1. Muloñadi Yesu chamulombeliyi Yehova nindi yayihembeña atumbanji twindi?

HAWUFUKU wakukumishaku muchihandilu chindi chawuntu hanu hamaseki, Yesu wadiña nakutoñojoka hakukala kwakamonawu atumbanji twindi. Yesu wayikeñeli nankashi amabwambu jindi, dichi wamulejeli tata yindi nindi “wuyihembi muloña wanowu watama.” (Yow. 17:14, 15) Yesu welukili nindi neyi nafunti dehi mwiwulu, Satana Diyabolu wukatwalekahu kulwa njita namuntu wejima wukukeña kumukalakela Yehova. Hamuloña wachumichi, antu jaYehova atela kuyikiña.

2. Tuneluki ñahi netu Yehova wukwakula kulomba kwetu?

² Yehova wakwili kulomba kwaMwanindi Yesu muloña wamukeña. Neyi tuzataña nañovu kulonda tumuzañalesheña Yehova, ninetu wukutukeña nawa wukutiyililaña kulomba kwetu kutwalombaña netu yatukwashi nikutukiña. Chineli Yehova wakamenaña chisaka chindi, wukutwalekahu kwakamena anyanindi. Neyi yabula kuyakamena anyanindi, ijina dindi dikutama.

3. Muloñadi chitunakukeñela netu Yehova yatukiñi?

³ Tunakukeña netu Yehova yatukiñeña sweje-e chayinu mpinji. Satana amutemuna mwiwulu dichi, “nahili chikupu.” (Chim. 12:12) Naleteshi antu amakwawu kutoñojoka nawu neyi anakutukabisha “amuzatilaña Nzambi mudimu wajila.” (Yow. 16:2) Amakwawu abula kumukuhwelela Nzambi, atukabishaña hamuloña wakwila twambukaku nawantu amukaayi. Twatiyaña woma wanyi, hichiweti muloña nayuma yinaleteshi atukabishiku. Muloñadi? Muloña Izu daNzambi dahosha nawu:  “Mwanta washinshika nawa wakayikolesha enu nikuyikiña kudi muntu watama.” (2 Tes. 3:3) Yehova watukiñaña ñahi? Tuhanjekenu njila jiyedi mwatukiñilañayi.

4. Kwesekeja naAEfwesesa 6:13-17, Yehova watwinka yumanyi yinateli kutukiña?

⁴ Yehova watwinka yitwa yanjita yejima yinateli kutukiña neyi chakwila Satana natulukuki. (Tañenu AEfwesesa 6:13-17.) Iyi yitwa yanjita yakuspiritu yakola nawa yatukwashaña. Ilaña yinateli kutukiña neyi chakwila tuvwala yitwa yanjita yejima nikuyizatisha. Chitwa-hichitwa chinakwimena chumanyi? Tuhanjekenu haniyi yitwa yejima.

5. Mushipi wachalala hichumanyi, nawa muloñadi chitwatela kuwuvwalila?

⁵ Mushipi wachalala wemenañaku chalala chekala mwiIzu daNzambi, Bayibolu. Muloñadi chitwatela kuvwalila iwu mushipi? Muloña Satana “diyi tata yakutwamba.” (Yow. 8:44) Natwambi hadi yaaka yayivulu nawa naluwañeshi “antu ashakama hamaseki hejima.” (Chim. 12:9) Ilaña chalala chekala muBayibolu chatukiñaña kulonda yabuli kutudimba. Twavwalaña ñahi iwu mushipi wachifwikija? Twawuvwalaña kuhitila mukudiza chalala chahosha hadi Yehova, kudifukula kudi yena “muspiritu nimuwalala,” nikwikala ashinshika muyuma yejima.—Yow. 4:24; Efwe. 4:25; Heb. 13:18.

6. Chuma chakujika hantulu chakuloña hichumanyi, nawa muloñadi chitwatela kuchivwalila?

⁶ Chuma chakujika hantulu chakuloña chemenañaku nshimbi jaYehova jaloña. Muloñadi chitwatela kuvwalila chuma chakujika hantulu? Chuma chakujika hantulu chakiñaña muchima wamushidika kulonda abuli kuwukatisha. Munjila yoyimu, chuma chakujika hantulu chakuloña chakiñaña muchima wetu wachifwikija hela wuntu wetu wamukachi, kulonda abuli kuwuluwañesha kudi kaayi. (Yish. 4:23) Yehova wakeñaña nindi tumukeñi nikumukalakela namuchima wetu wejima. (Mat. 22:36, 37) Satana watwesekaña kulonda tubuleña kumukalakela Yehova namuchima wumu, dichi watudimbekaña kulonda tukeñeña yuma yamukaayi, yuma yahelayi Yehova. (Yak. 4:4; 1 Yow. 2:15, 16) Nawa neyi aka kafuta kindi kanazatiki wanyi, wukutukabisha kulonda tufumpi nshimbi jaYehova.

7. Twavwalaña ñahi chuma chakujika hantulu chakuloña?

⁷ Twavwalaña chuma chakujika hantulu chakuloña kuhitila mukwovwahila nshimbi jaYehova jahosha hayuma yayiwahi niyatama nikuyizatishaña muchihandilu chetu. (Mas. 97:10) Antu amakwawu amonaña neyi nshimbi jaYehova jakala. Ilaña neyi tuleka kuzatisha yishina yamuBayibou muchihandilu chetu, tukwikala tuhu neyi mushidika wudi kunjita wunasubuli chuma chakujika hantulu nindi muloña chinamulemeni. Neyi yela mwenimu neli mwawusupi. Kudi antu amukeña Yehova “nshimbi jindi hijakalaku,” ilaña jatukiñaña.—1 Yow. 5:3.

8. Kuvwala nkwabilu kunyendu yenu yinakumwekesha nawu munadiloñeshi kushimwina nsañu yayiwahi kwatalisha mudihi?

⁸ Pawulu watulejeli cheñi kuvwala nkwabilu kunyendu yetu yinakumwekesha nawu tunadiloñeshi kushimwina nsañu yayiwahi yakuwunda. Munjila yikwawu twatela kwikala adiloñesha kushimwina nsañu yayiwahi yaWanta mpinji yejima. Chikuhwelelu chetu chakolaña neyi tulejaku antu nsañu yamuBayibolu. Chatukoleshaña hakumona antu jaYehova kwejima kwadiwu anakushimwina nsañu yayiwahi. Chakutalilahu, ashimwinaña kunyidimu, kumashikola, kwitala nikwiitala, kumaluña akulandishila, neyi anakuya nakulanda yuma, kudi antaña jawu abula kwikala ayinsahu, kuhanjeka nawenimbu nawa ashimwinaña hela  chakwila kudi yuma yinakuyikañesha kufuma hamatala. Neyi twikala nawoma nawa tuleka kushimwina, tukwikala neyi mushidika wunasubuli nkwabilu jindi hampinji yadiyi kunjita; nateli kudikatisha kunyendu. Chikufumamu, wukukañanya kudikiña kudi ayilumbu jindi neyi anayilukuki nawa hakutwesha kulondela munakumulejawu kudi mukulumpi windiku.

9. Muloñadi chitwatela kusendela nkebu yeneni yachikuhwelelu?

⁹ Nkebu yeneni yachikuhwelelu yemenañaku chikuhwelelu chitukweti mudi Yehova. Twakuhwelela netu wakashikija yuma yejima yashiikayi. Chikuhwelelu chikutukwasha “kujima nachu nyivu yakesi yanowu watama.” Muloñadi chitwatela kusendela nkebu yeneni? Muloña yatukiñaña kuntañishilu yawakwakusekesha hela kumazu atama awantu atudimbululaña. Chakadi chikuhwelelu hitukutwesha kukaana neyi anakutukanjikija nawu tufumpi nshimbi jaYehovaku. Mpinji yejima yitwahakwilañaku yuma yitwakuhwelela neyi tudi kumudimu hela kushikola, dikwila nawu tunasendi nkebu yetu. (1 Pet. 3:15) Neyi tukaana mudimu wanfwetu yeneni wukutudilaña mpinji yitwatela kuzatilamu nyidimu yaYehova, dikwila nawu tunakusenda nkebu yetu. (Heb. 13:5, 6) Nawa neyi tutwalekahu kumukalakela Yehova hela  chakwila anakutukabisha, dikwila nawu nkebu yetu yinakutukiña.—1 Tes. 2:2.

10. Itepa dawamwinu hichumanyi, nawa muloñadi chitwatela kudivwalila?

¹⁰ Itepa dawamwinu hikuchiñeja kwatwinkayi Yehova. Kuchiñeja kwatushiikayi nindi wukatupulwisha kukufwa nawa wakayisomwena antu elaña nkeñelu yindi. (1 Tes. 5:8; 1 Tim. 4:10; Tit. 1:1, 2) Kuchiñeja kwawamwinu kwakiñaña yitoñojoka yetu neyi chakiñanawu mutu wamushidika kudi itepa. Kwatukiñaña ñahi? Kuchiñeja kwatukwashaña kusha muchima hayikaninu yaYehova nawa kwatukwashaña kulonda tubuli kuzeya nakukala kutunakumona. Twavwalaña ñahi idi itepa? Neyi tumonaña yuma neyi chayimonañayi Nzambi dikwila nawu tunavwali itepa. Chakutalilahu, hitwashaña muchima hakwikala namahetaku, ilaña twamuchiñejaña Nzambi.—Mas. 26:2; 104:34; 1 Tim. 6:17.

11. Mpoku yakabali yaspiritu hichumanyi, nawa muloñadi chitwatela kuyizatishila?

¹¹ Mpoku yakabali yaspiritu hiIzu daNzambi, Bayibolu. Iyi mpoku yikweti ñovu yakusolola makudi ejima nikuyisubula antu kuwuduñu wantañishilu yakutwamba nikuyilwilu yafwana. (2 Kor. 10:4, 5; 2 Tim. 3:16, 17; Heb. 4:12) Twelukaña chakuzatisha chiwahi iyi mpoku kuhitila mukudiza kwankawetu nichatudizishañawu mukuloñesha kwaNzambi. (2 Tim. 2:15) Kubombela hayitwa yanjita yejima, Yehova wukweti cheñi njila yikwawu yatukiñilañamu. Hinjilanyi yeniyi?

12. Muloñadi chitwakeñelaña netu amanakwetu niahela atukwashi?

¹² Mushidika wakulukila mukwasa njita weluka nindi hanateli kushinda ayilumbu jindi amavulu kankawindiku; atela kumukwashaku kudi akwawu amashidika. Munjila yoyimu hitunateli kutwesha kumushinda Satana niantu jindi kankawetuku, chiña atukwashaku kudi amanakwetu niahela. Yehova watwinka ‘anakwetu amavulu’ mukaayi kejima atukwashañaku.—1 Pet. 2:17.

13. Kwesekeja naAHeberu 10:24, 25, kuwahanyi kwekelamu neyi tuyaña nakupompa?

¹³ Njila yimu mwatukwashilañawu hikupompa. (Tañenu AHeberu 10:24, 25.) Mpinji yikwawu twaneñaña, ilaña kupompa kwatukoleshaña. Ñakwilu yahanañawu amanakwetu niahela yatukoleshaña. Mpanji jahanañawu niyimwenu yatukwashaña kufwila kutwalekahu kumukalakela Yehova. Nawa nsañu yitwahanjekaña nawamanakwetu henohu kupompa kanda kutachiki nihanyima yakupompa yatukoleshaña. (1 Tes. 5:14) Kubombelahu, neyi tunayi nakupompa twekalaña nampinji yakukwasha akwetu nawa chumichi chatuzañaleshaña. (Yilw. 20:35; Rom. 1:11, 12) Kupompa kwetu kwatukwashaña cheñi munjila jikwawu. Kwatukwashaña kwikala akwakushimwina niantañishi akuluka yitembi. Chakutalilahu, kwatukwashaña kwiluka chakuzatisha chiwahi yozelu yidi muChikasha Chetu chaYozelu Yakuzatisha Hakudizisha. Dichi loñeshenuña chiwahi kupompa. Shenuñaku muchima hampinji yakupompa. Nawa zatishenuña yuma yimunadizi hakupompa. Neyi mwilaña yumiyi, mukwikala “ishidika wamuwahi waKristu Yesu.”—2 Tim. 2:3.

14. Anyi amakwawu atukwashaña?

¹⁴ Cheñi, mazaza awañelu atukwashaña. Toñojokenu hohu hamudimu wunateli kuzatayi kañelu wumu. (Isa. 37:36) Toñojokenu hamudimu wunateli kuzata mazaza awañelu. Kwosi muntu hela andemoni wukutwesha kuzuña namashidika aYehova añovuku. Yehova wukweti ñovu yasweja. Dichi neyi wudi kukabadi ketu tukwikala nañovu kubadika ayilumbu jetu hela chakwila amavulu  chamuchidinyi. (Ansomp. 6:16) Twatela kukuhwelela chumichi netu chalala. Anukenuña chumichi neyi akwenu mumwazatilaña, mumwatañilaña hela ntaña yenu wabula kwitiya yahosha hela yayila chuma chatama. Anukenuña nenu himunakuzuña kankawenuku. Munakwila munakuyilejayi Yehova.

15. Kwesekeja naIsaya 54:15, 17, muloñadi Satana niantu jindi chiyakubula kutweshelawu kuyilekesha antu jaNzambi kushimwina?

¹⁵ Kudi yuma yayivulu yinateli kuletesha kaayi kadi mumakasa aSatana katuheli. Hitwadiñijaña munsañu jamatuña nachiyuulu hela kwiñila wushidikaku. Twatiyakeshana ijina daNzambi, twashimwinaña netu Wanta waNzambi diwu hohu wunateli kuleta kuwunda nawa twovwahilaña nshimbi jindi. Cheñi twamusawulana nyuuli wakanu kaayi netu watama, hisakutwamba nawa himbanji. (Yow. 8:44) Nawa twashimwinaña netu katataka kanu kaayi kaSatana akajilumuni. Hela chochu, Satana niantu jindi hiyakutwesha kutulekesha kushimwinaku. Etu tukutwalekahu kumushimeka Yehova kuzatisha njila jejima jitukweti. Hela chakwila Satana wukweti ñovu, hanakutwesha kukañesha nsañu yaWanta kushika kudi anti ejima mukaayiku. Yehova diyi wunakutukiña.—Tañenu Isaya 54:15, 17.

16. Yehova wakapulwisha ñahi antu jindi hampinji yalukadi lwasweja?

¹⁶ Yumanyi yikamwekana kumbidi? Hampinji yalukadi lwasweja,Yehova wakatwamwina mapampa kayedi munjila yakuhayamisha. Chatachi, wakayipulwisha ambuñindi ashinshika hampinji yakakojejayi anyanta ahanu hamaseki kujilumuna Babiloni Muneni, kwitiya kwakutwamba kwejima. (Chim. 17:16-18; 18:2, 4) Nkumininaku, wakapulwisha antu jindi hampinji yakajilumunayi yuma yamukaayi kaSatana yejima haAmagedoni.—Chim. 7:9, 10; 16:14, 16.

17. Yumanyi yinateli kufumamu neyi tukundama kwakwihi naYehova?

¹⁷ Neyi tukundama kwakwihi naYehova, kwosi chuma chinateli kwilayi Satana chinateli kutukatishaku. Kafwampi yena diyi akajilumunawu haya nyaaka. (Rom. 16:20) Dichi vwalenu yitwa yanjita yejima nawa twalekenuhu kuyizatisha. Bayi muzuñaña kankawenuku. Yikwashenuñaku amanakwenu niahela. Nawa londelenuña nshimbi jaYehova. Neyi mwila yumiyi, Tata yenu wamwiwulu wakayinka ñovu nikuyikiña.—Isa. 41:10.