1. Kukalanyi kunateli kumonawu antu jaYehova?

KOMANA munakumona kukala kweneni? Hadaha manakwenu muchipompelu nayineñeshi. (Yak. 3:2) Indi kwiji akwenu mumwazatilaña hela mumwatañilaña kushikola ayisehaña muloña mwamukalakelaña Yehova. (1 Pet. 4:3, 4) Indi kwiji antaña jenu anakuyikañesha kuya nakupompa hela kulejaku akwenu yuma yimwakuhwelela. (Mat. 10:35, 36) Neyi kukala kumunakumona kunakuyineñesha chikupu, hadaha munateli kutoñojoka jakuleka kumukalakela Yehova. Ilaña ilukenu chikupu nenu mukukala kwejima kumukumona, Yehova wukuyinka maana akuyikwasha niñovu yakuumika nachu.

2. Kwesekeja naAroma 15:4, kutaña Bayibolu kunateli kutukwasha ñahi?

² Yehova washimuna mwiIzu dindi chomikiliwu antu akwawu kukala hela chakwila adiña awanina wanyi. Muloñadi? Kulonda tudiziliku. Dihafumini Yehova yamuleji kapostolu Pawulu kusoneka iyi nsañu. (Tañenu Aroma 15:4.) Neyi tutaña iyi nsañu yikutukolesha nawa tukutwalekahu kuchiñeja. Ilaña, hakwila nawu iyi nsañu yitukwashi, hitwatela kukuminaña hohu dakutaña Bayiboluku. Twatela kwiteja nsona yihimpi yitoñojoka yetu nawa yitushiki hanyichima. Yumanyi yitwatela kwila neyi tunakukeña nsañu yikutukwasha kuumika kukala kutukweti? Twatela kwila iyi yuma yiwana: (1) Kulomba, (2) Kufwikija, (3) Kutoñojokahu chikupu, (4) niKuzatisha yuma yitunakutaña. Ichi dinu tuhanjekenu yuma yinadivuñili muniyi yuma yiwana. * Nkumininaku tukuzatisha iyi njila yakudizilamu kulonda twiluki  yuma yitunateli kudizila kuyuma yamumwekeneni Mwanta Davidi nikapostolu Pawulu.

3. Henohu kanda mutachiki kutaña, Bayibolu chumanyi chimwatela kwila nawa muloñadi?

³ (1) Lombenu. Henohu kanda mutachiki kutaña Bayibolu, mulombenu Yehova kulonda yayikwashi kwiluka nsañu yimunakutaña chiyikuyikwasha. Chakutalilahu neyi munakukeña kuwana nsañu yikuyikwasha kumanisha kukala kumukweti, mulombenu Yehova yayikwashi kuwana yishina mwizu dindi yikuyikwasha kwiluka chimwatela kwila.—Fwi. 4:6, 7; Yak. 1:5.

4. Yumanyi yinateli kuyikwasha kutiyishisha nsañu yamuBayibolu?

⁴ (2) Fwikijenuña. Yehova watwinka wuswa wakufwikija yuma. Hakwila mutiyishishi nsañu yamuBayibolu fwikijenuña mudikwoku hampinji yinakumwekana oyu yuma nawa iyi yuma yinakumwekena enu. Esekenu kumona yuma yamweniyi nichatiyiliyi muntu imunakutañahu.

5. Kutoñojokahu chikupu mwabombela yumanyi nawa yumanyi yinateli kuyikwasha kutoñojokahu chikupu?

⁵ (3) Toñojokenuhu chikupu. Kutoñojokahu chikupu mwabombela kutoñojoa nakanañachima hansañu yitunakutaña nichiyinatukundami. Kutoñojokahu chikupu kukuyikwasha kutiyishisha nikunuñañesha nsañu yimunakutaña. Kutaña Bayibolu chakadi kutoñojokahu chikupu kudi neyi kutala hohu hamulumba wamatafwali chakadi kuyituña. Ilaña kutoñojokahu chikupu kudi neyi kutuña matafwali dimu dimu kulonda itala dituñewi. Hakwila chiyikwashi kutoñojokahu chikupu, munateli kudihula nikwakula malwihu adi neyi awa: ‘Indi iwu muntu inakudizahu welili ñahi hakwila yamanishi kukala? Yehova wamukwashili ñahi? Nateli kuzatisha ñahi nsañu yinadizi kulonda yinkwashi kumika kukala kunukweti?’

6. Muloñadi chitwatela kuzatishila yuma yitunakudiza?

⁶ (4) Zatishenuña nsañu yimunakudiza. Yesu wahosheli nindi neyi tubulaña kuzatisha nsañu yitunakudiza tudi neyi muntu wunakutuñila itala hawusekulula. Wazataña nañovu ilaña ñovu yindi yayaña mumenji. Muloñadi? Muloña neyi kwinza nvula yampepela nidibaji itala dikuhumuka. (Mat. 7:24-27) Munjila yoyimu, neyi tulomba, tufwikija, nawa tutoñojokahu chikupu, ilaña kuzatisha yuma yitunadizi nehi dikwila nawu ñovu yetu yikuya hohu mumenji. Neyi tumona yihuñu hela makabisha tukukañanya kuumika. Ilaña neyi tudiza nikuzatisha yuma yitunadizi tukufuukulaña chiwahi, tukwikalaña mukuwunda nawa chikuhwelelu chetu chikukola. (Isa. 48:17, 18) Ichi dinu tuhanjekenu chitunateli kuzatisha iyi yuma yiwana, chitukuhanjekaña hayuma yitunateli kudizila kuyuma yamumwekeneni Mwanta Davidi.

7. Nsañwinyi yamuBayibolu yitukuhanjekahu?

⁷ Ayineñeshahu dehi kudi ibwambu denu hela ntaña yenu? Neyi ayineñeshahu dehi chuma chikuyikwasha hikwiluka cheliliyi Mwanta Davidi helili mwanindi Abisalomi yamuneñeshi nawa yeseki kumutambula wanta.—2 Sam. 15:5-14, 31; 18:6-14.

8. Mwatela kwiladi hakwila Yehova yayikwashi?

⁸ (1) Lombenu. Iku munakutoñojoka hanoyu nsañu, mulejenumu Yehova chimunakutiya hachuma chatama chinayiliwu. (Mas. 6:6-9) Mulejenumu chimunakutiya. Nkumininaku mulombenu Yehova yayikwashi kuwana yikuma yikuyikwasha kuumika kukala kumunakumona.

9. Shimunenu yuma yamwekeni hadi Davidi naAbisalomi?

⁹ (2) Fwikijenu. Fwikijenu yuma yamwekeni muniyi nsañu nichatiyiliyi Mwanta Davidi. Mwana kaDavidi Abisalomi wadimbekeli antu hadi yaaka yayivulu kulonda amukeñi.  (2 Sam. 15:7) Abisalomi chamweniyi nindi mpinji yinashiki dehi, watemesheli akwakwendesha mwahita Isarela mwejima kulonda adimbeki antu akamwiteji yena kwikala mwata wawu. Wadimbekeli niAhitwofweli ibwambu daDavidi nawa mukwakumuleja maana kulonda yekali kukabadi kindi. Abisalomi wadidishili yomweni wanta, wesekeli kumukwata nikumujaha Davidi, haniyi mpinji Davidi watela wadiña wakata nankashi. (Mas. 41:1-9) Davidi chelukiliyi kafuta kaAbisalomi watemukili muYerusalema. Nkumininaku mashidika indi ashinshika azuñili namashidika aAbisalomi. Mashidika indi ashindili nawa mwana kaDavidi Abisalomi amujahili.

10. Mwanta Davidi wadi kwila ñahi nakukala kwamweniyi?

¹⁰ Cheñi fwikijenu chatiyiliyi Davidi hampinji yamumwekeneneña iyi yuma. Wamukeñeli Abisalomi nawa wamukuhweleleli Ahitwofweli. Ilaña wejima wawu ayedi amubalumukilimu. Amuneñesheli chikupu nawa akeñeleña nikumujaha. Mutenowu Davidi wadi kuleka kuyikuhwelela amabwambu jindi ashinshika nakutoñojoka nindi niwena anadibombi naAbisalomi. Hadaha wadi kudipulwisha hohu yomweni nikutemuka mwituña nkawindi. Indi kwiji wadi kushakama hohu nakudishona. Ilaña Davidi dicheliliyi wanyi. Hela chochu washindili iku kukala. Chumanyi chamukwashili?

11. Davidi welili ñahi hadiñayi mukukala?

¹¹ (3) Toñokenuhu chikupu. Yumanyi yimunadizili kuniyi nsañu? Akulenu ilu lwinhu, “Yumanyi yamukwashili Davidi kulonda yadamwini?” Davidi wadiwunjikili nawa wafuukwili chachiwahi. Hatiyili woma chakwila yakañanya nimwakwililaku. Walombeli kudi Yehova kulonda yamukwashi. Cheñi wayilombeli akwawu kulonda amukwashiku. Nawa wanyakeli kwila mwafuukwiliyi. Hela chakwila Davidi waneñeli chikupu halekeli kukuhwelela antu hela kuyihililaku. Watwalekelihu kumukuhwelela Yehova niamabwambu jindi.

12. Yehova wamukwashili ñahi Davidi?

¹² Yehova wamukwashili ñahi Davidi? Neyi musandujola mukwiluka nenu, wamwinkeli Davidi ñovu yakuumika iku kukala. (Mas. 3:1-8; tumazu twahewulu) Yehova wakiswilili mwafuukwiliyi Davidi. Nawa wakwashili amabwambu jaDavidi ashinshika hiyazuñileñawu kulonda amukiñi mwanta wawu.

13. Munateli kumwimbujola ñahi Davidi neyi mukwenu nayineñeshi chikupu? (Matewu 18:15-17)

¹³ (4) Zatishenuña yuma yimunatañi. Dihulenu nenu, ‘Nateli kumwimbujola ñahi Davidi?’ Manishenu kukala swayi swayi. Kwesekeja nakukala kumukweti, zatishenu kufumba kwaYesu kudi haMatewu kapetulu 18 munateli kuzatisha mazu ekalahu neyi chochayisonekawu hela kufumishahu chishina. (Tañenu Matewu 18:15-17.) Bayi mushikenaña dakufuukula hampinji yimunahiliku. Mulombenu Yehova yayikwashi kuwundisha muchima nawa yayinki maana akuyikwasha kwiluka chimwatela kwila nanoku kukala. Bayi muleka kuyikuhwelela amabwambu jenuku. Itejenuña wukwashu wawu. (Yish. 17:17) Chuma chasweja kulema zatishenuña kufumba kwayinkañayi Yehova kwekala mwiIzu dindi.—Yish. 3:5, 6.

14. 2 Timotewu 1:12-16 ni 4:6-11, 17-22 yinateli kuyikwasha neyi mudi mukukala kwamuchidinyi?

¹⁴ Komana anakuyikañesha kumukalakela Yehova kudi antu amuchisaka chenu? Indi kwiji munakushakama mwituña mwakañeshañawu hela mwalekeshawu mudimu wawaYinsahu jaYehova? Neyi dimu neyi mutaña mazu ekala ha  2 Timotewu 1:12-16 ni 4:6-11, 17-22, akuyikolesha. * Pawulu wasonekeli awa mazu hadiñayi mukaleya.

15. Yumanyi yimwatela kumulomba Yehova?

¹⁵ (1) Lombenu. Henohu kanda mutañi awa mavasi mulejenumu Yehova kukala kumukweti nichimunakutiya. Mulejenu yuma yejima. Nkumininaku mulombenu Yehova yayikwashi kuwana yishina munsañu yahosha hakukala kwamweniyi Pawulu yikuyikwasha kumanisha kukala kumukweti.

16. Shimunenu kukala kwamweniyi Pawulu?

¹⁶ (2) Fwikijenu. Fwikijenu munakumona kukala kwamweniyi Pawalu. Anamukasi mukaleya muRoma. Amukasahu dehi cheñi ilaña ichi, neluki nindi akumujaha. Amabwambu jindi anamushiyi nawa nazeyi kumujimba.—2 Tim. 1:15.

17. Pawulu wadi kwila ñahi nakukala kwamweniyi?

¹⁷ Hadaha Pawulu wadi kuditoñesha nindi neyi watondelihu mudimu wacheñi adi kumukasa wanyi. Wadi kuyihilila amayala amu Asiya amushiyili, nikuleka kuyikuhwelela amabwambu jindi amakwawu. Ilaña Pawulu dicheliliyi wanyi. Muloñadi chakuhweleliyi nindi amabwambu jindi akutwalekahu kwikala ashinshika nawa nindi Yehova wakamusomwena?

18. Pawulu welili ñahi nakukala kwamweniyi?

¹⁸ (3) Toñojokenuhu chikupu. Akulenu ilu lwihu, “Pawulu welili ñahi?” Hela chakwila Pawulu welukili nindi akumujaha, walekeli wanyi kumukalakela Yehova. Nawa watwalekelihu kukolesha akwawu. Wamushindameneni Yehova kuhitila mukulomba mpinji yejima. (2 Tim. 1:3) Chatela yayihilili antu amushili, wayisakilili amabwambu jindi ashinshika amukwashili munjila jashiyashana. Kubombelahu, Pawulu walekeli wanyi kudiza izu daNzambi. (2 Tim. 3:16, 17; 4:13) Chuma chasweja kulema welukili nindi Yehova niYesu amukeña. Hiyamushiyiliku nawa akamusomwena hamudimu windi wazatiliyi nakashinshi.

19. Yehova wamukwashili ñahi Pawulu?

¹⁹ Yehova wamulejeleñahu dehi Pawulu nindi akamukabisha muloña wakwikala mukwaKristu. (Yilw 21:11-13) Yehova wamukwashili ñahi Pawulu? Wakwili kulomba kwaPawulu nawa mukuhita kwampinji wamwinkeli ñovu. (2 Tim. 4:17) Yehova wamulejeli Pawulu nindi wakamufweta hanyidimu yakalakeleñayi. Yehova wayisañumwini amabwambu jaPawulu ashinshika kumukwasha muyuma yakumujimba.

20. Tunateli kumwimbujola ñahi Pawulu kwesekeja naAroma 8:38, 39?

²⁰ (4) Zatishenuña yuma yimunakudiza. Dihulenu nenu, ‘Nateli kumwimbujola ñahi Pawulu?’Kufwana Pawulu, twatela kwiluka netu ninetu akatukabisha muloña wachikuhwelelu chetu. (Maku. 10:29, 30) Hakwila tubuli kufumpa kashinshi ketu hampinji yitudi mukukala twatela kulombaña kudi Yehova nikudiza Izu daNzambi mpinji yejima. Nawa twatela kwanukaña mpinji yejima chuma chalema chitwatela kwila hikuleta kalemesha kudi Yehova. Twatela kwiluka netu mpinji yejima Yehova hamba katushiyaku nawa kwosi muntu hela chuma chinateli kutwambula kukukeña kwindiku.—Tañenu Aroma 8:38, 39; Heb. 13:5, 6.

21. Yumanyi yayikwashili aAya naHector kushinda kukala kwawu?

²¹ Hela chakwila tunakumona kukala kwamuchidinyi yuma yamweniwu antu ashimunawu muBayibolu yinateli kutukwasha. Chakutalilahu muhela, Aya, payiniya muJapan, wahosheli nindi, nsañu yaYona yamukwashili kuleka kutiya  woma kushimwina kumaluña kwawanikaña antu amavulu. Nsañu yahosha hadi Luti yamukwashili, Hector kansi wakuIndonesia, wukweti anvwali jindi abula kwikala aYinsahu kumwiluka nikumukalakela Yehova.

22. Munateli kwila ñahi hakwila nawu yimwenu hela yibaaba yinakuhosha nawu “Imbujolenu Chikuhwelelu Chawu” yiyikwashi?

²² Kudihi kumunateli kuwana nsañu yamuBayibolu yikuyikwasha? Mavidiyo etu, yimwenu yamazu, nimuyibaaba yahoshaña nawu “Imbujolenu Chikuhwelelu Chawu” yinateli kuyikwasha kutiyishisha nsañu yamuBayibolu. * Henohu kanda mutali, mutiyilili, hela kutaña oyu nsañu mulombenu Yehova yayikwashi muwani yikuma yimwatela kuzatisha. Difwikijenuña yenu owu muntu hanashindameni oyu nsañu. Toñojokenu chikupu hayuma yeliliwu ambuña aYehova nichayikwashiliyi kuumika kukala. Zatishenu oyu nsañu yimunadizi mukukala kumukweti. Nawa musakililenu Yehova chinayikwashiyi. Koleshenu nikukwasha amakwawu kulonda mumwekeshi nenu munakusakilila.

23. Kwesekeja naIsaya 41:10, 13, Yehova watushiika nindidi?

²³ Chihandilu mukanu kayi kaSatana chinateli kutukalila nawa tunateli nikukañanya mwakwilila. (2 Tim. 3:1) Ilaña bayi twakama hela kutiya womaku. Yehova neluki kukala kwejima kutunakumona. Neyi tudimbuka watushiika nindi wakatukwata nachikasa chindi chachidilu chañovu. (Tañenu Isaya 41:10, 13.) Tuneluki netu Yehova wukutukwasha nawa Bayibolu yatwinkaña ñovu yinateli kutukwasha kushinda kukala kudi kwejima.