1. Mukwakutaŋisha 3:1, 7 yatudizishañadi?

ETU amakwawu twakeña kuhosha-hosha. Amakwawu niwena akeña kuhosha-hosha wanyi. Neyi chinakuhosha mutu wachinu chibaaba, kudi mpinji yakuhosha nimpinji yakumwena. (Tañenu Mukwakutaŋisha 3:1, 7.) Hela chochu, tunateli kukeña amanakwetu niahela amakwawu kuhosha nankashi. Nawa tunateli kukeña amakwawu kubula kuhosha-hosha.

2. Hinyi wukweti wuswa wakutwinka nshimbi kutalisha hampinji yitwatela kuhosha nichitwatela kuhosha?

² Kuhosha hichawana chakufuma kudi Yehova. (Kwid. 4:10, 11; Chim. 4:11) Mwizu dindi, watukwashaña kwiluka chitwatela kuzatisha ichi chawana chiwahi. Muchinu chibaaba, tukuhanjeka hayakutalilahu yamuNsona yinateli kutukwasha kwiluka mpinji yakuhosha niyakumwena. Tukushinshika cheñi chatiyañayi Yehova kutalisha hamazu itwahoshaña nawakwetu. Chatachi, tuhanjekenu hampinji yitwatela kuhosha.

3. Kwesekeja naAroma 10:14, mpinjinyi yitwatela kuhosha?

³ Mpinji yejima, twatela kwikala adiloñesha kuhosha hadi Yehova nihaWanta. (Mat. 24:14; tañenu Aroma 10:14.) Neyi twila mwenimu, tukumwimbujola Yesu. Chuma chikwawu hakachi kayuma yenjililiyi Yesu hamaseki chadiña chakushimwina antu chalala hadi Tata yindi. (Yow. 18:37) Ilaña twatela kwanuka cheñi netu chitwahoshaña chalema nichena. Dichi neyi tunakuhanjeka nawantu hadi Yehova, twatela kwila mwenimu “namuchima wawovu nikalemesha chikupu.” Nawa twatela kumwekesha netu twalemesha chikupu chatiyañawu nichakuhwelelawu. (1 Pet. 3:15) Neyi twila mwenimu hitukukuminaña  dakuhoshaku, ilaña tukumudizisha hadaha nikumushika hamuchima.

4. Kwesekeja naYishimu 9:9, nhoshelu yetu yinateli kukwasha ñahi antu?

⁴ Akulumpi hiyatela kushintajala neyi amona nawu manakwetu hela muhela nakukeñeka kumufumbaku. Hela chochu, atela kuhosha nindi hampinji yatelela kulonda abuli kumutiyisha nsonyi. Atela kumufumbila kwakankawindi. Mpinji yejima akulumpi afwilaña kuhosha munjila yakwila abuli kumusawula muntu wunakuhanjekawu nindi. Hela chochu, amulejaña yishina yamuBayibolu yinateli kumukwasha kukoña mwamaana. (Tañenu Yishimu 9:9.) Muloñadi chichalemena kwikala wahamuka hakuhosha neyi chinatwesheki? Shinshikenu haniyi yakutalilahu yiyedi: Muchakutalilahu chimu iyala wateleleli kufumba anyanindi, nawa muchikwawu muntu wamumbanda wateleli kuhosha namuntu atondeliwu kwikala mwanta.

5. Mpinjinyi yateleli kuhoshayi Kapristu Muneni Eli?

⁵ Kapristu Muneni Eli wadiña nawanyana awamayala ayedi akeñeliyi chikupu. Hela chochu, awa anyana hiyamulemesheli Yehovaku. Adiña namudimu walema wawukapristu wakalakeleñawu hatabanaka. Ilaña azatishileña wuswa wawu chatama, hiyalemesheleña nyilambu yamwinkeleñawu Yehovaku nawa elileña wuvumbi. (1 Sam. 2:12-17, 22) Kwesekeja nanshimbi jaMosi, anyana kaEli ateleli kufwa, ilaña Eli hayizuwilileña nañovuku nawa wayitejeli kutwalekahu kuzatila hatabanaka. (Kuhit. 21:18-21) Yehova welili ñahi nachuma chelileñayi Eli haniku kukala? Wamulejeli Eli nindi: “Eyi hiwukulemesha anyaneyi abadikami!” Dichi Yehova wafuukwilihu kujaha ana amayala ayedi atama.—1 Sam. 2:29, 34.

6. Yumanyi yitwadizilaña kudi Eli?

⁶ Kudi Eli twadizilañaku chikuma chalema. Neyi tumona netu ibwambu detu hela ntaña yetu nafumpi nshimbi jaNzambi twatela kuhosha nindi, kulonda tumwanukishi nshimbi jaYehova. Kuhiñahu dinu twatela kumona netu natambwili wukwashu kudi antu amwimenañaku Yehova. (Yak. 5:14) Hitunakukeña kwikala neyi Eli, chakwila tulemesheña amabwambu hela antaña jetu kubadika Yehovaku. Chakeñekaña kwikala wahamuka hakuhanjeka namuntu wunakuñeka wukwashu, ilaña neyi tuhanjeka nindi munateli kufuma yuma yayiwahi. Talenu chaambu chidi hakachi kaEli namumbanda kaIsarela wejina daAbigayili.

7. Muloñadi Abigayili chahosheleliyi naDavidi?

 ⁷ Abigayili wadiña ñoda Nabali iyala wadiña namaheta. Hampinji Davidi niantu jindi yamutemukileñawu Mwanta Sawulu, ashakamini nawatubiña twaNabali nawa akiñili yimuna yaNambali kudi amakombi. Komana Nabali wasakilili hachumichi? Inehi. Chelili Davidi yaleji antu jindi kuya nakumulombaku Nabali yakuda yantesha nimenji, Nabali wahilili nawa wayihosheli mazu akasawuntu. (1 Sam. 25:5-8, 10-12, 14) Chafuminimu, Davidi wafuukwilihu kuya nakujaha amayala ejima amwitala daNabali. (1 Sam. 25:13, 22) Hanu iku kukala akukañesheli ñahi? Abigayili welukili nindi diyi mpinji yakuhosha, dichi wahamukili kuya nakubulakana amashidika 400 adiña nanzala, azuwili nawa wahosheli naDavidi.

8. Chumanyi chitwadizilaña kudi Abigayili?

⁸ Chelili Abigayili yadibulakani naDavidi wahosheli nindi nakuhamuka, nakavumbi nawa nakumushinjila. Hela chakwila Abigayili hakoñeli mwatamaku, wadanakeneni. Welukili nindi Davidi wadiña muntu wamuwahi nawa wukwila mwamuwahi. (1 Sam. 25:24, 26, 28, 33, 34) Kufwana Abigayili, neyi tumona netu muntu nakwila chuma chikuletesha yavulumuni, twatela kumukwasha. (Mas. 141:5) Twatela kwikala nakalemesha, ilaña akadi woma. Neyi tumufumba muntu mukukeña, tukumwekesha netu tudi amabwambu alala—Yish. 27:17.

9-10. Chumanyi chatela kwanukañawu akulumpi neyi hiyakufumba antu?

⁹ Akulumpi atela kwikala ahamuka hakuhosha nawantu anavulumuni muchipompelu. (Ñal. 6:1) Akulumpi atela kwanuka nawu niwena awanina wanyi nawa ifuku dimu niwena akakeñeka kuyifumba. Ilaña hiyatela kwiteja chumichi chiyikañeshi kufumba antu anakukeñeka kuyifumbaku. (2 Tim. 4:2; Tit. 1:9)  Neyi hiyakufumba muntu, azatishaña chawana chawu chakuhosha kulonda amukwashi nakumushika hamuchima nawa mukuwunda. Amukeña manakwawu nawa kukeña kweniku kwayisañumunaña kumukwasha. (Yish. 13:24) Ilaña chuma chalema kudi wena hikumulemesha Yehova kuhitila mukulemesha nshimbi jindi nikukiña chipompelu.—Yilw. 20:28.

¹⁰ Tunahanjeki hampinji yitwatela kuhosha. Hela chochu, kudi mpinji yitwatela kubula kuhosha. Kukalanyi kutwatela kumona hampinji jamuchidiwu?

11. Chakutalilahwinyi chazatishiliyi Yakoba, nawa chalemenadi?

¹¹ Chinateli kwikala chakala kufumba nhoshelu yetu. Nsoneki yaBayibolu Yakoba wazatishili chakutalilahu chashikila hakulumbulula iku kukala. Wahosheli nindi: “Neyi kudi muntu wabulaña kuhukana mumazu, dikwila nawu himuntu wawanina, nawa natweshi nikuyuula mujimba windi wejima.” (Yak. 3:2, 3) Mubulu amukasilaña kumutu wakawalu nawa chinkunku chantesha chahitaña mukanwa kindi. Mukwakwendela hakawalu nateli kuteñulula kawalu chiwahi hela kukimika. Neyi mukwakwendesha yakañanya kukwatisha chiwahi monji, kawalu kanateli kutemukila mumasaña nakudikatisha hela kumukatisha ona wunakukendesha. Munjila yoyimu, neyi tukañanya kuhemba idimi detu, dinateli kuleta kukala. Tushinshikenu mpinji yitwatela kuhemba idimi detu nikubula kuhosha.

12. Mpinjinyi yitwatela kuhemba idimi detu nikubula kuhosha?

¹² Mwelaña ñahi neyi manakwetu hela muhela neluki nsañu yakujinda? Chakutalilahu, neyi muwana manakwetu washakamaña  kwiluña kwalekeshawu mudimu wetu, komana mwafwilaña kumwihula kulonda yayilumbulwili chinakwenda mudimu mwituña dawu? Chakadi nikujina, himunakwihwila kulonda muyikoñi mwatamaku. Twayikeña nankashi amanakwetu nawa twakeñaña kwiluka yuma yinakuyimwekena. Tunakukeña kuyilombelaku cheñi hayuma yimu. Hela chochu, iyi diyi mpinji yitwatela kuhemba idimi detu nikubula kuhosha. Neyi tukanjikija muntu wukweti nsañu yakujinda, dikwila nawu tunakumwekesha wanyi kukeña kudi iwu muntu nikudi amanakwetu niahela anashindameni hadiwu muntu nawu wukuhemba kajindilu. Munjila yoyimu, kwosi manakwetu hela muhela wunakuzatila munidi ituña wukukeña kushimuna chashimwinañawu aYinsahu nichazatañawu nyidimu yawakwaKristuku.

13. Neyi chinashimuniwu haYishimu 11:13, chumanyi chatela kwilawu akulumpi nawa muloñadi?

¹³ Sweje-e akulumpi atela kuzatisha chishina chamuBayibolu chekala haYishimu 11:13 kuhitila mukuhemba nsañu yakajindilu. (Tañenu.) Chumichi chinateli kwikala chakala sweje-e neyi mukulumpi wasumbula. Adisumbula akoleshaña wulu wawu kuhitila mukuhanjeka kakavulu nawa nikudileja tujindilu, chinakutiyawu niyuma yinakuyakamisha. Ilaña mukulumpi weluka nindi watela wanyi kumuleja ñodindi “nsañu yakujinda” yawantu amuchipompelu. Muloña neyi yela mwenimu, akuleka kumukuhwelela nawa ijina dindi dikutama. Antu akweti kukooleka muchipompelu hiyatela kwikala antu akweti “madimi ayediku,” hela “abulaña kutwamba.” (1 Tim. 3:8, tth.) Chinayi mukwila nawu hiyatela kudimba antu hela kukeña matuñuku. Neyi mukulumpi wamukeña ñodindi, hakumulejaña nsañu yinabuli kumukundamaku.

14. Indi Mumbanda nateli kukwasha ñahi nfumwindi kutwalekahu kwikala nejina dadiwahi?

¹⁴ Mumbanda nateli kumukwasha nfumwindi kwikala nejina dadiwahi neyi yabulaña kumukanjikija nindi yahoshi nsañu yakajindilu. Neyi mumbanda yela mwenimu, bayi neyi wukukwasha nfumwindi hohuku ilaña wukumwekesha nikalemesha kudi ana antu alejeli nfumwindi nsañu yakujinda. Nawa chuma chasweja kulema, wukumuzañalesha Yehova nawa wukuleta kuwunda nikunuñañana muchipompelu.—Rom. 14:19.

15. Yehova watiyili ñahi nanawa amabwambu jaYoba asatu, nawa muloñadi?

¹⁵ Tunateli kudizilaku yuma yayivulu kumukanda waYoba kutalisha hachitwatela kuhosha nimpinji yakuhosha. Chelili Yoba yamoni yihuñu yayivulu, kwenjili amayala asatu nakumukundeja nikumukwasha. Awa amayala amwenenihu hadi mpinji yayilehi. Ilaña mazu enjili nakuhosha wenawa amayala asatu, Elifwazi, Bilidadi niZofwari, chamwekeni hatooka nawu hiyamwenenihu kulonda atoñojoki chiyatela kumukwasha Yobaku. Ilaña adiña nakutoñojoka chiyatela kumufwisha Yoba namuloña. Hakachi kansañu yahosheliwu hadiña yoloka, ilaña mazu amavulu ahosheliwu hadi Yoba niYehova adiña atama nawa akutwamba. Amufwishili Yoba namuloña nawu wadiña muntu watama. (Yoba 32:1-3) Indi Yehova welili ñahi? Wazuwili chikupu nanawa amayala. Wayiteneni nindi ayisupi nawa wayilejeli nindi amwili Yoba yayilombeliku.—Yoba 42:7-9.

16. Yumanyi yitwadizilaña kuyuma yatama yelili Elifwazi, Bilidadi niZofwari?

¹⁶ Twadizilañaku yuma yayivulu kuyuma yatama yeliliwu Elifwazi, Bilidadi niZofwari.  Chatachi, hitwatela kusompeshaña amanakwetuku. (Mat. 7:1-5) Dichi, twatela kuyitiyilila ntahi henohu kanda tuhoshi. Dihu dinu hitukwiluka kukala kwawu. (1 Pet. 3:8) Chamuchiyedi, neyi tunakuhosha nhoshelu yetu yatela kwikala yaluwi nawa yoloka. (Efwe. 4:25) Nawa chamuchisatu, Yehova washañaku muchima chikupu kumazu itwahoshaña nawakwetu.

17. Yumanyi yitwatela kudizila kudi Elihu?

¹⁷ Iyala wamuchiwana wamwendeleli Yoba wadiña Elihu ntaña yaAbarahama. Wadiwunjikili mpinji yadiña nakuhoshayi Yoba ninana amayala asatu. Chakadi nikujina, watiyilili nakanañachima yuma yahosheleñawu chakwila wamufumbili Yoba nawushona ilaña chakadi kumuhita mumbadi nawa chumichi chamukwashili Yoba kuhimpa yitoñojoka yindi. (Yoba 33:1, 6, 17) Chuma chacheni chafwilileñayi Elihu hikumulemesha Yehova, bayi yomweni hela muntu wacheñiku. (Yoba 32:21, 22; 37:23, 24) Kudi Elihu twadizilañaku netu kudi mpinji yakumwena niyakutiyilila. (Yak. 1:19) Twadizilañaku cheñi netu, neyi tunakufumbana tufwileña kumulemesha Yehova bayi etu aweniku.

18. Tunateli kumwekesha ñahi netu twalemesha chawana chakuhosha?

¹⁸ Tukumwekesha netu twalemesha chawana chakuhosha neyi tuzatishaña kufumba kwamuBayibolu kutalisha hampinji yakuhosha nichakuhosha. Mwanta wamaana Solomoni amoneneni kusoneka nawu: “Izu dakuhoshela hidinateleli didi neyi mabula awuru analoñejuwu mumabañu asiliva.” (Yish. 25:11) Neyi tutiyilila nakanañachima kumazu anakuhoshawu akwetu nawa tutoñojokahu henohu kanda tuhoshi, mazu etu akwikalaña neyi mabula awuru, alema nawa amawahi. Dichi, hela chakwila twawunda hela twalokota, nhoshelu yetu yinateli kutuña antu nawa tukumuzañalesha Yehova. (Yish. 23:15; Efwe. 4:29) Iyi diyi njila yayiwahi yitwatela kumusakililamu Nzambi hanichi chawana.