1. Yehova wayikana nindidi akanshidi anabalumuki chikupu mumuchima?

 HELA chakwila Yehova hiNleñi yetu, diyi Watwinkaña nshimbi, nawa hiNsompeshi yetu, wekala cheñi Tata yetu wukweti kukeña. (Mas. 100:3; Isa. 33:22) Neyi tuvulumuna kudi yena nawa tubalumuka chikupu mumuchima, wukweti wuswa nimuchima wakufwila kutwanakena. (Mas. 86:5) Kuhitila mudi kaprofwetu Isaya, Yehova watuleja nindi: “Hela chakwila nshidi jenu jichinana nge-e, akajitookesha neyi sino.”—Isa. 1:18.

2. Neyi tunakukeña kwikala mukuwunda nawakwetu, chumanyi chitwatela kwila?

² Chineli twawanina wanyi, twahoshaña nikwila yuma yaneñeshaña akwetu. (Yak. 3:2) Hela chochu, chumichi hichinayi mukwila nawu hitukuleka kudikunda nawuku. Tukwikala amabwambu, neyi tudanakenaña. (Yish. 17:9; 19:11; Mat. 18:21, 22) Neyi tunadineñeshi nawakwetu, Yehova nakukeña nindi tudanakeneña. (Kol. 3:13) Kudi chuma chikuletesha tudanakeneña. Kafwampi, Yehova ‘watwanakenaña nankashi.’—Isa. 55:7.

3. Yumanyi yitukuhanjekahu muchinu chibaaba?

³ Muchinu chibaaba, tukuhanjeka hadi antu abula kuwanina chiyanateli kumwimbujolawu Yehova nikwanakena akwawu. Nshidinyi jitwatela kulejamu akulumpi? Muloñadi Yehova chatulejelañayi nindi tuyanakeneña akwetu? Nawa chumanyi chitunateli kudizila kudi akwetu akakwitiya amakwawu ananeñi muloña wanshidi jawakwawu?

4. (a) Neyi kambuña aYehova nakoñi nshidi yasweja, watela kwiladi? (b) Mudimwinyi wukwetiwu akulumpi neyi anakuhanjeka namuntu wunavulumuni?

⁴ Neyi muntu nakoñi nshidi yasweja twatela kulejamu akulumpi. Nshidi jamuchidiwu ajishimuna ha 1 AKorinda 6:9, 10. Neyi muntu yakoña nshidi yasweja wafumpaña nshimbi yaNzambi. Neyi mukaKristu yakoña nshidi yamuchidiwu watela kumulejamu Yehova mukulomba, nawa watela kushimuna kudi akulumpi muchipompelu. (Mas. 32:5; Yak. 5:14) Mudimwinyi wazatañawu akulumpi? Yehova hohu diyi wukweti ñovu yakutwanakena chikupu, nawa watwanakenaña kushindamena hamulambu wefutu danyiloña. * Hela chochu, Yehova wayinka akulumpi mudimu wakushinshika muNsona kulonda amoni neyi mukakuvulumuna watela kutwalekahu muchipompelu hela nehi. (1 Kor. 5:12) Kubombela hayuma yikwawu, atela kwakula awa malwihu: Komana wavulumwinamu hohu? Komana wafwilaña kusweka nshidi? Komana watwalekahu kukoña nshidi hadi mpinji yayilehi? Nawa chuma chasweja kulema, kudihu wunsahu wunakumwekesha nawu nabalumuki chikupu? Kudihu wunsahu wunakumwekesha nawu Yehova namwanakeni?—Yilw. 3:19.

5. Yumanyi yayiwahi yafumaña mumudimu wazatañawu akulumpi?

⁵ Neyi akulumpi abulakana namuntu wunavulumuni, chuma chafwilañawu hikufuukula kwesekeja nachinafuukuliwu mwiwulu. (Mat. 18:18) Iyi ntanjikilu yakwashaña ñahi chipompelu? Ayishaku kulonda muntu wunabuli kubalumuka amufumishi muchipompelu kuchiina nawu wamba kaluwañesha nyikoku yambala yaYehova. (1 Kor. 5:6, 7, 11-13; Tit. 3:10, 11) Chinateli cheñi kukwasha mukakuvulumuna kubalumuka kulonda Yehova amwanakeni. (Luka 5:32) Akulumpi amulombelañaku muntu wunabalumuki nawa amulejañamu Yehova kulonda amukwashi kwikala nawubwambu wakola nayena.—Yak. 5:15.

6. Neyi muntu amuhaña muchipompelu komana Yehova nateli kumwanakena? Lumbululenu.

⁶ Twili netu muntu nabalumuki wanyi hanyima yakwila nadimoni nawakulumpi. Atela kumuhaña muchipompelu. Neyi nafumpi lushimbi lwetuña akulumpi hiyatela kumukiñaku. Yehova weteja akulumpi janfulumendi kusompesha nikubabesha muntu wudi wejima wunafumpi nshimbi hela nabalumuki mumuchima hela nehi. (Rom. 13:4) Hela chochu, neyi muntu yeluka nindi wakoñeli nshidi nawa abalumuka nakufunta kudi Yehova wukumwanakena. (Luka 15:17-24) Anateli kumwanakena hela chakwila nshidi yindi yadiña yasweja.—2 Kushi. 33:9, 12, 13; 1 Tim. 1:15.

7. Munjilanyi mutunateli kumwanakena muntu wunatuvulumuni?

⁷ Twasakililaña hakwiluka netu hitukweti mudimu wakufuukula neyi chakwila Yehova nateli kumwanakena muntu wunakoñi nshidi hela nehiku! Hela chochu, kudi chuma chikwawu chitwatela kufuukulahu. Chumanyi chenochu? Mpinji yikwawu muntu nateli kutuvulumuna chikupu ilaña yalomba kwanakena. Ilaña mpinji yikwawu muntu wukudanakena wanyi. Hela nenzi wanyi nakudanakena, tunateli kumwanakena nikubula kumuhembela nkunyi. Kuhosha hohu chalala, hanateli kuhita mpinji nawa chakeñekaña kuzata nañovu, sweje-e neyi muntu natutiyishi kutama nankashi. Kaposhi Kakutalila kaSeptember 15, 1994, kahosheli naku: “Neyi wunakwanakena mukanshidi, chumichi hichinatalishi mukwila nawu wunakwiteja nshidi  yinakoñiyiku. Neyi mukaKristu yanakena muntu chinayi mukwila nawu nashi yuma yejima mumakasa aYehova. Diyi Nsompeshi waloña mwiwulu nihamaseki nawa wakaleta wuñaji hampinji yatelela.” Muloñadi Yehova chatulejelañayi nindi tudanakeneña nikumushila yuma yejima mumakasa indi netu wukusompa munjila yaloña?

8. Chitwanakenaña akwetu chamwekeshaña ñahi nawu twasakililaña haluwi lwatutiyilañayi Yehova?

⁸ Twamwekeshaña netu twasakililaña neyi tudanakenaña. Muchishimu chimu, Yesu wamwesekejeli Yehova nankaka yawantu wanakeneni nduñu yindi mukudi hamukudi wakañenyi kufwetayi. Ilaña wakañenyi kutiyila luwi nduñu wadiña namukudi kudi yena, wamali antesha. (Mat. 18:23-35) Yesu watudizishileñadi? Neyi twasakililaña haluwi lwatutiyilañayi Yehova, ninetu tukwanakenaña akwetu. (Mas. 103:9) Hayaaka yayivulu yinahitihu Kaposhi Kakutalila kahosheli muniyi njila naku: “Hela chakwila tukwanakena akwetu mapampa añahi hichikwesekana nakwanakena kwatwanakenañayi Nzambi niluwi lwatutiyilañayi kuhitila mudi Kristuku.”

9. Hinyi atiyilañayi Yehova luwi? (Matewu 6:14, 15)

⁹ Antu anakenaña niwena akayanakena. Yehova watiyilaña luwi antu ekala naluwi. (Mat. 5:7; Yak. 2:13) Yesu wahosheli ichi chikuma hampinji yadizishileñayi atumbanji twindi chakulomba. (Tañenu Matewu 6:14, 15.) Hakusambila, Yehova wahosheli chikuma chochimu nikudi kambuña indi Yoba. Iwu iyala washinshika amuneñesheli namazu atama ahosheliwu amayala asatu aElifazi, Bilidadi niZofari. Yehova wamulejeli Yoba kuyilombelaku. Hanyima yakwila Yoba nayilombeliku dehi, Yehova wamukiswilili.—Yoba 42:8-10.

10. Muloñadi kuhemba ndulu chikwatamina? (AEfwesesa 4:31, 32)

¹⁰ Kuhemba ndulu kwatama. Yehova wakeñaña wanyi nindi tukabakaneña nayihuñu yenzaña hamuloña wakuhemba ndulu. (Tañenu AEfwesesa 4:31, 32.) Watulejaña nindi: “Lekaku kuzuwa nawa lekaku ndulu.” (Mas. 37:8) Chalema nankashi kulondela iku kufumba. Kuhemba ndulu kunateli kutukatisha kumujimba nimuyitoñojoka. (Yish. 14:30) Neyi tumuhembela muntu ndulu yena hichikumukatañaku chidi tuhu neyi tunanwi wulembi wukubula kumukatisha yena. Ilaña neyi tunakwanakena akwetu dikwila nawu tunakudinka etu aweni chawaana. (Yish. 11:17) Twekalaña nakuwunda kwamuyitoñojoka nimumuchima nawa twatwalekañahu kumukalakela Yehova.

11. Bayibolu yahoshahu nawudi kutalisha hakuditenda? (ARoma 12:19-21)

¹¹ Yehova diyi mukakutenda. Yehova hatwinka wuswa wakutenda muntu wunatuvulumuniku. (Tañenu ARoma 12:19-21.) Chineli twawanina wanyi nawa yitoñojoka yetu yakuminamu, hitunateli kusompesha muntu neyi chinateli kusompeshawu kudi Nzambiku. (Heb. 4:13) Nawa mpinji yikwawu yitoñojoka yetu yinateli kutuluwañesha chakwila tunateli kukañanya kwiluka chuma chachiwahi chitwatela kwila. Yehova wamoneneni Yakoba kusoneka nindi: “Kuzuwa kwamuntu, hikwaletaña kuloña kwaNzambiku.” (Yak. 1:20) Twatela kwiluka chikupu netu Yehova nateli kwila chuma chaloña nawa wakahakula mwaloña.

12. Tunateli kumwekesha ñahi netu tunakuhweleli muwuñanji waYehova?

¹² Neyi tunakwanakena twamwekeshaña netu tunakuhweleli muwuñaji waYehova. Neyi  tushiya yuma yejima mumakasa aYehova, twamwekeshaña netu tunakuhweleli chikupu netu wakafumishahu yuma yejima yatama yenza hamuloña wanshidi. Mwituña dadiha yuma yatuneñeshaña “hiyakayanukahu cheñiku, nawa hiyakenzahu cheñi kumuchimaku.” (Isa. 65:17) Neyi anatuneñeshi nankashi komana chinateli kwikala chaswayi kuleka kuzuwa nikubula kuhemba ndulu munyichima yetu? Talenu antu amakwawu cheliliwu.

13-14. Chumanyi chitunakudizila hakudanakena kwadiña hakachi kaTony naJosé?

¹³ Amanakwetu niahela amavulu anakenaña hela chakwila anayineñeshi nankashi nayuma yayilawu akwawu. Yumanyi yinafumimu?

¹⁴ Henohu kanda yadizi chalala, Tony, * washakamaña kuPhilippines, wenjili nakwiluka nindi yayindi amujahili kudi José. Ayina mpinji, Tony wadiña wazuwa nawa wamadombu, dichi wakeñeleña kumujaha niyena. José amukwatili nawa amukasili hamuloña wakoñeliyi. Chimwahitili mpinji, José amufumishili mukaleya, Tony wadikasili mumuchima nindi chiña tuhu akamukeñakeñi kulonda akamujahi. Dichi walandili wuta. Kufumahu, Tony watachikili kudiza Bayibolu nawaYinsahu jaYehova. Wahosheli nindi, “Chinadizileña nelukili nami natela kuhimpa yilwilu yami, nawa mwabombeleli nikubula kuhemba ndulu.” Chimwahitili mpinji, Tony wapapatisheweli nawa amutondeli kwikala mukulumpi muchipompelu. Wahayamini chelukiliyi nindi José niyena nekali kambuña aYehova wapapatishewa! Chadibulakeniwu adikumbatili nawa Tony wamulejeli José nindi namwanakeni. Tony wahosheli nindi iku kwanakena kwamuleteleli muzañalu weneni chikupu chakwila chamukalili nikushimuna chatiyiliyi. Yehova wamukiswilili Tony hamuchima windi wakwanakena.

15-16. Chuma chayimwekeneni aPeter naSue chinayidizishidi kutalisha hakwanakena?

¹⁵ Mu 1985, aPeter naSue adiña nakupompa Hetala daWanta kukasumuka mutenda nzumbu nadili. Kwadiña muntu watili mutenda nzumbu Mwitala daWanta! Sue wadikatishili nankashi chakwila walekeli kumona nikutiya.  Walekeli nikwepula ivumba. * Kakavulu aPeter naSue adihwileña nawu, ‘Muntu wamuchidinyi wukwila chuma chatama ñana?’ Chimwahitili yaaka yayivulu, iwu muntu watili mutenda nzumbu nawa wabulili kwikala kambuña aYehova amukwatili nawa amukasili nawu wukafwila mukaleya. Chayihwiliwu neyi chakwila anamwanakeni iwu muntu, aPeter naSue ahosheli nawu: “Yehova watudizisha kubula kuhemba nkunyi nindulu nawa kuhemba nkunyi nindulu kunateli kukatisha muntu kumujimba nimuyitoñojoka. Hohenahana, twamulombeli Yehova kulonda atukwashi kuleka kuzuwa nikubula kuhemba ndulu nawa nikuvulamenaku.”

¹⁶ Komana mpinji yejima adiña nakumwanakena? Inehi. Atwalekelihu nawu: “Mpinji yikwawu neyi Sue yatachika kutiya kuyeña twahilaña. Ilaña hitwatwalekañahu kutoñojokahuku, dichi ndulu yafwomokaña. Nawa twajinaña nikujina netu, neyi iwu muntu watili mutenda nzumbu yekala Chinsahu hela manakwetu, tukumutambwila. Ichi chuma chamwekeni chatudizishaña nawu yishina yamuBayibolu yatusubulaña chikupu; muyuma yitunatweshi nikubula kuchinda! Chatukundejaña kwiluka netu katataka Yehova yafumishihu yuma yatama yejima.”

17. Chuma chamumwekeneni Myra chinakutudizishadi kutalisha hakwanakena?

¹⁷ Myra wadizili chalala henohu wasumbuka dehi nawa wudi nawanyana ayedi anyanya. Nfumwindi hetejeli chalalaku. Chimwahitili mpinji, welili wujila nawa washili chisaka. Muhela Myra wahosheli: “Chelili nfumwami yanshiyi nawanyanetu ayedi, natiyili neyi chatiyañawu amavulu hanyima yakuyikwatila makasu kudi muntu akeñawu, natiyili kutama, natachikili kuditoñesha, kuneña, kudinka nyiloña nawa nahilili.” Hela chakwila wulu wamanini, kumuchima kwamukatileña hamuloña wakumukwatila makasu. Myra watwalekelihu nindi: “Ichi chineñi chatwalekelihu hadi tukweji twatuvulu, nawa nelukili nami ichi chineñi chaluwañesheleña wubwambu  wami naYehova niantu amakwawu.” Ichi muhela Myra wahoshaña nindi waleka dehi kuhila nawa hamuhembela ndulu muntu wadiña nfumwindiku. Wakuhwelela nindi ifuku dimu iwu iyala wukaswina kwakwihi naYehova. Myra watoñojokaña hohu hayuma yakumbidi. Nayikwashi anyanindi ayedi kwikala ambuña aYehova hela chakwila himama yawantu mujiki. Makonu Myra nakumukalakela Yehova hamu nawanyanindi niyisaka yawu.

18. Twatela kukuhwelela netu Nsompeshi Muneni Yehova nateli kwila chumanyi?

¹⁸ Chatuletelaña kuwunda hakwiluka netu hitwekala nawuswa wakufuukula chatela kumusompeshawu muntuku! Chineli Yehova diyi Nsompeshi Muneni, diyi wakazata iwu mudimu walema. (Rom. 14:10-12) Twatela kukuhwelela chikupu netu mpinji yejima wasompeshaña kwesekeja nanshimbi jindi jaloña. (Kutach. 18:25; 1 Anya. 8:32) Kwila ela chuma chabula kuloña nehi!

19. Yumanyi yikafuma muwuñanji waYehova waloña?

¹⁹ Tunakutalila mpinji yakafumishayi Yehova yuma yejima yenza hamuloña wakubula kuwanina kwawantu ninshidi. Hayina mpinji, yilonda yawantu yakumujimba nimuyitoñojoka yakakusuka yejima. (Mas. 72:12-14; Chim. 21:3, 4) Hiyakenza cheñi muyitoñojokaku. Hampinji yitunakuhembelela iyi mpinji yayiwahi kushika, tumusakilileña Yehova hakutwinka ñovu nikumwimbujola kuhitila mukwanakena.