ANTU amavulu eluka nsañu yaYesu yamukudikililiwu hamutondu nawambanji ayedi, wumu iku mukwawu iku. (Mat. 27:35-38) Hela chochu, antu amakwawu akaanaña nawu nsañu yekala muBayibolu yakwila nawu mujimba waYesu awuwahishili nakuwujiika mwijamu yalala wanyi.—Maku 15:42-46.

Antu atadikishaña nsañu yayiwahi ajinokaña nawu muntu anajahiliwu hamutondu kwila amujiika munjila yayiwahi nehi, chidi neyi kumusha mwijamu. Ilaña, atela kumujiika munjila yambukaku. Kamba nsañu wejina daAriel Sabar, wasonekeli mumagazini yaSmithsonian, nakulumbulula chaletesha antu atoñojokeña muniyi njila: “Kupopela muntu hakulusu hinjila yakubabeshelamu antu atama muchituñilu, nawa antu adiza chikupu ahoshaña nawu Aroma amweneña nawu hikasawuntu kujiika antu amuchidiwu munjila yayiwahi.” Aroma akeñeleña kusawisha ambanji munjila yatama chikupu, dichi nyijimba yawu kakavulu ayishileña hamutondu kulonda ayiidi kudi anyama amwisaña. Yiidi yashalileña diyanatilileñawu mwijamu.

Hela chochu, akakuvumbujola awanini nsañu yambukaku kutalisha hadi aYudeya amakwawu ajahileñawu. Mu 1968, awanini mafwaha amuntu akudikiliwu munkulakaji yakusambila. Ayiwanini mwijamu dachisaka chawaYudeya kwakwihi naYerusalema. Mafwaha adiña muchikasha. Nawa hadiña niifwaha dakukatutu. Wadiña wakupompa namusumali wawulehi mainchi 4.5. Sabar wahosheli nindi: “Katutu, kamuntu wejina daYehokanani, kamanishili ntaadi yadiñaku hadi mpinji yayilehi kutalisha haNsañu Yayiwahi yahosha hakumujiika Yesu mwijamu.” Chasweja kulema, “katutu kaYehokanani kanakumwekesha chakutalilahu chamuntu ajahililiwu hakulusu mumafuku aYesu etejeliwu kudi Aroma kumujiika neyi kaYudeya.”

Kunateli kwikala yitoñojoka yamboka-mboka yefwaha dakukatutu kutalisha hadi Yesu chamukudikiliwu hamutondu. Ilaña chikuma chidi chakwila nawu ambanji amakwawu ayijiikileña bayi neyi ayinatileña hohuku. Chakadi nikujina, chahosha Bayibolu nawu mujimba waYesu awujiikili mwijamu diimu. Wunsahu walala wunakuhakwilaku chahosha Bayibolu.

Chasweja kulema, Yehova washimwineñahu dehi nindi Yesu akamujiika mwijamu damuntu walema, nawa kwosi muntu wunateli kukañesha izu daNzambi kubula kushikijewaku.—Isa. 53:9; 55:11.