CHIBAABA CHAKUDIZA 26
Kukeña Chikwatukwashaña Kuleka Kutiya Woma
“Yehova wudi kukabadi kami, hinukutiya womaku.”—MAS. 118:6.
KAMINA 105 “Nzambi hiKukeña”
NSAÑU YIDI MUCHIBAABA *
1. Yumanyi yatiyaña antu woma?
TALENU iyi yuma yamwekeni muchihandilu. Nestor nañodindi María akeñeleña kuya nakuzatila kudi kukaankila. * Hakwila nawu eli mwenimu ateleli kupeleshaku chihandilu chawu. Ilaña atiyileña woma nawu akwikala wanyi namuzañalu neyi azatishaña mali antesha. Biniam chekaliliyi Chinsahu chaYehova mwituña mwakaanishañawu mudimu wetu, welukili nindi chineli nekali muntu waNzambi anateli kumukabisha. Chumichi chamutiyishili woma. Ilaña wakameneni chikupu chadi kwila chisaka chindi neyi eluka nawu nekali Chinsahu. Valérie wakatili kansa nawa wakabakeni hakwila awani muntu wukulemesha yuma yakuhwelelayi muBayibolu kutalisha hakumuladika chakadi kumusha mashi. Watiyili woma nindi wukufwa.
2. Muloñadi chitwatela kuleka kutiya woma?
2 Komana ninenu mwatiyahu dehi woma wamuchidiwu? Etu amavulu twawutiyahu dehi. Neyi tuswejaña kutiya woma, tunateli kufuukula mwaheña chakwila wubwambu wetu naYehova wukumana. Dichuma chakeñañayi Satana. Wakeñaña kuzatisha woma kulonda tubuli kwovwahila nshimbi jaYehova, kushilahu nilushimbi lwakushimwina nsañu yayiwahi. (Chim. 12:17) Satana watama chikupu, wazeyaña wanyi nawa wukweti ñovu. Ilaña munateli kudikiña. Munjilanyi?
3. Chumanyi chikutukwasha kuleka kutiya woma?
3 Neyi twiluka chikupu netu Yehova watukeña nawa wudi nanetu, tunateli kumushinda Satana. (Mas. 118:6) Chakutalilahu, nsoneki waIsamu 118 wamweni kukala kwakuvulu kwamwakamishileña. Wadiña nawayilumbu amavulu, kushilahu niantu alema (vasi 9, 10). Mpinji yikwawu, wadiña mukukala kwasweja (vasi 13). Nawa Yehova wamubabesheli chikupu (vasi 18). Hela chochu, ñimbi yaisamu wembili nindi: “Hinukutiya womaku.” Chumanyi chaletesheli atoñojoki nindi wakiñewa? Welukili nindi hela chakwila Yehova wamubabesheli, Tata yindi wamwiwulu wamukeña nankashi. Ñimbi yaisamu welukili chikupu nindi hela chakwila wudi mumukala kwamuchidinyi, Nzambi yindi wukweti kukeña wukumukwashaña mpinji yejima.—Mas. 118:29.
4. Woma wamuchidinyi wutunateli kutondolwela neyi tukuhwelela netu Nzambi watukeña?
4 Twatela kwiluka chikupu netu Yehova watukeña hamuntu-hamuntu. Neyi twiluka netu watukeña chikutukwasha kuleka kutiya woma iyi yuma yisatu, (1) kuchiina netu hitukutwesha kukeñela chisaka chetu yuma yakumujimbaku, (2) kutiya antu woma (3) nikuchiina kufwa. Antu ashimunawu muparagilafu yatachi alekeli kutiya woma muloña elukili nawu Nzambi wayikeña.
KUCHIINA NETU HITUKUTWESHA KUKEÑELA CHISAKA CHETU YUMA YAKUMUJIMBAKU
Manakwetu hamu namwanindi wudi mukamwihi, hiyayibinda anshi nawa iwu mudimu wamukwashaña kwakamena chisaka chindi (Talenu paragilafu 5)
5. Yumanyi yinateli kumuletesha mutu wachisaka kwakama nankashi? (Talenu mwevulu wudi hakava.)
5 Mutu wachisaka mukakristu washañaku nankashi muchima kukwakamena chisaka chindi kumujimba. (1 Tim. 5:8) Neyi mudi mutu wachisaka, hadaha mumpinji yachipupu chaCovid-19 mwadakameneneña nenu mudimu wukumana. Mwadakameneni nenu chikuyikalila kuwana yakuda nimali akusonkela nachu itala. Hadaha mwatiyileña cheñi woma nenu neyi mudimu wumana chikayikalila kuwana mudimu wukwawu. Hela, kufwana aNestor naMaría, itwashimuna hakusambila mwashintajalileña kuhimpa mudimu wenu wakumujimba nenu chihandilu chikukola. Satana nazatishi iyi njila hadi mpinji yayilehi nawa natweshi.
6. Satana wakeñaña nindi tutoñojokeña netudi?
6 Satana wakeñaña tutoñojokeña netu Yehova watwakamenaña wanyi hamuntu-hamuntu nawa wukutukwasha wanyi kwakamena chisaka chetu. Chikufumamu, tukukunkulula netu twatela kuzata nañovu kulonda tutwalekihu namudimu wetu hela chakwila tukulondelaña wanyi yishina yamuBayibolu.
7. Yesu watuleja nindidi?
7 Yesu wamwiluka chiwahi Tata kubadika muntu wudi wejima watulejeli nindi, Nzambi yetu “neluki yuma [yitunakukeña] henohu kanda [tumulombi].” (Mat. 6:8) Nawa Yesu weluka nindi Yehova wadiloñesha kutwinka yuma yitunakaankili. Etu akaKristu twekala antu amuchisaka chaNzambi. Twatela kwiluka chikupu netu chineli Yena hiMutu wachisaka, Yehova wukwila yuma yejima yalejayi nyitu yayisaka kwila ha 1 Timotewu 5:8.
Yehova wukutwinka yuma yejima yitunakukeña. Nateli kuzatisha amanakwetu kulonda atukwashi (Talenu paragilafu 8) *
8. (a) Chumanyi chikutukwasha kuleka kutiya woma netu tukutwesha wanyi kukeñela chisaka chetu jinakukeñeka? (Matewu 6:31-33) (b) Tunateli kwimbujola ñahi awa adisumbula adi hamwevulu anamuleteli muhela yakuda?
8 Neyi twiluka chikupu netu Yehova watukeña nawa wakeña chisaka chetu, chikutukalila wanyi kumukuhwelela netu wukutwinka yuma yitunakukeña. (Tañenu Matewu 6:31-33.) Yehova nakukeña kutwinka yuma yitunakukeña, yena hiMukakuhana wukweti kukeña nichisambu. Chaleñeliyi iseki, hakuminini dakutwinka hohu yuma yitwatela kuhanda nayuku. Wenzesheli iseki nayuma yejima yatutiyishaña kuwaha. (Kutach. 2:9) Hela chakwila mpinji yikwawu tukweti yuma yinashikili yakuhanda nachu, twatela kwanukaña netu Yehova diyi wunatwinki iyi yuma. (Mat. 6:11) Twatela kwanukaña netu yuma yakumujimba yejima yitukuleka hiyikwesekana nayuma yikutwinkayi Nzambi yetu wukweti kukeña chayinu mpinji niyakatwinkayi kumbidiku. Ichi dichuma chelukiliwu aNestor naMaría.—Isa. 65:21, 22.
9. Chakutalilahu chaNestor naMaría chinakutudizishadi?
9 Nestor naMaría adiña netala dadiha nimudimu wamali muColombia. Ahosheli nawu: “Twatoñojokeli netu tupeleshiku chihandilu chetu kulonda tuzateña nankashi mudimu wakushimwina, ilaña twachiniineña netu tukwikala wanyi namuzañalu chakadi mali amavulu.” Chumanyi chayikwashili kuleka kutiya woma? Atoñojokeli hanjila jajivulu mwayimwekesheleliyi Yehova nindi wayikeña. Chelukiliwu nawu wukuyakamenaña, alekeli nyidimu yawu yamali. Alandishili itala dawu nawa ayili nakuzatila kwadiña kukaankila kwawakakushimwina aWanta. Atiyaña ñahi nachafukwiliwu? Nestor wahosheli nindi: “Chahosha Matewu 6:33, dimu. Hitwakaankililihu chuma chidi chejimaku. Nawa tudi namuzañalu.”
KUTIYA ANTU WOMA
10. Muloñadi antu chayitiyilañawu akwawu antu woma?
10 Kufuma tuhu kunyima antu adikatishaña wumu namukwawu. (Mukwa. 8:9) Chakutalilahu, antu azatishaña wuswa wawu chatama, ambanji ajahañanaña, akakuchiinisha kumashikola atukanaña nikuchiinisha akwawu akashikola nawa antu amakwawu akabishaña antaña jawu. Dichaleteshaña antu kutiya akwawu antu woma. Satana wazatishaña ñahi muhetu wakutiya antu woma kulonda atulawuli?
11-12. Satana wazatishaña ñahi muhetu wakutiya antu woma?
11 Satana watuleteshaña kutiya antu woma kulonda tuchiineña nikuleka kushimwina. Satana waleteshaña jinfulumendi kulekesha mudimu wetu nikutukabisha. (Luka 21:12; Chim. 2:10) Mukanu kaayi kaSatana antu atandishaña nsañu yakutwamba hadi aYinsahu jaYehova. Antu etejaña iyi nsañu yakutwamba anateli kutuseha hela kutulukuka. (Mat. 10:36) Komana tufuta twaSatana twatuyamba? Inehi mwani. Watachikili dehi kutuzatisha mumafuku awapostolu.—Yilw. 5:27, 28, 40.
Hela chakwila antaña jetu akutudimbulula, twatela kwiluka netu Yehova watukeña (Talenu maparagilafu 12-14) *
12 Bayi neyi Satana wazatishaña hohu jinfulumendi kulonda atutiyishi womaku. Amakwawu atiyaña woma nachikutoñojokawu antaña jawu neyi eluka nawu anadizi chalala. Mpinji yikwawu atiyaña woma chumichi kubadika nikuyeta. Ayikeña nankashi antaña jawu nawa akeñaña nawu niwena amwiluki nikumukeña Yehova. Aneñaña nankashi neyi anakutiya antaña jawu anakuhosha yuma yatama hadi Nzambi walala niantu adifukulaña kudi yena. Hela chochu, mpinji yikwawu antaña jawu adiña nakuyikaanisha adizaña chalala. Indi neyi antaña jetu aleka kuhosha nanetu muloña wachalala chitunadizi, tukwila ñahi?
13. Neyi twiluka netu Nzambi watukeña chikutukwasha ñahi neyi atukaana kudi antaña jetu? (Isamu 27:10)
13 Mazu ekala haIsamu 27:10 anateli kutukwasha. (Tañenu.) Neyi twanuka netu Yehova watukeña, hitukutiya woma ikañeshaku. Nawa tukukuhwelela netu wakatusomwena hamuloña wakuumika. Yehova wukutwinka yuma yejima yitunakukeña, wukutukwasha kwikala mukuwunda nimuzañalu nawa tukuswina kudi yena. Ichi dichuma chenjili nakwiluka Biniam itwatena.
14. Chumanyi chimunadizili kudi Biniam?
14 Biniam wekalili Chinsahu chaYehova hela chakwila welukili nindi akumukabisha. Talenu kwiluka nindi Yehova wamukeña chikwamukwashili Biniam kuleka kutiya antu woma. Wahosheli nindi: “Ankabishili chikupu. Ilaña chuma chinatiyileña woma kubadika kunkabisha kudi nfulumendi hiikañesha damuchisaka. Natiyileña woma nami neyi nikala Chinsahu chaYehova atata akutiya kutama nawa antaña jami akummona nawu nidi wamukunkulwayi.” Hela chochu, Biniam welukili nindi Yehova wakamenaña antu akeñayi. Biniam walumbulwili nindi: “Natoñojokeleña Yehova chinakwashiyi akwetu kuumika mukukala kwamali, chaambu nikuyilukuka kudi antu. Nelukili nami neyi nitwalekahu kwikala washinshika kudi Yehova wukunkiswila. Chankwatiliwu kakavulu nikunkabisha, namweni Yehova chatukwashañayi neyi tutwalekahu kwikala ashinshika kudi yena.” Yehova wekalili Tata yindi nawa antu Jindi niwena diwu adiña chisaka chindi.
KUCHIINA KUFWA
15. Muloñadi chitwachiininaña kufwa?
15 Bayibolu yashimuna nawu kufwa hichilumbu. (1 Kor. 15:25, 26) Twatoñojokaña netu tunateli kufwa sweje-e neyi etu hela ntaña yetu nakati nankashi. Muloñadi chitwachiininaña kufwa? Muloña Yehova watuleñeli namuchima wakufwila kushakama haya nyaaka. (Mukwa. 3:11) Neyi tunakutiya woma netu tukufwa chinateli kutukwasha kudikiña. Chakutalilahu, chinateli kutukojeja kufuukula chiwahi hayakuda, kunyika mujimba, kudimona nandotolu nikutambula yitumbu neyi chinatwesheki nikubula kusha wumi muwubanji.
16. Satana wazatishaña ñahi woma wutukweti kutalisha hakufwa?
16 Satana weluka nindi twalemesha wumi wetu. Hela chochu, wahoshaña nindi tunateli kuleka yuma yejima yitukweti kushilahu niwubwambu wetu naYehova kulonda tubuli kufwa. (Yoba 2:4, 5) Satana hintwambi. Ilaña, chineli “wakojejaña kufwa,” Satana wazatishaña woma wutukweti kulonda tumushiyi Yehova. (Heb. 2:14, 15) Mpinji yikwawu antu amwimenañaku Satana ayitiyishaña woma akakudifukula aYehova nawu akuyijaha neyi akuleka wanyi kumukalakela. Hela, Satana nateli kuzatisha mpinji yitunakukeña kutuuka yikatu kulonda tufumpi yishina yamuBayibolu. Andotolu hela antaña jetu abula kwitiya anateli kutukanjikija nawu atwishili mashi mumujimba kulonda tufumpi nshimbi jaNzambi. Hela muntu nateli kutuleja njila yikwawu yakutuukilamu yambukaku nayishina yamuBayibolu.
17. Kwesekeja naARoma 8:37-39, muloñadi chitwatela kubulila kutiya woma kufwa?
17 Hela chakwila twakeñaña wanyi kufwa, tweluka netu Yehova watukeña hela chakwila tunafwi. (Tañenu ARoma 8:37-39.) Neyi amabwambu jaYehova afwa, wayanukaña neyi kwiji achidi amomi. (Luka 20:37, 38) Wafwilaña chikupu kuyisañula. (Yoba 14:15) Yehova wafweta wuseya weneni kulonda “[twakekali] nawumi wahaya nyaaka.” (Yow. 3:16) Tweluka Yehova chatukeñayi nawa nichatwakamenañayi. Dichi, chatela tumushiyi Yehova neyi tunakati hela tunakukeña kufwa, twatela kumulomba kulonda atukundeji, atwinki maana niñovu. Dicheliliyi Valérie hamu ninfumwindi.—Mas. 41:3.
18. Chumanyi chimunadizili kuchakutalilahu chaValérie?
18 Valérie hadiñayi nayaaka 35, amuwanini nakansa yasweja kutama. Talenu kukeña chikwamukwashili kuleka kutiya woma kufwa. Wahosheli nindi: “Chikatu chankwatiliwu nachu chahimpili chihandilu chami mukukasumwisha. Ateleli kunladika kulonda nikoli. Nahosheli nawandotolu amavulu aladikaña, ilaña ahosheli nawu hiyakutwesha kunladika chakadi kuñusha mashiku. Natiyili woma, ilaña kwesekeja nalushimbi lwaNzambi kwila niteja kuñusha mashi nehi! Muchihandilu chami chejima, Yehova nammwekesheli kukeña chikupu. Nadiña nakukooleka kwakumumwekeshela niyena kukeña. Mpinji yejima neyi nitambwila nsañu yanneñesheleña, nadikasileña nami nimutiyishi Yehova kuwaha bayi Satanaku. Nkumininaku anladikili chakadi kuñusha mashi. Hela chakwila nichidi kukatakata, Yehova watwinkaña yuma yitwakeñaña mpinji yejima. Chakutalilahu, ifuku dimu hakupompa henohu kanda ankwati nanichi chikatu, twadizili chibaaba chahosheleña nawu ‘Kwikala Ahamuka Hakuumika Yihuñu Makonu.’ * Ichi chibaaba chatukwashili nankashi. Twachitañili kakavulu. Yibaba yamuchidiwu nikwila yuma yakuspiritu yinakwashi nfumwami ninami kwikala nakuwunda nawa nikubula kwakama nikufuukula chachiwahi.”
KULEKA KUTIYA WOMA
19. Chumanyi chikumwekana katataka?
19 Nawukwashu waYehova, akaKristu mukaayi kejima anomiki kukala kwasweja nawa anadikañi naDiyabolu. (1 Pet. 5:8, 9) Ninenu mukutwesha. Katataka Yehova amuleji Yesu niantu akayuulañayi nindi kulonda “akisañani nyidimu yaDiyabolu.” (1 Yow. 3:8) Hanyima yayumiyi, antu jaNzambi akamukalakelaña hamaseki, hikwakekala ‘chuma chakayitiyishaña woma hela kuyifwisha mutentuku.’ (Isa. 54:14; Mika 4:4) Henohu iyi mpinji kanda yishiki, twatela kuzata nañovu kulonda tuleki kutiya woma.
20. Chumanyi chinateli kutukwasha kuleka kutiya woma?
20 Twatela kutwalekahu kukuhwelela chikupu netu Yehova watukeña nawa wakiñaña ambuñindi. Chuma chikutukwasha hikutoñojoka chikupu nikuhosha hadi Yehova chinakiñiyi ambuñindi akunyima. Nawa twatela kwanukaña chatukwashañayi hamuntu-hamuntu kuumika kukala munjila jajivulu. Nawukwashu waYehova, tunateli kuleka kutiya woma!—Mas. 34:4.
KAMINA 129 Tukutwalekahu Kuumika
^ Woma wawuwahi muloña watukiñaña kuwubanji. Ilaña kusweja kutiya woma kunateli kutwisha muwubanji. Munjilanyi? Satana nateli kuzatisha woma kulonda atuleteshi kufuukula mwaheña. Chakadi nikujina, twatela kuzata nañovu kulonda tubuli kwikala nawoma wamuchidiwu. Chumanyi chikutukwasha? Neyi chikushimuna achinu chibaaba, neyi twiluka chikupu netu Yehova wudi kukabadi ketu nawa netu watukeña, tukutiyaña woma wanyi.
^ Majina amakwawu anayihimpi.