1. Lushimbinyi lwayinkeliyi Yesu atumbanji twindi? (Talenu mwevulu wudi hakava.)

HAWUFUKU wakwila Yesu kanda yafwi, wayinkeli atumbanji twindi lushimbi. Wayilejeli nindi: “Neyi chinayikeña ami, ninenu nawa keñañanenu.” Kuhiñahu wabombelelihu nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.”—Yow. 13:34, 35.

2. Chalemenadi kumwekesha kukeña kudi wumu namukwawu?

² Yesu wahosheli nindi atumbanji twindi alala adi kuyiluka neyi amwekesheli kukeña kwokumu neyi kwamwekesheliyi. Dichichadiña nikudi akwaKristu akusambila niamakonu. Akwakristu amumafuku awapostolu ayilukili nawu adiña adikeña wumu namukwawu nawa dichinakumwekana nimakonu. Dimuloña waweni wuchalemena kudikeña wumu namukwawu hela chakwila yuma yinakali chamuchidinyi.

3. Yumanyi yitukudiza muchinu chibaaba?

³ Chineli twawanina wanyi chatukalilaña kumwekesha kukeña kwakweni kudi wumu namukwawu. Hela chochu, twatela kuzata nañovu hakwila tumwimbujoli Kristu. Muchinu chibaaba, tukudiza kukeña chikwatukwashaña kwikala akwakuleta kuwunda, akadi chaambu nawa akweti chisambu. Chimukudizaña nsañu yidi muchinu chibaaba, dihulenu nenu: ‘Yumanyi yinatela kudizila kudi amanakwetu niahela anatwalekihu kumwekesha kukeña kudi wumu namukwawu hichikweti muloña nakukala kukwetiwuku?’

4. Kwesekeja naMatewu 5:23, 24, muloñadi chitwatela kuletela kuwunda namanakwetu neyi tunadiluwañeshi?

⁴ Yesu watulejeli chichalemena kuleta kuwunda namanakwetu  neyi tunadiluwañeshi. (Tañenu Matewu 5:23, 24.) Wakonkomweneni nindi neyi tunakukeña kumuzañalesha Nzambi, twatela kwikala nawubwambu wawuwahi nawakwetu. Yehova wazañalalaña neyi tuzata nañovu kulonda tuleti kuwunda hakachi ketu nawamanakwetu. Wukwiteja wanyi kudifukula kwetu neyi chakwila tutwalekahu kumuhilila muntu nawa tukaana kuleta kuwunda nayena.—1 Yow. 4:20.

5. Chumanyi chaletesheli manakwetu wumu chimukalili kuleta kuwunda?

⁵ Chinateli kwikala chakala kuleta kuwunda. Muloñadi? Shinshikenu chuma chamumwekeneni Mark. * Chamukatili chikupu chelili manakwetu yamutadikishi nakuhosha mazu atama kudi antu amuchipompelu hadi yena. Indi Mark welili ñahi? Wanukaña nindi: “Nakañenyi kudiyuula nawa nahilili chikupu.” Chimwahitili mpinji, Mark waditoñesheli nayuma yeliliyi nawa wayili nakudanakena kudi manakwetu kulonda yaleti kuwunda hakachi kawu. Ilaña manakwetu wakaanini kuleta kuwunda. Hakusambila Mark watoñojokeli nindi, ‘Inakukabakenadi henohu yena nakukeña wanyi kuleta kuwunda nanami?’ Hela chochu, nkoñi wañinza wamukolesheli kubula kuzeya. Indi Mark welili ñahi?

6. (a) Mark watwalekelihu ñahi kukeña kuleta kuwunda? (b) Mark wazatishili ñahi Akolosi 3:13, 14?

⁶ Chelili Mark yatoñojoki hayilwilu yindi, welukili nindi niyena mpinji yikwawu wadimweneña nindi waloña. Welukili nindi watela kuhimpa yilwilu yindi. (Kol. 3:8, 9, 12) Wadizozeli nakuya kudi manakwetu nakudanakena cheñi. Mark wamusonekeleli cheñi manakwetu nyikanda, nakudanakena nawa wamulombeli neyi anateli kwikala amabwambu cheñi. Nawa wamwinkeliku niyawaana yimu yatoñojokeliyi nindi iwu manakwetu wukuyikeña. Chawushona, iwu manakwetu watwalekelihu kumuhembela nkunyi. Hela chochu, Mark watwalekelihu kovwahila lushimbi lwaYesu lwakukeña manakwindi nikwanakena. (Tañenu  Akolosi 3:13, 14.) Hela chakwila antu anakukeña wanyi kuleta kuwunda nanetu, kukeña kwalala kwawakwaKristu kukutukwasha kutwalekahu kuyanakena nikulomba netu tukekali nawu mukuwunda.—Mat. 18:21, 22; Ñal. 6:9.

7. (a) Yesu watukonkomweneni kwiladi? (b) Kukalanyi kwamweniyi muhela wumu?

⁷ Yesu watulejeli kwilila antu yuma yitunakukeña netu atwilili. Wabombelelihu nindi hitwatela kukeña hohu antu atukeñaku. (Luka 6:31-33) Hela chakwila chumichi hichavula kumwekanaku, indi neyi muntu wamuchipompelu hakeñaña kudikunda nanenuku nawa wakaanaña kuyimusha? Ichi dichuma chamumwekeneni Lara. Walumbulwili nindi: “Muhela wañimushileña wanyi nawa nelukili wanyi chuma chaletesheli. Chumichi chantiyishileña kutama nawa nekeñeleña kuya nakupompa wanyi.” Hakusambila Lara watoñojokeli nindi: ‘Kwosi chuma chatama chinnakoñi. Nawa antu amakwawu muchipompelu niwena eluka nawu iwu muhela dichekalayi.’

8. Lara welili ñahi hakwila yaleti kuwunda, nawa chumanyi chitunateli kudizila kudi yena?

⁸ Kudi yuma yeliliyi Lara hakwila yaleti kuwunda. Walombeli kudi Yehova nawa wahanjekeli namuhela. Ahanjekeli hakukala, adikumbatili nawa ekalili mukuwunda. Yuma yejima yamwekeneña neyi yidi chiwahi. Lara wahosheli nindi: “Chimwahitili mafuku, muhela wamwekesheli chilwilu chochimu neyi chelileñayi hakusambila. Naneñeli nankashi.” Hakusambila Lara watoñojokeli nindi wateleli kwikala namuzañalu neyi ona muhela wahimpili chilwilu chindi. Nkumininaku, Lara welukili nindi chuma chachiwahi chateleli kwilayi hikutwalekahu kumukeña muhela ‘nikumwanakena.’ (Efwe. 4:32–5:2) Lara wanukili nindi kukeña kwalala kwawakwaKristu “hikwahembaña nkunyiku. Kwabutaña yuma yejima, kwakuhwelelaña yuma yejima, kwachiñejaña yuma yejima, kwomikaña yuma yejima.” (1 Kor. 13:5, 7) Lara wekalili cheñi nakuwunda kwamuyitoñojoka. Chimwahitili mpinji, muhela watachikili kudikunda nindi.  Neyi muleta kuwunda nawamanakwenu niahela nawa mutwalekahu kuyikeña, ilukenu nenu “Nzambi wakukeña nawa wakuwunda wukwikalaña nanenu.”—2 Kor. 13:11.

9. Kwesekeja naYilwilu 10:34, 35, muloñadi chitwatela kubula kwikala nachaambu?

⁹ Yehova hekala nachaambuku. (Tañenu Yilwilu 10:34, 35.) Neyi tubula chaambu, tukumwekesha netu tudi anyanindi. Tovwahilaña lushimbi lwakukeña akwetu neyi chitwadikeña etu aweni nawa twekalaña mukuwunda nawamanakwetu niahela.—Rom. 12:9, 10; Yak. 2:8, 9.

10-11. Muhela wumu walekeli ñahi kutoñojoka mwaluwa?

¹⁰ Chinateli kwikala chakala kubula chaambu kudi amakwawu. Shinshikenu, chuma chamumwekeneni muhela Ruth. Hadiñayi kansi wadiña nakutiyañana wanyi namuntu wakwituña dacheñi. Chumanyi chafuminimu? Ruth wahosheli nindi: “Naheleli ituña dejima. Natoñojokeli nami antu ejima amudina ituña adiña chochimu, kushilahu tuhu niamanakwetu niahela.” Ruth walekeli ñahi kutoñojoka iyi yitoñojoka yatama?

¹¹ Ruth welukili nindi wateleli kuzata nañovu kulonda yaleki kutoñojoka muniyi njila. Watañili muYearbook nsañu ninyidimu yahosheleña hadi amanakwetu amunidi ituña. Wahosheli nindi: “Nazatili nañovu kulonda nikali nayitoñojoka yayiwahi hadi antu amudina ituña. Natachikili kumona nami amanakwetu niahela adiña neyena dakumukalakela Yehova. Nelukili chikupu nami niwena adi hakachi kawanakwetu amukaayi kejima.” Mukuhita kwampinji, Ruth welukili nindi wateleli kuzata nañovu. Walumbulwili nindi: “Neyi nidiwana nawamanakwetu niahela anafumi munidi ituña, nazatileña nañovu kulonda nidikundi nawu. Nahanjekeleña nawu nawa nadilukili nawu.” Yumanyi yafuminimu? Ruth wahosheli nindi: “Mukuhita kwampinji nalekeli kuyitoñojokela mwaluwa.”

12. Kukalanyi kwadiña namuhela Sarah?

¹² Antu makwawu anateli kwikala nachaambu chakadi wena kwiluka. Chakutalilahu, Sarah wadimweneña nindi wadiña wanyi nachaambu muloña wadiña nakusompesha wanyi antu kushindamena hekowa dawu, mali iyakweti hela kukooleka kwadiñawunaku mukuloñesha. Ilaña wetejeli nindi: “Natachikili kwiluka nami nadiña nachaambu.” Munjilanyi? Sarah wafumini muchisaka chawantu ataña nawa wadiña nakudikunda hohu nawantu adiña neyi wena. Mpinji yimu walejeli ibwambu nindi: “Nadikundaña nawakwetu akwakwitiya ataña. Ilaña abula kutaña nehi.” Chakadi nikujina, Sarah wateleleli kuhimpa chilwilu chindi. Munjilanyi?

13. Tunadiziliku kwodi kudi Sarah chahimpiliyi chilwilu chindi?

¹³ Ñkoñi wañinza wamukwashili Sarah kushinshika yilwilu yindi. Sarah washimwini nindi: “Wanhamekeli hanyidimu yami, ñakwilu yami, niyuma yineluka muBayibolu. Kuhiñahu walumbulwili nindi chitunakwiluka yuma yayivulu, twatela cheñi kwikala nayilwilu yawakwaKristu yidi neyi kudizoza, kudikehesha niluwi.” Sarah welili mwamufumbiliwu kudi nkoñi wañinza. Wahosheli nindi: “Nelukili nami chuma chabadika kulema hikwikala nakukeña niluwi.” Chafuminimu, watachikili kuyimona amanakwetu niahela munjila yayiwahi. Nawa walumbulwili nindi: “Natachikili kumona yilwilu yaletesha Yehova yayilemeshi.” Indi etu? Bayi tudimonaña netu twabadika akwetu muloña washikola yitwatañaku. Neyi ‘twakeña anakwetu ejima,’ tukutondolwelaña chaambu.—1 Pet. 2:17.

14. Kwesekeja naAheberu 13:16, Yehova watiyaña ñahi neyi tuyimwekeshela akwetu chisambu?

¹⁴ Yehova watiyaña kuwaha neyi tumwekeshaña chisambu. (Tañenu Aheberu 13:16.) Wachimonaña nindi himbadi yakudifukula kwetu, sweje-e neyi tukwashaña antu anakaankili. (Yak. 1:27; 2:14-17) Dichi, Nsona yatukoleshaña ‘kwikala nachisambu mpinji yejima.’ (Rom. 12:13) Neyi tudi nachisambu, tukumwekesha kudi akwetu netu twayakamenaña, twayikeña nawa tunakukeña netu ekali amabwambu jetu. Yehova watiyaña kuwaha neyi tuyinkahu akwetu yakuda hela yakunwa hela neyi twikala nampinji yakuhanjeka nawu. (1 Pet. 4:8-10) Hela chochu, kudi yuma yinateli kutukañesha kumwekesha chisambu.

15-16. (a) Muloñadi antu amakwawu chatoñojokelañawu nawu akutwesha wanyi kumwekesha chisambu? (b) Chumanyi chamukwashili Edit kwikala nachisambu?

¹⁵ Chinateli kutukalila kumwekesha chisambu muloña wayuma yamwekanaña. Talenu chakutalilahu chamumbanda nfwila Edit. Henohu kanda yekali Chinsahu, wakeñeleña hohu kudikunda nawantu antesha. Edit watoñojokeli nindi akwawu diwu atela hohu kutambwila añenji.

¹⁶ Edit wahimpili yitoñojoka yindi chekaliliyi Chinsahu. Wazatili nañovu hakwila yekali nachisambu. Walumbulwili nindi: “Chatuñileñawu Itala detu daWanta, mukulumpi wanlejeli nindi kudi adisumbula anakwinza nakutukwashaku, nawa wañihwili neyi chikutwesheka kushakama nawu hadi nyilungu yiyedi. Nanukili Yehova chamukiswililiyi ona mumbanda nfwila wakuZarefwati.” (1 Anya. 17:12-16) Edit wetejeli kushakama nanawa adisumbula. Komana amukiswilili? Wahosheli nindi: “Twashakamini nawu tukweji tuyedi chatela tushakamini nawu nyilungu yiyedi. Haniyi mpinji, twekalili amabwambu chikupu.” Edit wudi cheñi nawamabwambu muchipompelu. Chayinu mpinji hipayiniya nawa watiyaña kuwaha kuzata nawamanakwetu mwinha nikuyitambika kwitala dindi nakuzañalela hamu nawu. Dichi wahosheli  nindi: “Kuhana kwantiyishaña kuwaha. Nawa natambwili nkisu jajivulu nankashi.”—Heb. 13:1, 2.

17. Chumanyi chelukiliwu aLuke niañodawu?

¹⁷ Hadaha twamwekeshaña chisambu, hanu dinu kwila tuswejelaku nehi? Chakutalilahu, Luke nañodindi ekala nachisambu. Adiña hohu nachaaku chakutambika anvwali jawu, antaña jawu, amabwambu jawu ninkoñi wañinza nañodindi kwitala dawu. Hela chochu, Luke wahosheli nindi, “Twelukili netu twatambikileña hohu antu itwadikunda nawu.” Indi Luke nañodindi elili ñahi kulonda amwekesheña chisambu chikupu?

18. Indi Luke nañodindi elili ñahi kulonda amwekesheña chisambu chikupu?

¹⁸ Luke nañodindi ahimpili yitoñojoka yawu hanyima yakutoñojoka hamazu aYesu akwila nawu: “Neyi mukukeña hohu antu ayikeña, mukuwanamu wufwetwinyi?” (Mat. 5:45-47) Elukili nawu atela kumwimbujola Yehova, wekala nachisambu kudi antu ejima. Dichi afuukwilihu kutambika amanakwetu niahela iyabulahu dehi kutambika. Luke wahosheli nindi: “Chayinu mpinji wejima wetu twadiluñishaña mpinji jamuchidiwu. Nawa twadikundaña chikupu wumu namukwawu ninaYehova.”

19. Twamwekeshaña ñahi netu tudi atumbanji twaYesu, nawa munakufwila kwiladi?

¹⁹ Tunahanjeki hakukeña kwakudikeña wumu namukwawu chikunateli kutukwasha kwikala akwakuleta kuwunda, akadi chaambu nawa adi nachisambu. Twatela kushinda yitoñojoka yatama kulonda tuyikeñi amanakwetu niahela chakufuma hamuchima. Neyi twila mwenimu, tukwikala namuzañalu nawa tukumwekesha netu tudi atumbanji twaYesu.—Yow. 13:17, 35.