaKristu alala neyi tulondela lushimbi lwaKristu lwakushimwina.

6. Chumanyi chinateli kuyikwasha kuzata chiwahi mumudimu wakushimwina?

⁶ Antu amavulu akeñaña kudiza chalala chamuBayibolu, ilaña amavulu itwabulakanaña hakusambila amwekeshaña mpwila wanyi. Twatela kuyisañumuna kulonda ekali nampwila. Twatela kuloñesha chiwahi hakwila nawu tushimwineña chiwahi. Tondenu mutu wunateli kusañumuna antu imukuwana. Kuhiñahu loñeshenu chimunateli kutachika kuhosha hanowu mutu.

7. Munateli kutachika ñahi kuhanjeka namuntu, nawa munakutoñojoka nenu chalemenadi kuyitiyilila nikulemesha yitoñojoka yawu?

⁷ Chakutalilahu, munateli kumwila mwiniitala nenu: “Inakukeña kuyihulaku lwihu. Kukala kutunakumona makonu dikunakumona antu ejima mukaayi kejima. Munakutoñojoka wanyi nenu kunakukeñeka nfulumendi yatela kumanisha kukala kwejima kudi mukaayi?” Kuhiñahu munateli kuhanjeka Danyeli 2:44. Hela munateli kumwihula nenu: “Chumanyi chinateli kuyikwasha kukulisha chiwahi anyana? Kwiji munakutoñojokahu nenudi?” Nkumininaku hanjekenu Kuhituluka 6:6, 7. Hamutu wejima wumukutonda, toñojokenuña hadi antu imukuhanjeka nawu. Toñojokenu chiwunateli kuyikwasha neyi adiza  chatañishaña Bayibolu. Neyi munakuhanjeka nawu, chalema nankashi kuyitiyilila neyi anakulumbulula nikulemesha yitoñojoka yawu. Kwila mwenimu chikuyikwashaku kwiluka yitoñojoka yawu, nawa akukeñaña kuyitiyilila.

8. Muloñadi chitwatela kufuntilaku mpinji yejima kudi antu?

⁸ Henohu muntu kanda yafuukulihu kudiza Bayibolu, mwatela kufuntilaku kakavulu. Muloñadi? Muloña kakavulu antu avula kuwanikahu wanyi neyi tufuntilaku. Cheñi, chakeñekaña kufuntilaku nankashi kulonda mwiniitala yekali wakasunuka kudiza nenu Bayibolu. Mwatela kwanuka nenu, mutondu wakulaña neyi munakuwutukumwina mpinji yejima. Munjila yoyimu, muntu wukweti mpwila yakumwiluka Yehova niKristu nateli kwikala nampwila neyi tuhanjekaña nindi Izu daNzambi mpinji yejima.

9-10. Muloñadi chitukuhoshela netu mukaKristu wejima wazatañaku mudimu wakuwana antu akweti nyichima yayovu?

⁹ MukwaKristu wejima wukweti mudimu wakukwasha kukeñakeña antu akweti nyichima yayovu. Tunateli kwesekeja chumichi nakukeñakeña mwana wunajimbelimu. Munjilanyi? Toñojokenu chuma chamumwekeneni mwana wajimbelelimu wadiña nayaaka yisatu. Ayili nakumukeñakeña kudi antu akushika ku 500. Nkumininaku, chimwahitili maora 20, muntu wumu wadihanini wamuwanini mumaha. Iwu muntu wamuwanini wakaanini kumusakilila. Wahosheli nindi: “Iwu mwana namwekani muloña wakwila antu amavulu azatila hamu hakumukeñakeña.”

¹⁰ Antu amavulu adi neyi iwu mwana wajimbeli. Adana kuchiñeja, ilaña anakukeña wakuyikwasha. (Efwe. 2:12) Wejima wetu  kubadika ha 8 miliyoni tunakuzata mudimu wakukeñakeña antu atelela. Hadaha munateli kuwana wanyi muntu wunakukeña kudiza Bayibolu. Hela chochu, akwakushimwina amakwawu anakuzatila mwiluña dodimu dakushimwina anateli kuwana muntu wunakukeña kudiza chalala chaMwizu daNzambi. Neyi manakwetu hela muhela yawana muntu yekali kambanji kaKristu, ejima azatiliku mudimu wakukeñakeña atela kuzañalala.

11. Hela chakwila munakulombola wanyi kudiza Bayibolu, munjilanyi yikwawu mumunateli kukwashila kwilisha atumbanji?

¹¹ Hela chakwila chayinu mpinji mudana kadizi waBayibolu, munateli kukwashaku kwilisha atumbanji munjila yikwawu. Chakutalilahu, munateli kuyitambwila nikuyikwasha antu amaha anakwinza Kwitala daWanta nakupompa. Neyi mumwekesha kukeña muniyi njila, chikumuleñela kwiluka nindi mwamweni tudi atumbanji twaKristu alala. (Yow. 13:34, 35) Ñakwilu yenu hakupompa hela chakwila yayihi, yinateli kukolesha amaha anakwinza kupompa kwakulahu. Munateli cheñi kuzata namukwakushimwina wamuha mumudimu wakushimwina nikumukwasha chakuzatisha Nsona hakuhanjeka nawantu. Neyi mwila mwenimu, mukumudizisha kumwimbujola Kristu.—Luka 10:25-28.

12. Komana twatela kwikala nawuswa wasweja hakwila tudizishi antu kwikala atumbanji? Lumbululenu.

¹² Kwosi muntu hakachi ketu wunateli kutoñojoka nindi twatela kwikala nawuswa wasweja hakudizisha antu ekali atumbanji twaYesuku. Muloñadi? Shinshikenu yuma yamumwekeneni Faustina washakamaña muBolivia. Chatachikiliyi kuhanjeka nawaYinsahu jaYehova, wadiña weluka kutaña wanyi. Ilaña ichi neluki kutaña chantesha. Chayinu mpinji wapapatishewa nawa wakeña kudizisha antu. Kakavulu, walombolaña atudizi 5 mumulungu. Hela chakwila Faustina hatañaña chiwahi neyi chatañaña atudizi twindiku, nakwashi antu 6 kupapatishewa.—Luka 10:21.

13. Hela chakwila tukweti nyidimu yayivulu, yumanyi yayiwahi yafumaña mumudimu wakwilisha atumbanji?

¹³ AkwaKristu amavulu akweti nyidimu yayivulu yakuzata. Hela chochu, alombolaña atudizi aBayibolu nawa atiyaña kuwaha. Talenu chakutalilahu chaMelanie. Wadiña mujiki nawa wakulishileña mwanindi wamumbanda wadiña nayaaka 8 muAlaska. Wazatileña cheñi mudimu nikwakamena nvwali yindi wadiña nakansa. Melanie diyi wadiña hohu Chinsahu muchituñilu chawu. Mpinji yejima wadiña nakulomba ñovu kulonda ayi nakushimwina hela chakwila kwadiña mashika nankashi muloña wakeñeleña muntu wakudizisha Bayibolu. Nkumininaku,  wawanini Sara wakeñesheleña kwiluka ijina daNzambi. Mukuhita kwampinji, Sara wetejeli kudiza Bayibolu. Melanie wahosheli nindi: “Hachitanu-Hachitanu namelela, twayileña namwanami nakumudizisha. Twatiyileña kuwaha kusandujola ñakwilu yamalwihu ehwileñayi Sara nawa twatiyili kuwaha chikupu chekaliliyi ibwambu daYehova.” Sara womikili ikañesha, wafumini muchechi yawu nawa wapapatisheweli.

14. (a) Mudimu wakwilisha atumbanji wesekana ñahi namudimu wakukwata inshi? (b) Mazu aPawulu asonekawu ha 2 Timotewu 4:1, 2 anayikwashi ñahi?

¹⁴ Hela chakwila kanda muwani muntu wakudizisha, bayi muleka kukeñakeña anakukeña kwikala atumbanjiku. Mwatela kwanuka nenu Yesu wesekejeli mudimu wakwilisha atumbanji nawayibinda anshi. Ayibinda anshi azataña maora amavulu henohu kanda akwati inshi. Kakavulu azataña nawufuku hela nantetemena nankashi nawa mpinji yikwawu endaña maluña amalehi hamenji. (Luka 5:5) Munjila yoyimu, akwakushimwina amakwawu azataña maora amavulu ‘hakukeñakeña’ antu mukudiwunjika hampinji jambokamboka nikumaluña ashiyashana. Muloñadi? Kulonda atweshi kuwana antu amavulu. Antu azataña nañovu ekalaña nakukoleka kwakuwana antu amavulu akweti mpwila yakudiza chalala. Kwila mweseka kushimwina hampinji yimunateli kuwana antu hamatala hela heluña dimunateli kuyiwana nehi?—Tañenu 2 Timotewu 4:1, 2.

15. Muloñadi chichakeñekelaña kwikala adiwunjika hakulombola atudizi aBayibolu?

 ¹⁵ Muloñadi chichakeñekelaña kwikala adiwunjika hakulombola atudizi aBayibolu? Muloña wumu wudi wakwila nawu twatela kuzata nañovu chatela tukumineña hohu dakukwasha kadizi kwiluka nikukeña nsañu yamuBayibolu. Twatela kumukwasha kadizi kulonda yamwiluki nikumukeña Yehova, Nsoneki yaBayibolu. Kubombela hakumudizisha kadizi chuma chakeñañayi Yesu kudi atumbanji twindi, twatela kumukwasha kadizi kwiluka chatela kushakamayi hamu neyi mukwaKristu walala. Hampinji yinakufwilayi kuzatisha yishina yamuBayibolu, twatela kumukwasha mukudiwunjika. Atudizi amakwawu ahimpaña yitoñojoka niyilwilu yawu mutukweji twantesha hohu amakwawu hashimbulaña.

16. Yumanyi yimunadizili kuyuma yamweniyi Raul?

¹⁶ Mishonali wumu muPeru wamweni yuma yayiwahi muloña wakudiwunjika. Wahosheli nindi: “Nadiña nakadizi waBayibolu Raul wunadizishili nyikanda yiyedi. Ilaña wadiña nakumona kukala kwakuvulu muchihandilu chindi. Wadiña nakukala muwulu windi, wahosheleña mazu akasawuntu nawa anyanindi adiña nakumulemesha wanyi muloña wayilwilu yindi yatama. Wenjileña mpinji yejima nakupompa, dichi natwalekelihu kumuhempula nikumukwasha hamu nichisaka chindi. Muyaaka yisatu kufuma hinamuwanini, wapapatisheweli.”

17. Yumanyi yitukahanjekahu muchibaaba chinalondelihu?

¹⁷ Yesu watulejeli nindi “yenu mwakelishi antu akunyuza yejima ekali atumbanji.” Hakwila tuzati iwu mudimu, twatela kuhanjekaña mpinji yejima nawantu akuhwelela yuma yambukaku nayetu, kubombelahu ninana abulaña kuya kuchechi yidi yejima hela abula kukuhwelela nawu Nzambi wekala kwoku. Chibaaba chinalondelihu chikahosha chitunateli kushimwina nsañu yayiwahi kudi antu amboka-mboka.