AkwaKristu amakwawu azatishaña jakutuñatuña jidiku makonu kulonda ahanjekeña nawantaña jawu niakwawu aYinsahu. Kafwampi, mukwaKristu wapama watoñojokaña haniku kufumba: “Muntu wadihoñeshaña mumuchima wamonaña katama, Hakubatama, ilaña abula maana ayaña tuhu kwawu, hiyakumwenamu jakala.”—Yish. 27:12.

Tuneluki netu Yehova nakukeña kutukiña. Dichi twadikundaña wanyi nawantu aletaña chaambu, ahañawu muchipompelu hela aletaña ntañishilu yambukaku. (Rom. 16:17; 1 Kor. 5:11; 2 Yow. 10, 11) Antu amakwawu adikundileña nachipompelu anateli kuleka kulondela nshimbi jamuBayibolu. (2 Tim. 2:20, 21) Neyi tunakutonda amabwambu twatela kutoñojokaña hachumichi. Chapela wanyi kutonda chiwahi amabwambu amawahi kuzatisha njila jakuhankekelahu.

Sweje-e dinu mwatela kwikala asoñama hakwiñila mwizanvu mudi antu amavulu akuhanjeka nawu. AkwaKristu amakwawu adiñijili mumazanvu amaneni nawa mwafumini yuma yatama. Manakwetu hela muhela nateli kwikala ñahi wasoñama neyi mwizanvu mudi antu makulakaji hela makombakaji? Chinateli kwikala chakala kuyiluka wejima wawu nichidi wubwambu wawu naNzambi. Masamu 26:4 yahosha nawu: “Hinashakami hamu nawantu amaswimbuku; hinukwiñila mwaduwu akwakujinda nsañuku.” Chumichi chinakumwekesha nawu, mwatela kuhanjekaña hohu nawantu imweluka neyi munakuzatisha njila jakuhanjekelamu.

Hela neyi kadizanvu kanyanya, mukwaKristu watela kwiluka mpinji yinakuzatishayi nikwiluka yuma yinakuhoshawu antu anakuhanjekayi nawu. Hitwatela kutoñojokaña netu chiña twatela kwakula mameseji ejima hichikweti muloña nakuleha kwampinji hela yuma yinakuhoshawuku. Pawulu wamusoñamishili Timotewu kubula kudikunda nawantu “akwamatuñu, akwakudiñija munsañu jawakwawu.” (1 Tim. 5:13) Makonu chinateli kwikala chaswayi kwila chumichi kuhitila mukuzatisha yozelu.

Kwosi mukwaKristu wapama wunateli kuhosha hela kukeña kutiyilila kunsañu yatama hela kunsañu yakujinda yawakwawu akwakwitiyaku. (Mas. 15:3; Yish. 20:19) Nawa hanateli kuhosha hela kutiyilila kunsañu yejima yinabuli wunsahu walalaku. (Efwe. 4:25) Twatambwilaña yakuda yakuspiritu ninsañu yalala yitwatela kukuhwelela hawebusayiti yetu ya jw.org nimumaprogilamu ahakakweji ha JW Broadcasting^®.

A Yinsahu amakwawu azatishaña njla jakuhanjekelamu kulandishilahu, kulandilahu yuma nikutiyakeshelahu yuma yikwetiwu hela kwiñijilahu antu nyidimu. Iku kuhikuselujolu hijinakundami kukudifukula kudi Yehovaku. AkwaKristu adi nanyichima “[yakadi] kusweja kukeña mali” hiyazatishaña amanakwawu kulonda awaninimu maliku.—Heb. 13:5.

Komana twatela kuzatisha iyi njila yakuhanjekelamu kulonda tulombelimu mali akukwasha nachu amanakwetu anakankili hela anakukabakana hamuloña wawubanji wadimwekenaña? Twayikeña amanakwetu nawa twayakamenaña. Dichi twakwashaña ejima anakankili nikuyikolesha. (Yak. 2:15, 16) Ilaña, kwila mwenimu kuzatisha mazanvu akuhanjekelamu amaneni, hikuluwañesha ntanjikilu yayiwahi yashaku dehi kasanji kamutayi hela chipompelu. (1 Tim. 5:3, 4, 9, 10, 16) Nawa hakachi ketu kwosi wukukeña antu atoñojokeña nawu anamusakuli kwakamena nyikoku yaNzambi munjila yambukaku.

Twafwilaña kwila yuma yikumulemesha Nzambi. (1 Kor. 10:31) Dichi neyi munakufuukulahu kuzatisha njila jakuhanjekelamu hela yuma yikwawu yinakutuñatuñawu, shinshikenuña wubanji wudimu nawa ikalenu asoñama.