1. Twatela kumona ñahi chikuhwelelu chawakwaKristu?

CHIKUHWELELU chawakwaKristu hichilwilu chalema nankashi. Bayi neyi antu ejima ekala nachuku. (2 Tesa. 3:2) Hela chochu, Yehova wayinka akwakudifukula indi kwesekeja ‘namwesekela chikuhwelelu’ chawu. (Rom. 12:3; Ŋal. 5:22) Ejima akweti chikuhwelelu atela kusakilila chikupu.

2, 3. (a) Nkiswinyi jinateli kutambwilayi muntu wukweti chikuhwelelu? (b) Malwihwinyi itukuhanjekahu?

² Yesu Kristu wahosheli nindi Tata yindi wamwiwulu wakundamishaña antu kudi yomweni kuhitila mudi Mwanindi. (Yow. 6:44, 65) Kumukuhwelela Yesu, kwaleteshaña muntu amwanakeni nshidi jindi. Ichi, chaleteshaña muntu kwikala nakukooleka kwakwikala nawubwambu wawuwahi naYehova haya nyaaka. (Rom. 6:23) Chumanyi chitwelili hakwila nawu twikali nakukooleka kwamuchidiwu? Hakwikala akwanshidi, twatelela hohu kufwa. (Mas. 103:10) Ilaña Yehova wamweni yuma yayiwahi mudi etu. Muloña waluwi lwindi lwasweja, wenzunwini nyichima yetu nansañu yayiwahi. Dichi, twatachikili kumukuhwelela  Yesu kulonda twakaheti wumi wahaya nyaaka.—Tañenu 1 Yowanu 4:9, 10.

³ Chikuhwelelu chatalisha mudihi? Komana chatalisha mukukuhwelela hohu nkisu jatuhembelayi Nzambi? Sweje-e dinu, tunateli kumwekesha ñahi chikuhwelelu chetu?

4. Muloñadi wutukuhoshela netu chikuhwelelu hichatalisha hohu mukwiluka nkeñelu yaNzambiku? Lumbululenu.

⁴ Chikuhwelelu hichatalisha mukwiluka hohu nkeñelu yaNzambiku. Hichilwilu chaleteshaña muntu kwila yuma kwesekeja nankeñelu yaNzambi. Kukuhwelela njila jaNzambi jakwamwinamu antu, kwakojejaña mukwakwitiya kushimwina nsañu yayiwahi kudi antu. Kapostolu Pawulu walumbulwili nindi: “Neyi wukwiteja nakanwa keyi neyi Yesu diyi Mwanta, nakwitiya mumuchima weyi neyi Nzambi wamusañwili mudi afu, eyi wukuhanda. Muloña namuchima muntu wetiyaña nakutambula kuloña; nakanwa wetejaña nakumona kuhanda.”—Rom. 10:9, 10; 2 Kor. 4:13.

5. Muloñadi chikuhwelelu chichalemena, nawa tunateli kutwalekahu ñahi kuchikolesha? Lumbululenu.

⁵ Mwamweni, hakwila nawu twakadiluñishi chihandilu chachiwahi mwituña dadiha daNzambi, twatela kwikala nachikuhwelelu nikuchikoleshaña. Kukolesha chikuhwelelu chetu anateli kukufwanisha kumutondu wakeñekaña menji. Kwambuka namutondu wakutuña kudi muntu, mutondu waweni watwalekañahu kuhimpa. Mutondu waweni womaña muloña wakubula menji hela watwalekañahu kuhanda namukekemena. Neyi wukwikala namenji wanyi, mutondu waweni womaña. Dichekala nichikuhwelelu chetu. Chikukeha nawa chikujiya neyi kuchisha maana nehi. (Luka 22:32; Heb. 3:12) Ilaña neyi tukushaku muchima, chikuhwelelu chetu chikutwalekahu kuhanda, ‘chikupaminaku’ nawa chikwikala ‘chakola.’—2 Tesa. 1:3; Tit. 2:2.

6. Mukanda waaHeberu 11:1 walumbulula mwatalisha chikuhwelelu munjilanyi jiyedi?

⁶ Bayibolu yalumbulula mwatalisha chikuhwelelu hamukanda waaHeberu 11:1. (Tañenu.) Chikuhwelelu chashindamena hayuma yiyedi yitwabulaña kumona: (1) “Yuma yitwachiñejaña”—yinateli kubombelamu yuma yatukanawu kumbidi yakamwekana yitwabulahu dehi kumona ilaña yichidi kanda yimwekani, chidi neyi kukuma kwayuma yatama yejima nikwinza kwetuña dadiha. (2) “Yuma yakadi kumonewa.” Muniyi nsañu, izu dachiGiriki dabalumunawu nawu ‘chinjikijilu chamwekeshaña’ datalisha kuwunsahu walala wayuma yabulaña kumwekana, yidi neyi kwikalaku kwaYehova Nzambi, Yesu Kristu, añelu niyuma yikwawu yekala muWanta wamwiwulu. (Heb. 11:3) Twamwekeshaña ñahi netu yuma yitwachiñejaña yalala nawa netu twakuhwelela muyuma yitwabula kumonahu dehi yashimunawu Mwizu daNzambi? Twamwekeshaña netu tukweti chikuhwelelu kuhitila munhoshelu nimuyilwilu yetu.

7. Chakutalilahu chaNowa chatukwashaña ñahi kwiluka mwatalisha kwikala nachikuhwelelu? (Talenu mwevulu wudi hefu datachi.)

⁷ Mukanda waaHeberu 11:7 walumbulula chikuhwelelu chaNowa welili hanyima ‘yakumusoñamisha kudi Nzambi kutalisha hayuma yachidiña kanda yimwekani, wamutiyili woma nakutuña watu wakupulwishilamu amwitala dindi.’ Nowa wamwekesheli chikuhwelelu kuhitila mukutuña watu weneni. Chakadi nikujina, antuñi nindi atela amwihwileña chatuñilileñayi chuma cheneni chamuchidiwu. Komana Nowa wamweneni kwanzo-o hela kuyileja nindi kawa kanyambalama tala jeyi? Inehi! Chikuhwelelu chindi chamuletesheli yashimwini antu adiñaku hayina mpinji chakadi woma  nikuyisoñamisha hakusompesha kwaNzambi kwadiña hambidi yawu. Chakadi nikujina, Nowa walejeleña antu mazu wowamu ahosheliyi Yehova akwila nawu: “Namoni antu ejima kunayikumi dehi; muloña iseki adiwanisha dehi madombu kudi wena . . . Hinukuleta dibaji damenji hamaseki, kulonda kujilumuna mwishina dewulu akwanyijimba ejima ahandaña nakwona; niyuma yejima yekala mwishina hamaseki yakafwa.” Chakadi nikujina Nowa wayilejeli antu njila yakupulukilamu kuzatisha mazu aNzambi akwila nawu: “Wakeñili muwatu.” Dichi, Nowa wamwekesheli chikuhwelelu chindi kuhitila mukwikala ‘mukwakushimwina kuloña.’—Kutach. 6:13, 17, 18; 2 Pet. 2:5.

8. Kambanji Yakoba amoneneni kulumbulula yumanyi kutalisha hachikuhwelelu chalala chawakwaKristu?

⁸ Chakadi nikujina, mukanda waYakoba awusonekeli chimwahitili kapinji kantesha kufuma hampinji yasonekeliyi kapostolu Pawulu mazu indi onenawu alumbulula mwatalisha chikuhwelelu. Kufwana Pawulu, Yakoba walumbulwili nindi chikuhwelelu chalala chamukwaKristu hichashindamena hakukuhwelela hohuku, ilaña nihanyidimu. Yakoba wasonekeli nindi: “Nleji chikuhwelelu cheyi chakadi nyidimu, ninami nikukuleja chikuhwelelu chami nanyidimu yami.” (Yak. 2:18) Yakoba watwalekelihu kumwekesha chaambu chekala  hakukuhwelela nikumwekesha chikuhwelelu. Andemoni akuhwelela nawu Nzambi wekala kwoku, ilaña hiyekala nachikuhwelelu chalalaku. Hamuloña wakubula kwikala nachikuhwelelu chalala, azataña nañovu kulonda eleña yuma yambukaku nankeñelu yaNzambi. (Yak. 2:19, 20) Kwambukaku, Yakoba wehwili hadi muntu mukwawu wakushankulu wadiña nachikuhwelelu nindi: “Nkakulula yetu Abarahama, chalambwiliyi mwanindi Isaka hakameña haloñeli nanyidimuku, tahindi? Wunamoni kwitiya kwakoñeli chimu nanyidimu yindi, nikwitiya kwelili kwalala nanyidimu.” Kuhiñahu, hakwila nindi yamwekeshi chikuma chakwila nawu chikuhwelelu chatela kumwekena munyidimu, Yakoba wabombelelihu nindi: “Chafwa mujimba wakadi spiritu, dichi nikwitiya kwakadi nyidimu kwafwa.”—Yak. 2:21-23, 26.

9, 10. Kapostolu Yowanu watukwashaña ñahi kwiluka chichalemena kukuhwelela?

⁹ Chimwahitili yaaka 30, kapostolu Yowanu wasonekeli Nsañu yindi Yayiwahi ninyikanda yisatu. Komana wasakililili hanlumbulwilu yayiwahi yachikuhwelelu chalala chawakwakristu yalumbulwiliwu ansoneki aBayibolu amakwawu oneneniwu? Mapampa kakavulu, Yowanu wazatishili izu dachiGiriki dabalumunañawu mpinji jikwawu nawu “kukuhwelela” kubadika ansoneki aBayibolu amakwawu.

¹⁰ Chakutalilahu, Yowanu walumbulwili nindi: ‘Muntu wamukuhwelelaña Mwana wakekala nawumi wahaya nyaaka; hakwila muntu wadikañaña naMwana hakekala nawumiku, ilaña kuzuwa kwaNzambi kwakekala hadi yena.’ (Yow. 3:36) Muchikuhwelelu chawakwakristu mwabombela kwovwahila Nshimbi jaYesu. Kakavulu, Yowanu wazatishileña mazu aYesu nindi twatela kutwalekahu kumwekesha chikuhwelelu.—Yow. 3:16; 6:29, 40; 11:25, 26; 14:1, 12.

11. Tunateli kumwekesha ñahi kusakilila hakwiluka chalala?

¹¹ Twatela kumusakilila Yehova chikupu hakuzatisha spiritu yindi yajila kulonda yatumwekesheli chalala nikutuletesha tukuhweleli nsañu yayiwahi. (Tañenu Luka 10:21.) Bayi tuleka kumusakilila Yehova hakutukundamisha kwakwihi nayomwenindi kuhitila mudi Mwanindi, ‘Ntwamina Muneni nawa Mukwakuwanisha chikuhwelelu chetu.’ (Heb. 12:2) Hakwila nawu tumwekeshi kusakilila haluwi lwasweja lwamuchidiwu, twatela kutwalekahu kukolesha chikuhwelelu chetu kuhitila mukulomba nikudiza Izu daNzambi.—Efwes. 6:18; 1 Pet. 2:2.

12. Tunateli kumwekesha chikuhwelelu chetu munjilanyi?

¹² Twatela kutwalekahu kukuhwelela muyikaninu yaYehova. Twatela kwila mwenimu kuzatisha njila jinakumonawu antu. Chakutalilahu, twatwalekañahu kushimwina haWanta waNzambi nikuzataku mudimu wakwilisha atumbanji. Twelilaña cheñi ‘yuma yayiwahi kudi antu ejima, sweje-e dinu kudi akwetu akwakwitiya.’ (Ŋal. 6:10) Nawa twazataña nañovu ‘kuvuula muntu wamukulu nimwelañayi,’ kulonda tubuli kwila yuma yikutuzeyesha kuspiritu.—Kol. 3:5, 8-10.

13. ‘Kukuhwelela mudi Nzambi’ kwalema ñahi, akufwanisha kuchumanyi, nawa muloñadi?

¹³ Bayibolu yahosha nawu, ‘chakadi chikuhwelelu, hitunatweshi kumutiyisha Nzambi kuwahaku; muloña muntu wukwinza kudi Nzambi chiña etiya nindi wudi kwoku, nindi wasomwenaña antu amukeñakeñaña.’ (Heb. 11:6) Izu daNzambi dalumbulula ‘kukuhwelela mudi Nzambi’ nawu hichibalu ‘chachikuku’ chakeñekaña kudi muntu hakwila nawu yekali nawa yatwalekihu kwikala mukwaKristu  walala. (Heb. 6:1) Hanichi chikuku, akwaKristu atela ‘kubombela kuchikuhwelelu chawu’ yilwilu yikwawu yalema ‘kulonda ashakameña mukukeña kwaNzambi.’—Tañenu 2 Petulu 1:5-7; Yuda 20, 21.

14, 15. Chikuhwelelu chalema ñahi neyi kuchesekeja nakukeña?

¹⁴ AkwaKristu asonekeli Bayibolu akonkomweneni hakulema kwachikuhwelelu kuhitila mukuchitena mapampa kakavulu. Kwosi chilwilu chikwawu chawakwaKristu chatenawu kakavulu. Komana ichi chinayi mukwila nawu chikuhwelelu dichilwilu chawakwaKristu chasweja kulema tahindi?

¹⁵ Kapostolu Pawulu wasonekeli kutalisha hachikuhwelelu nikukeña nindi: “Neyi nikweti kukuhwelela kwonsu nikwakututulula nachu mapidi, ilaña nabula kukeña, niwamukunkulwayi tuhu.” (1 Kor. 13:2) Yesu wakonkomweneni hakulema kwejima kwakumukeña Nzambi hampinji yaakwiliyi lwihu lwakwila nawu: “Lushimbi lwabadika nshimbi jejima lushimbinyi?” (Mat. 22:35-40) Kukeña kwabombelamu yilwilu yayivulu yalema yawakwaKristu, kushilahu nichikuhwelelu. Bayibolu yahosha nawu, “Kukeña . . . kwetejaña yuma yejima.” Kwakuhwelelaña yuma yejima yahoshayi Nzambi Mwizu dindi dalala.—1 Kor. 13:4, 7.

16, 17. Chikuhwelelu nikukeña ajishimuna ñahi hamu muNyikanda Yajila, ilaña chilwilwinyi chabadika kulema, nawa muloñadi?

¹⁶ Muloña wakulema kwachikuhwelelu nikukeña, ansoneki aBayibolu akwaKristu asonekeli iyi yilwilu kapampa kakavulu, nankashi mumukuku wumu. Pawulu walejeli amanakwindi nindi ‘vwalenu chikuñu chakujika hantulu chakukuhwelela nakukeña.’ (1 Tesa. 5:8) Petulu wasonekeli nindi: ‘Hela chakwila himwamumweni Yesuku, mwamukeña. Hela chakwila hayinu mpinji himunakumumonaku, ilaña mwamukuhwelela.’ (1 Pet. 1:8) Yakoba wehwili anakwindi awayishewa nindi: ‘Komana Nzambi hatondeli antu amonañawu mukaayi nawu hiyatuzweñi nakuyilisha kwikala aheta muchikuhwelelu nikwikala answana aWanta wakaniniyi antu amukeñaku, tahindi?’ (Yak. 2:5) Yowanu wasonekeli nindi: ‘Ilu dilu lushimbi [lwaNzambi] lwakwila nawu: tukuhweleli mwijina daMwanindi Yesu Kristu nikudikeña wumu namukwawu.’—1 Yow. 3:23.

¹⁷ Hela chakwila chikuhwelelu chalema, ichi chilwilu chakamana hampinji yitwakamona Nzambi chakashikijayi yikaninu yindi niyuma yitwachiñejaña. Ilaña kukeña Nzambi niantuñi netu kwakatwalekahu. Dichi, Pawulu wasonekeli nindi: ‘Ichi dinu kwekala kukuhwelela, kuchiñeja, nikukeña, yumiyi yisatu; chasweja kulema yowu kukeña.’—1 Kor. 13:13.

18, 19. Chikuhwelelu anakuchimwekesha ñahi chikupu makonu, nawa hinyi atela kuhamekawu?

¹⁸ Makonu, antu jaYehova anatwalekihu kukuhwelela muWanta waNzambi waloñeshayi. Chinafumimu, antu jaYehova kubadika ha 8 miliyoni mukaayi kejima adi muparadisa yakuspiritu. Hiiluña mwenzala nyikabu yaspiritu yaNzambi. (Ŋal. 5:22, 23) Chakadi nikujina, akwaKristu alala anakumwekesha chikuhwelelu nikukeña.

¹⁹ Kwosi muntu wunatweshi kwila mwenimuku. Nzambi yetu diyi wunazati mudimu wejimiwu. Iwu mudimu wawuwahi wunakuleta ‘mpuhu hejina daYehova, nichinjikijilu chakwiluka nachu haya nyaka.’ (Isa. 55:13) Mwamweni, ‘hichawaana chaNzambi’ chakwila nawu ‘akatwamwini kuhitila muchikuhwelelu.’ (Efwes. 2:8) Paradisa yetu yakuspiritu yikutwalekahu kutohelaku sampu iseki dejima dinenzali nawantu awanina, aloña nawa amuzañalu kulonda akahameki ijina daYehova. Dichi, tutwalekenuhu kukuhwelela muyikaninu yaYehova.