1. Yehova watwila ñahi wejima wetu?

YEHOVA watukokela kwakwihi nayena. (Yow. 6:44) Toñojokenu mwatalisha chumichi. Yehova chashinshikiliyi antu ejima mukaayi, wamweni chuma chalema mudi enu, muchima wawuwahi wakumukeña. (1 Kushi. 28:9) Yehova wayiluka, weluka chimwatiyaña nawa wayikeña. Awa mazu atukoleshaña chikupu.

2. Yesu walumbulwili ñahi Yehova chakamenañayi nyikoku yindi hamuntu-hamuntu?

² Yehova wayakamenaña chikupu nawa wayakamenaña amanakwenu niahela akwaKristu ejima. Hakwila nawu tutiyishishi ichi chikuma, Yesu wamwesekejeli Yehova nakabiña. Neyi mukoku wumu yafuma hamukanka wawanyikoku 100, chumanyi chikwilayi kabiña? “[wukushiya] anyikoku 99 hamapidi nakuya nakukeñakeña owu mukoku wunajimbali.” Neyi kabiña yawana iwu mukoku wukuhila wanyi. Ilaña wukuzañalala. Chumanyi chitunakudizilaku? Mukoku wejima walema kudi Yehova. Yesu wahosheli nindi: “Tata yami wekala mwiwulu . . . hakeñaña wumu hadi awa akehelamu kujilumukaku.”—Mat. 18:12-14.

3. Tukuhanjekadi muchinu chibaaba?

³ Hitunakukeña netu tuneñesheña amanakwetu niahelaku. Tunateli kutondolwela ñahi kuhukesha akwetu? Nawa tunateli kwila ñahi neyi muntu yatuneñesha? Tukwakula awa malwihu muchinu chibaaba. Chatachi, tusambilenu kudiza hadi “awa akehelamu” ashimunawu haMatewu kapetulu 18.

4. “Awa akehelamu” hiyanyi?

⁴ “Awa akehelamu” hiyatumbanji twaYesu ejima akweti yaaka yashiyashana. Ejima wawu adi “neyi anyana anyanya,” muloña etejaña kuyidizisha kudi Yesu. (Mat. 18:3) Hela chakwila akweti nkulilu yambuka, yisemwa, nawa akweti yitoñojoka yashiyashana niyilwilu, wejima wawu amukuhwelela Kristu. Kristu niyena wayikeña nankashi.—Mat. 18:6; Yow. 1:12.

5. Yehova watiyaña ñahi neyi muntu yahukesha hela yaneñesha muntu Windi?

⁵ “Awa akehelamu” ejima alema kudi Yehova. Hakwila tutiyishishi chatiyañayi, toñojokenu hadi anyana. Twayikeña nankashi. Twayikiñaña muloña adana ñovu, eluka yuma wanyi nawa hiyakweti maana neyi akulumpiku. Hitwakeñaña kumona muntu wudi wejima kukabisha mukwawuku, nawa twaswejaña kuhila neyi tumona muntu nakukabisha mwana. Munjila yoyimu, Yehova niyena wakeñaña kutukiña. Watiyaña kutama neyi yamona muntu nahukeshi hela yaneñesha muntu Windi.—Isa. 63:9; Maku 9:42.

6. Kwesekeja 1 AKorinda 1:26-29, kaayi kayimonaña ñahi atumbanji twaYesu?

⁶ Munjilanyi yikwawu atumbanji twaYesu mwekalilawu neyi “akehelamu”? Twihulenu netu anyi alemeshawu mukanu kaayi? Antu aheta, aya mpuhu nawa akweti ñovu. Kwambukaku atumbanji twaYesu amwekanaña neyi alema wanyi nawa “akehelamu.” (Tañenu 1 AKorinda 1:26-29.) Ilaña Yehova dichayimonañayi wanyi.

7. Yehova wakeñaña nindi tuyileña ñahi amanakwetu niahela?

⁷ Yehova wayikeña ambuñindi ejima, hela chakwila anamukalakeli yaaka yayivulu hela amaha muchalala. Yehova walemesha amanakwetu niahela ejima, ninetu twatela kuyilemesha. Twatela ‘kukeña anakwetu ejima,’ bayi amu hohuku. (1 Pet. 2:17) Twatela kuzataña hanakumina ñovu yetu kulonda tuyikiñi amanakwetu nikuyakamena. Neyi tunaneñeshi hela kuhukesha muntu, hitwatela kwilaña neyi kwosi chuma chinamwekaniku, nakutoñojoka netu mukwetu nateli kutwanakena nikudiwulaku. Chumanyi chaleteshaña antu amakwawu kuhukana? Hadaha hamuloña wankulilu yawu. Amanakwetu niahela amakwawu adimonaña nawu ashikilamu wanyi. Amakwawu achidi amaha muchalala; kanda eluki nawu atela kwanakena antu neyi anayineñeshi. Hichikweti muloña nachitunakutiyaku, twatela kuzata nañovu kulonda tuleteña kuwunda. Kubombelahu, hela chakwila muntu wahukanaña nankashi nayuma yelaña akwawu, watela kwiluka nindi watela kudiwulañaku. Yuma yikufumamu, wukwikala namuzañalu ninawubwambu wawuwahi nawamanakwindi.

8. Yilwilwinyi yadiñaku mumafuku aYesu yayiluwañesheli atumbanji twindi?

⁸ Chumanyi chamuletesheli Yesu kuhosha hadi “awa akehelamu”? Atumbanji twindi amwihwili nawu: “Hinyi wabadika chikupu muWanta wamwiwulu?” (Mat. 18:1) AYudeya amavulu amweneña yifulu nawu yalema nankashi. Muntu wumu wadiza nankashi wahosheli nindi: “Kutambwila kalemesha kudi antu nikwikala waya mpuhu, dichuma chalemesheliwu antu muchihandilu chawu.”

9. Chumanyi chateleleli kwila atumbanji twaYesu?

⁹ Yesu welukili nindi atumbanji twindi ateleli kuzata nañovu kulonda abuli kwikala nayilwilu yadiña nawaYudeya yakufwila kwikala waya mpuhu. Wayilejeli nindi: “Muntu wunakukeña kwikala muneni chikupu hakachi kenu, yekali neyi kansi chikupu, nawa wunakulombola, yekali neyi mukwakuzatila akwawu.” (Luka 22:26) Twadimonaña netu tudi  ‘atwansi chikupu’ neyi ‘tumonaña akwetu netu atubadika.’ (Fwili. 2:3) Neyi tumonaña akwetu netu atubadika, tukutondolwelaña kuyihukesha.

10. Kufumbanyi kwaPawulu kutwatela kuzatisha?

¹⁰ Amanakwetu niahela ejima atubadika etu munjila yimu hela yikwawu. Neyi tusha maana hayilwilu yawu yayiwahi tukuyiluka chekalawu. Twatela kuzatishaña kufumba kwayifumbiliyi kapostolu Pawulu akwaKorinda kwakwila nawu: “Hinyi wakuleñelaña wudimoneña neyi wabadika mukwenu? Hanu dinu, chumanyi chiwukweti chiwabulili kutambwila? Dichi, neyi wachitambwilili, muloñadi chiwadisambilaña neyi kwiji wachitambwilili wanyi?” (1 Kor. 4:7) Twatela kwikala ababala kulonda tubuleña kukeña akwetu netu atulemesheña, hela kuyimonaña akwetu netu twayibadika. Neyi manakwetu wahanaña mpanji chiwahi hela muhela wukweti chawana chakulombola atudizi, watela kuhanaña kalemesha kejima kudi Yehova.

11. Chikumanyi chadizishileñayi Yesu muchakutalilahu chamwanta ninduñu yindi?

¹¹ Hanyima yakwila Yesu nayisoñamishi dehi akwakumulondela kubula kuhukesha akwawu wahanini chakutalilahu chamwanta ninduñu yindi. Mwanta wamwanakeneni nduñu mukudi wakañenyiyi kufwetayi. Chimwahitili mpinji, iwu nduñu yowumu wakañenyi kwanakena mukwawu nduñu wadiña namukudi wantesha. Nkumininaku, iwu mwanta wamumbilili iwu nduñu wabula luwi mukaleya. Chumanyi chitunakudizilaku? Yesu wahosheli nindi: “Tata yami wekala mwiwulu niyena dichakayilayi neyi himukwanakenaña anakwenu chakufuma kumuchimaku.”—Mat. 18:21-35.

12. Neyi tukaana kwanakena twayineñeshaña ñahi akwetu?

¹² Chuma cheliliyi nduñu chamuletesheli yena kukabakana niantu amakwawu. Chatachi, wamukabishili mukwawu nduñu kuhitila mukumutwala “kulonda amushi mukaleya sampu namufweti dehi mukudi windi.” Chamuchiyedi, waneñesheli anduñu amakwawu amweni yuma yeliliyi. “Akwawu anduñu chamweniwu yuma yeliliyi, atiyili kutama nankashi.” Munjila yoyimu, yuma yitwelaña yinateli kukwasha hela kuneñesha akwetu. Neyi muntu yatuneñesha nawa tukaana kumwanakena, chumanyi chinateli kumwekana? Chatachi, twamuneñeshaña neyi tubula kumwanakena, kumutiyilila hela kumumwekeshela kukeña. Chamuchiyedi, twaleteshaña antu amakwawu muchipompelu kubula kwikala akasunuka neyi amona nawu tunakutiyañana wanyi nanowu muntu.

13. Yumanyi yimunadizili kuyuma yamweniyi payiniya wumu?

¹³ Neyi twanakenaña amanakwetu niahela twekalaña namuzañalu etu aweni niantu amakwawu. Dichuma chamumwekeneni payiniya wumu itukutena netu Crystal. Amuneñesheli kudi muhela muchipompelu. Crystal wanukaña nindi: “Mazu azatishiliyi antapili neyi mpoku. Nakeñeleña niwanyi kuya nindi mumudimu wakushimwina. Iyena nimuzañalu wunadiña nawu wamanini.” Crystal watoñojokeleña nindi chadiña hohu chachiwahi kuhila. Ilaña hamuhilili muhela hela kusha maana hachatiyileñayiku. Wazatishili kufumba kwamuNsona kwadiña muchibaaba chahosheleña nawu “Anakenenuña Chakufuma haMuchima” chadiña muKaposhi Kakutalila kaEnglish KaOctober 15, 1999. Wamwanakeneni muhela. Crystal wahosheli nindi: “Ichi neluki chikupu nami wejima wetu tunakuzata nañovu kulonda tuvwali wuntu wawuha nawa Yehova  watwanakenaña chakufuma hamuchima mpinji yejima. Ichi natiyaña tuhu neyi chiteli chasweja kulema chinafumi hamafwiji ami. Ichi nidi namuzañalu.”

14. Kwesekeja naMatewu 18:21, 22, kukalanyi kwadiña nakapostolu Petulu nawa munadiziliku kwodi chamwakwiliwu kudi Yesu?

¹⁴ Tweluka netu twatela kwanakenaña; dichuma chachiwahi chitwatela kwila. Ilaña chinateli kutukalila kwanakena. Hadaha kapostolu Petulu niyena chamukalileña mpinji yikwawu. (Tañenu Matewu 18:21, 22.) Chumanyi chinateli kutukwasha? Chatachi, toñojokenuña chikupu hamapampa ayanakenañayi Yehova. (Mat. 18:32, 33) Hitwateleli kutwanakenaku, ilaña watwanakena chikupu. (Mas. 103:8-10) “Ninetu twatela kudikeña wumu namukwawu.” Kwanakena bayi neyi hichuma chitwatela kufuukula kwila hela nehiku. Twatela kwanakenaña amanakwetu niahela. (1 Yow. 4:11) Chamuchiyedi, toñojokenuña chikupu hachuma chamwekanaña neyi mwanakena akwenu. Tunateli kukwasha muntu wunatuneñeshi, kunuñañesha chipompelu, kukiña wubwambu wetu naYehova nikufumisha chiteli chalema hamafwiji etu. (2 Kor. 2:7; Kol. 3:14) Nkumininaku, mulombenu Muntu watulejaña nindi twanakeneña akwetu. Bayi mumwitejaña Satana yaluwañeshi kuwunda kumukweti nawamanakwenu niahelaku. (Efwe. 4:26, 27) Twatela kwiteja Yehova yatukwashi neyi tunakukeña tutondolweli kufwa mumuhetu waSatana.

15. Kwesekeja naAKolosi 3:13, yumanyi yitwatela kwila neyi yuma yineliyi muhela hela manakwetu yinatuneñeshi?

¹⁵ Indi neyi mukwenu mukwakwitiya yela yuma yinayineñeshi, mukwila ñahi? Zatenu nañovu yejima kulonda muleti kuwunda. Mulejenumu Yehova mukulomba chimunakutiya. Mulombenu yamukiswili owu muntu wunayihukeshi, nawa yayikwashi kumona yilwilu  yayiwahi yekala nanowu muntu, yilwilu yayiwahi yakeñayi Yehova mudi yena. (Luka 6:28) Neyi mukutwesha wanyi kujimbala yiluwa yineliyi manakwenu, toñojokenu hanjila yayiwahi yimwatela kuhanjekelamu. Chachiwahi kutoñojoka mpinji yejima nenu manakwenu hanateli kuyineñeshelamu hohuku. (Mat. 5:23, 24; 1 Kor. 13:7) Neyi munakuhanjeka nindi, toñojokenuña nenu himuntu wudi nayilwilu yayiwahi. Indi neyi nakukeña kuleta kuwunda wanyi? “Ditiyililenuña.” Twalekenuhu kwikala adiwunjika namanakwenu. (Tañenu AKolosi 3:13.) Chuma chasweja kulema, bayi mudihililaku muloña chikuluwañesha wubwambu wenu naYehova. Bayi mwiteja chuma chidi chejima chiyihukeshiku. Neyi mwilaña mwenimu, mukumwekeshaña nenu mwamukeña Yehova kubadika chuma chidi chejima.—Mas. 119:165.

16. Wejima wetu hamuntu-hamuntu tukweti mudimwinyi?

¹⁶ Twasakililaña hakumukalakela Yehova mukunuñañana neyi “mukanka wumu” nawa wukweti “kabiña wumu.” (Yow. 10:16) Mukanda waAbateyanishiwa ku Kucita Ukufwaya Kwa Kwa Yehova, ifu 165, wahosha nawu: “Chineli mwatiyaña kuwaha kwikala anuñañana, ninenu mwatela kuzataña nañovu kulonda mutwalekihu kwikala anuñañana.” Dichi, twatela “kuyimonaña amanakwetu neyi chayimonañayi Yehova.” Kudi Yehova, etu “akehelamu” watulemesha wejima wetu. Komana dichimwayimonaña amanakwetu niahela? Yehova wamonaña nawa walemesha yuma yejima yimwelaña hakuyikwasha nikuyakamena.—Mat. 10:42.

17. Chumanyi chitunakufwila kwila?

¹⁷ Twayikeña akwetu akwakudifukula. Dichi “[tunakufwila] kubula kusha chuma chakumuhukesha manakwetu hela chakumukañesha.” (Rom. 14:13) Twayimonaña amanakwetu niahela netu atubadika nawa tunakukeña kuyanakena chakufuma hamuchima. Dichi, bayi twitejeña akwetu atuhukesheñaku. Ilaña, “tufwileña yuma yaletaña kuwunda niyuma yatuleñelaña kudikolesha wumu namukwawu.”—Rom. 14:19.