LISA * wahosheli nindi: “Luwi lwammwekesheliwu amanakwetu niahela lwantiyishili kuwaha.” Wateneneña chuma chamuletesheli adizi chalala. Dichatiyiliyi Anne niyena, wahosheli nindi: “Antu ammwekesheleleña luwi kubadika yuma yatañishileñawu.” Awa ahela ejima atiyaña kuwaha kutaña Bayibolu nikutoñojokahu chikupu, ilaña luwi lwayimwekesheleliwu lwayikwashili hama.

Tunateli kumwekesha ñahi luwi lunateli kuyishika hamuchima antu atumonaña? Tuhanjekenu njila jiyedi: Nedimi detu nimuyilwilu yetu. Nawa tukuhanjeka antu itwatela kumwekeshela luwi.

Mumbanda watelela ashimunawu haYishimu kapetulu 31 wukweti “nshimbi yaluwi” hedimi dindi. (Yish. 31:26) Wetejaña “nshimbi” kuyuula izu ninsañu yinakuhoshayi. Atata jawantu niwena atela kwikala naniyi “nshimbi” hedimi dawu. Anvwali amavulu eluka nawu nhoshelu yakuzazoka yinateli kuneñesha mwanawu. Neyi anvwali ahoshaña nakuketujola ninezu dankalu, mwanawu wukufundumuka. Hakwila anyanawu abuleña kufundumoka, anvwali atela kuhoshaña munjila yayiwahi.

Hela chakwila mudi anvwali hela nehi, munateli kuyuula ñahi idimi denu naluwi? Twawanaña chitwatela kwila kumatachikilu haYishimu 31:26: “Waasamaña kanwa kindi nakuhosha mwamaana.” Munabombeli kutonda chiwahi mazu nintiyakenu yezu. Chikubadika kuwaha neyi tudihula netu, ‘Mazu inakukeña kuhosha akusañumuna kuzuwa tahindi akuleta kuwunda?’ (Yish. 15:1) Dimu, twatela kusambila kutoñojokahu henohu kanda tuhoshi.

Chishimu chikwawu chahosha nawu: “Nhoshelu yakutuboka yidi neyi yilonda yampoku yakabali.” (Yish. 12:18) Neyi tutoñojokaña hamazu etu hela yuma yinateli kufumamu, tukuyuulaña idimi detu. Neyi tuzatishaña “nshimbi yaluwi,” chikutukwashaña kubula kuzatisha mazu atama ninhoshelu yankalu. (Efwe. 4:31, 32) Tukuzatishaña nhoshelu yayiwahi nawa yakutuña. Yehova welili chuma chitwatela kwimbujola hampinji yamukolesheliyi kambuñindi Elija watiyili woma. Kañelu wamwimeneneñaku Yehova wahosheli “[nezu] dawunda, datiyakeneneña mwishina.” (1 Anya. 19:12) Hela chochu, mukumwekesha luwi mwabombela yuma yayivulu bayi kuhosha hohu naluwiku. Twatela cheñi kwila yuma yinakumwekesha nawu tukweti luwi. Munjilanyi?

Neyi tunakumwimbujola Yehova, hitwatela kukuminaña hohu munhoshelu yaluwiku ilaña twatela kuyikwasha. (Efwe. 4:32; 5:1, 2) Lisa itwashimuna hakusambila washimwini luwi lwamumwekesheleliwu kudi aYinsahu. “Chelili chisaka chetu achikanjikiji kubuuka mukukasumwisha, yisaka yiyedi muchipompelu yalombeli kumudimu kulonda yinzi nakutukwashaku kuloña yuma. Hayina mpinji hinnadiña nakudiza Bayiboluku!” Ilu luwi lwayimwekesheleliwu  lwamutesheli Lisa kutoñojokahu chikupu hachalala.

Anne itwatena hakusambila, wasakilili niyena haluwi lwamumwekesheleliwu kudi aYinsahu. Wahosheli nindi: “Kwesekeja nachamonaña kaayi yuma nayijinokeleña nankashi. Chankalileña kukuhwelela antu.” Watwalekelihu nindi: “Chinayibulakeni aYinsahu, hinayikuhweleleliku. Nadihwili nami, ‘Anakukeñadi kudi ami?’ Ilaña luwi lwammwekesheleliwu kudi muntu wandizishileña lwanletesheli kumukuhwelela.” Chumanyi chachiwahi chafuminimu? “Nkumininaku natachikili kusha muchima kuyuma yinadizileña.”

Tunamoni netu luwi lwayimwekesheleliwu aLisa naAnne kudi antu amuchipompelu lwayiletesheli kutachika kudiza chalala. Luwi lwayimwekesheleliwu kudi chipompelu lwayikwashili kwenzununa nyichima yawu.

Antu amakwawu anateli kuzatisha mazu amawahi nikutumba chimwemweta muloña wankulilu yawu. Chachiwahi antu amakwawu amwekeshaña yilwilu yamuchidiwu muloña  wachisemwa chawu hela nkulilu yawu. Ilaña neyi ichi dichuma chatusañumunaña kumwekesha luwi, dikwila nawu hitunakumwimbujola Nzambiku.—Esekejenu Yilwilu 28:2.

Luwi lwaNzambi himukaabu waspiritu yaNzambi yajila. (Ñal. 5:22, 23) Dichi mukwikala naluwi mwabombela kuzatila hamu naspiritu yaNzambi. Chumichi chinesekani nachuma chitwafwilaña chakumwimbujola Yehova niYesu. Nawa chineli tudi akaKristu, twafwilaña kukwasha akwetu. Dichi, kukeña kutwamukeña Yehova Nzambi niakwetu antu dikwatusañumunaña. Luwi lwetu hichilwilu chafumaña hamuchima wetu nawa chetejayi Nzambi.

Kakavulu twamwekeshelaña luwi antu atumwekesheleli luwi hela itweluka. (2 Sam. 2:6) Njila yimu hikuyisakilila. (Kol. 3:15) Hanu neyi tumona netu kudi muntu itwatela kubula kumwekeshela luwi?

Toñojokenu hachumichi: Yehova diyi muntu wamwekeshaña chikupu luwi lwasweja nawa Izu dindi datudizishaña chakumwekesha ichi chilwilu chasweja kulema. Nhoshelu yakwila nawu “luwi lwasweja” ayizatisha mapampa kakavulu muNsona jawakaKristu jachiGiriki. Nzambi watutiyilaña ñahi luwi?

Toñojokenu hakuvula kwawantu atiyilañayi Yehova luwi kuhitila mukuyinka yuma yakeñekaña hakwila atwalekihu kuhanda. (Mat. 5:45) Kafwampi, nihampinji yachidiñawu antu kanda amwiluki Yehova, yena wayimwekesheleleña luwi. (Efwe. 2:4, 5, 8) Chakutalilahu, wahanini Mwanindi wumu hohu kukola antu ejima. Kapostolu Pawulu wasonekeli nindi Yehova wahanini ifutu danyiloña “kwesekeja nakuvula kwaluwi lwindi lwasweja.” (Efwe. 1:7) Kubombelahu, hela chakwila twavulumunaña nikumuneñesha Yehova, yena watwalekañahu kutulombola nikutudizisha. Nshimbi jindi nimazu indi adi neyi “chasansaña nvula.” (Kuhit. 32:2) Tukutwesha wanyi kumufweta haluwi lwindi lwatumwekeshelañayi. Walala wudi wakwila nawu twashindamena haluwi lwaNzambi hakwila tutwalekihu kuhanda.—Esekejenu 1 Petulu 1:13.

Chakadi nikujina, luwi lwaYehova lwaluwahi nawa lwatusañumunaña. Chikufumamu, chatela tusakuleña hohu antu antesha itwatela kumwekeshela luwi, twatela kumwimbujola Yehova kuhitila mukumwekeshaña luwi muchihandilu chetu chejima. (1 Tes. 5:15) Neyi tumwekeshaña luwi mpinji yejima, tukwikala neyi kesi kanakubutuka nakuleta iyena mpinji yamashika. Tukukundejaña antaña jetu, akwetu akakudifukula, mutwazatilaña, mutwatañilaña niantuñi netu.

Toñojokenu hadi antu amuchisaka hela amuchipompelu anateli kupaminaku neyi muyimwekeshelaña luwi mumazu niyuma yimwelaña. Hadaha muchipompelu chenu mudi muntu wunakukeñeka kumukwasha kwakamena itala, hanji hela kumulandilañaku yuma mpinji yonsu. Kubombelahu, neyi muwana muntu mumudimu wakushimwina wunakukeñeka kumukwasha, kwila mumukwasha nehi?

Tumwimbujoleña Yehova mumazu nimuyuma yitwelaña nawa atulomboleña kudi “nshimbi yaluwi.”