KUNYIMA, nhembi wahembeleña itala hela yuma yamuntu mukwawu. Izu dachiHeberu hela dachiGiriki dabalumunawu nawu “nhembi” mpinji yikwawu datalisha kudi kalama hela mukwakutala itala.

Hampinji yadiña Yosefu mwana kaYakoba, nduñu muEjipitu, wekalili nhembi wetala damwanta windi. Hela chochu, mwanta windi wamuEjipitu, “wamushiyilili Yosefu yuma yejima kuhemba.” (Kutach. 39:2-6) Kuhiñahu, Yosefu chekaliliyi nyuuli muEjipitu, watondeli nhembi wakutala itala dindi.—Kutach. 44:4.

Mumafuku aYesu, antu adiña namaha ashakamineña munyisumba kwakulehi namaha awu. Dichi awa antu atondeli atulama atalileña nyidimu yazatileñawu akwakukalakala mumaha awu.

Hinyi atondeleñawu kwikala nhembi? Mukwakusoneka nsañu wakuRoma Columella wamumafuku awapostolu washimwini nindi, nduñu watondeleñawu kwikala kalama hela nhembi, wadiña “muntu weluka kuzata nyidimu.” Wekalileña muntu “weluka kuzatisha chiwahi akwakuzata nawa wabulaña kukabisha akwanyidimu.” Wabombelelihu cheñi nindi: “Kalama wakeñekeleña kwikala muntu wabulaña kudimona nindi weluka yuma yejima nawa wateleli kwikala muntu wunakukeña kudiza.”

Izu daNzambi dazatisha chakutalilahu chakalama nimudimu windi hakulumbulula nyidimu yazatañawu muchipompelu chawakwaKristu. Chakutalilahu, kapostolu Petulu wayikoleshaña akwaKristu kuzatisha wuswa wawu wayinkawu kudi Nzambi “hakudikalakela wumu namukwawu nanochu [chiyadi] añamba amawahi aluwi lwaNzambi lwasweja.”—1 Pet. 4:10.

Yesu wazatishili chakutalilahu chañamba muchakutalilahu chasonekawu haLuka 16:1-8. Kubombelahu, muwuprofwetu wahosha hayinjikijilu yakwinza kwaMwanta, Yesu wayilejeli akwakumulondela nindi wakatonda “nduñu wamaana nikashinshi” hela “ñamba washinshika.” Mudimu wakazataña iwu ñamba hikuloñeshela akwakumulondela Kristu yakuda yakuspiritu mumafuku akukuminina. (Mat. 24:45-47; Luka 12:42) Twasakililaña muloña twatambwilaña nyikanda yatuloñeshelaña ñamba washinshika nawa yinakushika kwakumina iseki.