1, 2. (a) Kukalanyi kwamonañawu enyi amavulu makonu? (Talenu mwevulu wakutachikilahu.) (b) Kusoñamishanyi kwahaniniyi kapostolu Pawulu, nawa malwihwinyi itukuhanjekahu?

YAAKA 30 yinahitihu, Osei, ^[1] wabulili kwikala Chinsahu hayina mpinji wafumini kuGhana nakuya kuEurope. Wahosheli nindi: “Natachikili kumona nami antu amavulu añakameneni wanyi. Iluña dadiña dituta nankashi. Chinafumini kwibulu dandeki natiyili kututa katachi muchihandilu chami chakwila natachikili kudila.” Osei wawanini wanyi mudimu watelela hadi chaaka chimu muloña wakubula kwiluka idimi. Chineli wadiña kwakulehi nawa kwakankawindi, wanukileña nankashi kumukala wawu.

² Toñojokenu yuma yimwadi kukeña nenu ayilili kudi antu, neyi yenu mwadiña mukukala kwamuchidiwu. Komana himukutiya kuwaha kuyitambwila Kwitala daWanta hela chakwila munafumi kwituña dacheñi indi kwiji mudi nekowa dacheñiku? Kuhosha hohu chalala, Bayibolu yakoleshaña akwaKristu nawu “Bayi muvulamena kukeña enyuku.” (Heb. 13:2.) Dichi tushinshikenu  hamalwihu analondelihu: Yehova wamonaña ñahi enyi? Muloñadi wutwatela kuhimpila njila yitwamwenañamu enyi? Nawa tunateli kukwasha ñahi antu anafumi kwiluña dacheñi kwikala akasunuka muchipompelu chetu?

3, 4. Kwesekeja naKwidika 23:9, antu jaNzambi akushankulu ateleleli kumona ñahi enyi, nawa muloñadi?

³ Chelili Yehova yafumishi antu jindi muEjipitu, wayinkeli nshimbi jaletesheli antu abulili kwikala aIsarela adibombeli nawu ekali antu alema. (Kwid. 12:38, 49; 22:21) Chineli enyi ayimweneña munjila yatama, Yehova mukukeña wayiloñesheleli njila jayikwashileña. Kwikala nawuswa wakunonojola yakuda yashalileña mwiha diyi yadiña njila yimu.—Lev. 19:9, 10.

⁴ Chatela yayileji aIsarela nindi atela kulemesha enyi, Yehova wayilembeleli nindi ayitiyileña luwi. (Tañenu Kwidika 23:9.) Elukili ‘chichatiyakeneña kwikala mwenyi.’ Nihampinji yadiñawu muwuduñu, aHeberu ayikanishileña kudi aEjipitu muloña wachaambu chekowa nikudivwimba kwawakulumpi jansakililu. (Kutach. 43:32; 46:34; Kwid. 1:11-14) A Isarela amweni kukala kweneni muchihandilu chawu hadiñawu enyi mwituña dacheñi, ilaña Yehova wakeñeleña nindi amoneña enyi neyi ‘hiyenimbu’ mukachi kawu.—Lev. 19:33, 34.

5. Chumanyi chikutukwasha kutiyila antu luwi anafumi kuyisemwa yashiyashana neyi chelañayi Yehova?

⁵ Makonu, tunateli kukuhwelela netu Yehova nakwakamena antu afuma kuyisemwa yashiyashana apompaña muyipompelu yetu. (Kuhit. 10:17-19; Mal. 3:5, 6) Neyi tukutoñojoka chikupu hakukala kunakumonawu, kudi neyi chaambu hela muchidi, tukukeñakeña njila jakuyimwekeshelamu kukeña niluwi.—1 Pet. 3:8.

6, 7. Chumanyi chinakumwekesha nawu akwaKristu akusambila adizila chakumanisha chaambu?

⁶ AkwaKristu amuyaaka yawaPostolu adizili chakumanisha kukala kwachaambu kwadiña hakachi kawaYudeya. HaPentekosta 33 C.E., antu adiña nakushakama muYerusalema amwekesheli chisambu kudi akwaKristu amaha afumini kumaluña ashiyashana. (Yil. 2:5, 44-47) Kukeña kwamwekesheliwu akwaKristu aYudeya kudi akwawu akwakwitiya afumini kumaluña acheñi, kwamwekesheli nawu elukili chikupu mwatalisha izu dakwila nawu “chisambu,” dikwila nawu, “kukeña enyi.”

⁷ Chipompelu chawak waKristu akusambila chichatoheli, kukala kwachaambu kwatachikili cheñi. A Yudeya ahosheleña idimi dachiGiriki atachikili kutooba nawu antuluwa jawu adiña nakuyakamena wanyi. (Yil. 6:1) Hakwila nawu amanishi iku kukala, apostolu atondeli amayala 7 kulonda akameneña antuluwa. Awa amayala ejima adiña namajina achiGiriki, chamwekesheleña nawu apostolu akeñeleña kumanisha swayi kukala kwamwekeni kwachaambu chayisemwa chadiña hakachi kawakwaKristu akusambila.—Yil. 6:2-6.

8, 9. (a) Chumanyi chikumwekesha nawu tukweti chaambu hela twadisambaña nekowa? (b) Chumanyi chitwatela kufumisha mumuchima wetu? (1 Pet. 1:22)

⁸ Hela chakwila tuneluki hela nehi, wejima wetu twaluwankana nachisemwa chetu. (Rom. 12:2) Kubombelahu, kakavulu twatiyaña antuñi netu, akwetu itwazataña nawu hela akwetu akashikola, anakuhosha chatama hadi antu afuma kwituña dacheñi, akumuchidi wacheñi hela ekowa dacheñi. Komana yilwilu yamuchidiwu yatuluwañeshaña? Nawa twelaña ñahi neyi muntu nakusupisha  muza wetu, hadaha kulebumuna yuma yekala muchisemwa chetu?

⁹ Mpinji yimu, kapostolu Petulu wadiña nachaambu nawantu abulili kwikala aYudeya, ilaña watachikili kuleka chovu-chovu yitoñojoka yatama yadiña mumuchima windi. (Yil. 10:28, 34, 35; Ŋal. 2:11-14) Munjila yoyimu, neyi tumona netu tunatachiki kwikala nachaambu hela kudisamba muloña wekowa detu, twatela kuzata nañovu kulonda tuyifumishi mumuchima wetu. (Tañenu 1 Petulu 1:22.) Twatela kwiluka netu kwosi wumu hakachi ketu watelela kupulukaku; wejima wetu twekala antu abula kuwanina hichidi namuloña namuza wetuku. (Rom. 3:9, 10, 21-24) Hanu dinu, chumanyi chikuletesha tudimoneña kulema kubadika ejima? (1 Kor. 4:7) Twatela kumona neyi chamweneñayi kapostolu Pawulu, wasoñamishili akwawu kwaKristu awayishewa dehi nindi hiyadiña ‘cheñi antu acheñi hela añiinzaku, ilaña hiyenimbu nawa antu amuchisaka chaNzambi.’ (Efwes. 2:19) Neyi tuzata nañovu kulonda tushindi yilwilu yakwikala nachaambu kutalisha hadi antu akuyitachi yashiyashana kukutukwasha kuvwala muntu wamuha.—Kol. 3:10, 11.

10, 11. Bowazi hampinji yamukwashiliyi Luti kaMowabi, wamwekesheli ñahi nindi wamweneña enyi neyi chayimweneñayi Yehova?

¹⁰ Chakadi nikujina, Bowazi hampinji yamukwashiliyi Luti kaMowabi, wamwekesheli nindi wamweneña enyi neyi chayimonañayi Yehova. Chenjiliyi nakutala kwiha dindi hampinji yakwañula, Bowazi wamumweni mumbanda wadikita wakwituña dacheñi nakunonojola tidiku mwiha munañuliwu dehi akakwañula indi. Chatiyiliyi nindi nalombi kulonda yamwiteji kunonojola hela chakwila wadiña nawuswa wakwila mwenimu, Bowazi wamwitejeli nikusenda jañwiliwu dehi.—Tañenu Luti 2:5-7, 15, 16.

¹¹ Mpanji yahanjekeliwu yamwekeshaña chikupu nawu Bowazi wamwakameneni Luti nichihandilu chindi hakwikala ñiinza. Chatachi, wamulejeli kulonda yashakami nawakwawu ambanda kulonda abuli kumwila chatama kudi amayala adiña nakuzata mwiha. Wamulejeli cheñi nindi watela kusenda yakuda yashikila nimenji amavulu, neyi chasendeleñawu akwakuzata. Kubombelahu, Bowazi wamusawili wanyi iwu mumbanda ñiinza, ilaña wamukolesheli.—Luti 2:8-10, 13, 14.

12. Yilwilu yetu yakukeña yinateli kukwasha ñahi antu amaha anafumi kwacheñi?

¹² Bayi neyi Bowazi wamukeñeli Luti muloña wakwila Luti wakeñeli mukuwindi wamumbanda Nawomi hohuku, ilaña watiyili kuwaha muloña wekalili mukwakudifukula waYehova. Kukeña kwamwekesheliyi Bowazi kwamwekesheli kukeña kwaYehova kwakeñeliyi mumbanda wenjili nakukeña ‘kubatama mumpuula jaNzambi yawaIsarela.’ (Luti 2:12, 20; Yish. 19:17) Munjila yoyimu, makonu yilwilu yetu yakukeña yinateli kukwasha “antu ejima” kwiluka chalala nikwiluka chasweja kuyikeñayi Yehova.—1 Tim. 2:3, 4.

13, 14. (a) Muloñadi wutwatela kuzatila nañovu kulonda twimusheña enyi hetala daWanta? (b) Munateli kukañesha ñahi kutiya wudi wakusolomokela antu anafumi kuyisemwa yacheñi?

¹³ Tunateli kumwekesha kukeña kudi antu amaha anafumi kwacheñi kuhitila mukuyimusha nachisambu Hetala daWanta. Kakavulu antu amaha anafumi kwituña dacheñi mpinji jikwawu atiyaña nsonyi nawa akeñaña kushakama nkawawu. Muloña wankulilu yawu hela nshakaminu yawu, anateli kudimona nawu amukunkulwayi kudi antu akumuza wacheñi. Dichi twatela kuzata nañovu kulonda tuyimwekesheleña kukeña. Neyi mukweti JW  Language app mwidimi denu, yinateli kuyikwasha kwiluka chimunateli kwimusha amaha mwidimi dawu.—Tañenu aFwilipi 2:3, 4.

¹⁴ Munateli kutiya wudi kwimusha antu anafumi kuyisemwa yacheñi. Hakwila nawu mushindi iku kukala, munateli kuyileja chimwahandaña. Neyi mukwila mwenimu, mukwiluka nenu mukweti yuma yadifwanaku kubadika yimwadiña nakutoñojoka nawa mukwiluka cheñi nenu chisemwa chejima chikweti hichawahila nihichatamina.

15. Chumanyi chikutukwasha kwiluka chikupu antu anakufwila kwinjilila chihandilu chamwituña munenziwu?

¹⁵ Hakwila nawu mukwashi amakwawu ekali akasunuka muchipompelu, dihulenu nenu, ‘Neyi nadiña mwituña dacheñi, nadi kukeña akwetu antambwili ñahi?’ (Mat. 7:12) Yiwundishilenu nyichima antu anakufwila kwinjilila chihandilu chamwituña munenziwu. Hakutachika, hitunateli kwiluka chikupu chatoñojokañawu hela chelañawuku. Ilaña, chatela tutoñojoki netu akutiya kuwaha nachisemwa chetu, komana kwila tutiya kuwaha nachekalawu wena nehi?—Tañenu aRoma 15:7 futunoti.

16, 17. (a) Yumanyi yitunateli kwila hakwila nawu tudikundi nawantu anafumi kuyisemwa yacheñi? (b) Njilanyi jitunateli kukwashilamu antu anafumi kwituña dacheñi adi muchipompelu chetu?

¹⁶ Neyi tukwiluka iluña nichisemwa chawantu anafumi kuchisemwa chacheñi, chikutukwasha kudikunda nawu. Hakudifukula kwachisaka tunateli kushiyaku mpinji yakusandujola hachihandilu chawantu amuchipompelu hela amwiluña mutwashimwinaña itunabuli kwiluka. Njila yikwawu yakudikundilamu nawantu anafumi kuyisemwa yacheñi, hikuyitambika kwitala detu nakudila hamu. Chineli Yehova ‘nenzulwili aJentili chenzelu chakukuhwelela,’ kwila twenzulwila yinsu yetu enyi ‘akwetu akwakwitiya’ nehi?—Yil. 14:27; Ŋal. 6:10; Yoba 31:32.

 ¹⁷ Neyi twikala nampinji yakuhanjeka nachisaka chinafumi kwituña dacheñi, tukwiluka chikupu netu anakufwila kwinjilila chisemwa chetu. Neyi twila mwenimu chikuletesha twiluki netu anakukeña kuyikwasha kudiza idimi detu. Cheñi, kwila tuyileja ayi kudi antu anateli kuyikwasha kuwana matala hela nyidimu yashikila nehi? Kuzata muniyi njila kukukwasha mukwetu mukwakwitiya kwikala nachihandilu chachiwahi.—Yish. 3:27.

18. Antu anafumi kwituña dacheñi anateli kwimbujola chakutalilahu chanyi chakalemesha nikusakilila?

¹⁸ Hela chochu, antu anafumi kwituña dacheñi anateli kufwila kwinjilila chisemwa chamwituña dacheñi. Luti wemikili chakutalilahu chachiwahi haniyi nsañu. Chatachi, walemesheli chisemwa chamwituña mwayiliyi kuhitila mukulomba kulonda amwiteji kunonojola mwiha. (Luti 2:7) Walemesheli wuswa windi muloña welukili nindi wudi mwituña dambala. Chamuchiyedi, wasakililili nankashi haluwi lwamumwekesheleliwu. (Luti 2:13) Antu anafumi kwituña dacheñi neyi amwekesha yilwilu yamuchidiwu, akuyilemesha chikupu kudi antu amwituña munenziwu nikudi akwawu akwakwitiya.

19. Muloñadi wutwatela kutambwila enyi?

¹⁹ Twatiyaña kuwaha muloña Yehova muluwi lwindi lwasweja neteji antu afuma kuyitachi yashiyashana kutiya nsañu yayiwahi. Mwituña dawu, hadaha chayikalilili kudiza Bayibolu hela kudikunda nawantu jaYehova mukukasunuka. Ilaña chineli anakudikunda nanetu, kwila tuyikwasha kulonda abuli kudimona neyi hiyenyi nehi? Hela chakwila tudi namaheta antesha hela tudi nawukwashu wantesha wutunateli kuyinka, neyi tuyimwekeshela kukeña, tukumwekesha nawu Yehova wayikeña. Chineli tudi “akwakwimbujola Nzambi,” tuzatenu nañovu kulonda tutambwileña enyi.—Efwes. 5:1, 2.