1. Yehova watwiteja kwiladi?

YEHOVA watwiteja kufuukulahu yuma yitwatela kwila muchihandilu. Watudizishaña chitwatela kufuukulahu chiwahi nawa watukwashaña kwikala namuzañalu neyi twila yuma yamuzañaleshaña. (Mas. 119:173) Neyi tuzatishaña maana ekala muBayibolu tukufuukulahu chiwahi.—Heb. 5:14.

2. Kukalanyi kutunateli kumona hanyima yakufuukula?

² Hela chakwila mpinji yikwawu tunafuukuli mwamuwahi, chinateli kutukalila kumanisha chuma chitwatachikili kuzata. Talenu haniyi yakutalilahu: Manakwetu wakansi nafuukulihu kutaña Bayibolu yejima. Natachiki hohu chiwahi munyilungu yatensha, ilaña naleki muloña wayuma yikwawu. Muhela nafuukulihu kuzata wupayiniya, ilaña kutachikaña kuzata nehi. Izanvu dawakulumpi dinafuukulihu kuzata mudimu wakubiña antu adi muchipompelu, ilaña tukweji chituhita chakadi kuzata iwu mudimu. Iyi yakutalilahu yinambuki, ilaña yikweti kukala kwokumu. Wejima wawu afuukwilihu, ilaña hiyashikijili mwafuukwiliwuku. AkwaKristu amumafuku awapostolu muKorinda niwena adiña nakukala kwokumu. Tuhanjekenu yuma yitwatela kudizilaku.

3. Chumanyi chafuukwiliwu akwaKorinda, nawa chumanyi chamwekeni?

³ Kwakwihi na 55 C.E., akwaKorinda afuukwilihu chuma chalema. Atiyili nawu amanakwawu muYerusalema nimuYudeya adiña nakukabakana, chakwila yipompelu yikwawu yatachikili kuyipompeshelaku mali akuyikwasha nachu. AkwaKorinda adiña naluwi nichisambu nawa afuukwilihu nawu niwena anakukeña kukwasha amanakwawu. Dichi amwihwili Pawulu chiyatela kuhanawu yawaana  yawu. Walejeli chipompelu chichatela kwila nawa watondeli Titusa kutambula yawaana. (1 Kor. 16:1; 2 Kor. 8:6) Hela chochu, chimwahitili tukweji twantesha, Pawulu watiyili nawu akwaKorinda anahani wanyi yawaana. Chafuminimu, yawaana yawu ayitambwili wanyi mumpinji yateleliwu kuyitwala kuYerusalema hamu nayawaana yafumini kuyipompelu yikwawu.—2 Kor. 9:4, 5.

4. Pawulu wayikolesheli akwaKorinda kwila chumanyi kwesekeja na 2 Akorinda 8:7, 10, 11?

⁴ AkwaKorinda afuukwili mwamuwahi nawa Pawulu wayihamekeli hamuloña wachikuhwelelu chawu chakola nimuchima wachisambu. Ilaña wayikolesheli cheñi kumanisha kuzata chuma chatachikiliwu dehi kuzata. (Tañenu 2 Akorinda 8:7, 10, 11.) Chuma chayimwekeneni chinakutudizisha nawu niakwaKristu ashinshika chinateli kuyikalila kwila mwafuukwiliwu.

5. Tukwakula malwihwinyi?

⁵ Kufwana akwaKorinda, chinateli kutukalila kwila mutwafuukwili. Muloñadi? Muloña wakubula kuwanina, tunateli kukañanya kushikija mutunafuukuli. Hela chuma chakadi kukuhwelela chinateli kumwekana chakwila chinateli kutuleñela kubula kwila mutwafuukwili. (Mukwa. 9:11; Rom. 7:18) Chumanyi chitwatela kwila neyi tunakukeña kuhimpa mutwafuukwili? Nawa tunateli kuzata ñahi nañovu kulonda tushikiji mutwafuukwili?

6. Mpinjinyi yitwatela kuhimpa mutunafuukuli?

⁶ Yuma yikwawu yalema yitwafuukulaña tunateli kuyihimpa wanyi. Chakutalilahu, neyi tufuukulahu kumukalakela Yehova twahimpaña wanyi nawa twafwilaña kwikala ashinshika kudi enikwetu. (Mat. 16:24; 19:6) Ilaña, yuma yikwawu yitwafuukulaña tunateli kuyihimpa. Muloñadi? Muloña yuma yahimpikaña muchihandilu. Yumanyi yinateli kutukwasha kufuukula chiwahi?

7. Chumanyi chitwatela kulomba, nawa muloñadi?

⁷ Lombenu maana. Yehova wamoneneni Yakoba kusoneka nindi: “Neyi hakachi kenu hadi muntu wunabuli maana, yatwalekihu kulomba kudi Nzambi nawa wakamwinka, muloña yena wahanaña kudi antu ejima.” (Yak. 1:5) Munjila yikwawu, wejima wetu “maana” atukehaña. Dichi shindamenenuña hadi Yehova hampinji yimunakufuukula nimpinji yimunakukeña kuhimpa mumwafuukwili. Nkumininaku, Yehova wukuyikwasha kufuukula chiwahi.

8. Yumanyi yitwatela kusandujola henohu kanda tufuukulihu?

⁸ Sandujolenu chikupu. Tañenuña Izu daNzambi, nyikanda yamukuloñesha kwaYehova nawa ihulenuña antu anateli kuyikwasha. (Yish. 20:18) Iyi yuma yalema nankashi henohu kanda mufuukuli kuhimpa mudimu, kubuuka hela kutonda shikola yinateli kuyikwashaku kutwalekahu kumukalakela Yehova.

9. Yumanyi yayiwahi yinateli kufumamu neyi twikala ashinshika?

⁹ Shinshikenu yuma yinaleteshi mufuukuli. Yehova wamonaña chuma chaleteshaña twileña yuma yitwelaña. (Yish. 16:2) Wakeñaña twikali ashinshika muyuma yejima. Dichi neyi tunafuukulihu, ninetu twatela kwikala ashinshika muyuma yitwelaña nikudi akwetu. Neyi twashinshika wanyi, chinateli kutukalila kwila mutunafuukuli. Chakutalilahu, manakwetu wakansi nateli kufuukulahu kwikala payiniya wampinji yejima. Mukuhita  kwampinji nateli kukañanya kushikija maora akeñekaña, nkumininaku wukuleka kudiluñisha mumudimu windi. Hadaha wukutoñojoka nindi chuma chamuletesheli kutachika wupayiniya himuloña wakukeña kumuzañalesha Yehova. Tahindi wakeñeleña kuzañalesha anvwali jindi hela muntu wacheñi?

10. Chumanyi chitwatela kwila hakwila nawu tuhimpi?

¹⁰ Talenu ichi chakutalilahu chakadizi waBayibolu wunakukeña kuleka kunwa makanya. Hakusambila, wukudinkaku kuleka hadi mulungu wumu hela yiyedi, ilaña hakutachika cheñi. Nkumininaku hakuleka chikupu. Muloña wakumukeña Yehova nikufwila kumuzañalesha dichinaleteshi yaleki.—Kol. 1:10; 3:23.

11. Muloñadi chimwatela kwilukila chuma chimunakukeña kwila?

¹¹ Ilukenu chuma chimunakukeña kwila.  Neyi mwiluka chuma chimunakukeña kwila, chikuyikwashaku kuzata chuma chimunakufwila. Chakutalilahu, hadaha munafuukuli nenu mukutañaña Bayibolu mpinji yejima. Ilaña neyi munatanjiki chiwahi wanyi nyidimu, himukutwesha kwila mumunafuukuliku. * Twili netu, akulumpi muchipompelu anafuukuli nawu akubiñaña nyikoku mpinji yejima, ilaña mukuhita kwampinji kwilamu nehi. Hakwila nawu eli munafuukuliwu, atela kudihula nawu: “Amanakwetu anyi niahela itwatela kubiña? Tunashimuni ntahi mpinji yitwatela kuyendela?”

12. Chumanyi chitwatela kwila, nawa muloñadi?

¹² Ilukenu hanakumini ñovu jenu. Wejima wetu hitukweti mpinji, maheta hela ñovu yakwila yuma yejima yitwafwilañaku. Dichi ilukenu hanakumini ñovu jenu nikumona yuma chiyidi. Neyi mukañanya kushikija mumwafuukwili, mwatela kuhimpa. (Mukwa. 3:6) Twili netu, munahituluki dehi mumwafuukwili, nawa mutoñojoka nenu munakufwila kwila mumunafuukuli chakatataka. Talenu yuma yitanu yinateli kuyikwasha kwila mumunafuukuli.

13. Munateli kwikala ñahi nañovu hakwila mwili mumunafuukuli?

¹³ Lombenu ayinki ñovu yakwilamu. Nzambi nateli kuyinka “ñovu yakwilamu” nikwila mumunafuukuli. (Fwi. 2:13) Dichi, lombenuña spiritu yajila kudi Yehova kulonda yiyinkeña ñovu. Twalekenuhu kulomba hela chakwila anayakuli swayi wanyi. Yesu wahosheli nindi: ‘Twalekenuhu kulomba, [spiritu yajila] akayinka.’—Luka 11:9, 13.

14. Chishina chidi haYishimu 21:5 chinateli kuyikwasha ñahi kwila mumunafuukuli?

¹⁴ Fuukulenu chakuzata. (Tañenu Yishimu 21:5.) Mwatela kufuukula chiwahi hakwila mumanishi mudimu wumwatachikili. Cheñi, mwatela kuzata kwesekeja nachimwafuukwili. Munjila yoyimu, neyi munakufuukula chuma, sonekenu yuma yimwatela kwila hakwila nawu muzati owu mudimu. Neyi mudimu wenu wakola wambulenu muyikunku yapela. Pawulu wayikolesheli akwaKorinda kuhemba yawaana hambadi “hefuku datachi damulungu-himulungu” chatela akapompesheña mpinji yakenzayi. (1 Kor. 16:2) Kwambula nyidimu yamaneni muyikunku yanyanya kukuyikwasha kubula kutoñojoka nenu mukukañanya.

15. Chumanyi chikufumamu neyi tunafuukuli chakuzata?

 ¹⁵ Neyi musoneka yuma yimunakufwila kwila, chikuyipelela kwilamu. (1 Kor. 14:40) Chakutalilahu, izanvu dawakulumpi adileja kutonda mukulumpi watela kusoneka munafuukuliwu, antu atela kuzata nimafuku atela kuzatawu. Akulumpi alondeleña iyi ntanjikilu, chayipelelaña kwila munafuukuliwu. (1 Kor. 9:26) Ninenu dichimwatela kwila neyi munakukeña kufukulahu. Chakutalilahu, mwatela kusoneka yuma yimunakukeña kwila hefuku-hefuku nawa sambilenu kusoneka yuma yimukutachikilañahu. Neyi musonekela chadimu ndandanda chikuyikwashaku kwila mumunafuukuli nikuyizata swayi.

16. Chumanyi chitwatela kwila neyi tunafuukulihu, nawa Aroma 12:11 yinakoleshi ñahi ichi chikuma?

¹⁶ Zatenu nañovu. Twatela kuzata nañovu hakwila nawu twili mutunafuukuli. (Tañenu Aroma 12:11.) Pawulu wamulejeli Timotewu ‘kutwalekahu’ ‘nakukolelaku chikupu’ hakwila yekali ntañishi wamuwahi. Twatela kuzatisha kufumba kwaPawulu neyi tunakukeña kufuukulahu yuma yakuspiritu.—1 Tim. 4:13, 16.

17. Tunateli kuzatisha ñahi Aefwesesa 5:15, 16 neyi tunakwila mutunafuukuli?

¹⁷ Zatishenuña chiwahi mpinji yenu. (Tañenu Aefwesesa 5:15, 16.) Tondenu mpinji yakwililamu yuma yimunafuukuli nawa bayi muhimpaku. Bayi mwilaña nenu nikazata neyi nekali dehi nampinji yayiwahiku, muloña yikamwekana wanyi. (Mukwa. 11:4) Bayi mukisilaña mpinji kuyuma yamukunkulwayi yikuyidiila mpinji niñovu yakwililamu yuma yalemaku. (Fwi. 1:10) Neyi chinatwesheki, tondenuña mpinji yinateli kubula kuyiluwañeshawu kudi antu. Lejenu akwenu nenu inakukeña wanyi kunluwañesha. Jimenuña foni yenu nawa mwatela kutaña emelu hela kuya haintaneti mpinji yacheñi. *

18-19. Chumanyi chinateli kuyikwasha kutwalekahu kwila mumwafuukwili hela chakwila munakumona kukala?

¹⁸ Toñojokenu hayuma yayiwahi yikufumamu. Yuma yafumaña muyuma yimwafuukulaña, yidi neyi kwiluña kumunakuya. Neyi munakukeña kushika kumunakuya, mukutwalekahu kuya hela chakwila mukukeña kuhimpa njila yimunakuyamu. Munjila yoyimu, neyi twiluka yuma yayiwahi yikufuma muyuma yitunafuukuli, tukuhimpa wanyi hela chakwila tunamoni kukala.—Ñal. 6:9.

¹⁹ Chekala chakala kufuukulahu chachiwahi nawa chinateli kutukalila kwila mutunafuukuli. Ilaña Yehova nateli kuyinka maana niñovu yakumanisha chuma chimwatachikili kuzata.