1. Kwesekeja naMatewu 24:9, muloñadi chitwatela kubula kuhayamina neyi kaayi katuhela?

YEHOVA watuleña munjila yakwila tukeñi antu amakwawu nawa niwena atukeñi. Dichi neyi muntu yatuhela, chatukataña nawa hadaha twatiyaña niwoma. Chakutalilahu, muhela Georgina washakamaña kuEurope, wahosheli nindi: “Hinadiña nayaka 14, amama anheleli hamuloña wakwila namukalakeleleña Yehova. Namweni nami anañumbi nawa natachikili kutoñojoka nami hinidi muntu wamuwahiku.” * Manakwetu Danylo wahosheli nindi: “Chelili amashidika añeti, antukoli nawa antiyishi woma hamuloña wakwikala Chinsahu chaYehova, natiyili woma nawa namweni nami anansawuli.” Neyi anatuheli chatukataña, ilaña hitwahayamañaku. Yesu washimwineñahu dehi nindi akatuhela.—Tañenu Matewu 24:9.

2-3. Muloñadi akwakumulondela Yesu chayihelelawu?

² Akwakumulondela Kristu ayihela kudi kaayi. Muloñadi? Muloña neyi chochadiñayi Yesu, ‘hitwekala amukaayiku.’ (Yow. 15:17-19) Dichi hela chakwila twalemesha nfulumendi, twakaanaña kudifukula kudi wena hela kuyifwikija yemenañaku jinfulumendi. Twadifukulaña hohu kudi Yehova. Twamuhakwilañaku Nzambi netu diyi watela kuyuula antu ejima, chuma chatadikishañayi Satana ‘nianyanindi.’ (Kutach. 3:1-5, 15) Twashimwinaña netu Wanta waNzambi hohu diwunateli kumanisha kukala kwawantu ejima nawa katataka yajilumuni antu ejima adikañaña naWanta windi. (Dan. 2:44; Chim. 19:19-21) Akwakudizoza akeña iyi nsañu, ilaña antu atama ayihela.—Mas. 37:10, 11.

 ³ Cheñi, atuhela muloña twalondelaña nshimbi jaNzambi. Yuma yahoshañayi Nzambi nindi yatama, mukaayi ayimonaña nawu yayiwahi. Nawa yuma yahoshañayi Nzambi nindi yayiwahi, mukaayi ayimonaña nawu yatama. Chakutalilahu, antu makonu etejaña nikwila yilwilu yawuvumbi, yoyilwilu yaletesheli Nzambi yajilumuni musumba waSodoma niwaGomora. (Yuda 7) Chineli twovwahilaña nshimbi yamuBayibolu yahosha haniyi yilwilu, antu amavulu atusehaña nawa ahoshaña nawu twakolesha yuma.—1 Pet. 4:3, 4.

4. Yilwilwinyi yatukwashaña kuumika neyi antu anatuheli?

⁴ Yumanyi yinateli kutukwasha kuumika neyi antu anatuheli hela anakutuhosha chatama? Twatela kukuhwelela chikupu netu Yehova wukutukwasha. Kufwana nkebu, chikuhwelelu chetu, chinateli kujima “nyivu yakesi [yejima] yanowu watama.” (Efwe. 6:16) Ilaña hachikuhwelelu twatela kubombela cheñi kukeña. Muloñadi? Muloña kukeña “hikwahilaña swayiku.” Kwabutaña nikuumika yuma yejima yatuneñeshaña. (1 Kor. 13:4-7, 13) Ichi dinu tutalenu kukeña kutwamukeña Yehova, akwetu akwakudifukula niayilumbu jetu chikwatukwashaña kuumika neyi anatuheli.

5. Yesu welili ñahi hamuloña wakumukeña Tata yindi?

⁵ Hawufuku wakukumishaku henohu ayilumbu jindi kanda amujahi, Yesu wayilejeli akwakumulondela ashinshika nindi: “Namukeña Tata, [dichi] inakwila kwesekeja nachanlejeliyi Tata kwila.” (Yow. 14:31) Yesu wadiña wamukeña Yehova chikupu nawa iku kukeña kwamukwashili Yesu kuumika kukala kwenjileña hambidi yindi. Ninetu kukeña kutwamukeña Yehova kunateli kutukwasha kuumika kukala kutunakumona.

6. Kwesekeja naAroma 5:3-5, ambuña aYehova elaña ñahi neyi kaayi kanayiheli?

⁶ Kukeña kwamukeñawu Nzambi, kunayikwashi ambuña aYehova kuumika makabisha. Chakutalilahu, hampinji yelili apostolu ayileji kudi akulumpi jawanyuuli muchota cheneni chawaYudeya nawu aleki kushimwina, kukeña kwamukeñawu Nzambi kwayiletesheli ‘kumwovwahila Nzambi neyi nyuuli bayi antuku.’ (Yilw. 5:29; 1 Yow. 5:3) Kukeña kwamuchidiwu kunakuyikwasha cheñi amanakwetu makonu kutwalekahu kuumika hela chakwila anakuyikabisha kudi jinfulumendi jikweti ñovu. Neyi kaayi kanatuheli, twaneñaña wanyi ilaña twazañalalaña.—Yilw. 5:41; tañenu Aroma 5:3-5.

7. Twatela kwila ñahi neyi antaña jetu anakutudimbulula?

⁷ Hadaha, kweseka kweneni kutunakumona kunakufuma kudi antaña jetu. Neyi tutachika kudiza chalala, antaña jetu amakwawu anateli kutachika kutoñojoka nawu anatuluwañeshi. Amakwawu anateli kutachika kutwila nawu tunazaluki. (Esekejenu Maku 3:21.) Anateli nikutwila chatama. Neyi anakutwila chamuchidiwu, bayi tuhayamaku nehi. Yesu wahoshelli nindi: “Ayilumbu jamuntu akekala antu amwitala dindi yomweni.” (Mat. 10:36) Hela chakwila antaña jetu anakutwila yuma yatama, hitwayimonaña netu ayilumbu jetuku. Dichi, kukeña kutwamukeña Yehova neyi kunakuswejelaku, nikukeña kutwayikeña antu kwaswejelañaku. (Mat. 22:37-39) Ilaña kwila tuleka kulondela nshimbi yamuBayibolu hela yishinaa kulonda tuyitiyisheña antu kuwaha nehi.

8-9. Yumanyi yamukwashili muhela wumu kuumika kukala kwasweja?

⁸ Muhela Georgina itwatena hakusambila womikili ikañesha dasweja dafumineña kudi amama yindi. Georgina walumbulwili nindi: “Ami nawamama twatachikili kudiza Bayibolu nawaYinsahu jaYehova. Ilaña chimwahitili tukweji 6, mpinji yinakeñeleña nami nitachiki kuya  nakupompa, amama ankaanishili. Nenjili nakwiluka nami ahanjekeleña nawakwakusekesha. Mazu ayilejeleñawu kudi akwusekesha diyi yuma yanlejeleñawu ninami. Anhosheleña kasawuntu, kunkoka munsuki, kunkwata hanyidiwu nikunatila nyikanda yami. Chinashikijili yaaka 15, napapatisheweli. Amama esekeli kunkañesha kumukalakela Yehova. Dichi, antwalili kwitala kwahembelañawu anyana abulaña kutiya, amakwawu anwineña yitumbu yashetana nawa elileña yuma yatama. Chakala kuumika ikañesha sweje-e neyi dinakufuma kudi muntu watela kukukeña hela kukwakamena.”

⁹ Chumanyi chamukwashili Georgina kuumika? Wahosheli nindi: “Ifuku datachikili kunkabishawu amama, dihinamanishili kutaña Bayibolu yejima. Nelukili chikupu nami ichi dichalala, nawa naswinini kwakwihi naYehova. Kakavulu nalombeleña kudi yena nawa watiyileña kulomba kwami. Hampinji yinashakamineña munidi itala, muhela wantambikili kwitala dindi nawa twadizilili hamu Bayibolu. Haniyi mpinji amanakwetu niahela ankolesheleña chikupu Hetala daWanta. Añakameneneña tuhu neyi muntu wamuchsaka. Nenjili nakwiluka chikupu nami Yehova wabadika chikupu antu atudimbululaña hela adi ñovu yamuchidinyi.”

10. Mpinji yejima twatela kukuhwelela netu Yehova Nzambi yetu nateli kutwililadi?

¹⁰ Kapostolu Pawulu wasonekeli nindi kwosi chuma chinateli “kutwambula kukukeña kwaNzambi kwekala mudi Kristu Yesu Mwanta wetuku.” (Rom. 8:38, 39) Hela neyi tukukabakana chamuchidinyi, mpinji yejima Yehova wukutukundejaña nikutukolesha. Neyi chitunamoni munsañu yamuhela Georgina, cheñi Yehova watukwashaña kuzatisha amanakwetu niahela.

11. Indi kukeña kwashimwiniyi Yesu haYowanu 15:12, 13 kwayikwashili ñahi atumbanji twindi? Shimunenu chakutalilahu.

¹¹ Hawufuku wakukumishaku henohu Yesu kanda yofwi, wayilejeli atumbanji twindi kudikeña wumu namukwawu. (Tañenu Yowanu 15:12, 13.) Welukili nindi neyi adikeña chikupu, akwikala anuñañana nawa akuumikaña hela chakwila kaayi kanayiheli. Talenu chuma chamwekeneni chipompelu chamuTesalonika. Kufuma hachituñiliwu antu amunichi chipompelu ayikabishileña. Hela chochu, amanakwetu niahela munichi chipompelu omikili nawa adiña adikeña wumu namukwawu. (1 Tes. 1:3, 6, 7) Pawulu wayikolesheli kumwekeshaña kukeña nikutwalekahu  “kwila mwenimu chikupu.” (1 Tes. 4:9, 10) Kukeña kwayikwashili kukundeja antu ananeñi nikukolesha azeya. (1 Tes. 5:14) Azatishili kufumba kwaPawulu muloña mumukanda windi wamuchiyedi, wasonekeliyi hanyima yakwila munahiti chaaka, Pawulu wahosheli nindi: “Kukeña kwenu wejima wenu kwakudikeña wumu namukwawu kunakuswejelaku.” (2 Tes. 1:3-5) Kukeña kwawu kwayikwashili kuumika yihuñu nimakabisha.

12. Mpinji yikwadiña njita mwituña dimu, amanakwetu niahela amwekesheli ñahi nawu adikeña wumu namukwawu?

¹² Talenu chuma chamumwekeneni Danylo itwashimuna niñodindi. Chelili mumusumba wawu mwikala njita, wena apompeleña nikushimwina kwesekeja nahanakumini ñovu jawu nawa ayinkeleñahu amanakwawu niahela yakuda. Dichi, ifuku dimu mashidika enjili nakumulukuka Danylo. Danylo wahosheli nindi: “Anlejeli nawu nileki kwikala Chinsahu. Chinakaanini añeteli nawa antiyishili woma nawu akunloza nawa alozeli mumpepela. Henohu kanda ayi, anchiniishili nawu akenza nakumushima ñodami. Dichi amanakwetu enjili swayi-swayi nakutukandamisha sitima kulonda tuyi kumbaka yacheñi. Hinamba kavulumena kukeña kwamwekesheliwu awa amanakwetuku. Chitwashikili kumbaka kutwayili, amakwetu akunidi iluña atwinkeleña yakuda nikutukwashaku kuwana mudimu niitala. Chafuminimu, ninetu twatachikili kutambwila aYinsahu amanakwawu atemukileña njita.” Yakutalilahu yamuchidiwu yinakumwekesha nawu kukeña kutwadikeña wumu namukwawu kunateli kutukwasha kuumika hela chakwila anatuheli.

13. Spiritu yajila yatukwashaña ñahi kuumika hampinji yitunakumukalakela Yehova hela chakwila antu anatuheli?

¹³ Yesu wayilejeli akwakumulondela nindi akeñi ayilumbu jawu. (Mat. 5:44, 45) Komana chumichi chaswayi? Chaswayi wanyi. Ilaña tunateli nawukwashi waspiritu yajila yaNzambi. Nyikabu yaspiritu yaNzambi mwabombela kukeña, kudiwunjika, luwi, kuwunda, kwovwaha nikudihemba. (Ñal. 5:22, 23) Iyi yilwilu yatukwashaña kuumika hela chakwila anatuheli. Akwankunyi netu amavulu ahimpa yilwilu yawu hamuloña wakwila iyala, mumbanda, mwana hela ntuñi nawu wayimwekesheleli yilwilu yayiwahi. Awa akwankunyi amavulu ichi ekala dehi amanakwetu niahela. Neyi chayikalilaña kuyimwekeshela kukeña awa antu ayihela  hamuloña wakwila mwamukalakelaña Yehova, lombenu spiritu yajila. (Luka 11:13) Dichi ilukenu chikupu nenu kumwovwahila Nzambi mpinji yejima dichuma chabadika kuwaha chitwatela kwila.—Yish. 3:5-7.

14-15. Aroma 12:17-21 yamukwashili ñahi Yasmeen kumumwekeshela nfumwindi kukeña hela chakwila wamukabishileña?

¹⁴ Talenu chuma chamumwekeneni muhela Yasmeen. Mpinji yekaliliyi Chinsahu chaYehova, nfumwindi watoñojokeli nindi anamuluwañeshi, dichi wesekeli kumulekesha ñodindi kumukalakela Nzambi. Wamuhosheleña kasawuntu nawa walejeli antaña jindi, mukulumpi wachechi nikatepa kulonda amutiyishi woma nikumutwambila nawu nakusanda chisaka. Iyala wayihosheli niamanakwetu kasawuntu iku anakupompa. Yasmeen kakavulu wadilileña muloña wayuma yatama yamwilileñawu.

¹⁵ Neyi adi Hetala daWanta, amanakwetu niahela amukolesheleña muhela Yasmeen. Akulumpi amulejeli kuzatisha mazu ekala haAroma 12:17-21. (Tañenu.) Yasmeen wahosheli nindi: “Chankalilili. Ilaña namulombeli Yehova nami yankwashi nawa nazatatili hakumina ñovu yami kulonda nizatishi yuma yahosha Bayibolu. Neyi nfumwami yamwañila nswadi muchinsambu, ami nadiña nakuwahishamu. Neyi yanhosha chatama, ami namwakwileña chachiwahi. Nawa neyi nakati, ami namwakameneña chachiwahi.”

16-17. Chumanyi chimunadizili kuyuma yamumwekeneni muhela Yasmeen?

¹⁶ Mwafumini yuma yayiwahi chineli Yasmeen wamumwekesheleli nfumwindi kukeña. Wahosheli nindi: “Nfumwami watachikili kunkuhwelela muloña welukili nindi mpinji yejima natwambileña wanyi. Watachikili kuntiyilila nakalemesha neyi tunakuhanjeka hayuma yinakuhwelela nawa wetejeli nindi tuleti kuwunda hetala. Chayinu mpinji wañitejaña kuya nakupompa. Nawa ami nawamwanta wami twatiyañanaña chiwahi cheñi tudi mukuwunda. Dichi nalombaña nami ifuku dimu nfumwami yaketeji chalala kulonda twakamukalakeleña Yehova hamu.”

¹⁷ Chakutallilahu chaYasmeen chinakumwekesha nawu kukeña “kwabutaña yuma yejima, . . . kwachiñejaña yuma yejima, kwomikaña yuma yejima.” (1 Kor. 13:4, 7) Neyi anatuheli chatukataña nawa chatuneñeshaña, ilaña kukeña kukweti ñovu chikupu kubadika yumiyi. Neyi tuyikeñaña antu, hadaha anateli kubalumuka. Chumichi chamuzañaleshaña Yehova. Hela chakwila akwankunyi netu akutwalekahu kutuhela, etu tukuzañalalaña. Munjilanyi?

18. Muloñadi chitwatela kuzañalela neyi anatuheli?

¹⁸ Yesu wahosheli nindi: “Mudi namuzañalu enu neyi antu ayihela.” (Luka 6:22) Hitwakeñaña netu antu atuheliku. Nawa hitwakeñaña netu atukabisheña hamuloña wayuma yitwakuhwelelaku. Hanu dinu tukuzañaleladi neyi anakutuhela? Hamuloña waniyi yuma yisatu. Chatachi, neyi tuumika, Nzambi watutiyaña kuwaha. (1 Pet. 4:13, 14) Chamuchiyedi, chikuhwelelu chetu chakolelañaku. (1 Pet. 1:7) Nawa chamuchisatu, akatwinka wufwetu wabadika, wumi wahaya nyaaka.—Rom. 2:6, 7.

19. Muloñadi apostolu chazañaleliwu hanyima yakuyivupola?

¹⁹ Hashimbwili wanyi kufuma hamusañwiliwu Yesu, apostolu ekalili namuzañalu wateneniyi Yesu. Chelili ayivupoli nawa ayilekeshi kushimwina wena azañaleli. Muloñadi? “Muloña ayisawili hamuloña wakuzatisha ijina [daYesu].” (Yilw. 5:40-42) Amukeñeli chikupu Mwanta wawu nawa hiyatiyili woma kuyikabisha kudi ayilumbu jawuku. Nawa amwekesheli kukeña kwawu kuhitila mukushimwina nsañu yayiwahi ‘chakadi kuleka.’ Amanakwetu amavulu makonu, anatwalekihu kwikala ashinshika hela chakwila anakumona yihuñu. Eluka nawu Yehova hamba kavulamena mudimu wawu hela kukeña kwakeñawu ijina dindiku.—Heb. 6:10.

20. Tukadizadi muchibaaba chinalondelihu?

²⁰ Kaayi kakuleka wanyi kutuhela kushika nimpinji yakakuma nshakaminu yamakonu. (Yow. 15:19) Ilaña bayi tutiyaña womaku. Neyi chitwakadiza muchibaaba chinalondelihu, Yehova ‘wukayikolesha nikuyikiña’ antu jindi ashinshika. (2 Tes. 3:3) Lekenu, tutwalekihu kumukeña Yehova, amanakwetu niahela nikukeña ayilumbu jetu. Neyi tulondela iku kufumba, tukwikala anuñañana nawa tukwikala nachikuhwelelu chakola, tukuletaña kalemesha hadi Yehova cheñi tukumwekesha netu kukeña kukweti ñovu chikupu yatukwashaña kuumika hela anatuheli.