1-2. (a) Kwesekeja na Aefwesesa 6:16, muloñadi chitwatela kwikalila ‘nankebu yeneni yachikuhwelelu’? (b) Malwihwinyi itukuhanjekahu?

KOMANA mukweti “nkebu yeneni yachikuhwelelu”? (Tañenu Aefwesesa 6:16.) Chakadi nikujina mukweti. Neyi chakiñaña nkebu yeneni mujimba wejima, chikuhwelelu chenu chayikiñaña kuwuvumbi, wubanji niyuma yejima yabulaña kwendela hamu nanshimbi jaNzambi.

² Hela chochu, tunakushakama “mumafuku akukuminina” nawa chikuhwelelu chetu akutwalekahu kucheseka. (2 Tim. 3:1) Munateli kushinshika ñahi nkebu yenu yachikuhwelelu kulonda mumoni neyi yakola? Chumanyi chimwatela kwila hakwila mutwalekihu kwikala nachikuhwelelu chakola? Tuwanenu ñakwilu yanawa malwihu.

3. Amashidika elileña ñahi nankebu jawu, nawa muloñadi?

³ Mumpinji yakunyima, amashidika azatishileña nkebu yachikuñu yakujika muchitembi. Amashidika akwitileña manji kunkebu kulonda chitembi chibuli kukisika nikukañesha ndala kuchikuñu. Neyi mushidika yamona nindi nkebu yinakisiki, wayiwahishileña kulonda yakayizatishi cheñi kunjita. Ichi chakutalilahu chinakundami ñahi kuchikuhwelelu chenu?

4. Muloñadi chimwatela kutalatalaña nkebu yachikuhwelelu chenu, nawa munateli kwila ñahi mwenimu?

⁴ Kufwana amashidika akunyima, mpinji yejima mwatela kutalatalaña nikuhemba nkebu yachikuhwelelu chenu kulonda mwikaleña adiloñesha mpinji yejima kulwa njita. Etu akwaKristu twalwishaña njita yakuspiritu nawayilumbu  jetu kushilahu niandemoni atama. (Efwe. 6:10-12) Kwosi muntu wunateli kuyihembela chikuhwelelu chenuku. Munateli kwiluka ñahi nenu chikuhwelelu chenu chakola neyi anayeseki? Chatachi, mwatela kulomba wukwashu kudi Nzambi. Kuhiñahu zatishenuña Izu daNzambi kulonda chiyikwasheñaku kudimona enu aweni neyi chayimonañayi Nzambi. (Heb. 4:12) Bayibolu yahoshaña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku.” (Yish. 3:5, 6) Toñojokenu hachuma chayimwekeneni nichimwelili. Chakutalilahu, mwadiñahu nakukala kwamali? Komana mwatoñojokelihu hachikaninu chaYehova chekala haAheberu 13:5, chahoshaña nawu: “Hinamba kakushiya hela kukufutalelaku”? Komana ichi chikaninu chayikwashili kukuhwelela nenu Yehova wukuyikwasha? Neyi dimu, dikwila nawu munakuhemba chiwahi nkebu yachikuhwelelu chenu.

5. Chumanyi chimunateli kuwana neyi mushinshika chidi chikuhwelelu chenu?

⁵ Mukuhayama hayuma yimukuwana neyi mushinshika nankashi chidi chikuhwelelu chenu. Munateli kudiwana nakuzeyazeya kumwabulili kwiluka. Chakutalilahu, kusweja kwakama, makudi nimazu akuzeyesha, yumiyi yinateli kukisañana chikuhwelelu chenu. Neyi chayimwekenahu dehi, munateli kukiña ñahi chikuhwelelu chenu kulonda chibuli kusweja kukisika?

6. Yakutalilahwinyi yinakumwekesha nawu kwakama kukwawu kwakuwahi?

⁶ Kwakama kukwawu kwakuwahi. Chakutalilahu, chachiwahi kwakama kulonda tubuli kuneñesha Yehova niYesu. (1 Kor. 7:32) Neyi tukoña nshidi yeneni, twadakamenaña chitunateli kuwahisha wubwambu wetu naNzambi. (Mas. 38:18) Twakamenaña chitunateli kuzañalesha mwinikwetu nichakwakamena chisaka chetu niakwetu akwakwitiya.—1 Kor. 7:33; 2 Kor. 11:28.

7. Kwesekeja na Yishimu 29:25, muloñadi chitwatela kubulila kutiya antu woma?

⁷ Munjila yikwawu, kusweja kwakama kunateli kukisa chikuhwelelu chetu. Chakutalilahu tunateli kusweja kwakama hansañu yayakuda nihayakuvwala. (Mat. 6:31, 32) Dichi, tunateli kutachika kusha maana hakufwila yuma yakumujimba. Tukutachika cheñi kufwila mali. Neyi chumichi chimwekana, chikuhwelelu chetu mudi Yehova chinateli kuzeya nawa chikukisika. (Maku 4:19; 1 Tim. 6:10) Hela tunateli kusweja kwakama hayuma yatoñojokañawu antu hadi etu. Tukutachika kuchiina kutuseha hela kutukabisha kudi antu chatela tuchiineña kumuneñesha Yehova. Hakwila tudikiñi kuniwu wubanji, twatela kumulembelela Yehova kulonda yatwinki chikuhwelelu nawa twikali ahamuka kulonda tubuleña kutiya antu woma.—Tañenu Yishimu 29:25; Luka 17:5.

8. Chumanyi chitwatela kwila neyi tunatiyi nsañu yakutwamba?

⁸ Satana “tata yakutwamba,” wazatishaña antu ayulañayi kulonda atandisheña kutwamba hadi Yehova, amanakwetu niahela. (Yow. 8:44) Chakutalilahu, akwakusekesha atandishaña nsañu yakutwamba hadi kuloñesha kwaYehova haintaneti, haTV, hayikuzulemba nimuyipapilu yansañu. Iku kutwamba kwekala hakachi ‘kanyivu yakesi’ yaSatana. (Efwe. 6:16) Tunateli kwila ñahi neyi muntu yatachika kutuleja nsañu  yakutwamba? Twatela kuyitiyilila wanyi! Muloñadi? Muloña twamukuhwelela Yehova nawa twayikuhwelela amanakwetu. Nawa hitwatiyañanaña nawakwakusekeshaku. Hitwetejaña muntu hela chuma chidi chejima chikuletesha tutachiki kutadeka nawuku.

9. Chumanyi chinateli kumwekana neyi tutoñojokaña hakukala kutukweti?

⁹ Yuma yaneñeshaña yinateli kuzeyesha chikuhwelelu chetu. Hitwatela kudiwula kukala kutukwetiku. Dichi, chinateli kwikala chaluwa neyi tukudiwula. Mpinji yikwawu tunateli kuzeya. Ilaña bayi tutoñojokaña hakukala kutukweti mpinji yejimaku. Neyi tuswejaña kutoñojoka, tukuvulamena yuma yayiwahi yejima yatukanayi Yehova. (Chim. 21:3, 4) Tukuzeya chakwila tukutachika nikutoñojoka netu tuleki kumukalakela Yehova. (Yish. 24:10). Ilaña hitwatela kwiteja chuma chamuchidiwu kutwimwekenaku.

10. Yumanyi yimunadizili kumukanda wasonekeliyi muhela?

¹⁰ Talenu Muhela wakuUnited States chatwalekelihu kukolesha chikuhwelelu chindi hampinji yakatili nfumwindi chikupu. Mumukanda wasonekeleliyi kasanji keneni, wasonekeli nindi: “Kukala kutwahitileñamu kwadiña nakutuzeyesha mpinji yikwawu, ilaña chikuhwelelu chetu chakola. Nasakililaña hansañu yejima yatwinkañayi Yehova kulonda tukolesheña chikuhwelelu chetu nikutukwasha. Twakeñaña nankashi kutufumba nikutukolesha. Kwatukwashaña kutwalekahu kumukalakela Yehova nikuumika makabi atuletelañayi Satana.” Mazu aniwu muhela anatukwashi kwiluka nawu ninetu twatela kuumika kukala! Munjilanyi? Anukenuña nenu makabi imwamonaña hikweseka kwafumaña kudi Satana. Mukuhwelelenu Yehova nenu wukuyikundejaña. Nawa zatishenuña yakuda yakuspiritu yayinkañayi.

11. Hakwila twiluki netu chikuhwelelu chakola, malwihwinyi itwatela kudihula?

¹¹ Komana chikuhwelelu chenu chinakukeñeka kuchikolesha? Hatukweji twantesha tunahitihu, komana mwalekeli kusweja  kwakama? Mwakaninihu kutiyilila kunsañu yakutwamba nikutadeka nawakwakusekesha hansañu yakutwamba yatandishañawu? Komana mwashindili kukala kwayineñesheli? Neyi mwatwesheli, dikwila nawu chikuhwelelu chenu chakola. Ilaña twatela kwikala asoñama muloña Satana wukweti yitwa yikwawu yakeñañayi kuzatisha hadi etu. Tuhanjekenu hayitwa yimu.

12. Chumanyi chinateli kumwekana neyi tutachika kwakama nankashi hayuma yakumujimba?

¹² Kufwila yuma yakumujimba kunateli kutuluwañesha nikumba nkebu yetu yachikuhwelelu. Kapostolu Pawulu wahosheli nindi: “Kwosi muntu wunakuzata mudimu wawushidika wadiñijaña mumudimu wakulanda nakulandululaku, kulonda amutiyi kuwaha kudi muntu wamwiñijili wushidika.” (2 Tim. 2:4) Amashidika awaRoma ayitejeli kudiñija munsañu jakulanda nakulandulula wanyi. Chumanyi chadi kumwekana neyi mushidika yakaana kulondela yina nshimbi?

13. Muloñadi mushidika chatela kubulilayi kudiñija mumudimu wakulanda nakulandulula?

¹³ Fwikijenu ichi chakutalilahu. Izanvu dawamashidika dinakudiza chakuzuña njita, ilaña wumu najiñi. Iwu mushidika kwindi nakulandisha yakuda hachisankanu. Namelela, amashidika anakuwahisha nkebu jawu nikuwambwisha mpoku jawu jakabali. Ilaña ona mukwakulandisha, yena kwindi nashi hohu maana hakuloñesha yakuda yakulandisha ifuku dikwawu. Chikunachi, ayilumbu ayilukuka nikuyilukuka. Mushidika wumu yodihi wunadiloñeshi kulwa njita nawa wukumutiyisha mukulumpi windi kuwaha? Neyi ninenu mwadiña nakuzuña, mwadi kukundama kudi mushidika wumu yodihi, wadiloñeshaña tahindi mukwakulandisha?

14. Chumanyi chitwalemesha etu amashidika aKristu?

¹⁴ Tudi neyi amashidika amawahi. Chuma chalema chitwafwilaña hikumutiyisha Yehova niKristu kuwaha. Twalemesha chumichi kubadika chuma chejima chitunateli kwikala nachu mukaayi kaSatana. Twatela kwikala  nampinji niñovu yakumukalakela Yehova nikuhemba chiwahi nkebu yetu yachikuhwelelu niyitwa yetu yejima yanjita yakuspiritu.

15. Pawulu watusoñamishili nindidi, nawa muloñadi?

¹⁵ Twatela kwikala asoñama mpinji yejima. Muloñadi? Kapostolu Pawulu wasoñamishili nindi: “Antu afwilaña kuheta” ‘akayisenwisha nakufuma kuchikuhwelelu.’ (1 Tim. 6:9, 10) Izu dakwila nawu ‘kusenwisha’ dinakumwekesha nawu tunateli kuluwankana nakutachika kufwila yuma yamukunkulwayi yakumujimba. Nkumininaku tukutachika kusha muchima kuyuma “yayivulu yawusupi nimukufwila kwaletaña wubanji.” Chatela twitejeña iku kufwila munyichima yetu, twatela kwanukaña netu Satana nakuzatisha iku kufwila neyi chitwa kulonda yazeyeshi chikuhwelelu chetu.

16. Nsañu yekala haMaku 10:17-22 yinateli kutukwasha kutoñojoka hamalwihwinyi?

¹⁶ Twili netu tukweti mali akulandamu yuma yayivulu yakumujimba. Komana chatama neyi tulanda yuma yitunakukeña ilaña hitukuyizatishaku? Chatama wanyi. Ilaña toñojokenu hanawa malwihu: Hela chakwila tukutwesha kulanda chuma chidi chejima, komana tukweti mpinji yeneni niñovu yakuchizatisha nikuchihemba? Cheñi, komana  tunateli kusweja kukeñesha yuma yetu yakumujimba? Komana kusweja kukeña yuma yakumujimba kunateli kutuletesha kwila neyi ona mukwenzi wakaanini mutambi waYesu wakukalakala mudimu waNzambi? (Tañenu Maku 10:17-22.) Dichi, chikuwaha kupeleshaku chihandilu chetu kulonda tuzatisheña mpinji niñovu yetu kwila nkeñelu yaNzambi.

17. Chumanyi chitwatela kwanukaña?

¹⁷ Twatela kwanukaña netu tudi munjita nawa twatela kwikala adiloñesha kulwa mpinji yejima. (Chim. 12:17) Amanakwetu niahela kwila atusendela nkebu yachikuhwelelu nehi. Ilaña twatela kudisendela etu aweni.

18. Muloñadi amashidika kunyima chazatilileñawu nañovu kulonda abuli kunata nkebu?

¹⁸ Kunyima, mushidika adiña nakumulemesha neyi yekala wahamuka kunjita. Ilana watiyileña nsonyi neyi yafunta kumukala chakadi nkebu. Mukwakusoneka nsañu yakunyaka Tacitus wakuRoma, wasonekeli nindi: “Neyi mushidika yashiya nkebu yindi kunyima wasawukileña.” Dichaletesheleña amashidika kuzata nañovu yejima kulonda abuli kunata nkebu yawu.

19. Tunateli kukwatisha ñahi nkebu yachikuhwelelu chetu?

¹⁹ Twakwatishaña nkebu yetu yachikuhwelelu kuhitila mukupompa mpinji yejima nikushimwina ijina daYehova niWanta windi kudi antu. (Heb. 10:23-25) Kubombelahu, twatañaña Izu daNzambi mafuku ejima nikulomba kudi Yehova kulonda yatukwashi kulondela kufumba kwindi. (2 Tim. 3:16, 17) Nawa, kwosi chitwa chidi chejima chikuzatishayi Satana chinateli kutukatishaku. (Isa. 54:17) ‘Nkebu yetu yeneni yachikuhwelelu’ yikutukiña. Tukutwalekahu kuzatila hamu nawamanakwetu niahela chakadi kutiya woma. Tukushinda njita yitwazuñaña ifuku nifuku kulonda tuhembi chikuhwelelu chetu. Nawa chuma chasweja kulema tukwikala kukabadi kaYesu neyi yamushinda Satana niantu jindi.—Chim. 17:14; 20:10.