1. Neyi chashimunawu haMukwakutañisha 7:20, chalalanyi chashimwiniyi Mwanta Solomoni?

 MWANTA Solomoni wasonekeli nindi: “Kwosi muntu waloña hamaseki welaña yuma yayiwahi mpinji yejima nawa wabulaña kuvulumunaku.” (Mukwa. 7:20) Imu diimu! Wejima wetu tudi akanshidi. (1 Yow. 1:8) Dichi wejima wetu twakeñaña kutwanakena kudi Nzambi nikudi akwetu antu.

2. Chatiyakanaña ñahi neyi anatwanakeni kudi ibwambu detu?

² Chakadi nikujina munakwanuka mpinji yimwamuneñesheli ibwambu denu. Mwakeñeleña nenu ayanakeni nawa mutwalekihu kwikala amabwambu, dichi mwamulombeli chakufuma hamuchima nenu ayanakeni. Mwatiyili ñahi ibwambu denu chayanakeneniyi chakufuma hamuchima? Kukasunuka? Eña, nawa mwatiyili nikuwaha!

3. Yumanyi yitukuhanjekahu muchinu chibaaba?

³ Tunakukeña Yehova kwikala Ibwambu detu chikupu, ilaña mpinji yikwawu, tunateli kuhosha hela kwila yuma yikumuneñesha. Hanu tuneluki ñahi netu Yehova nakufwila kutwanakena? Munjilanyi kwanakena kwaYehova chikwambukila nakwawantu? Nawa, hinyi atela kwanakenawu kudi Nzambi?

4. Tuneluki ñahi netu Yehova wadiloñesha kwanakena?

⁴ Izu daNzambi datulejaña nawu Yehova wadiloñesha kwanakena. Yehova chadimwekesheliyi kudi Mosi haMpidi yaSinayi, wahosheli kuhitila mudi kañelu nindi: “Yehova, Yehova, Nzambi wukweti luwi niwushona, hazuwaña swayiku nawa wavulisha  kukeña kwakashinshi nichalala, wamwekeshelaña makombakaji awantu kukeña kwakashinshi, wanakenaña yiluwa ninshidi.” (Kwid. 34:6, 7) Yehova hiNzambi wukweti luwi niwushona, wekala wadiloñesha mpinji yejima kwanakena antu anabalumuki mumuchima.—Nehe. 9:17; Mas. 86:15.

5. Kwesekeja naIsamu 103:13, 14, yuma yejima yelukayi Yehova hadi antu yamuleteshaña kwiladi?

⁵ Chineli diyi watuleñeli, Yehova watwiluka nankashi. Toñojokenu hachumichi! Weluka yuma yejima hadi muntu wejima hanu hamaseki. (Mas. 139:15-17) Dichi wamonaña yiluwa yejima yitwaswanini kudi anvwali jetu. Kubombelahu, weluka cheñi yuma yahimpa yilwilu yetu. Indi iyi yuma yejima yelukayi Yehova hadi antu yamuleteshaña kwiladi? Yamuleteshaña kututiyila luwi.—Mas. 78:39; tañenu Isamu 103:13, 14.

6. Yehova namwekeshi ñahi nindi nakukeña kutwanakena?

⁶ Yehova namwekeshi nindi nakukeña kutwanakena. Weluka nindi hamuloña wayuma yakoñeliyi muntu watachi, Adama, wejima wetu twekala mwishiñu danshidi nikufwa. (Rom. 5:12) Hitukutwesha kudamwina etu aweni hela muntu mukwawu kunidi ishiñuku. (Mas. 49:7-9) Ilaña Nzambi wukweti kukeña watutiyilili luwi nawa waloñesheli njila kulonda atukuuli. Chumanyi cheliliyi? Neyi chashimuna Yowanu 3:16, Nzambi watemesheli mwanindi akeñayi kulonda atufwili. (Mat. 20:28; Rom. 5:19) Yesu watusendeleli yihuñu yetu, kutukabakena kushika nikukufwa, kulonda asubuli muntu wejima wukumukuhwelela. (Heb. 2:9) Chamukatili nankashi Yehova hakumona Mwanindi akeñayi nakufwa kufwa kwayeña nawa kwakasawuntu! Mwamweni, Yehova hadi kukeña nindi Mwanindi afwiku neyi wakeñeleña wanyi kutwanakena.

7. Yakutalilahwinyi yawantu anakeneniyi Yehova chikupu?

⁷ MuBayibolu mwekala yakutalilahu yawantu anakeneniyi Yehova chikupu. (Efwe. 4:32) Hinyi imunakwanuka? Hadaha munanuki Mwanta Manasi. Ona muntu watama wamuvulumwini Yehova munjila yatama. Watandishili kudifukula kwakutwamba. Wajahili anyanindi nakuyilambula kudi anzambi akutwamba. Washili ninkishi wakusoña wanzambi wakutwamba mutembeli yaYehova yajila. Bayibolu yahosha hadi yena nawu: “Wakoñeli yuma  yatama chikupu kumesu aYehova nakumuzuwisha.” (2 Kushi. 33:2-7) Hela chochu, Manasi chamwekesheliyi nindi nabalumuki chikupu, Yehova wamwanakeneni chikupu. Nzambi wamufuntishili cheñi hawanta. (2 Kushi. 33:12, 13) Hadaha munakutoñojoka cheñi hadi Mwanta Davidi wakoñeli nshidi yamaneni kudi Yehova, kubombelahu, welili wujila nawa wajahañeni. Ilaña, Davidi chabalumukiliyi chikupu mumuchima nakwiluka nindi wakoñeli chiluwa, Yehova niyena wamwanakeneni. (2 Sam. 12:9, 10, 13, 14) Mwamweni, tunateli kukuhwelela netu Yehova wafwilaña kwanakena. Nawa neyi chitukumona, yena wanakenaña chambukaku nachanakenañawu antu.

8. Yehova chekalayi Nsompeshi wambukaku chamukwashaña ñahi kwanakena?

⁸ Yehova diyi “Nsompeshi yeseki dejima.” (Kutach. 18:25) Nsompeshi wamuwahi welukaña nshimbi yejima. Dichekalayi niYehova kubombelahu chineli hinsompeshi yetu, diyi cheñi Watwinkaña Nshimbi. (Isa. 33:22) Kwosi muntu mukwawu wukwesekana naYehova weluka nankashi yuma yayiwahi niyatama. Yumanyi yikwawu yelañayi nsompeshi wamuwahi? Watela kwiluka chidi nsañu yejima henohu kanda asompeshi. Chumichi, dichinaleteshi Yehova kwikala nsompeshi watelela nawa wambukaku.

9. Wunsahwinyi wekalaña naYehova neyi nakukeña kumwanakena muntu hela nehi?

⁹ Kwambukaku nawansompeshi awantu, Yehova welukaña wunsahu wejima henohu kanda yishiki kudi yena. (Kutach. 18:20, 21; Mas. 90:8) Hashindamenaña hayuma yamonañawu antu hela yatiyañawuku. Weluka chikupu yuma yaleteshaña muntu eli chuma, chidi neyi nkulilu yindi, iluña kwashakamañayi, chatiyañayi nichatoñojokañayi. Yehova wamonaña cheñi mumuchima. Weluka nankashi chaleteshaña muntu akoñi ochu chuma. Kwosi nichuma nichimu chaswama kudi Yehova. (Heb. 4:13) Dichi neyi muntu namwanakeni muntu, dikwila nawu neluki wunsahu wejima hadi owu muntu.

10. Tukuhosheladi netu mpinji yejima Yehova wasompeshaña mwaloña nawa mwamuwahi? (Kuhituluka 32:4)

¹⁰ Mpinji yejima Yehova wasompeshaña mwaloña nawa mwamuwahi. Hekala nachaambuku. Hanakenaña kwesekeja nachinakumwekayi muntu, maheta akwetiyi, mpuhu hela wuswaku. (1 Sam. 16:7; Yak. 2:1-4) Kwosi wunateli kumukanjikija Yehova hela kumwila majika kanwaku. (2 Kushi. 19:7) Hafuukulaña muloña wayitoñojoka hela chikelaku. (Kwid. 34:7) Chakadi nikujina, Yehova hinsompeshi wamuwahi muloña watwiluka nankashi chitwekala.—Tañenu Kuhituluka 32:4.

11. Chanakenañayi Yehova chinambukiku ñahi nachanakenañawu antu?

¹¹ Ansoneki anyikanda yachiHeberu elukili nawu kwanakena kwaYehova kwambukaku. Hamaluña amakwawu azatishili izu dachiHeberu dashimunawu mumukanda wumu nawu “adisoneka nakumwekesha kwanakena kwanakenañayi Nzambi mukanshidi, nawa hiyadizatisha haluwi nikwanakena kwamwanakenañayi muntu mukwawuku.” Yehova hohu diyi wukweti ñovu yakwanakena chikupu muntu wunabalumuki mumuchima. Yumanyi yafumañamu neyi Yehova atwanakena?

12-13. (a) Yumanyi yadiluñishañayi muntu neyi anamwanakeni kudi Yehova? (b) Yehova neyi namwanakeni muntu chekalaña ñahi?

¹² Neyi twiluka chikupu netu Yehova natwanakeni, ‘tukunooka,’ kushilahu nikwikala nakuwunda kwamuyitoñojoka nichinleji chitooka. Kwanakena kwamuchidiwu hikunateli kufuma kudi antuku ilaña kwafumaña kudi  “Yehova yomweni.” (Yilw. 3:19) Neyi Yehova natwanakeni, watwitejaña cheñi kwikala amabwambu nawa chekalaña tuhu neyi twavulumwini wanyi.

¹³ Neyi Yehova natwanakeni hakatwinka cheñi muloña hela kutubabesha nanshidi yitwakoñeliku. (Isa. 43:25; Yere. 31:34) Yehova watwalaña nshidi yetu “neyi chikwaleha kwaselelaña itena nakwahuminaña itena.” * (Mas. 103:12) Neyi tutoñojoka Yehova chatwanakenañayi, twasakililaña nikumulemesha. (Mas. 130:4) Ilaña hinyi atela kwanakenawu kudi Yehova?

14. Yumanyi yitunadizi dehi neyi Yehova hakufuukulahu kwanakena?

¹⁴ Neyi chitunadizi, Yehova neyi nakwanakena muntu hashindamenaña hakutoha kwanshidi hela hakukeha kwanshidiku. Cheñi, tunadizi netu Yehova wazatishaña yuma yelukayi hadi etu chineli diyi Nleñi yetu, Mukakutwinka Nshimbi nawa Nsompeshi neyi hakufuukulahu neyi chakwila watela kutwanakena hela nehi. Yumanyi yashinshikañayi Yehova?

15. Kwesekeja naLuka 12:47, 48, chumanyi chashinshikañahu Yehova?

¹⁵ Chuma chimu chashinshikañayi Yehova hikwiluka neyi muntu neluki nindi chuma chelayi chatama. Yesu washimwini chumichi hatooka neyi chasonekawu haLuka 12:47, 48. (Tañenu.) Muntu neyi afuukulahu kwila chuma chinelukiyi nindi nakwila chuma chahelayi Yehova, dikwila nawu nakoñi nshidi yasweja. Muntu wamuchidiwu Yehova nateli kufuukulahu kubula kumwanakena. (Maku 3:29; Yow. 9:41) Twatela kwiteja netu mpinji yikwawu twelukili netu twelili chuma chatama. Komana anateli kutwanakena hanichi chuma chitwelili? Eña! Chumichi chinatuleti kuchuma chikwawu chashinshikañayi Yehova.

16. Kubalumuka mumuchima kwatalisha mudihi, nawa chalemenadi kubalumuka hakwila atwanakeni kudi Yehova?

¹⁶ Chuma chikwawu chashinshikañahu Yehova hikwiluka neyi chakwila muntu wunakoñi nshidi nabalumuki chikupu hela nehi. Kubalumuka mumuchima kwatalisha mudihi? Kubalumuka mumuchima “hikuhimpa yitoñojoka, yilwilu hela yuma yiwunakufwila.” Mwabombela cheñi yitoñojoka yakwila nawu  muntu nakuditoñesha nikutiya kutama nankashi hayuma yatama yeliliyi hela kubula kwila chuma chachiwahi chateleli kwilayi. Muntu wunabalumuki waneñaña nayuma yatama yeliliyi nihakujimbesha wubwambu windi naYehova. Mwatela kwanuka nenu Mwanta Manasi niMwanta Davidi akoñeli nshidi yasweja; ilaña Yehova wayanakeneni muloña abalumukili chikupu. (1 Anya. 14:8) Yehova watela kumona chuma chinakumwekesha nawu tunabaluki hakwila atwanakeni. Ilaña hitwatela kukumina hakulomba kwanakena hanshidi yitunakoñiku. Twatela kuzatilahu. * Chumichi chinatuleti kuchuma chikwawu chashinshikañayi Yehova.

17. Kuhimpa kwatalisha mudihi, nawa muloñadi chichalemena kutondolwela nshidi yitwakoñeli kunyima? (Isaya 55:7)

¹⁷ Chuma chikwawu chashinshikañahu Yehova hikuhimpa. Kuhimpa kwatalisha “mukubalumuka.” Mumazu amakwawu, muntu watela kuhimpa yilwilu yindi kuhitila muleka yuma yatama nakutachika kumwovwahila Yehova. (Tañenu Isaya 55:7.) Muntu watela kubalumuka muyitoñojoka yindi kulonda amulomboleña nayitoñojoka yaYehova. (Rom. 12:2; Efwe. 4:23) Watela kuleka yitoñojoka yatama niyuma yelañayi. (Kol. 3:7-10) Hela chochu, kukuhwelela mumulambu waKristu dichuma chaleteshaña Yehova kutwanakena nikututookesha kunshidi. Yehova wukutwanakena kushindamena haniwu mulambu neyi amona nindi tunakuzata nañovu kulonda tuhimpi yilwilu yetu.—1 Yow. 1:7.

18. Yumanyi yitunahanjekihu kutalisha hachatwanakenañayi Yehova?

¹⁸ Tuhitulukenu muwihi yikuma yitunahanjekihu. Yehova diyi muntu wanakenaña chikupu mukuleña kwejima. Chumanyi chinaleteshi tuhoshi mwenimu? Chatachi, wadiloñesha kwanakena mpinji yejima. Chamuchiyedi, weluka yuma yejima hadi etu. Watwiluka nankashi chatuleñayi, nawa diyi weluka nankashi neyi chakwila tunabalumuki chikupu. Nawa chamuchisatu, neyi Yehova natwanakeni, wavulamenañaku kuyiluwa yetu. Chumichi chatuleteshaña  kwikala nachinleji chitooka nikutwiteja.

19. Hela chakwila twawanina wanyi nawa tukutwalekahu kuvulumuna, muloñadi chitwatela kwikala namuzañalu?

¹⁹ Hela chochu, chineli twawanina wanyi tukutwalekahu kuvulumuna. Ilaña, mazu ekala muInsight on the Scriptures, Volume 2, hefu 771, anateli kutukundeja: “Chineli Yehova hamuloña waluwi lwindi lwashindamena hakuzeyazeya kwawambuñindi, hiyatela kuneña mpinji yejima hamuloña wanshidi yakoñañawu yafuma kukubula kuwaninaku. (Mas. 103:8-14; 130:3) Neyi elaña yuma yakeñañayi Nzambi, akwikala namuzañalu. (Fwili. 4:4-6; 1 Yow. 3:19-22) Awa mazu anatukoleshi hama.

20. Tukahanjekadi muchibaaba chinalondelihu?

²⁰ Twasakililaña hakwiluka netu Yehova wadiloñesha kutwanakena neyi tubalumuka chikupu nanshidi yitunakoñi. Hanu dinu tunateli kwanakena ñahi neyi chanakenañayi Yehova? Chitwanakenaña chinadifwani ñahi nachanakeñayi Yehova, ilaña chambwinyi chidihu? Muloñadi chichinalemeni kwiluka chaambu chidihu? Chibaaba chinalondelihu chikakula awa malwihu.