1. (a) Kuchiñejanyi kwatwinkayi Yehova? (b) ‘Kumuchiñeja Yehova’ kwatalisha mudihi? (Talenu “Mwatalisha Idi Izu.”)

 YEHOVA wayinka antu ejima amukeña kuchiñeja kwakuwahi. Katataka afumishihu yikatu, chineñi nikufwa. (Chim. 21:3, 4) Wakakwasha “amwovu” amuchiñejaña nawu wukabalumuna iseki kwikala paradisa. (Mas. 37:9-11) Nawa wakaletesha etu ejima kwikala nawubwambu wakola nayena, wubwambu wukawaha nankashi kubadika wutukweti makonu. Iku kuchiñeja kwakuwahi chikupu! Hanu yumanyi yikuletesha tukuhweleli netu Nzambi wakashikija mwakanayi? Yehova welaña mwejima mwakanañayi. Dichi twatela ‘kumuchiñeja Yehova.’ * (Mas. 27:14) Twamwekeshaña chumichi kuhitila mukumuchiñililaña Nzambi yetu nakudiwunjika nimuzañalu netu wakela yuma yejima yakaanayi.—Isa. 55:10, 11.

2. Yumanyi yineliyi dehi Yehova?

² Yehova namwekeshi nindi washikijaña yikaninu yindi. Talenu chakutalilahu chimu. Mumukanda waChimwekeshu, Yehova wakanini nindi mumafuku etu, wakapompesha antu kufuma kunyuza yejima nyichidi nimadimi, nawa wakayinuñañesha mukudifukula kwalala. Makonu, iwu mukanka wawantu awutenaña nawu “izaza deneni.” (Chim. 7:9, 10) Hela chakwila muniwu mukanka mwekala amayala, ambanda nianyana amakowa ambokamboka, madimi ashiyashana nawa akweti yitachi ninkulilu yambuka, ekala mukuwunda, hiyamanakwamuntu anuñañana mukaayi kejima.  (Mas. 133:1; Yow. 10:16) Antu ekala mwizaza deneni hiyakakushimwina adikita chikupu. Ekala adiloñesha kushimwina nsañu yachiñejañawu kudi muntu wejima wukukeña kutiyilila. (Mat. 28:19, 20; Chim. 14:6, 7; 22:17) Neyi mwekala hakachi kawantu adi hezaza deneni, chakadi nikujina mwachiñejaña yuma yayiwahi yikenza.

3. Chumanyi chafwilañayi Satana?

³ Diyabolu nakukeña nindi muleki kuchiñeja. Yena nakukeña nindi mutoñojokeña nenu Yehova wayakamenaña wanyi nawa hakela mwakanayiku. Neyi Satana atukojeja kuleka kuchiñeja, kuhamuka kukumana nawa hadaha tukuleka nikumukalakela Yehova. Neyi chitukumona, Satana wakeñeleña nindi Yoba aleki kuchiñeja nikumukalakela Yehova.

4. Tukuhanjekadi muchinu chibaaba? (Yoba 1:9-12)

⁴ Muchinu chibaaba, tukuhanjeka hatufuta twazatishiliyi Satana hakufwila kumukañesha Yoba kufumpa kashinshi kindi. (Tañenu Yoba 1:9-12.) Tukuhanjeka cheñi yuma yitukudizila kudi Yoba nimuloña waweni wutwatela kwanukilaña netu Nzambi watukeña nawa wakashikija yikaninu yindi.

5-6. Yumanyi yamumwekeneni Yoba mukapinji kantesha hohu?

⁵ Yuma yadiña nakumwendela hohu chiwahi Yoba. Wadiña nawubwambu wawuwahi naYehova. Wadiña nachisaka cheneni chanuñañana nawa wadiña namaheta amavulu. (Yoba 1:1-5) Ilaña Yoba wajimbesheli yuma mwifuku dimu hohu. Chatachi, wajimbesheli maheta indi. (Yoba 1:13-17) Kuhiñahu, anyanindi ejima afwili. Toñojokenuhu ntahi haniku kukala kwamuholokeleli. Anvwali aneñaña chikupu neyi mwanawu wumu afwa. Hanu toñojokenu chikela nichineñi chatiyiliyi Yoba niñodindi hakutiya nawu anyanawu ejima 10 anafwi. Dichaletesheli Yoba hakutabula yakuvwala yindi nakudila nawa wadimbukili heseki!—Yoba 1:18-20.

⁶ Kuhiñahu Satana wamukatishili Yoba nawa waletesheli antu amumoneña nawu wamukunkulwayi. (Yoba 2:6-8; 7:5) Yoba adiña amulemesha mumukala mwashakamineñayi. Antu enjileña nakulomba maana kudi yena. (Yoba 31:18) Haniyi mpinji alekeli kwinza kudi yena. Amudiwili, amukaanini kudi amanakwindi, amabwambu jindi nikudi añamba amwitala dindi yomweni!—Yoba 19:13, 14, 16.

7. (a) Yoba watoñojokeli nindi yihuñu yindi yafumini kudihi, ilaña chumanyi chabuliliyi kwilayi? (b) MukaKristu nateli kumona ñahi kukala kwadifwana nakunamwekeshiwu hamwevulu?

⁷ Satana wakeñeleña Yoba akuhweleli nindi nakukabakana muloña Yehova wamutiyili kutama. Chakutalilahu, Satana wakojejeli mpepela yañovu kubuvula itala mwadiña nakudiila anyana kaYoba. (Yoba 1:18, 19) Cheñi wakojejeli kesi kufuma mwiwulu kajilumwini yimuna yaYoba niañamba adiña nakuyihemba. (Yoba 1:16) Chineli mpepela nikesi kafumini mwiwulu, Yoba watoñojokeli nindi jinafumi kudi Yehova. Nawa chafuminimu, hadaha Yoba watoñojokeli nindi namuneñeshi Yehova. Hela chochu, Yoba hamuhoshelihu Tata yindi wamwiwulu chatamaku. Yoba welukili nindi Yehova namwinki yuma yayiwahi hadi yaaka yayivulu. Watoñojokeli nindi neyi watiyileña kuwaha kutambwila yuma yayiwahi watela nikutambwila yuma yatama. Dichi wahosheli nindi: “Ijina daYehova atwalekihu kudihameka.” (Yoba 1:20, 21; 2:10) Hela chakwila  Yoba wajimbesheli maheta indi, anyanindi nawa wakatili, ilaña watwesheli kuumika. Hela chochu, Satana wazeyeli wanyi.

8. Kafutanyi kakwawu kazatishiliyi Satana hadi Yoba?

⁸ Satana wazatishili kafuta kakwawu hadi Yoba, wazatishili amabwambu jindi asatu akutwamba kulonda amukojeji Yoba kumona nawu wadiña wamukunkulwayi. Awa amayala ahosheleña nawu Yoba wakabakeneña muloña wakoñeli yuma yatama yayivulu. (Yoba 22:5-9) Esekeli cheñi kumukanjikija nawu hela chakwila waluwañesheleña wanyi, ilaña ñovu jejima jazatishiliyi kumutiyisha Nzambi kuwaha jayili hohu mumenji. (Yoba 4:18; 22:2, 3; 25:4) Munjila yikwawu, akeñeleña Yoba ajinoki nindi Nzambi hamukeñaku, hamwakamenañaku nawa kumukalakela hikunata hohu mpinji. Mazu ahosheliwu adi kumukojeja Yoba kumona nindi chihandilu chindi hichikawahahu cheñiku.

9. Chumanyi chamukwashili Yoba kwikala wahamuka nawa wakola?

⁹ Fwikijenu chumichi. Yoba nashakami mumawuti nawa chinakumuyeña. (Yoba 2:8) Amabwambu jindi anatwalekihu kumutena nawu watama nawa anakukeña kumutamishila ijina. Yihuñu yinakumonayi yinamuvulili iku nakudila anyanindi anafwi. Hakusambila Yoba namweni nzo-o. (Yoba 2:13–3:1) Neyi amabwambu jaYoba anakutoñojoka nawu chinamweniyi wukumufutalela Nleñi yindi, anakudidimba hohu aweni. Mpinji yimu, hadaha Yoba, wabandwili mutu windi nakutala amabwambu jindi nakuyileja nindi: “Nukuhembaña kashinshi kami, nichinakafwa!” (Yoba 27:5) Chumanyi chamukwashili Yoba kwikala wahamuka nawa wakola hela chakwila wamweneña makabi ejima awa? Hela chakwila wamweni yuma yejima iyi, halekeli kumuchiñeja Nzambi  yindi wukweti kukeña nindi hamba kamutoñahu kumbidiku. Welukili nindi hela chakwila wukufwa, Yehova wukamusañula.—Yoba 14:13-15.

10. Nsañu yaYoba yatudizishañadi?

¹⁰ Nsañu yaYoba yatudizishaña nawu Satana hanateli kutukanjikija kumushiya Yehovaku nawa Yehova weluka yuma yejima. Kukala kwamweniyi Yoba kunateli cheñi kutukwasha kwiluka yuma yadibombelelimu. Talenu yuma yikwawu yitwadizilaña kudi Yoba.

11. Neyi tutwalekahu kumukuhwelela Yehova, yumanyi yikufumamu? (Yakoba 4:7)

¹¹ Yoba wamwekesheli nindi neyi tutwalekahu kumukuhwelela Yehova, tunateli kuumika kukala kudi kwejima nawa tunateli kudikaña naSatana. Nawa yumanyi yikufumamu? Nsona yamwekeshaña nawu Diyabolu wukututemuka.—Tañenu Yakoba 4:7.

12. Kukuhwelela mukusañuka kwamukolesheli ñahi Yoba?

¹² Twatela kukuhwelela chikupu netu kwakekala kusañuka. Neyi chitwadiza muchibaaba chinafumihu, Satana wazatishaña muhetu wakuchiina kufwa kulonda atuleteshi tufumpi kashinshi ketu. Satana wahosheli nindi Yoba nateli kwila chuma chidi chejima, hela kufumpa kashinshi kindi kulonda apulwishi wumi windi. Satana watwambili. Nihampinji Yoba yamweniyi nindi nakukeña kufwa, hafumpili kashinshi kindiku. Welukili nindi Yehova wamuwahi nawa wamukuhweleli Yehova nindi wakwolola yuma kumbidi. Yoba wakuhweleleli nindi neyi Yehova wukwolola wanyi yuma hampinji yachidiñayi waweni, wakwolola yuma kumbidi nawa wakamusañula. Yoba wakuhweleli chikupu nindi kwakekala kusañuka. Neyi tukuhwelela chikupu mukusañuka, kuchiina kufwa hikunateli kutukojeja kufumpa kashinshi ketuku.

13. Muloñadi chitwatela kwilukila tufuta twazatishiliyi Satana hadi Yoba?

¹³ Twatela kwiluka tufuta twazatishiliyi Satana hadi Yoba, muloña ditu twazatishañayi makonu. Talenu chahosheliyi Satana: “Muntu [bayi neyi Yoba hohuku] wukuhana yuma yejima yikwetiyi kulonda apulwishi wumi windi.” (Yoba 2:4, 5) Munjila yikwawu Satana wahosheleña nindi hitwamukeña Yehova Nzambiku tunateli kumubalumukamu neyi tunakukeña kupulwisha wumi wetu. Satana wahoshaña cheñi nindi Nzambi hatukeñaku nawa hashañaku maana kuchitwamukalakelañaku. Etu asoñamishawu dehi, twamuchiñejaña Yehova nawa hitwayamba tufuta twaSatanaku.

14. Kukala kwasololaña yumanyi hadi etu? Shimunenu chakutalilahu.

¹⁴ Twatela kumonaña kukala netu hinjila yayiwahi yitwatela kudilukilamu chitwekala. Kukala kwamweniyi Yoba kwamukwashili kwiluka kuzeyazeya kwindi nawa wazatililihu. Chakutalilahu, wadizili nindi watela kwikala wadizoza nankashi. (Yoba 42:3) Kudi yuma yitwatela kudizilaku neyi tunakuhita mukukala. Manakwetu Nikolay, * akasiliwu mukaleya hela chakwila wadiña wakata chikupu, wahosheli nindi: “Kaleya kadi neyi ikina da X-ray (ekisewu), kamwekeshaña yilwilu yamukaKristu yamukachi.” Neyi twiluka kuzeyazeya kwetu twatela kuzata nañovu kulonda tuzatilihu.

15. Hinyi itwatela kutiyilila, nawa muloñadi?

¹⁵ Twatela kumutiyililaña Yehova bayi  ayilumbu jetuku. Yoba watiyilili nakanañachima hampinji Yehova yahosheleñayi nayena. Nzambi wahanjekeleña naYoba, munjila yikwawu wamwihwileña nindi: ‘Wunamoni neyi nikweti ñovu yakuleña yuma? Neluki yuma yejima yinakumwekeni. Wunakutoñojoka neyi nukukañanya kukwakamena?’ Yoba wakwili nakudizoza nawa wasakilili chikupu nindi Yehova wamuwahi. Wahosheli nindi: “Nakutiyileña hohu namatu ami, ilaña ichi nakumoni namesu ami.” (Yoba 42:5) Yoba hahosheleñayi awa mazu watela wachidiña washakama mumawuti, mujimba windi wejima wadiña namahuti, nawa anyanindi adiña mwijamu. Hela chochu, Yehova wamulejeli nindi wamukeña Yoba nawa wamutiyaña kuwaha.—Yoba 42:7, 8.

16. Kwesekeja naIsaya 49:15, 16, chumanyi chitwatela kwanukaña neyi tunakumona kukala?

¹⁶ Nimakonu antu anateli kutuhosha kasawuntu nikutwila yuma yikumwekesha neyi tudi amukunkulwayi. Anateli kweseka kututamishila ijina hela ijina dakuloñesha nawa anateli kututwambila “yuma yatama yeñi-nayeñi.” (Mat. 5:11) Kunsañu yaYoba tunadiziliku netu Yehova watukuhwelela nindi tunateli kutwalekahu kwikala ashinshika hela chakwila tunakumona makabi. Yehova watukeña nawa hamba kashiya antu amuchiñejañaku. (Tañenu Isaya 49:15, 16.) Bayi mutiyililaña kumazu atama ahoshañawu ayilumbu jaNzambiku! James manakwetu wakuTurkey, wukweti chisaka chamweni kukala kwasweja, wahosheli nindi: “Neyi tutiyililaña kumakudi ahoshañawu hadi antu  jaNzambi tukuzeya. Dichi twatwalekelihu kusha maana hayuma yikela wanta nawa twatwalekelihu kudikita mumudimu waYehova. Nawa chuma chafuminimu twatwalekelihu kwikala namuzañalu.” Kufwana Yoba, twamutiyililaña Yehova! Nawa makudi awayilumbu jetu hiyakutukañesha kuchiñejaku.

17. Yumanyi yitukudizila kudi amayala nawambanda ashinshika ashimunawu muAHeberu kapetulu 11?

¹⁷ Yoba wudi hakachi kawambuña Yehova atwalekelihu kwikala ahamuka nawa akola hampinji yamweneñawu kukala. Mumukanda wayisonekeleli aHeberu, kapostolu Pawulu washimwini amakwawu, wayiteneneni nindi “ivu deneni dawayinsahu.” (Heb. 12:1) Wejima wawu ahitili mukukala kweneni, ilaña, atwalekelihu kwikala ashinshika kudi Yehova. (Heb. 11:36-40) Komana kuumika kwawu ninyidimu yawu yayili hohu mumenji? Inehi mwani! Hela chakwila mumpinji yawu hiyamweni kushikijewa kwayikaninu yaNzambi yejimaku, atwalekelihu kumuchiñeja Yehova. Nawa chineli elukili chikupu nawu Yehova wayitiyileña kuwaha, akuhweleli chikupu nawu akamona yuma yakanayi. (Heb. 11:4, 5) Yuma yeliliwu yinateli kutukwasha kutwalekahu kumuchiñeja Yehova.

18. Munakufwila kwiladi? (AHeberu 11:6)

¹⁸ Mukaayi mutunakushakama makonu, yuma yinakutaminaku. (2 Tim. 3:13) Satana kanda amanishi kweseka antu jaNzambi. Hela chakwila tukamona makabi kumbidi, tutwalekihu kumukalakela Yehova nañovu, nakwiluka netu “tunakuhweleli mudi Nzambi wamumi.” (1 Tim. 4:10) Anukenuña nenu, yuma yamwinkeliwu Yoba kudi Nzambi yinakumwekesha nawu “Yehova wukweti wushona chikupu niluwi.” (Yak. 5:11) Tutwalekenuhu kwikala ashinshika kudi Yehova, nakukuhwelela netu yena wakafweta “antu amukeñakeñaña chikupu.”—Tañenu AHeberu 11:6.