1-2. Anyi anateli kuyikwasha atudizi aBayibolu kuyilaku hambidi nakupapatishewa?

AMY wakuFiji wahosheli nindi: “Nekeñeli chikupu yuma yinadizileña hakudiza Bayibolu. Nelukili nami yuma yinadizileña dichalala. Ilaña chinatachikili kudikunda nawamanakwetu niahela nayililiku hambidi nawa napapatisheweli.” Chuma chamumwekeneni Amy chinakutudizisha ichi chuma chalema: Kadizi waBayibolu nateli kuyilaku hambidi nikupapatishewa neyi amukwashaña kudi antu muchipompelu.

² Mukwakushimwina wejima nateli kukwashaku atudizi kuyilaku hambidi nikupapatishewa. (Efwe. 4:16) Payiniya wejina daLeilani, washakamaña muVanuatu, wahosheli nindi: “Mwana hiyamukulishaña kudi muntu wumuku. Namoni dichekala nimudimu wakwilisha atumbanji; hakwila nawu muntu yenzi muchalala chipompelu chatela kuzatila hamu.” Antu amuchisaka, amabwambu, antañishi kushikola ejima wawu azataña mudimu walema hakwila amukwashi mwaana kukula muyitoñojoka. Amukoleshaña nikumudizisha yuma yalema. Munjila yoyimu, akwakushimwina anateli kukwasha, kukolesha, nikumwekesha yilwilu yayiwahi yikumukwasha kadizi waBayibolu, chumichi chikuyikwasha kuyilaku hambidi nakupapatishewa.—Yish. 15:22.

3. Yumanyi yimunadizili kumazu ahosheliyi Ana, Dorin, niLeilani?

³ Muloñadi akwakushimwina anakulombola atudizi aBayibolu chatela kwitejelewu akwawu akwakushimwina kuyikwasha atudizi awu? Muhela Ana, payiniya wadimena kuMoldova wahosheli nindi: “Neyi kadizi natachiki kuyilaku hambidi wakeñekaña  kumukwasha chikupu, dichi chinateli kumukalila ntañishi kumukwasha muyuma yejima nkawindi.” Dorin, payiniya wadimena mwituña dodimu wahosheli nindi: “Kakavulu, akwakushimwina amakwawu inazataña nawu ahoshaña nsañu yayishikaña atudizi hamuchima, nsañu yinabula nikutoñojokahu.” Leilani washimwini cheñi chuma chikwawu nindi: “Neyi kadizi yamona kukeña kunamumwekesheliwu kudi amanakwetu nichinamwakameniwu, chinateli kumukwasha kutwiluka nindi tudi antu jaYehova.”—Yow. 13:35.

4. Yumanyi yitukudiza muchinu chibaaba?

⁴ Hela chochu, munateli kudihula nenu, ‘Nateli kukwasha ñahi kadizi waBayibolu wunakudizishawu kudi muntu wacheñi kuyilaku hambidi?’ Ichi tuhanjekenu yuma yitunateli kwila neyi tunayi namukwetu nakulombola kadizi windi waBayibolu niyuma yitwatela kwila neyi kadizi waBayibolu natachiki kwinza nakupompa. Cheñi tukuhanjeka chinateli akulumpi kukwashawu katudizi waBayibolu kulonda yayiliku hambindi nikupapatishewa.

5. Mudimwinyi wumukwikala nawu neyi munayi namukwenu nakulombola kadizi windi waBayibolu?

⁵ Neyi munakulombola kadizi, ntañishi diyi wukweti mudimu weneni wakumukwasha kadizi kutiyishisha Izu daNzambi. Neyi mwini kadizi yayila nindi muyi nindi nakulombola kadizi, enu mudimu wenu hikumukwasha. (Mukwa. 4:9, 10) Munateli kwila ñahi hakwila mumukwashi mukwenu hampinji yinakulombolayi?

6. Neyi munayi namukwenu nakudizisha kadizi windi waBayibolu, munateli kuzatisha ñahi chishina chidi haYishimu 20:18?

⁶ Loñeshenu nsañu yimukudiza. Chatachi, mwihulenu mwini kadizi yayileji chekalayi kadizi windi. (Tañenu Yishimu 20:18.) Munateli kumwihula nenu: “Kadizi wenu mukulumpi tahindi hikansi? Wakuhwelela yumanyi? Mwakadizaña nsañwinyi? Yumanyi yimunakufwila kadizi wenu yakeluki? Kudihu yuma yinatela kwila hela kubula kwila, kuhosha hela kubula kuhosha? Yumanyi yatela kumukwasha kadizi wenu kuyilaku hambindi?” Hela chochu, ntañishi hatela kuyileja nsañu yakujinda yakadizi windiku, ilaña yuma yikuyilejayi yikuyikwasha. Mishonali wejina daJoy wayilejaña chadimu antu ayañayi nawu nakudizisha atudizi indi aBayibolu. Wahosheli nindi: “Neyi nayilejeli dimu antu inayaña nawu chayikwashaña kwikala nampwila yakukwasha atudizi nikuloñesha mazu akuhoshawu hampinji yitukudizaña.”

7. Muloñadi chimwatela kuloñeshela neyi munakuya namukwenu nakudizisha kadizi windi?

⁷ Neyi mukwenu yayila nindi mwakamutwaliku nakudizsha kadizi windi waBayibolu chikuwaha neyi mukuloñesha dimu nsañu yakadizishañayi. (Ezera 7:10) Manakwetu Dorin  itwatena wahosheli nindi: “Natiyaña kuwaha neyi mukwetu inakuzata nindi yaloñeshela chadimu nsañu yinakuya nakudizisha. Muloña nsañu yikubombelañahu yikukwashana.” Kadizi wukwiluka nindi wejima wenu mwaloñesha chiwahi, nawa chikumuletesha niyena yaloñesheña. Hela neyi mukutwesha wanyi kuloñesha nsañu yejima, wanenuku mpinji yakuloñesha yikuma yamaneni yidi munoku kudiza.

8. Munateli kwila ñahi hakwila mulombi hohu yuma yinakukeñeka hampinji yimunakumudizisha muntu Bayibolu?

⁸ Kulomba hichibalu chalema hakudizisha Bayibolu, dichi loñeshelenu chadimu mazu imukuhosha neyi anayinki kulomba. Neyi tuloñeshela chadimu tukulomba kwesekeja nayuma yinakukeñeka. (Mas. 141:2) Muhela Hanae washakamaña muJapan, wuchidi kwanuka kulomba kwalombeleñayi muhela wenjileña nantañishi yindi. Wahosheli nindi: “Nelukili nami wadiña nawubwambu wakola naYehova, ninami nakeñeleña kwikala neyi yena. Cheñi nelukili nami ankeña chanteneneñayi hejina mukulomba.”

9. Kwesekeja naYakoba 1:19, yumanyi yimwatela kwila hakwila mwikali nkwashi wamuwahi hampinji yimunayi namukwenu nakudizisha kadizi windi?

⁹ Zatilenu hamu nantañishi hampinji yinakudizishayi. Omamuyovbi, payiniya wadimena muNigeria wahosheli nindi: “Nkwashi wamuwahi watiyililaña nakanañachima hampinji yimunakudizisha. Wahoshañahu neyi hadi hanakukeñeka, ilaña haswejaña kuhosha hoshahuku, muloña neluki nindi ntañishi diyi wudi namudimu wakulombola.” Mpinjinyi yimwatela kuhoshahu nawa yumanyi yimwatela kuhoshahu? (Yish. 25:11) Tiyililenu nakanañachima hampinji yinakuhoshayi ntañishi nakadizi. (Tañenu Yakoba 1:19.) Chimwela mwenimu mukwiluka mpinji yatelela kuhoshahu. Hela chochu, mwatela kusambila kutoñojokahu henohu kanda muhoshihu. Chakutalilahu, himwatela kusweja kuhosha mazu amavulu, kumuketwisha ntañishi mpinji yinakulumbululayi, hela kuhosha nsañu yimunakubula kuhanjekahuku. Munateli kuhoshahu muwihi, kuhana chakutalilahu, hela kwihula lwihu, kulonda chikuma chimunakuhoshahu chitiyakani. Mpinji yikwawu munateli kumona nenu mudana jajivulu jakuhoshahu. Ilaña neyi mumuhameka kadizi, mukumwekesha nenu mwamukeña, mukumukwasha kuyilaku hambidi.

10. Yuma yayimwekeneni muchihandilu chenu yinateli kumukwasha ñahi kadizi waBayibolu?

¹⁰ Mulejenuku yuma yayimwekeneni. Neyi chinatwesheki mulejenuku kadizi chimwadizili chalala, chimwomikili kukala, hela chinakuyikwashayi Yehova muchihandilu chenu. (Mas. 78:4, 7) Hadaha yuma yayimwekeneni yikumukwasha chikupu. Indi kwiji yikumukwasha kukolesha chikuhwelelu chindi hela yikumukwasha kuyilaku hambidi nakupapatishewa. Nawa hadaha yinateli kumukwasha kwiluka  chinateli kuumikayi kukala kunakumonayi. (1 Pet. 5:9) Gabriel, washakamaña muBrazil ichi hipayiniya, wanukaña yuma yamukwashili hadizileñayi Bayibolu. Wahosheli nindi: “Chinatiyili yuma yamweniyi amanakwetu, nadizililiku nami Yehova wamonaña kukala kutwamonaña. Neyi wena atwesheli kuumika, ninami nukutwesha.”

11-12. Muloñadi chitwatela kumutambwila namuzañalu kadizi waBayibolu wunenzi nakupompa?

¹¹ Hakwila kadizi waBayibolu yayiliku hambidi nakupapatishewa watela kupompaña mpinji yejima kupompa kwahachipompelu, chumichi chikumukwasha. (Heb. 10:24, 25) Hadaha, ntañishi namutambiki katachi kukupompa. Neyi yenza nakupompa, wejima wetu twatela kumukolesha kulonda yatwalekihu kwinza nakupompa Kwitala daWanta. Tunateli kwila ñahi mwenimu?

¹² Mutambwilenu kadizi namuzañalu. (Rom. 15:7) Neyi tumutambwila kadizi namuzañalu chikumuletesha kwikala nampwila yakutwalekahu kwinza nakupompa. Mutambwilenu munjila yatelela, mwimushenu nawa lejenuku niamakwawu niwena amwiluki. Bayi mutoñojoka nenu kudi antu amakwawu anakumwakamenaku; hadaha ntañishi yindi kanda yashiki hela neyi nehi wudi nanyidimu yikwawu yinakuzatayi. Tiyililenu nakanañachima chinakuhoshayi kadizi nawa mwekeshenu nenu munamushi muchima. Chumanyi chikufumamu neyi mumutambwilaña namuzañalu? Talenu yuma yamumwekeneni Dmitrii, wapapatisheweli yaaka yantesha yinahitihu nawa ichi hinkoñi wakuzatila. Wanukaña ifuku datachi dayiliyi nakupompa, wahosheli nindi: “Manakwetu wammweni inakuhembelela hanji Yetala daWanta iku nadihombi wansendeli nawa tweñilili hamu. Amavulu enjili nakuñimusha. Nahayamini nankashi. Natiyili kuwaha nankashi nawa nakeñeleña tuhu nami tupompeña mafuku ejima. Kanda nimoneñahu dehi chuma chamuchidiwu.”

13. Yilwilu yenu yinateli kumukwasha ñahi kadizi waBayibolu?

¹³ Ikalenu nayilwilu yayiwahi yinateli kwimbujolayi kadizi. Yilwilu yenu yinateli kumukwasha kadizi kwiluka nindi tudi akwaKristu alala. (Mat. 5:16) Vitalii, wunakuzata wupayiniya muMoldova wahosheli nindi: “Nelukili chihandilu chawantu muchipompelu, yitoñojoka yawu, niyilwilu yawu. Chumichi chankwashili kwiluka nami aYinsahu jaYehova ekala mukudifukula kwalala.”

14. Yilwilu yenu yayiwahi yinateli kukwasha ñahi muntu kuyilaku hambidi?

¹⁴ Hakwila kadizi yashikihu nakupapatishewa, watela kuzatishaña yuma yinakudizayi. Chumichi hichaswayiku. Ilaña neyi yamona kuzatisha yishina yamuBayibolu  chikunayikwashi, niyena wukutachika kuyizatisha. (1 Kor. 11:1) Talenu yuma yamumwekeneni Hanae, itwatena cheñi. Wahosheli nindi: “Amanakwetu niahela adiña atachika dehi kuzatisha yuma yinadizileña. Nadizilili kudi wena chakukolesha akwetu kuyanakena nichakumwekesha kukeña. Neyi anakutena akwawu ahosheleña hohu yuma yayiwahi. Nakeñeleña kwikala nayilwilu neyi yawu.”

15. Yishimu 27:17 yatukwashaña ñahi kwiluka chichalemena kudikunda nakadizi waBayibolu wunatwalekihu kupompa?

¹⁵ Dikundenuña nakadizi. Neyi kadizi natwalekihu kwinza nakupompa, mwekeshenuña nenu mwamukeña. (Fwili. 2:4) Mwilukenu chekalayi? Munateli kumuleja nenu munatiyi kuwaha chinakuyilaku hambidi, mwihulenu hayuma yinakudizayi, chisaka chindi nimudimu, ilaña bayi mumwihula yuma yikumutiyisha nsonyiku. Kuhanjeka nsañu yamuchidiwu kukuletesha mudikundi. Neyi mwikala ibwambu dakadizi mukumukwasha kuyilaku hambidi nakupapatishewa. (Tañenu Yishimu 27:17.) Hanae ichi hipayiniya wampinji yejima. Wanukaña mpinji yatachikiliyi kupompa wahosheli nindi: “Chinekalili nawamabwambu muchipompelu, nayileña nakupompa mpinji yejima, nawa nayileña nakupompa hela inakutiya kuzeya. Natiyileña kuwaha kudikunda nanawa amabwambu amaha, nawa chumichi chankwashili kuleka kudikunda nawantu abula kukuhwelela yuma yinakuhwelela. Nakeñeleña kudikunda chikupu nawamanakwami niahela. Dichi, nafuukwilihu kupapatishewa.”

16. Yumanyi yikwawu yimunateli kwila hakwila mumukwashi kadizi waBayibolu kwikala wakasunuka muchipompelu?

¹⁶ Neyi kadizi nakuyilaku hambidi nawa nakuhimpa, mukwashenu kulonda yadikundeña nawantu muchipompelu. Mumwekeshelenuña chisambu. (Heb. 13:2) Manakwetu Denis washakamaña kuMoldova wanukaña mpinji yadizileñayi Bayibolu, wahosheli nindi: “Kakavulu, ami niñodami atutambikileña kudi amanakwetu nakuhanjeka. Atulejeleña chayikwashiliwu kudi Yehova. Chumichi chatukolesheli. Chatuletesheli kwiluka chikupu netu ninetu twatela kumukalakela Yehova nawa twakekala nachihandilu chamuzañalu.” Neyi kadizi nekali mukwakushimwina, yenuña nindi mumudimu wakushimwina. Diego, mukwakushimwina wamuBrazil, wahosheli nindi: “Amanakwetu amavulu ansendeleñaku mumudimu wakushimwina. Chumichi chankwashili kuyiluka chikupu. Hampinji yinazatileña nawu nadizililiku yuma yayivulu nawa naswinineña kwakwihi naYehova niYesu.”

17. Akulumpi anateli kukwasha ñahi atudizi?

¹⁷ Ikalenuña nampinji yakuhanjeka nawatudizi aBayibolu. Enu akulumpi, neyi muyimwekeshelaña atudizi kukeña chikuyikwasha kuyilaku  hambidi nakupapatishewa. Ikalenuñaku nampinji yakuhanjeka nawatudizi neyi anenzi nakupompa? Akumona nawu mwayikeña neyi muyitenaña hamajina sweje-e neyi anatachiki kwakulahu. Ikalenuña nampinji yakuya nawakwakushimwina nakulombola atudizi awu aBayibolu? Hadaha munateli kumukwasha kadizi munjila yimunabuli nikukuhwelela. Payiniya wejina daJackie, washakamaña muNigeria, wahosheli nindi: “Atudizi amavulu ahayamini chelukiluwu nawu manakwetu inazatileña nindi hinayidizishileña himukulumpi. Kadizi wumu wahosheli nindi: ‘Mukulumpi wamuchechi yetu kwila yakuhempula nehi. Wahempulaña hohu antu aheta nihena chiña tuhu neyi amufweta.’” Iwu kadizi ichi wenzaña nakupompa.

18. Akulumpi anateli kuzata ñahi mudimu wayinkawu neyi chinamwekeshiwu haYilwilu 20:28?

¹⁸ Yidizishenu nikuyikolesha akwakushimwina anakulombola atudizi. Enu akulumpi, mudi namudimu walema wakukwasha akwakushimwina kukulukila mumudimu wakushimwina, nikuyikwasha adizisheña chiwahi atudizi awu aBayibolu. (Tañenu Yilwilu 20:28.) Neyi mukwakushimwina imunakuzata nindi natiyi nsonyi yakulombola himudi, lombolenu. Jackie, itwatena cheñi wahosheli nindi: “Kakavulu akulumpi añihulaña kutalisha hadi atudizi ami. Neyi nindi nakukala kutalisha kukulombola atudizi aBayibolu, ankwashaña.” Akulumpi anateli kuyikolesha nikuyisañumuna akwakushimwina anakulombola atudizi. (1 Tes. 5:11) Manakwetu Jackiel wabombelelihu nindi: “Natiyaña kuwaha neyi akulumpi ankolesha nawa ansakilila hamudimu winakuzata. Mazu awu antiyishaña kuwaha neyi chochatiyaña muntu wanafwi mpwila neyi yanwa menji atuta. Mazu ahoshañawu aleteshaña kwiluka nami inakudishaku mumudimu wakwilisha atumbanji nawa anzañaleshaña.”—Yish. 25:25.

19. Chumanyi chinateli kutuzañalesha wejima wetu?

¹⁹ Hela neyi chayinu mpinji tunakulombola wanyi kadizi, tunateli kukwasha muntu kuyilaku hambidi nakupapatishewa. Chatela tuswejeña kuhoshahu, neyi twaloñesha chiwahi tukumukwasha mukwetu wunakulombola kadizi. Twatela kudikundaña nawatudizi neyi anenzi nakupompa, nawa yilwilu yetu yayiwahi yinateli kuyikwasha. Nawa akulumpi anateli kukolesha atudizi neyi ekalaña nampinji yakuhanjeka nawu, nawa anateli kuyikolesha anakulombola atudizi neyi ayidizishaña nikuyihameka. Neyi twiluka netu tunakwashi muntu munjila yidi yejima kulonda yamukeñi nikumukalakela Tata yetu, Yehova, tukuzañalala.