1-3. (a) Yumanyi yitwatela kutwamijaku hichidi namuloña nachidi chihandilu chetuku? (b) Kukalanyi kwamonañawu antu adizaña idimi dacheñi, nawa malwihwinyi itukuhanjekahu? (Talenu mwevulu wakutachikilahu.)

MAKONU, aYinsahu jaYehova amavulu anakuzata mudimu wakushikija chimwenu chakushimwina nsañu yayiwahi ‘kunyuza yejima, kunyichidi yejima, kumadimi ejima, nikumatuña ejima.’ (Chim. 14:6) Komana mudi hakachi kawantu anakudiza idimi dacheñi? Komana munakuzata wumishonali hela kukalakela mwiluña dacheñi kudi kukaankila indi kwiji munatachiki kupompa muchipompelu mwazatishañawu idimi dacheñi mwiluña denu?

² Hakwikala ambuña aNzambi, wejima wetu twatela kutwamijaku wuspiritu wetu niwachisaka chetu hambidi. (Mat. 5:3) Mpinji jikwawu, chinateli kutukalila kwikala nakudiza kwahalwetu munjila yayiwahi muloña wakwikala nanyidimu yayivulu. Hela chochu, antu akalakelaña mwituña dacheñi amonaña kukala kwakuvulu.

³ Kubombela hakudiza idimi, antu akalakelaña kwituña dacheñi atela cheñi kwiluka nawu anakudiisha nyichima yawu nayakuda yakola yakuspiritu. (1 Kor. 2:10) Anateli kwila ñahi mwenimu  neyi chakwila hiyanakutiyishisha muchidi wazatishañawu muchipompeluku? Nawa muloñadi anvwali akwaKristu chiyatela kuzatilawu nañovu kulonda Izu daNzambi dishiki hanyichima yawanyanawu?

4. Chumanyi chinateli kufuntisha wuspiritu wetu hanyima? Shimunenu chakutalilahu.

⁴ Kubula kutiyishisha Izu daNzambi mumuchidi wacheñi kunateli kutufuntisha hanyima kuspiritu. Muyaaka nkulakaji 5 B.C.E., Nehemiya wakameneni chelukiliyi nindi anyana amakwawu hakachi kawaYudeya afumini kuBabiloni akañenyeña kuhosha chiHeberu. (Tañenu Nehemiya 13:23, 24.) Awa anyana ajimbesheleña chinjikijilu chawu chakwikala ambuña aNzambi muloña elukili wanyi mwatalishili Izu daNzambi.—Nehe. 8:2, 8.

5, 6. Yumanyi yinelukiwu anvwali amakwawu akalakelaña mwiluña mwahoshañawu idimi dacheñi, nawa muloñadi?

⁵ Anvwali akwaKristu amakwawu akalakelaña mwiluña mwahoshañawu idimi dacheñi aneluki nawu anyanawu alekaña chovu-chovu kukeña chalala. Muloña wakubula kutiyishisha nsañu yinakuhoshawu hakupompa, maprogilamu akuspiritu ahanineñawu Hetala daWanta ashikileña wanyi anyana hanyichima. Pedro, ^[1] wabuukili hamu nachisaka chindi kufuma kuSouth America nakuya kuAustralia wahosheli nindi, “Yitoñojoka nimuchima jazatilaña hamu neyi tunakuhosha hansañu yakuspiritu.”—Luka 24:32.

⁶ Neyi tunakutaña mwidimi dacheñi, nsañu yikutushika nankashi wanyi hamuchima neyi chiyinateli kutushika hamuchima mwidimi detu. Kubombelahu, kubula kutiyashana chiwahi mwidimi dacheñi kunateli kutuzeyesha muyitoñoka nikuspiritu. Dichi hampinji yitunakukeña kutwalekahu kukalakela Yehova mwiluña mwahoshañawu idimi dacheñi, twatela kuhemba wuspiritu wetu.—Mat. 4:4.

7. AkwaBabiloni akeñeleña kumukokweja ñahi Danyeli kulonda amubalumuni yekali wakuchisemwa chawu nawa yadifukuleña hamu nawu?

⁷ Hampinji yadiñawu aDanyeli nialunda nindi muwunkoli, akwaBabiloni akeñeleña ayikwokweji kulonda ayibalumuni ekali amuchisemwa chawu kuhitila mukuyidizisha “idimi dawaKaladeya.” Kubombelahu, akulumpi jachota chanyiloña adiña nakuyidizisha, atumbili aDanyeli nialunda nindi majina achiBabiloni. (Dan. 1:3-7) Ijina damwinkeliwu Danyeli datalishili kudi Bayali nzambi yawu. Chakadi nikujina, Mwanta Nebukaneza wakeñeleña nindi yamutiyishi Danyeli kuwaha nansañu yakwila nindi Nzambi yindi Yehova anamubadiki ñovu kudi nzambi yawaBabiloni.—Dan. 4:8.

8. Chumanyi chamukwashili Danyeli kutwalekahu kwikala wakola kuspiritu hadiñayi mwituña dacheñi?

⁸ Hela chakwila Danyeli amwinkelihu yakuda yayiwahi yadileñayi mwanta, “wafuukwili mumuchima windi” nindi ‘kwonti kwindi kudijilola.’ (Dan. 1:8) Muloña wakwila watwalekelihu kudiza ‘nyikanda yajila’ mwidimi dindi, watwalekelihu kwikala wakola kuspiritu hela chakwila wadiña nakushakama mwituña dacheñi. (Dan. 9:2) Dichi, chimwahitili yaaka 70 kufuma hampinji yayiliyi muBabiloni, amwilukili nejina dachiHeberu.—Dan. 5:13.

9. Kwesekeja naMasamu 119, Izu daNzambi damukwashili ñahi nsoneki yamasamu?

⁹ Nsoneki yaMasamu 119 wawanini ñovu Mwizu daNzambi yamukwashili kwikala wambukaku nawakwawu. Womikili yilwilu yatama yawantu amuchota chanyiloña. (Mas. 119:23, 61) Hela chochu, wetejeli mazu ahosheliyi Nzambi amushiki hamuchima chikupu.—Tañenu Masamu 119:11, 46.

10, 11. (a) Hampinji yitunakudiza Izu daNzambi, twatela kufwila kwiladi? (b) Tunateli kushikija ñahi yuma yitwafwilaña? Lumbululenu.

¹⁰ Hela chakwila tukweti nyidimu yayivulu kuspiritu nikumujimba, twatela kwikala nampinji yakwikala nakudiza kwahalwetu nikudifukula kwachisaka. (Efwes. 5:15, 16) Hela chochu, bayi tufwileña kutaña mafu amavulu hela kuloñesha kupompa kulonda twakuleñahu hakupompa hohuku. Twatela kuzata nañovu kulonda Izu daNzambi ditushiki hanyichima nikukolesha chikuhwelelu chetu.

¹¹ Hakwila twili mwenimu, hitwatela kutoñojoka hohu hayuma yinakukaankilawu akwetu kuspirituku, ilaña twatela nikutoñojoka hayuma yitunakaankili etu kuspiritu. (Fwi. 1:9, 10) Twatela kwiluka netu neyi tunakuloñesha kuya mwiha, kupompa, hela mpanji, nsañu yitwatañaña hitunateli kuyikundamisha kudi etu aweni hohuku. Chakutalilahu: Hela chakwila mukwakuteleka yakuda wasambilaña kuyitompa henohu kanda yayihani kudi antu, hanateli kuhanda hohu nayakuda yatompañayiku. Neyi nakukeña kutwalekahu kwikala wakola kumujimba, watela kuloñesha yakuda yayiwahi yatela kudayi. Munjila yoyimu, twatela kuzata nañovu kulonda tudiishi muchima wetu nayakuda yakuspiritu yikumanishi kukaankila kwetu.

12, 13. Muloñadi antu akalakelaña mwituña dacheñi chiyadizilañawu mpinji yejima mwidimi dawu?

¹² Antu amavulu ayaña nakukalakela kumatuña acheñi, atiyaña kuwaha kudiza Bayibolu mpinji yejima ‘mwidimi dawu.’ (Yil. 2:8) Niamishonali eluka nawu hakwila nawu atwalekihu kwikala akola kuspiritu hampinji yinakukalakelawu mwituña dacheñi, hiyatela kushindamena hayakuda yakuspiritu yatambwilañawu kukupompa hohuku.

 ¹³ Alain, wunadizi idimi daPersia hadi yaaka 8, wahosheli nindi: “Neyi inakuloñesha kupompa mwidimi daPersia, nashaña hohu maana hedimi. Chineli kakavulu nazatishaña yitoñojoka yami hakuloñesha, yikuma yakuspiritu yinatañaña yanshikaña wanyi hamuchima. Dichaleteshaña mpinji yejima niikaleña nampinji yakudiza Bayibolu ninyikanda yikwawu mwidimi dami.”

14. Anvwali atela kusha maana kuyumanyi, nawa muloñadi?

¹⁴ Anvwali akwaKristu akwila chiwahi neyi akuzata nañovu kulonda eteji Izu daNzambi dishikeña chovu-chovu muyitoñojoka nihanyichima yawanyanawu. Hanyima yakukalakela mwituña mwahoshañawu idimi dacheñi kubadika hadi yaaka yisatu, Serge niñodindi Muriel, amweni nawu mwanawu weyala wayaaka 17 naleki kuzañalala nanyidimu yakuspiritu. Muriel wahosheli nindi: “Mwanetu watiyileña kutama kuya nakushimwina mwidimi dacheñi, ilaña hatachi wadiluñishileña kushimwina mwidimi dachisemwa daFrench.” Serge walumbulwili nindi: “Chitwelukili netu iku kukala kwakañesheleña mwanetu kuyilaku hambidi kuspiritu, twafuukwilihu kufunta kuchipompelu kutwadiña hatachi.”

15. (a) Yumanyi yinateli kuletesha anvwali afunti kuchipompelu chazatishaña idimi datiyishishañawu anyanawu? (b) Anvwali ayikonkomwena kwiladi hamukanda Kuhituluka 6:5-7?

¹⁵ Yumanyi yinateli kuletesha anvwali afunti kuchipompelu chazatishaña idimi datiyishishañawu anyanawu? Chatachi, atela kwiluka nawu adi nampinji yeneni niñovu kulonda akwashi anyanawu kumukeña Yehova hampinji yoyimu kuyidizisha idimi dacheñi. Chamuchiyedi, anateli kumona nawu anyanawu analeki kukeña nyidimu yakuspiritu hela yuma yelañawu mwidimi dacheñi munakukalakelawu. Neyi yuma yamuchidiwu yinamwekani, anvwali akwaKristu anateli kutondahu kufunta kuchipompelu chazatishaña idimi datiyishishañawu chikupu anyanawu sampu anashimati dehi muchalala.—Tañenu Kuhituluka 6:5-7.

16, 17. Anvwali amakwawu anakutwesha ñahi kudizisha anyanawu kuspiritu iku anakukalakela mwituña dacheñi?

¹⁶ Munjila yikwawu, anvwali amakwawu anawani njila yakudizishilamu anyanawu mwidimi dawu iku anakuya nakupompa kuchipompelu hela kwiizanvu dazatishaña idimi dacheñi. Charles, nvwali weyala wukweti anyana awambanda asatu adi nayaaka yakusemuka kutachika ha 9 kushika ha 13, apompaña mwiizanvu dazatishaña idimi daLingala. Walumbulwili nindi: “Twafuukulahu kudiza nikudifukula kwachisaka nanyanetu mwidimi detu. Kuhiñahu, twahitulukaña muyuma yitunadizi nikuhema yisela mwidimi daLingala kulonda adizi idimi.”

¹⁷ Kevin, nvwali weyala wukweti anyana awambanda ayedi, ayaaka yakusemuka 5 ni 8, waloñesha njila yakukwashilamu anyanindi kulonda eluki nsañu yadizañawu hakupompa kwamwidimi dacheñi. Walumbulwili nindi: “Ami nañodami twekalaña nakudiza kwahalwetu nawanyanetu muFrench, idimi dawu. Nawa twafuukwilihu kuya nakupompa mwidimi daFrench kamu mumulungu, nawa twazatishileña mafuku etu akunooka kuya nakupompa kupompa kweluña kwamwidimi detu.”

18. (a) Chishinanyi chekala haaRoma 15:1, 2 chinateli kuyikwasha kwiluka yuma yinateli kukwasha anyanenu? (b) Njilanyi jinazatishiwu anvwali amakwawu? (Talenu mazu adi kunsa.)

¹⁸ Hela chochu, chisaka hichisaka chinateli kutondahu yuma yinateli kukwasha anyanawu kupaminaku kuspiritu. ^[2] (Ŋal. 6:5) Muriel itwatena hakusambila wahosheli nindi, yena ninfumwindi adibondeli yuma yawu yejima  yakeñawu kulonda akwashi anyanawu kuspiritu. (Tañenu aRoma 15:1, 2.) Chayinu mpinji, Serge weluka nindi afuukwili mwamuwahi. Wahosheli nindi: “Kufuma hampinji yitwafuntili kuchipompelu chazatishaña idimi daFrench, mwanetu weyala wapamininiku kuspiritu nawa wapapatisheweli. Chayinu mpinji nakuzata wupayiniya wampinji yejima. Nakutoñojoka nikuya nakukalakela mwizanvu dazatishaña idimi dacheñi.”

19, 20. Tunateli kumwekesha ñahi netu twakeña Izu daNzambi?

¹⁹ Muloña wakukeña kwindi, Yehova nakojeji Izu dindi Bayibolu kwikala mumadimi amavulu kulonda ‘antu ejima eluki nsañu yalala chikupu.’ (1 Tim. 2:4) Weluka nindi antu anateli kwikala akola kuspiritu neyi ataña yitoñojoka yindi mwidimi dawu.

²⁰ Hichikweti muloña nakukala kutukwetiku, wejima wetu twatela kuzata nañovu kulonda tudiishi nyichima yetu nayakuda yakuspiritu. Neyi tukudizaña Nyikanda Yajila mwidimi detu, tukutwalekahu kwikala akola kuspiritu nichisaka chetu nawa tukumwekeshaña netu twalemesha mazu aNzambi.—Mas. 119:11.