Navwalikili muMay 19, 1940, mumusumba waAmioûn, Lebanon. Chimwahitili yaaka yantesha, chisaka chetu chabuukilili mumusumba waTripoli, kwankulishililiwu muchisaka chamwiluka Yehova Nzambi nawa chamukeña. Twadiña atanu, ambanda asatu niamayala ayedi nawa ami iyami wadiña kabinda. Anvwali jami hiyaswejeli kulemesha maliku. Chisaka chetu chalemesheli kudiza Bayibolu, kuya kukupompa kwawaKristu nikukwasha antu kumwiluka Nzambi.

Muchipompelu chetu mwadiña akwaKristu awayishewa amavulu. Wumu wadiña Michel Aboud, walombweleña mukanda wutwateneneña netu Kudiza Mukanda haChipompelu. Wadizilili chalala muNew York nawa diyi watachikili mudimu wakushimwina chalala muLebanon mu 1921. Inakwanuka chayikwashiliyi atwansi ayedi afumini kushikola yaGileyadi aAnne niGwen Beavor. Ekalili amabwambu jetu chikupu. Chimwahitili yaaka, natiyili kuwaha chitwadiwanini naAnne muUnited States. Chimwahitili mpinji, twadiwanini naGwen, asumbwiliwu kudi Wilfred Gooch nawa azatilileña haBeteli hakasanji kamutayi kamuLondon, England.

Hinadiña kansi muLebanon mwadiña hohu akwakushimwina antesha. Ilaña twazatileña nañovu kulejaku antu nsañu yamuBayibolu yitwelukili.  Twashimwinineña hela chakwila atukaañesheleña kudi akulumpi jansakililu amakwawu. Nanukaña yuma yikwawu yatumwekeneni.

Ifuku dimu, muhelami Sana ninami twashimwinineña nsañu yamuBayibolu mwitala dimu. Kapristu wenjili mukapeka mutwadiña. Kwatela kwadiña muntu wamutambikili. Kapristu watachikili kutuka muhelami. Wahilili nawa wamushinjikili yayami Sana kufuma hewulu nawa wamukatishili. Kudi muntu wayitemesheleli akapokola foni, enjili nakumukwasha Sana. Amutwalili iwu kapristu kukapokola nawa amuwanini nawuta. Mukulumpi wawakapokola wamwihwili nindi: “Eyi komana wudi hinyi? Watañishaña antu kulonda amwiluki Nzambi tahindi wayitañishaña kulonda aleteña yikonkojola?”

Mpinji yikwawu yinanukaña himpinji yelili chipompelu chetu chifweti mali kubasi kulonda yitutwali kwiluña dakwakulehi nakushimwinaku nsañu yayiwahi. Twashimwinineña chiwahi sampu nichatiyiliyi kapristu yuma yitwadiña nakwila nawa watumini izanvu dawantu kulonda dinzi nakutulukuka. Atukabishili, atwasili malola, nawa atata ayikatishili. Inakwanuka kumesu awu kwamwekeneña kwamashi hohu. Afuntili kumotoka nawamama nawa wejima wetu twayilondeleli. Hela chochu, hinakavulamena mazu ahosheliwu atata hampinji yayiwahishileñawu amamaku, ahosheli nawu: “Yehova, yanakeni. Aneluki wanyi yuma yinakwilawu.”

Cheñi mpinji yimu, twayili nakuhempula antaña jetu kumukala wetu. Hamukala wawankaka twawaninihu mukulumpi wansakililu waya mpuhu, bishopu. Iwu bishopu welukili nindi anvwali jami adiña aYinsahu jaYehova. Hela chakwila nadiña nayaaka 6 wesekeli kunsawisha nawa wañihwili nindi, “Muloñadi chiwabulila kupapatishewa?” Namwakwili nami nichidi kansi hakwila nipapatishewi natela kwiluka yuma yayivulu yamuBayibolu nikwikala nachikuhwelelu chakola. Watiyili kutama nachinamwakwili, nawa wayilejeli ankaka nindi nahoshi kasawuntu.

Iyi hiyuma yatama yantesha yatumwekeneni. Hela chochu, antu amuLebanon, hiyantu akasunuka nawa achisambu. Dichi twahanjekeleña nawantu amavulu nsañu yamuBayibolu, nikulombola atudizi aBayibolu amavulu.

Hinadiña kushikola, manakwetu wakansi wakuVenezuela wenjili kuLebanon. Twapompeleña nindi muchipompelu chimu nawa watachikili kudiluka namuhelami Wafa. Chimwahitili mpinji, adisumbwili nawa ayili nakushakama kuVenezuela. Wafa wasonekeli nyikanda nakuyilembelela atata nindi abukishi chisaka chejima kuVenezuela. Welili mwenimu muloña wakeñeleña nindi tushakameña hamu. Nkumininaku, twamutiyilili nawa twafuukwilihu kuya!

Twashikili muVenezuela mu 1953 nawa twashakamineña muCaracas, kwakwihi nakwashakamineña kajiña mpata. Chineli nadiña kansi, natiyileña kuwaha kumona kajiña mpata nakuhita munyotoka yawuseya. Chayikalili anvwali jami kwinjilila nshakaminu yamwituña dacheñi, idimi,  chisemwa, yakuda nawa ninchilu. Hampinji, yitwatachikili kwinjilisha chihandilu, chuma chatama chamwekeni.

Atata atachikili kukata. Chumichi chatuhayamishili chikupu, muloña atata adiña kanda akateñahu dehi muniyi njila, adiña akola nankashi. Twanukileñahu wanyi netu nikunyima nikwena akatilihu. Akatili kansa yakumapwapwa nawa ayiladikili. Chimwahitili hohu mulungu wumu afwili.

Chakalaña nikulumbulula chineñi chitwatiyili hayina mpinji. Nadiña hohu nayaaka 13 hayina mpinji. Hitwakuhweleleli netu atata hiyakufwaku nawa twamweni netu hitwakekalahu namuzañaluku. Hadi mpinji yayilehi, chayikalilileña amama kwiteja nawu atata anafwi. Hela chochu, twelukili netu twatela kuvalamenaku nawa Yehova wukutukwasha kuumika. Chinashikijili yaaka 16, namanishili shikola muCaracas, nawa nakeñeleña kukwasha chisaka chetu.

Chayinu mpinji, yayami Sana wasumbuka namanakwetu Rubén Araujo, wamanishili Shikola yaGileyadi nawa wafuntili nakushama kuVenezuela. Afuukwilihu kubuukila kuNew York. Chelili chisaka chetu chifuukulihu nawu natela kuya kuuniversity nayili nawa nashakamineña namuhelami. Muhelami neshaku akwashili kuswina kwakwihi naYehova hampinji yinashakamineña nawu. Kubombelahu, muchipompelu chaBrooklyn Spanish mwadiña amanakwetu amavulu apama. Kudi amanakwetu hinelukili nawa ankwashili nankashi aMilton Henschel niaFrederick Franz; wejima wawu azatilileña kuBeteli yakuBrooklyn.

Chelili chaaka chami chatachi chahayunivesiti hichikukeña kumana, natachikili kutoñojoka hayuma yinelileña nachihandilu chami. Natañili nikutoñojoka hayibaaba yadiña muMagazini yaKaposhi Kakutalila, yahosheleña hadi akwaKristu chatela kufuukulahu chiwahi yuma yatela kwilawu. Namweneña muzañalu wadiña nawapayiniya niakwaBeteli adiña muchipompelu chetu nawa ninami nafwilileña kwikala neyi wena. Hela chochu, nadiña kanda nipapatishewi. Hashimbwili wanyi nelukili nami natela kudihana kudi Yehova. Dichinelili nawa napapatisheweli haMarch 30, 1957.

Hanyima yakupapatishewa natachikili kutoñojoka nami nizatiku wupayiniya wampinji yejima. Nakeñeleña kwikala payiniya, ilaña namweni nami kwila mwenimu kwekala kwakala chikupu. Nukutweshaña ñahi kuzata wupayiniya nishikola? Ami nichisaka chami twadisonekeleleña nyikanda chelili nifuukulihu nami innakukeña kuleka shikola kulonda nifunti kuVenezuela nakutachika wupayiniya.

Mu June 1957, nafuntili kuCaracas. Hela chochu, namweni nami chisaka chetu chakabakeneña. Chakeñekeleña muntu wakuyikwasha munsañu jamali. Nateli kuchikwasha ñahi? Neñilili mudimu kunyambawulu iku nakeñeleña kuzata wupayiniya. Henohu, wupayiniya diwaletesheli nifunti. Nafuukwilihu nami nikuzataña nyidimu yejima yiyedi. Hadi yaaka yayivulu, nazatileña mpinji yejima kunyambawulu nawa nazatileña niwupayiniya.  Nakasikileña chikupu nawa hinadiña namuzañaluku!

Natiyili kuwaha chitwadimweni naSylvia, muhela wakuGerman wamukeña Yehova chikupu nawa twadisumbwili. Nawa wabuukili kuVenezuela hamu nawanvwali jindi. Hashimbwili wanyi, twekalili nawanyana ayedi, mwanetu weyala Michel (Mike), nimwanetu wamumbanda Samira. Natachikili cheñi kuyihemba amama. Enjili nakushakama nanetu. Hela chakwila nalekeli wupayiniya hamuloña wakukeña kwakamena chisaka chami, natwalekelihu kuzata nankashi mudimu wakushimwina. Ami nañodami Sylvia twazatileñaku wupayiniya wakukwasha mumpinji yakunooka.

Anyana achidiña kushikola hampinji yinamweni yuma yinashimuna kumatachikilu achinu chibaaba. Chihandilu chami chadiña chiwahi nawa antu inazatileña nawu kunyambawulu anlemesheli. Hela chochu, nakeñeleña antu amoneña nawu nidi kambuña aYehova. Natwalekelihu kutoñojoka hayuma yinatela kwila kulonda antu ammoneña nawu nidi kambuña aNzambi. Ami niñodami twashakamini hamu nakuhanjeka hansañu jamali. Neyi nalekeli mudimu kunyambawulu adi kunyikahu kadali keneni kakudikwashamu nachu. Chineli twadiña wanyi nanyikudi twatoñojokeli netu neyi tupeleshaku chihandilu chetu, tukwikala namali amavulu anateli kutukwasha hadi mpinji yayilehi.

Chadiña chaswayi wanyi kwila mwenimu ilaña ñodami niamama ankwashili. Cheñi natachikili wawupayiniya. Natiyili kuwaha chikupu! Nakeñeleña kutachika kuzata wupayiniya. Ilaña chuma chitwabulili kukuhwelela chamwekeni.

Ifuku dimu ndotolu watulejeli nindi ñodami wadiña nevumu. Twahayamini wejima wetu! Twatiyili muzañalu chikupu; ilaña natoñojokeli cheñi hachuma chikwawu chinafuukwili, chakwikala payiniya. Nadihwileña nami, komana nateli kwikala payiniya? Twatachikili cheñi kutoñojoka chitunateli kwakamena mwana wukuvwalika. Ilaña nadiña nakujinooka neyi nukutwesha kuzata wupayiniya?

Hanyima yakuhanjeka mutwafuukwili, twafuukwilihu kubula kuleka mutwafuukwili hakusambila. Mwanetu weyala Gabriel wavwalikili muApril 1985. Hela chochu, nalekeli mudimu wunazatileña kunyambawulu nawa natachikili cheñi kuzata wupayiniya wampinji yejima muJune 1985. Chimwahitili mpinji, nekalili membala wamukomiti yaKasanji Kamutayi. Hela chochu, kasanji kamutayi kadiña wanyi muCaracas, dichi nayileña kayedi hela kasatu mumulungu, iluña dakwenda makilomita kwakwihi na 80.

Kasanji kamutayi kadiña mumbaka yaLa Victoria, dichi twafuukwilihu nachisaka chami kubuukila kuLa Victoria kwakwihi naBeteli. Iku kwadiña kuhimpika kweneni chikupu. Natiyaña kuwaha nachisaka chami nawa nachisakililaña nankashi. Yilwilu yamwekesheleñawu yankwashili chikupu. Muhelami Baha wadihaninihu kuyihemba amama. Mike wasumbwili, ilaña Samira naGabriel achidiña nakushakama hetala. Chitwabukilili kuLa Victoria ashiyili amabwambu jawu muCaracas. Cheñi, ñodami Sylvia wateleleli kwinjilila mumukala wanyanya kubadika mumusumba mwadiña antu amavulu. Nawa wejima wetu twenjililili kushakama mwitala danyanya. Mwamweni, mwabombeleli yuma yayivulu hakwila nawu tufumi muCaracas nakuya kuLa Victoria.

Hela chochu, yuma yahimpikili cheñi. Gabriel wasumbwili nawa Samira watachikili kudishakamina. Ñodami Sylvia ninami atutambikili kuya nakushakama haBeteli mu 2007, dihu hituchidi kuzatila nimakonu. Mwanetu wawedi Mike, himukulumpi nawa nakuzatila hamu wupayiniya nañodindi, Monica. Gabriel niyena himukulumpi nawa nakukalakela kuItaly nañodindi, Ambra. Kubombela hawupayiniya Samira, wakwashanaña cheñi haBeteli.

Nahimpili yuma yayivulu yalema muchihandilu chami. Hela chochu, naditoñeshaña wanyi. Nateli kufuukulahu kwila chuma chochimu. Nasakililaña nankashi hanyidimu yejima yinamukalakeli Yehova. Hadi yaaka yayivulu, namoni chichalemena kutwalekahu kwikala nawubwambu wakola naYehova. Hela chakwila yuma yitunakufuukula yanyanya hela yamaneni, yena nateli kutwinka “kuwunda kwabadika kwiluka kwejima.” (Fwili. 4:6, 7) Ami niñodami Sylvia twatiyaña kuwaha kuzatila haBeteli nawa tweluka netu Yehova nakiswili mwejima mutwafuukwili, muloña twamutwamijañaku mpinji yejima muchihandilu chetu.