CHIBAABA CHAKUDIZA 10
Kumukeña niKumusakilila Yehova Kukuyisañumuna Kupapatishewa
“Chumanyi chikunkañesha kupapatishewa?”—YILW. 8:36.
KAMINA 37 Kumukalakela Yehova naWumi Wejima
NSAÑU YIDI MUCHIBAABA *
1-2. Neyi chinamwekeshiwu haYilwilu 8:27-31, 35-38, chumanyi chamusañumwini ntuñu kaEtiyopiya kupapatishewa?
KOMANA munakukeña kupapatishewa nakwikala kambanji kaKristu? Kukeña nikusakilila kunasañumuni antu amavulu kupapatishewa. Shinshikenu chakutalilahu chachilolu wamukalakeleleña mwanta wamumbanda wakuEtiyopiya.
2 Iwu kaEtopiya chelukiliyi chahosha Nsona washikeneni kupapatishewa. (Tañenu Yilwilu 8:27-31, 35-38.) Chumanyi chamusañumwini? Walemesheli Izu daNzambi; wadiña nakutaña nsañu yamumukanda waIsaya hampinji yendeleñayi mwikalu dindi. Nawa chelili Fwilipu yahanjeki nindi, iwu iyala walemesheli chuma chamwilililiwu kudi Yesu. Hanu dinu muloñadi iwu chilolu chayililiyi kuYerusalema? Muloña wadiña wamukeña Yehova. Tuneluki ñahi? Muloña wadiña nakudifukula kudi Yehova muYerusalema. Iwu iyala hadaha wafumini munsakililu yindi nawa wadibombeli kumuza wadihanini kudi Nzambi walala. Kukeña kwokumu kwamukeñeliyi Yehova dikwamusañumwini yafuukulihu kwila chuma chalema, kupapatishewa nakwikala kambanji kaKristu.—Mat. 28:19.
3. Chumanyi chinateli kumukañesha muntu kupapatishewa? (Talenu chikasha chinakwila nawu “ Yumanyi Yidi muMuchima Weyi?”)
3 Kumukeña Yehova kunateli kuyiletesha kupapatishewa. Ilaña kukeña kunateli kuyikañesha cheñi kwila mwenimu. Munjilanyi? Toñojokenu haniyi yakutalilahu. Neyi musweja kukeña antaña jenu abula kwitiya niamabwambu jenu, munateli kwakama nenu neyi mupapatishewa, akuyihela. (Mat. 10:37) Indi kwiji mwakeña yaaku yimweluka nenu Nzambi wayihela nawa chinakuyikalila kuyileka. (Mas. 97:10) Hekwawu kufuma tuhu kuwansi wenu mwanakanaña tushidikilu twakundama kunsakililu yakutwamba. Hadaha munakwanuka yuma yimwadiluñishileña yakundama kunitu tushidikilu. Chikufumamu, chinateli kuyikalila kuleka kwanakana tushidikilu twahelayi Yehova. (1 Kor. 10:20, 21) Dichi mwatela kutonda, “Chuma chimwakeñesha hela muntu imwakeñesha nankashi.”
MUNTU ITWATELA KUKEÑESHA
4. Chumanyi chacheni chinateli kuyisañumuna kupapatishewa?
4 Mukweti yuma yayivulu yayiwahi yimwatela kukeña nikusakililahu. Chakutalilahu, nihampinji yimwadiña kanda mutachiki kudiza nawaYinsahu jaYehova mwadiña mwalemesha Bayibolu. Nawa mwadiña mwamukeña Yesu. Ichi dinu chimunadiluki dehi nawaYinsahu jaYehova, hadaha munakudikunda nawu. Ilaña bayi neyi kukeña iyu yuma kukuyileñela mudihani kudi Yehova nakupapatishewaku. Chuma chacheni chinateli kuyiletesha kupapatishewa hikumukeña Yehova Nzambi. Neyi musweja kumukeña Yehova kubadika yuma yejima, himukwiteja chuma chidi chejima hela muntu kuyikañesha kumukalakela Yehovaku. Kumukeña Yehova kukuyisañumuna kupapatishewa nawa kukuyikwasha kutwalekahu kwikala ashinshika kudi yena nihanyima yakupapatishewa.
5. Malwihwinyi itukuhanjekahu?
5 Yesu wahosheli nindi twatela kumukeña Yehova namuchima wetu wejima, nawumi wetu wejima, nayitoñojoka yetu yejima niñovu jetu jejima. (Maku 12:30) Munateli kumukeña ñahi Yehova nikumulemesha chikupu? Kutoñojoka hakukeña kwatukeñayi Yehova, kukutuletesha ninetu kumukeña. (1 Yow. 4:19) Yilwilwinyi yikwawu yimukwikala nayu neyi mwikala nakukeña kwamuchidiwu? *
6. Kwesekeja naAroma 1:20, njilanyi yimu mumwatela kumwilukilamu Yehova?
6 Mwilukenu Yehova kuhitila muyileñaleña yindi. (Tañenu Aroma 1:20; Chim. 4:11) Toñojokenu hamaana indi amwekenaña munyitondu yaleñayi nianyama. Toñojokenu chatuñawu mujimba wenu chakuhayama. (Mas. 139:14) Nawa toñojokenu hañovu jashayi Yehova mwitena. Nawa itena didi hakachi kamabiliyoni atutumbwa. * (Isa. 40:26) Chimukutoñojokaña hayileñaleña yaYehova, mukumulemesha chikupu. Hela chochu, chalema nankashi kwiluka nenu Yehova wukweti maana niñovu. Ilaña hakwila nawu musweji kumukeña Yehova nikwikala ibwambu dindi, mwatela kumwiluka chikupu.
7. Hakwila nawu mumukeñi Yehova chikupu, chumanyi chimwatela kukuhwelela?
7 Mwatela kwiluka nenu Yehova wayakamenaña hamuntu-hamuntu. Komana chayikalilaña kukuhwelela nenu Nleñi wamawulu nimaseki wayiluka nawa nenu wayakamenaña? Neyi dimu, ilukenu nenu Yehova “hekala kwakulehi nanetu ejimaku.” (Yilw. 17:26-28) Yena “washinshikaña nyichima yejima,” nawa wayikana enu, neyi Davidi chamulejeliyi Solomoni nindi: “Neyi wakamukeñakeña, wakamuwana.” (1 Kushi. 28:9) Chuma chinaleteshi mutachiki kudiza Bayibolu chidi chakwila nawu Yehova wahosheli nindi, “nakukoki.” (Yere. 31:3) Neyi mwiluka yuma yejima yinayililiyi Yehova, mukumukeña chikupu.
8. Tunateli kumwekesha ñahi netu twamukeña Yehova?
8 Njila yimu mutwamwekeshelaña netu twamukeña Yehova neyi chatukeñayi, hikuhanjeka nindi mukulomba. Mukusweja kumukeña Nzambi neyi mumuleja yitoñojoka yenu nikumusakilila hayuma yejima yayililañayi. Nawa wubwambu wenu naYehova wukukola neyi mumona chakulañayi kulomba kwenu. (Mas. 116:1) Mukwiluka chikupu nenu wayiluka. Ilaña hakwila nawu muswini kwakwihi naYehova mwatela kwiluka yuma yakeñayi, yahelayi nichelañayi yuma. Nawa mwatela kwiluka yuma yakeñañayi kudi enu. Njila yimu yimwatela kwilukilamu yuma yakeñañayi hikudiza Izu dindi, Bayibolu.
Njila yimu yakuswininamu kwakwihi naYehova nikwiluka yuma yakeñayi, hikudiza Bayibolu (Talenu paragilafu 9) *
9. Munateli kumwekesha ñahi nenu mwalemesha Bayibolu?
9 Lemeshenuña Izu daNzambi, Bayibolu. Bayibolu hohu diyi yahosha chalala hadi Yehova ninkeñelu yindi hadi enu. Mwamwekeshaña nenu mwalemesha Bayibolu kuhitila mukuyitaña mafuku ejima, kuhitila mukuloñesha henohu kanda mudizi nawa nikuzatisha yuma yimwadizaña. (Mas. 119:97, 99; Yow. 17:17) Komana mukweti ndandanda yakutaña Bayibolu kwahalwenu? Komana mwayilondelaña nakutaña Bayibolu mafuku ejima?
10. Chumanyi chimu chaletesha Bayibolu kwikala yambukaku?
10 Chuma chimu chaletesha Bayibolu kwikala yambukaku, yikweti nsañu yawantu amumweni Yesu namesu kapu. Diwu mukanda hohu walumbulula yuma yayililayi Yesu. Chimukudizaña yuma yahosheliyi Yesu niyeliliyi, hadaha mukukeña kwikala ibwambu dindi.
11. Chumanyi chikuyikwasha kumukeña Yehova?
11 Mukeñenu Yesu nawa mukusweja kumukeña Yehova. Muloñadi? Muloña Yesu wadiña nakwimbujola yilwilu yaTata yindi. (Yow. 14:9) Dichi chimukudizaña nankashi hadi Yesu, mukumwiluka nikumulemesha Yehova. Toñojokenu hawushona wamwekesheleliyi Yesu antu adiña nakumonawu nawu amukunkulwayi, muloña wawuzweñi, yikatu nikuzeya. Toñojokenu cheñi hanshimbi jajiwahi jayinkañayi nichahimpikaña chihandilu chenu neyi mujilondela.—Mat. 5:1-11; 7:24-27.
12. Neyi mumwiluka Yesu, chikuyileñela kwiladi?
12 Neyi mutoñojokaña nankashi hakudihana kwadihaniniyi Yesu hakwila nawu nshidi jetu ajanakeni mukusweja nankashi kumukeña. (Mat. 20:28) Neyi mwiluka chikupu nenu wadihanini nakuyifwila, chikuyiletesha kulomba kudi Yehova nenu yayanakeni nshidi jenu. (Yilw. 3:19, 20; 1 Yow. 1:9) Nawa chimukusweja kumukeña Yesu niYehova, chikuyiletesha kukeña kuswina kudi antu adi neyi enu.
13. Chumanyi chayinkayi Yehova?
13 Keñenu antu amukeña Yehova. Antaña jenu abula kwitiya niamabwambu imwahemeneña nawu kwila eluka chimunakukeñela kudihana kudi Yehova nehi. Anateli nikuyikaanisha. Yehova wukuyikwasha kuhitila muyinka chisaka chakuspiritu. Neyi mudikunda nawu mukumona nenu ayikeña nawa akuyikwasha. (Maku 10:29, 30; Heb. 10:24, 25) Nawa mukuhita kwamafuku chisaka chenu chikatachika kumukalakela Yehova nikulondela nshimbi jindi.—1 Pet. 2:12.
14. Neyi chinashimuniwu ha 1 Yowanu 5:3, yumanyi yimunadizi kutalisha hanshimbi jaYehova?
14 Lemeshenuña nikuzatisha nshimbi jaYehova. Henohu kanda mumwiluki Yehova, mwadiña nakudifuukwila enu aweni, ilaña chayinu mpinji munakumona nenu nshimbi jaYehova jajiwahi. (Mas. 1:1-3; tañenu 1 Yowanu 5:3.) Toñojokenu hakufumba kwamuBayibolu kwahosha hadi adisumbula, anvwali nianyana. (Efwe. 5:22–6:4) Komana chisaka chenu chidi namuzañalu chineli munakwovwahila iku kufumba? Komana kovwahila kufumba kwaYehova kwakutonda chiwahi amabwambu kunayileteshi kwikala antu amawahi? Komana mudi namuzañalu? (Yish. 13:20; 1 Kor. 15:33) Chakadi nikujina, ñakwilu yanawa malwihu yinateli kwikala nawu eña.
15. Chumanyi chimwatela kwila neyi himukeña wukwashu hakuzatisha yishina yamuBayibolu?
15 Mpinji yikwawu, chinateli kuyikalila kwiluka chakuzatisha yishina yamuBayibolu yimunakudiza. Dimuloña waweni wazatishilañayi Yehova kuloñesha kwindi kulonda yayiloñesheleña nyikanda yashindamena haBayibolu yinateli kuyikwasha kwiluka yuma yayiwahi niyatama. (Heb. 5:13, 14) Neyi mutaña nikudiza iyi nyikanda, mukumona chiyinateli kuyikwasha nawa mukukeña kwikala mukuloñesha kwaYehova.
16. Yehova napompeshi ñahi antu jindi?
16 Mwekeshenuña kukeña nikuzatila hamu nakuloñesha kwaYehova. Yehova napompeshi antu jindi muchipompelu; Mwanindi Yesu diyi mutu wanichi chipompelu. (Efwe. 1:22; 5:23) Yesu watonda izanvu danyanya dawamayala awayishewa kulombola mudimu wunakuzatewa makonu. Yesu wateneni idi izanvu dawamayala nindi “nduñu wamaana nikashinshi,” nawa azataña nañovu kulonda ayikwashi muswini kwakwihi naNzambi nikuyikiña kuspiritu. (Mat. 24:45-47) Njila yimu mwayakamenañayi nduñu washinshika hikutonda amayala ashikahu kwikala akulumpi kulonda ayibiñeña. (Isa. 32:1, 2; Heb. 13:17; 1 Pet. 5:2, 3) Akulumpi anakufwila kuzata hakumina ñovu jawu, kulonda ayikundeji nikuyikwasha kuswina kwakwihi naYehova. Ilaña chuma chalema chinateli kuyililawu hikuyikwasha kulonda mudizishi antu amwiluki Yehova.—Efwe. 4:11-13.
17. Kwesekeja naAroma 10:10, 13, 14, muloñadi chitwalejelaña antu nsañu yahosha hadi Yehova?
17 Kwashenu antu amukeñi Yehova. Yesu walejeli akwakumulondela kudizisha antu kulonda amwiluki Yehova. (Mat. 28:19, 20) Chaswayi kovwahila ilu lushimbi muloña tweluka netu twatela kulovwahila. Ilaña neyi musweja kumukeña Yehova, mukutiya neyi chatiyili kapostolu Petulu niYowanu, ahosheli nawu: “Hitukutwesha kuleka kuhosha yuma yitunamoni nikutiyaku.” (Yilw. 4:20) Twazañalalaña nankashi neyi tukwasha muntu yamukeña Yehova. Fwikijenu muzañalu watiliyi Fwilipu chelili yakwashi kaEtiyopiya kudiza chalala chamuNsona nikupapatishewa. Neyi mumwimbujola Fwilipu nawa mwovwahila lushimbi lwaYesu lwakushimwina, mukumwekesha nenu munakukeña kwikala Chinsahu chaYehova. (Tañenu Aroma 10:10, 13, 14.) Hanyima yakwila mwenimu, hadaha mukudihula neyi chadihwiliyi kaEtiyopiya nindi: “Chumanyi chikunkañesha kupapatishewa?”—Yilw. 8:36.
18. Tukahanjekadi muchibaaba chinalondelihu?
18 Neyi mukufuukulahu kupapatishewa dikwila nawu muneli chuma chasweja kulema muchihandilu chenu. Muloña kwila mwenimu chalema nankashi, dichi mwatela kwiluka muchatalisha. Yumanyi yimwatela kwiluka kutalisha kuchipapatishu? Yumanyi yimwatela kwila henohu kanda mupapatishewi nihanyima yakupapatishewa? Awa malwihu akayakula muchibaaba chinalondelihu.
KAMINA 2 Iyeyi Yehova
^ para. 5 Antu amakwawu amukeña Yehova ajinookaña neyi chakwila atela kupapatishewa nakwikala aYinsahu jindi. Neyi ninenu mwajinookaña, achinu chibaaba chikuyikwasha kwiluka yuma yimwatela kwila yinateli kuyikwasha kupapatishewa.
^ para. 5 Antu ambuka, amakwawu anateli kulondela njila jinashimuniwu muchinu chibaaba munjila jashiyashana nachinajisonekiwu.
^ para. 6 Neyi munakukeña kwilukilahu nsañu yayivulu, talenu mubuloshuwa yaWas Life Created? niwaThe Origin of Life—Five Questions Worth Asking.
^ para. 61 KULUMBULULA NYEVULU: Muhela nahani tilakiti kudi kansi wamumbanda iku nakulanda jakulanda-landa.
