1. Yumanyi yinateli kwilawu amanakwetu akwenzi?

ENU amanakwetu akwenzi, kudi nyidimu yayivulu yimwatela kuzataku muchipompelu. Enu amavulu mwakola nawa mudi nañovu. (Yish. 20:29) Mwazataña nyidimu yayivulu muchipompelu. Nawa hadaha munakutalila mpinji yakayitondawu kwila nkoñi wakuzatila. Hela chochu, hekwawu mwatoñojokaña nenu amakwawu ayimonaña nawu muchidi atwansi chikupu, kwosi jimweluka munashikilumu nawa wanyi kuyinka nyidimu yalema. Hela muchidi atwansi, kudi nyidimu yimunateli kuzata chayinu mpinji hakwila nawu ayikuhweleli nikuyilemesha kudi amanakwenu muchipompelu.

2. Yumanyi yitukuhanjekahu muchinu chibaaba?

² Muchinu chibaaba, tukuhanjeka hanchihandilu chaMwanta Davidi. Tukuhanjeka cheñi chantesha hayuma yamwekeni muchihandilu chaAsa niYehoshafwati, anyanta ayedi awaYuda. Tukuhanjeka hakukala kwamweniwu awa amayala asatu, chiyeliliwu naniku kukala, niyuma yinateli kudizilaku amanakwetu akwenzi.

3. Njilanyi yimu munateli kukwashilawu antwansi atushinakaji muchipompelu?

³ David hachidiñayi kansi wadizili nyidimu yayivulu yalemesheliwu kudi antu. Mwamweni wadiña nawubwambu wakola naYehova, nawa wazatishili yuma yadiziliyi kumukwasha Sawulu, mwanta atondeliwu kudi Nzambi. (1 Sam. 16:16, 23) Komana enu akwenzi kudihu yuma yimweluka yimunateli kuzatisha hakwila muyikwashi amanakwenu muchipompelu?  Enu amavulu kudi yuma yimweluka. Chakutalilahu, atushinakaji amavulu asakililaña chimwayikwashaña kwiluka chakuzatisha matabuleti niyozelu yawu yikwawu hakudiza kwankawawu nihakupompa. Munateli kuyikwasha awa atushinakaji muloña iji jakutuñatuña muneluki chakujizatisha.

4. Kufwana Davidi, yilwilu yamuchidinyi yatela kwikala nawamanakwetu atwansi? (Talenu mwevulu wudi hakava.)

⁴ Muchihandilu, Davidi wazatileña nyidimu yamwinkeleñawu nawa amukuhweleleli. Chakutalilahu hadiñayi mukwenzi, wahembeleña chiwahi nyikoku yatata yindi. Wamweni kukala kwakuvulu hazatileñayi iwu mudimu. Nkumininaku Davidi wamulejeli Mwanta Sawulu nindi: “Ami kambuñeyi hinahembelaña nyikoku yatata yami kwenjili nimutupa nibera hiyakukwata mwana kamukoku hamutaña; ami hinukuya kwadiñiyi hinukumutapa hinukumupulwisha mukanwa kindi.” (1 Sam. 17:34, 35) Davidi welukili nindi wadiña namudimu wakukiña nyikoku, dichi wazatili nañovu kulonda yayikiñi. Amanakwetu achidi atwansi niwena anateli kumwimbujola Davidi kuhitila mukuzata chiwahi nyidimu yejima yinayinkuwu.

5. Kwesekeja naMasamu 25:14, chumanyi chalema chatela kwilañawu amanakwetu atwansi?

⁵ Kufuma tuhu kuwansi, Davidi wadiña nawubwambu wakola naYehova. Davidi walemesheli nankashi wubwambu windi naYehova kubadika chilwilu chakuhamuka chadiñayi nachu hela kwimba tudada. Yehova wadiña Nzambi yaDavidi nawa Ibwambu dindi, Ibwambu dindi chikupu. (Tañenu Masamu 25:14.) Amanakwetu atwansi, chuma chalema chimwatela kwila hikukolesha wubwambu wenu naTata yenu wamwiwulu, nawa chumichi chikuletesha ayinki nyidimu yikwawu.

6. Antu amakwawu amumweneña ñahi Davidi?

⁶ Kukala kumu kwomikiliyi Davidi, antu amakwawu amumweneña nawu wuchidi kansi nawa washaku maana wanyi kumudimu. Chakutalilahu, chelili Davidi yadihani kuzuña naGoliyati, Mwanta Sawulu wesekeli kumukañesha, wamwilili nindi: “Eyi wumukwenzi hohu kweyi.” (1 Sam. 17:31-33) Hakusambila, manakwindi wamwilili nindi washileñaku wanyi muchima kumudimu. (1 Sam. 17:26-30) Hela chochu, Yehova hamumweneña Davidi nindi wuchidi kansi hela washa wanyi maana kumudimuku. Wamwilukili Davidi chachiwahi.  Nawa Davidi wamujahili Goliyati muloña washindameneni hadi ibwambu dindi, Yehova.—1 Sam. 17:45, 48-51.

7. Yumanyi yimunateli kudizila kunsañu yimu yaDavidi?

⁷ Yumanyi yimunateli kudizila kuyuma yamumwekeneni Davidi? Tunakudizilaku netu twatela kwikala adiwunjika. Hanateli kuhita mpinji hakwila antu anakuyimona chimunakukula atachiki kuyimona nawu munakuli. Ilaña mwatela kwiluka chikupu nenu Yehova hashaña maana hachimunakumwekanaku. Wayiluka chachiwahi nawa weluka niyuma yimukutwesha kwila. (1 Sam. 16:7) Koleshenu wubwambu wenu naNzambi. Davidi wakolesheli wubwambu windi naNzambi kuhitila mukushinshika hayuma yaleñayi Yehova. Davidi watoñojokeleña chikupu hayileñaleña chiyamudizishileña hadi Nleñi. (Mas. 8:3, 4; 139:14; Rom. 1:20) Chuma chikwawu chimunateli kwila hikulomba kudi Yehova kulonda yayinki ñovu. Chakutalilahu, komana akwenu imwatañaña nawu kushikola ayisehaña hamuloña wakwikala Chinsahu chaYehova? Neyi ayisehaña mulombenu Yehova kulonda yayikwashi kuumika iku kukala. Nawa zatishenuña yuma yekala Mwizu daNzambi nimunyikanda yetu yashindamena haBayibolu nimavidiyo. Neyi mumona Yehova chinayikwashiyi kumanisha kukala kumu, mukusweja nikumukuhwela. Kubombelahu, neyi antu amona chimwamushindamena chikupu Yehova, akuyikuhwelela.

8-9. Chumanyi chamukwashili Davidi kuchiñilila nakudiwunjika kushika nimpinji yekaliliyi mwanta, nawa chumanyi chimunateli kudizilaku enu amanakwetu achidi atwansi?

⁸ Talenu kukala kukwawu kwamweniyi Davidi. Kufuma hamuwayishiliwu kwikala mwanta, Davidi wahembeleleli hadi yaaka yayivulu hakwila amuswanyiki kwikala mwanta wawaYuda. (1 Sam. 16:13; 2 Sam. 2:3, 4) Haniyi mpinji, chumanyi chamukwashili Davidi kuhembelela nakudiwunjika? Chatela Davidi yadihombi, welileña yuma yatwesheleñayi. Chakutalilahu, mpinji yatemukililiyi mumpata yawaFwilistinu, Davidi wazatishili iyi mpinji kuzuña nawayilumbu jawaIsarela. Cheliliyi mwenimu, wakiñili muñinza yawaYuda.—1 Sam. 27:1-12.

⁹ Yumanyi yinateli kudizilaku amanakwetu achidi akwenzi kudi Davidi? Zatenuña hanakumini ñovu yenu kulonda mukalakeli amanakwenu. Talenu chuma chamumwekeneni manakwetu Ricardo. * Kufuma tuhu kuwansi windi, wafwilileña kwikala payiniya wampinji yejima. Ilaña akulumpi amulejeli nawu kudi yuma yatela kuzatilahu. Chatela yafunti hanyima hela yaneñi, Ricardo watwalekilihu kudikita nankashi mumudimu wakushimwina. Wahosheli nindi: “Neyi nanuka kunyima, natoñokaña nami nateleleli kuzatilahu nawa dichinelili. Nashileñaku muchima kulonda nifuntili kudi antu ejima anamwekeshi mpwila nawa naloñesheleña. Natachikili nikulombola kadizi wami waBayibolu watachi. Chinatachikili kushimwina nankashi nalekeli kutiya woma.” Chayinu mpinji Ricardo hipayiniya wampinji yejima wadikita nawa hinkoñi wakuzatila.

10. Chumanyi cheliliyi Davidi mpinji yimu henohu kanda yafuukulihu kwila chuma chalema?

¹⁰ Talenu chuma chikwawu chamumwekeneni Davidi. Hampinji yaswamujokeleñayi Davidi niantu jindi mumpanta yawaFwilistinu, ashili yisaka yawu hamatala wena ayili kunjita. Iku wena achidi kunjita, ayilumbu alukukili mukala wawu nawa asendeli yisaka yawu muwunkoli. Davidi wadi kutoñojoka nindi chineli wadiña mushidika wañovu, wukuwana njila yayiwahi yakupulwishilamu yisaka  yawu yatwaliliwu muwunkoli. Ilaña, Davidi wamulombeli Yehova kulonda yamukwashi. Davidi wayili nakumwihula Yehova, kuhitila mudi kapristu Abiyatari nindi: “Ichi chendu chawantu neyi nukuchilondela nakachiwana tahindi?” Yehova wamulejeli Davidi nindi watela kuya nawa wukumukwasha. (1 Sam. 30:7-10) Chumanyi chimukudizila kuniyi nsañu?

11. Chumanyi chimwatela kwila henohu kanda mufuukulihu?

¹¹ Lombenu wukwashu henohu kanda mufukuulihu. Ihulenu anvwali jenu. Munateli cheñi kuhosha nawakulumpi akuluka yitembi. Yehova wayikuhwelela awamayala atondayi, nawa ninenu mwatela kuyikuhwelela. Yehova wayimonaña nindi “yaawana” muchipompelu. (Efwe. 4:8) Neyi mwimbujola chikuhwelelu chawu niyuma yikuyilejawu mukufukulahu chiwahi. Ichi tutalenu yuma yitunateli kudizila kudi Mwanta Asa.

12. Yilwilwinyi yadiña naMwanta Asa hatachikiliyi kuyuula?

¹² Mwanta Asa, hachidiñayi kansi wadiña wadizoza nawa wahamuka. Chakutalilahu, hampinji yamuswaniniyi tata yindi Abiya, watachikili kufumisha ankishi ejima mwituña. Cheñi “walejeli aYuda kukeñakeña Yehova Nzambi yawankakulula jawu nikwila ninshimbi nikuleja.” (2 Kushi. 14:1-7) Chelili Zera kaEtiopiya niamashidika indi 1,000,000, enzi nakulukuka Yuda, Asa wamulombeli Yehova nindi yamukwashi, walombeli nindi: “Eyi hiwamonaña kukala kukwasha hela akwañovu hela abula ñovuku; tukwashuku eyi Yehova Nzambi yetu, muloña tunashindameni hadeyi.” Awa mazu amawahi amwekeshaña nawu Asa wakuhweleleli nindi Yehova wakweti ñovu yakumwamwina yena niatu jindi. Asa wamushindameneni Tata yindi wamwiwulu, nawa “Yehova hakutapa aEtiyopiya.”—2 Kushi. 14:8-12.

13. Chumanyi chenjili nakumumwekena Asa, nawa muloñadi?

¹³ Kumulukuka kudi amashidika 1,000,000 kwadiña hikukala kweneni kudi Asa, hela chochu wamushindameneni Nzambi nawa washindili. Ilaña chawushona, hampinji yamweniyi Asa kukala kwanyanya hamushindameneni Yehovaku. Asa chamutiyishiliwu woma kudi Mwanta watama wawaIsarela Bayasha, walombeli wukuwashu kudi  mwanta wawaSiriya. Chuma cheliliyi mwafumini kukala! Yehova wamulejeli Asa kuhitila mudi kaprofwetu kindi Hanani nindi: “Chiwunashindameni hadi mwanta wakuSiriya kushindamena hadi Yehova Nzambi yeyi nehi dichi njita yamwanta wakuSiriya yinapuluki dehi kudeyi.” Kufuma hohu hayina mpinji, Asa wamweneña hohu majita. (2 Kushi. 16:7, 9; 1 Anya. 15:32) Chumanyi chitunakudizilaku?

14. Munateli kumwekesha ñahi nenu mwamushindamena Yehova, nawa kwesekeja na 1 Timotewu 4:12, chumanyi chikufumamu?

¹⁴ Twalekenuhu kwikala adizoza nikumushindamena Yehova. Chimwapapatisheweli, mwamukuhweleleli nikumushindamena Yehova. Nawa Yehova wayitambwilili chachiwahi muchisaka chindi. Chuma chimwatela kwila hikutwalekahu kumushindamena Yehova. Chinateli kumwekana neyi chapela kumushindamena Yehova neyi munakufuukula yuma yalema, hanu dinu mwelaña ñahi muyuma yikwawu? Chalema nankashi kumushindamena Yehova hampinji yimunakufuukula niyuma yidi neyi yisela, mudimu wakumujimba niyuma yimunakufwila kwila! Bayi mushindamena hamaana enuku. Keñenu yishina yamuBayibolu yikuyikwasha mukukala kumukweti hela muyuma yimunakukeña kwila nawa yizatishenu. (Yish. 3:5, 6) Chimwela mwenimu, mukumutiyisha Yehova kuwaha nawa antu muchipompelu chenu akuyilemesha.—Tañenu 1 Timotewu 4:12.

15. Kwesekeja na 2 Kushindulula 18:1-3; 19:2, yiluwanyi yakoñeliyi Mwanta Yehoshafwati?

¹⁵ Ninenu mudi neyi etu, mwawanina wanyi, mpinji yikwawu munateli kuluwañesha. Hela chochu, chumichi hichatela kuyikañesha kudikita chikupu mumudimu waYehovaku. Toñojokenu hadi Mwanta Yehoshafwati. Wadiña nayilwilu yayiwahi. Hachidiñayi mukwenzi, “wakeñakeñeli kudi Nzambi yatata yindi wendeli mwaya kuleja kwindi.” Nawa cheñi, watemesheli atulamba munyisumba yejima yawaYuda yejima nakuyitañisha antu amwiluki Yehova. (2 Kushi. 17:4, 7) Hela chakwila Yehoshafwati wadiña washinshika, mpinji yikwawu wafuukwileña mwaluwa. Mpinji yimu yafuukwiliyi Yehoshafwati mwaluwa, amufumbili kudi ñamba yaYehova. (Tañenu 2 Kushindulula 18:1-3; 19:2.) Yumanyi yimunateli kudizilaku?

16. Yumanyi yimunateli kudizila kudi Rajeev?

 ¹⁶ Itejenuña kufumba nikukuzatisha. Hadaha, neyi chekala atwansi amavulu chayikalilaña kwiluka yuma yimwatela kutwamijaku. Bayi muneñaku. Talenu chamumwekeneni manakwetu wakansi Rajeev. Wahosheli kutalisha hampinji yadiña kampululu nindi: “Mpinji yikwawu nelukileña wanyi yuma yinakela muchihandilu chami. Neyi chocheka atwansi amavulu, natiyileña kuwaha kuhema kubadika kuya nakupompa hela kuya nakushimwina.” Chumanyi chamukwashili Rajeev? Mukulumpi wumu wamufumbili. Rajeev wahosheli nindi: “Wankwashili kutoñojoka hachishina chekala ha 1 Timotewu 4:8.” Rajeev wadizozeli wazatishili kufumba nawa watoñojokeli hayuma yalema yatela kwilayi muchihandilu chindi. Wahosheli nindi: “Nafukwilihu kumukalakela Yehova muchihandilu chami.” Chumanyi chafuminimu? Rajeev wahosheli nindi: “Chimwahitili hohu yaaka yantesha kufuma hanfumbiliwu nashikilihu nawa antondeli kwikala nkoñi wakuzatila.”

17. Atushinakaji atiyaña ñahi hakumona akwenzi anakumukalakela Yehova?

¹⁷ Atushinakaji alemesha chimwamukalakelaña Yehova hamu nawu ‘namuchima wumu! (Zef. 3:9) Atiyaña kuwaha chimwazataña nyidimu yinayinkiwu muchipompelu neyena nawa nañovu. Mwayitiyishaña kuwaha chikupu.—1 Yow. 2:14.

18. Neyi chinamwekeshiwu haYishimu 27:11, Yehova watiyaña ñahi hakumona akwenzi anakumukalakela?

¹⁸ Enu akwenzi anukenuña nenu Yehova wayikeña nawa wayikuhwelela. Washimwineñahu dehi nindi mumafuku akukuminina, kwakekala izanvu deneni dawakwenzi akadihana aweni chakudikeñela. (Mas. 110:1-3) Weluka nindi mwamukeña nawa munakufwila kumukalakela hanakumini ñovu yenu. Dichi ikalalenu adiwunjika. Neyi munaluwañeshi nawa ayifumba, itejenu kufumba nakukumona nenu kunafumi kudi Yehova. (Heb. 12:6) Zatenuña nañovu mudimu wejima wunayinkiwu. Nawa chuma chasweja kulema, muyuma yejima yimunakwila, mutiyishenuña Tata yenu wamwiwulu kuwaha.—Tañenu Yishimu 27:11.