1-2. Kukalanyi kwamonañawu aYinsahu amavulu?

KAPOSTOLU PAWULU wamukolesheli Timotewu niakwawu akwaKristu kutwalekahu kuzata nañovu mudimu wakushimwina. (2 Tim. 4:5) Wejima wetu twalondelaña kufumba kwaPawulu. Ilaña mpinji jikwawu chakalaña. Amanakwetu niahela amavulu chayikalilaña kuzataku mudimu wakushimwina. (2 Tim. 4:2) Chakutalilahu, toñojokenu hadi amanakwetu niahela ashakamaña mumaluña mwakaanishawu hela mwalekeshawu mudimu wetu. Ashimwinaña hela chakwila eluka nawu anateli kuyikasa.

² Antu jaYehova amonaña kukala kwashiyashana kunateli kuyizeyesha. Chakutalilahu, amakwawu azataña hadi mpinji yayilehi hakwila nawu akeñeli yisaka yawu yuma yakeñekaña. Akeñaña kuzata nankashi mumudimu wakushimwina, ilaña nyijimba yazeyaña. Amakwawu anateli kukañanya kuzata nañovu muloña wayikatu hela kukula kumujimba; chakwila ashakamaña hohu hamatala. Hela chochu, amakwawu atoñojokaña mpinji yejima nawu alema wanyi kudi Yehova. Muhela Mary, * washakamaña kuMiddle East, wahosheli nindi: “Nazataña nañovu hakwila nawu nileki kutoñojoka yitoñojoka yatama yanleteshaña nizeyeña. Nadinkaña nyiloña muloña namanishaña mpinji niñovu yinatela kuzatisha mumudimu wakushimwina.”

3. Tukuhanjekadi muchinu chibaaba?

³ Hichikweti muloña nakukala kwetuku, Yehova nateli kutwinka ñovu yakuumika kukala nikutukwasha kutwalekahu kumukalakela hanakumini ñovu yetu. Henohu kanda tushinshiki Yehova chinateli kutukwashayi, tuhanjekenu ntahi Yehova chamukolesheliyi Pawulu niTimotewu kuzata nyidimu yawu hela chakwila amweneña kukala.

4. Kukalanyi kwamweniyi Pawulu?

⁴ Pawulu wamweneña kukala kwakuvulu. Sweje-e wakeñeleña ñovu hamweteliwu, hamwasiliwu malola nihamukasiliwu. (2 Kor. 11:23-25) Pawulu washimwini nindi mpinji jikwawu waneñeleña. (Rom. 7:18, 19, 24) Wadiña cheñi “namwiña mumujimba,” kukala kwakeñeleñayi nindi Nzambi yakumanishi.—2 Kor. 12:7, 8.

5. Mudimwinyi wazatiliyi Pawulu hela chakwila wamweneña kukala?

⁵ Yehova wamwinkeli Pawulu ñovu yakutwalekahu kushimwina hichikweti muloña nakukala kwamweneñayiku. Talenu nyidimu yazatiliyi Pawulu. Chakutalilahu, hampinji yamukasiliwu mukaleya muRoma mwitala, wahakwilileñaku nsañu yayiwahi kumesu awanlomboli jawaYudeya niakwawuswa. (Yilw. 28:17; Fwili. 4:21,22) Wayishimwinineña cheñi ninana amuhembeleña mukaleya niantu ejima enjileña nakumuhempula. (Yilw. 28:30, 31; Fwili. 1:13) Hayoyina mpinji, Pawulu wasonekeli nyikanda yonenewa yakwashili akwaKristu alala hayina mpinji nawa yinakutukwasha nimakonu. Kubombelahu, chakutalilahu chaPawulu chakolesheli chipompelu chamuRoma, nawa chaletesheli amanakwindi “kuhamuka chikupu hakuhosha izu daNzambi chakadi woma.” (Fwili. 1:14) Hela chakwila Pawulu mpinji jikwawu wazatileña neyi chakeñeleñayiku, wazatileña hakumina ñovu jindi nawa “[chaletesheli] nsañu yayiwahi kuyilaku hambidi.”—Fwili. 1:12.

6. Kwesekeja na 2 AKorinda 12:9, 10, chumanyi chamukwashili Pawulu kuzata mudimu windi wakushimwina?

⁶ Pawulu welukili nindi nyidimu yejima yazatileñayi mumudimu waYehova hayizatileña nañovu yindiku, ilaña nañovu yaNzambi. Wahosheli nindi ñovu yaNzambi yalumbulukilileña “mukuzeyazeya.” (Tañenu 2 AKorinda 12:9, 10.) Yehova wazatishili spiritu Yindi yajila kumwinka Pawulu ñovu yakuzata chikupu mudimu wakushimwina hela chakwila amukabishileña, kumukasa nikukala kukwawu kwamweneñayi.

7. Kukalanyi kwadiña naTimotewu kwadi kumukañesha kuzata mudimu wakushimwina?

⁷ Timotewu, ibwambu daPawulu wakansi, niyena washindameneni hañovu jaNzambi hakwila yazati mudimu windi. Timotewu wayileña naPawulu kumaluña amalehi nakuzata  wumishonali. Nawa Pawulu wamutemesheleña cheñi kwendela yipompelu nikuyikolesha. (1 Kor. 4:17) Hekwawu Timotewu watoñojokeleña nindi wukutwesha wanyi. Hadaha dichaletesheli Pawulu yamuleji nindi: “Bayi witeja muntu hela wumu yadiwuli wukwenzi weyiku.” (1 Tim. 4:12) Nawa haniyi mpinji, Timotewu wadiña dehi namwiña mumujimba windi, “kukatakata.” (1 Tim. 5:23) Ilaña Timotewu welukili nindi spiritu yajila yaYehova yikumwinka ñovu yakushimwina nsañu yayiwahi nikukalakela amanakwindi.—2 Tim. 1:7.

8. Yehova wayikoleshaña ñahi antu jindi makonu?

⁸ Makonu, Yehova wayinkaña antu jindi “ñovu yabadika hañovu jawantu” kulonda atwalekihu kumukalakela nakashinshi. (2 Kor. 4:7) Tuhanjekenu hayuma yiwana mwatukoleshelañayi Yehova nawa yatukwashaña kwikala ashinshika kudi yena: kulomba, Bayibolu, akwetu akwaKristu nimudimu wakushimwina.

9. Kulomba kunateli kutukwasha ñahi?

⁹ Kulomba kwatukoleshaña. Neyi chashimunawu haAEfwesesa 6:18, Pawulu watuleja kulomba kudi Nzambi “mpinji yejima.” Chikufumamu, Nzambi wukutukolesha. Manakwetu Jonnie, washakamaña kuBolivia, wamweni Yehova chamukwashiliyi hampinji yadiñayi nakukala kwakuvulu. Ñodindi nianvwali jindi ejima ayedi akatili nankashi hampinji yoyimu. Chamukalilili Jonnie hakwila nawu yatweshi kuyakamena wejima wawu asatu. Amama yindi afwili nawa haleheli hakwila nawu ñodindi niatata yindi akoli. Chanukiliyi kukala kwamweniyi, Jonnie wahosheli nindi, “Hinnadiña muniku kukala, chuma chankwashileña mpinji yejima hikutena mukulomba yuma yejima yinnakukeña.” Yehova wamwinkeli Jonnie ñovu yamukwashili kuumika. Manakwetu Ronald, nawa mukulumpi washakamaña kuBolivia, wenjili nakwiluka nindi amama yindi akatili kansa. Chimwahitili kakweji afwili. Chumanyi chamukwashili kuumika? Wahosheli nindi: “Neyi innakulomba kudi Yehova, namulejañamu yuma yejima yidi kumuchima nichinnakutiya. Neluka nami wañiluka chikupu kubadika chañilukawu antu hela chinadiluka ami aweni.” Mpinji jikwawu, tunateli kuzeya hela kukañanya kwiluka jitunakukeña kulomba. Ilaña Yehova nakukeña nindi tumulombeña hela chakwila chinakutukalila kumulejamu yitoñojoka yetu nichitunakutiya.—Rom. 8:26, 27.

10. Neyi chinamwekeshiwu haAHeberu 4:12, muloñadi kutaña Bayibolu nikutoñojoka hansañu yitunakutaña chikwalemena?

¹⁰ Bayibolu yatukoleshaña. Pawulu watañileña Nsona kulonda jimukoleshi nikumukundeja, ninetu twatela kutañaña Bayibolu. (Rom. 15:4) Neyi tutañaña Izu daNzambi nikutoñojokahu Yehova nateli kuzatisha spiritu yindi yajila kulonda twiluki Bayibolu chiyinateli kutukwasha nakukala kutukweti. (Tañenu AHeberu 4:12.) Manakwetu Ronald, itwatena, wahosheli nindi: “Nazañalalaña muloña natachikili kutaña Bayibolu mpinji yejima nawufuku. Natoñojokaña chikupu hayilwilu yaYehova nichakamenañayi ambuñindi. Chumichi chankoleshaña chikupu.”

11. Bayibolu yamukwashili ñahi muhela wadiña nachineñi kuumika?

¹¹ Neyi tutoñojokaña Hezu daNzambi chikutukwashaña kwikala nayitoñojoka yayiwahi hakukala kutunakumona. Toñojokenu  Bayibolu chiyamukwashili mumbanda nfwila wadiña nachineñi. Mukulumpi wumu wamulejeli nindi neyi yataña nsañu yekala mumukanda waYoba yinateli kumukwasha. Chatachikiliyi kutaña, watachikili kumwinka Yoba nyiloña hakutoñojoka mwaluwa. Wafwikijileña nakumwila Yoba nindi: “Yoba! Kutoñojokaña hohu hakukala kweyi nehi!” Ilaña nkumininaku welukili nindi yilwilu yindi yadiña neyi yaYoba. Chumichi chamukwashili kuhimpa yitoñojoka yindi nawa chamukwashili kuumika chineñi chakufwisha nfumwindi.

12. Yehova wazatishaña ñahi akwetu akwaKristu kulonda yatukoleshi?

¹² Akwetu akwaKristu atukoleshaña. Cheñi Yehova wazatishaña akwaKristu kulonda akoleshi akwawu akwakudifukula. Pawulu wafwilileña kudimona nawamanakwindi niahela kulonda ‘akadikoleshi.’ (Rom. 1:11, 12) Muhela Mary, itwatena, watiyaña kuwaha kwikala nawamanakwetu niahela. Wahosheli nindi: “Yehova wazatishili amanakwetu nihela abulili nikwiluka kukala kunamweneña. Ankolesheleña hela kuntemeshela kaadi nawa ichi chuma dichinakeñeleña. Chumichi chankwashaña cheñi kuhanjeka nawahela amakwawu amweni kukala kwokumu nikudizila kuyuma yayikwashili. Nawa akulumpi ankwashaña kwiluka nami amanakwetu niahela muchipompelu ankeña.”

13. Tunateli kudikolesha ñahi wumu namukwawu hakupompa kwachipompelu?

¹³ Twadikoleshaña wumu namukwawu hakupompa kwahachipompelu. Neyi munayi nakupompa, ikalenuña atachi kukolesha akwenu nawa yilejenuña nenu mwayikeña nawa mwasakililaña hayuma yelañawu. Chakutalilahu, henohu kupompa kanda manakwetu Peter nawa mukulumpi wamulejeli muhela wukweti iyala wabula kwitiya nindi: “Watukoleshaña nankashi chiwenzaña nakupompa. Mpinji yejima wasendaña anyaneyi ejima 6 nawa mwadiloñeshaña kulonda mwakulihu.” Mumesu indi mwenzeli madilu amuzañalu nawa wamwakwili nindi: “Mazu imunahoshi anankoleshi nankashi dalelu.”

14. Kushimwina kwatukwasha ñahi?

¹⁴ Mudimu wakushimwina watukoleshaña. Neyi tulejaku antu chalala chamuBayibolu, twatiyaña kuwaha hela chakwila aneteji hela nehi. (Yish. 11:25) Muhela Stacy wamweni mudimu wakushimwina chiwamukolesheli. Chelili ntaña yindi yekali kunsa yakuloñesha, waneñeli nankashi nawa waditoñesheleña nindi, ‘Chiña nelilihu chuma chadi kumukwasha.’ Chamukalilili nankashi hakwila nawu yaleki kutoñojoka haniyi nsañu. Chumanyi chamukwashili kuumika iku kukala? Mudimu wakushimwina! Chashimwinineñayi, watachikili kusha muchima hadi antu ateleli kukwashayi. Wahosheli nindi: “Haniyi mpinji Yehova wanyinkeli kadizi wadiña nakupaminaku. Ichi chuma chankolesheli chikupu. Mudimu wakushimwina wankwashili nankashi.”

15. Munadiziliku kwodi kumazu ahosheliyi muhela Mary?

¹⁵ Muloña wakukala kunakumonawu, amakwawu anateli kutoñojoka nawu hiyanakuzata nañovu mumudimu wakushimwinaku. Neyi ninenu dichimwatoñojokaña, anukenu nenu Yehova wazañalalaña chimwazataña hakumina ñovu yenu. Talenu cheñi chuma cheliliyi muhela Mary. Chayiliyi kwiluña kwahoshañawu idimi dacheñi, wamweni nindi nakuzata wanyi. Wahosheli nindi: “Hadi mpinji yayilehi nakuminineña dakwakulahu ñakwilu yapela, kutaña Nsona hela kuhana hohu tilakiti.” Ichi chamuletesheli kutoñojoka nindi hazatileña nañovu neyi chazatileña  amanakwindi ahosheleña dina idimiku. Hela chochu, wahimpili yitoñojoka yindi. Watachikili kwiluka nindi Yehova nateli kumuzatisha hela chakwila welukisha wanyi dina idimi. Wahosheli nindi: “Chalala chamuBayibolu chakala wanyi nawa dichahimpaña yihandilu yawantu.”

16. Chumanyi chinateli kuyikwasha amanakwetu ashakamaña hohu hamatala muloña wayikatu?

¹⁶ Yehova wamonaña nawa watiyaña kuwaha chitwazataña nañovu mumudimu wakushimwina hela chakwila twekala hohu hetala muloña wayikatu. Nateli kutukwasha kuyishimwina anhembi, andotolu hela anansi. Neyi twesekejaña chitwazatileña kunyima nachitunakuzata yinu mpinji tunateli kuzeya. Ilaña neyi twiluka Yehova chinakutukwashayi chayinu mpinji tukwikala nañovu yakuumika kukala namuzañalu.

17. Kwesekeja naMukwakutañisha 11:6, muloñadi chitwatela kutwalekahu kushimwina hela chakwila kwosi wuneteji?

¹⁷ Tuneluki wanyi mbutu jachalala jitunakutumba jikamena nakutachika kukula. (Tañenu Mukwakutañisha 11:6.) Chakutalilahu, muhela Barbara wudi nayaaka yamuma 80, mpinji yejima washimwinaña kuzatisha foni nikusoneka nyikanda. Mumukanda wumu wasonekeliyi washilimu Kaposhi Kakutalila kaMarch 1, 2014, mwadiña chibaaba nawu “Yuma Yinayililiyi Nzambi.” Welukili wanyi nindi wayitemesheleli iwu mukanda adisumbula adiña aYinsahu jaYehova. Iyi magazini ayitañili mapampa kakavulu. Iyala watiyili tuhu neyi Yehova nakuhosha nindi. Awa adisumbula atachikili cheñi kupompa, hanyima yakwila munahiti yaaka kubadika 27 nawa ekalili cheñi aYinsahu. Muhela Barbara wakolesheweli nankashi hakumona yuma yayiwahi yafumini mumukanda wasonekeliyi.

18. Yumanyi yitwatela kwila hakwila nawu ñovu yaNzambi yitukwashi?

¹⁸ Yehova watwinka yuma yayivulu mwatwinkelañayi ñovu yasweja. Neyi tuzatishaña yuma yatwinkayi chidi neyi kulomba, Bayibolu, akwetu akwaKristu nimudimu wakushimwina, tukumwekesha kudi yena netu twakuhwelela muñovu yindi nawa netu yikutukwasha. Dichi tumushindameneña Tata yetu wamwiwulu watiyaña kuwaha “[kukwasha] nañovu adi nanyichima yalala, yindi chikupu.”—2 Kushi. 16:9.