1. Muloñadi chitwatela kudifukula hohu kudi Yehova?

TWATELA kudifukula hohu kudi Yehova muloña diyi Watuleñeli niKutwinka Wumi. (Chim. 4:11) Hela chochu, twamonaña kukala. Hela chakwila twamukeña nikumulemesha Yehova, yuma yimu yinateli kwikala yalema muwumi wetu chakwila yinateli kutukañesha kumukeña nikudifukula kudi Yehova. Twatela kwiluka chatela kumwekana chumichi. Chatachi, tukuhanjeka muwatalisha kudifukula hohu kudi Yehova.

2. Kwesekeja na Kwidika 34:14, chumanyi chitunateli kwila neyi twamukeña chikupu Yehova?

² MuBayibolu, kumukeña Yehova chikupu kwabombelamu cheñi kudifukula hohu kudi yena. Hituketeja muntu wudi wejima hela chuma chidi chejima kutukañesha kudifukula kudi yenaku.—Tañenu Kwidika 34:14.

3. Muloñadi kudihana kwetu kudi Yehova chikwekalila kwalala?

³ Kudihana kwetu kudi Yehova kwalala. Muloñadi? Muloña kwashindamena hayuma yitunadizi kutalisha hadi yena. Twatiyaña kuwaha nayilwilu yindi yayiwahi. Tweluka yuma yakeñayi niyahelayi nawa chatiyañayi dichi twatiyaña. Tweluka nkeñelu yindi hadi antu nawa twalondelaña nshimbi jindi. Twatiyaña kuwaha muloña watwitejaña kwikala amabwambu jindi. (Mas. 25:14) Yuma yejima yitwadizaña hadi Nleñi yetu yatuleñelaña kuswina kwakwihi nayena.—Yak. 4:8.

4. (a) Yumanyi yazatishañayi Diyabolu kulonda tubuli kumukeña Yehova? (b) Tukuhanjekadi muchinu chibaaba?

⁴ Diyabolu diyi wunakuyuula kanu kaayi nawa nakukizatishaña kulonda yatuñilimu yuma yakokolaña antu nikuyiletesha afwileña yuma yatama. (Efwe. 2:1-3; 1 Yow. 5:19)  Wakeñaña nindi tukeñi yuma yikwawu kulonda tubuli kumukeña Yehova nkawindi. Tukuhanjeka hayuma yiyedi yazatishañayi Diyabolu. Chatachi, watwesekaña kulonda tusweji kukeña maheta nawa chamuchiyedi, wakeñaña nindi tutondeña yisela yatama.

5. Muloñadi chitwatela kutondolwela kusweja kukeña mali?

⁵ Wejima wetu twakeñaña yakuda yayivulu, yakuvwala yayiwahi niiluña dadiwahi kwakushakama. Hela chochu, twatela kutondolwela kusweja kukeña mali. Antu amavulu makonu “asweja kukeña mali” niyuma yakumujimba. (2 Tim. 3:2) Yesu welukili nindi akwakumulonda anateli kutachika kukeña mali. Dichi wahosheli nindi: “Hikudi muntu wunateli kukalakela anyanta ayediku; watela kuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kukalakela Nzambi hampinji yoyimu niMahetaku.” (Mat. 6:24) Muntu wadifukulaña kudi Yehova iku nakukisila mpinji niñovu yindi kukufwila maheta, dikwila nawu nakukalakela anyanta ayedi. Hakudifukulaña chikupu kudi Yehova muchalalaku.

6. Yumanyi yitunateli kudizila kumazu aYesu alejeliyi chipompelu chamuLayodikeya?

⁶ Kukukuma kwayaaka yawapostolu, antu amuchipompelu chadiña mumusumba waLayodikeya adisambileña nawu: “Ami nidi mukwamaheta nawa nekali namaheta amavulu, hinnakukeña chuma chidi chejimaku.” Ilaña kumesu aYehova niYesu adiña ‘nayihuñu, anshona, atuzweñi, amputamesu nawa adiña nawuvu.’ Yesu hayifumbili muloña wamaheta adiñawu nawuku, ilaña  muloña wakwila aswejeli kukeña mali chakwila aluwañesheleña wubwambu wawu naYehova. (Chim. 3:14-17) Neyi tumona netu tunatachiki kufwila mali, twatela kuzatilahu swayi-swayi kulonda tuyitondolweli. (1 Tim. 6:7, 8) Neyi nehi, tukutachika kufwila yuma yikwawu nawa Yehova wukwiteja wanyi kudifukula kwetu. Muloña yena “hiNzambi wukweti mukawu.” (Kuhit. 4:24) Tunateli kutachika ñahi kusweja kulemesha mali muchihandilu chetu?

7-9. Chumanyi chimunadizili kuyuma yamumwekeneni manakwetu David?

⁷ Talenu chuma cheliliyi David, mukulumpi washakamaña muUnited States. Wahosheli nindi wadiña wadikita chikupu kumudimu. Amwinkeli chifulu cheneni hamudimu wazatileñayi nawa mwituña mwadiñayi amwilukili nawu wadiña weluka mudimu chikupu. David wahosheli nindi: “Haniyi mpinji, natoñojokeli nami yuma yejimiyi yadiña hinkisu yaYehova.” Komana yadiña hinkisu yaYehova?

⁸ David watachikili kumona nindi mudimu windi wadiña nakuluwañesha wubwambu windi naYehova. Wahosheli nindi, “Neyi nayi nakupompa hela mumudimu wakushimwina nadiña hohu nakutoñojoka hakukala kwadiña kumudimu. Nadiña nakutambula mali amavulu, ilaña nadileteleleña hohu yihuñu nawa muwulu wetu mwatachikili wufwinda.”

⁹ David wenjili nakwiluka nindi wateleleli kutondahu chuma chasweja kulema. Wahosheli nindi: “Nafukwilihu chiwahi kulonda nimanishi kukala.” David wakeñeleña kuhimpa ndandanda yindi yamudimu  nawa walejeli mukulumpi wamudimu chuma chakeñeleñayi. Chumanyi chafuminimu? Mudimu wamanini. Welili ñahi? Wahosheli nindi: “Ifuku dalondelelihu, nasonekesheli wupayiniya wakukwasha.” David niñodindi atachikili kuzata mudimu wakuwahisha mumatala kulonda amoni mwakudikwashila. Chimwahitili mpinji, watachikili wupayiniya wampinji yejima nawa ñodindi niyena watachikili wupayiniya. Awa adisumbula atondelihu kuzata mudimu wadiwulañawu antu amavulu, ilaña mudimu wazatañawu walema wanyi kudi wena. Hela chakwila atambulaña mali antesha kubadika atambwileñawu hatachi, adi nayuma yakeñekaña muchihandilu. Akeña kumutwamijaku Yehova muchihandilu chawu nawa aneluki nawu Yehova wakamenaña antu atwamijañaku Wanta windi.—Mat. 6:31-33.

10. Tunateli kuhemba ñahi nyichima yetu?

¹⁰ Hela chakwila tudi namali antesha hela amavulu, twatela kuhemba nyichima yetu. Munjilanyi? Bayi musweja kukeña maliku. Nawa bayi mulemesha nyidimu yakumujimba kubadika nyidimu yaYehovaku. Munateli kwiluka ñahi neyi dichuma chinakuyimwekena? Mwatela kudihula nenu: ‘Komana natoñojokaña hamudimu wami neyi tunakupompa hela mumudimu wakushimwina? Komana nakamenaña neyi chakwila nakekala namali kumbidi? Komana Mali niyuma yakumujimba yinakuleta kukala muwulu wetu? Nateli kuzata mudimu wadiwulawu antu kulonda nikaleña nampinji yakumuzatila Yehova?’ (1 Tim. 6:9-12) Chitukutoñojokaña hanawa malwihu twanukeña netu Yehova watukeña nawa wakana antu ejima adihana kudi yena nindi: “Hinamba kakushiya hela kukufutalelaku.” Dichaletesheli kapostolu Pawulu kusoneka nindi: “Chihandilu chenu chiikali chakadi kusweja kukeña mali.”—Heb. 13:5, 6.

11. Chumanyi chinateli kumwekana kudi muntu hamuloña wayisela yatondañayi?

¹¹ Yehova wakeñaña nindi tudiluñisheña, nawa yisela yinateli kutukwasha kudiluñisha. Hela chochu, Izu daNzambi dahosha nawu “hikudi chuma chacheñi chakuwahisha muntuku, chiña yowu kudya nakunwa nakuluñisha muchima windi nanyidimu yindi yikukabakanayi.” (Mukwa. 2:24) Hela chochu, yisela yayivulu yidi mukaayi yinateli kutuluwañesha. Yinateli kuletesha antu  kutachika kwiteja nikukeña yuma yakaanisha Izu daNzambi.

12. Kwesekeja na 1 Akorinda 10:21, 22, muloñadi chitwatela kutondela yisela chiwahi?

¹² Twatela kudifukula kudi Yehova kankawindi hohu, dichi hitwatela kuda “kumesa yaYehova nikumesa yawandemoniku.” (Tañenu 1 Akorinda 10:21, 22.) Kuda yakuda namuntu chamwekeshaña nawu hadi wubwambu. Neyi tutonda yisela munabombeli madombu, kupesha, wuvumbi hela kufwila kwamujimba niyilwilu yatama, dikwila nawu tunakuda hamu yakuda yinaloñeshiwu kudi ayilumbu jaNzambi. Yuma yikufumamu, hitukuditamisha hohu etu aweniku, ilaña tukuluwañesha cheñi niwubwambu wetu naYehova.

13-14. Kwesekeja na Yakoba 1:14, 15, muloñadi chitwatela kwikalila asoñama hakutonda yisela? Shimunenu chakutalilahu.

¹³ Tunateli kwesekeja yisela nayakuda yitwadaña. Neyi tunakuda, tunateli kutonda yakuda yitunakukeña kuda. Ilaña neyi tunadi dehi hitukutwesha kutonda chiyinateli kuzatika kumujimba wetuku. Yakuda yayiwahi yinateli kutukwasha kwikala namujimba wawuwahi, ilaña yabula kutelela yinateli kutuletela yikatu. Hitunateli kushikena kwiluka yuma yikufumamu hanoyu mpinjiku, chiña neyi munahiti dehi mafuku.

¹⁴ Munjila yoyimu, neyi tunakutonda yisela, tunateli kutonda yuma yitwatela kutala nikutiyilila. Ilaña hanyima yakutonda, yisela yitunatondi yinateli kuluwañesha chitwatoñojokaña nichitwatiyaña. Yisela yayiwahi yinateli kutuzañalesha, ilaña yisela yatama yinateli kutuluwañesha. (Tañenu Yakoba 1:14, 15.) Yuma yafumaña muyisela yatama hiyinateli kumwekana hohenohuku, ilaña yinateli kumwekana mukuhita kwampinji. Dichatusoñamishilaña Bayibolu nawu: “Bayi ayiluwañeshaku: Nzambi hiyamusupishañaku. Muloña chuma chinakukuwayi muntu, dichakamunayi; muloña muntu wunakukuwa kumujimba, wakamuna kutoka kumujimba windi.” (Ñal. 6:7, 8) Chalema kutondolwela yisela yejima yatandishaña yuma yahelayi Nzambi.—Mas. 97:10.

15. Chawaananyi chatwinkayi Yehova nindi tudiluñisheña?

¹⁵ Antu jaYehova amavulu adiluñishaña kutala maprogilamu ahaTV yaJW Broadcasting^®. Muhela Marilyn wahosheli nindi: “JW Broadcasting yinankwashi kwikala namuzañalu nawa natalaña yuma yejima yidihu muloña yankwashaña. Neyi inakutiya wudi hela naneñi, natalaña mpanji yakukolesha hela Kudifukula kwaNtetemena. Chumichi chanleñelaña kuswina kwakwihi naYehova nikuloñesha kwindi. JW Broadcasting yinahimpi chihandilu chami chikupu.” Komana munakudiluñisha nachawaana chatwinkayi Yehova? Kubombela haprogiramu yahakakweji, ha JW Broadcasting hadi mazu akukwata nimavidiyo amavulu kushilahu nitumina twatuwahi tumwatela kutiyilila.

16-17. Tunateli kukeheshaku ñahi mpinji yitwazatishaña kuyisela, nawa tunateli kwila ñahi mwenimu?

¹⁶ Twatela kusoñama nayisela yitwatondaña nimpinji yitwakisilaña kuniyi yisela. Neyi nehi, tunateli kukisila mpinji yeneni hakuditiyisha etu aweni kuwaha kubadika yitwazatishaña hakumukalakela Yehova. Amakwawu chayikalilaña kukeheshaku mpinji yakisilañawu kuyisela. Muhela Abigail wudi nayaaka 18 wahoshaña nindi: “Kutala TV chankwashañaku kunooka hanyima yakuzata nyidimu yayivulu. Ilaña neyi kusoñama nehi, nateli kukisila maora amavulu nakutala TV.” Manakwetu wakansi Samuel  niyena wahosheli nindi: “Kakavulu natalaña mavidiyo amavulu amehi haIntaneti. Chinatachika kutala yimu, hinelukaña nami nakisilihu maora asatu hela awanaku.

¹⁷ Munateli kukeheshaku ñahi mpinji yimwazatishaña kuyisela? Njila yatachi hikwiluka maora imwazatishaña. Kwila musoneka mpinji yimwazatishaña mumulungu nehi? Sonekenu hakalenda maora imwazatishaña hakutala TV, kusandujola haintaneti nikuhema yisela yahafoni. Neyi mwiluka nenu mwakisilañahu mpinji yeneni, keheshenuku. Ikalenuña nampinji yeneni yakuzatilamu yuma yalema kuhiñahu dinu mwikali nampinji yakuzatisha kuyisela. Mulombenu Yehova yayikwashi kulonda muzatisheña mpinji yenu chiwahi. Muniyi njila mukwikalaña nampinji niñovu yakudiza Bayibolu nkawenu, kudifukula kwachisaka, kupompa nikumukalakela Yehova mumudimu wakushimwina. Nawa himukudinkaña nyiloña hampinji yimwazatishaña kuyiselaku.

18-19. Tunateli kumwekesha ñahi netu twadifukulaña hohu kudi Yehova?

¹⁸ Hanyima yakusoneka nsañu yakukuma kwakaayi kaSatana nikwinza kwetuña dadiha, kapostolu Petulu wahosheli nindi: “Enu akwetu itwakeña, chineli munakutalila yumiyi, zatenu nañovu jenu jejima kulonda akayiwani akadi ihuji, akadi hakuyinkela muloña nawa akayiwani mukuwunda.” (2 Pet. 3:14) Neyi twovwahila iku kufumba nawa twikala nayilwilu yayiwahi kumujimba nikuspiritu, tukumwekesha netu twadifukulaña hohu kudi Yehova.

¹⁹ Satana nikaayi kindi akutwalekahu kutweseka kulonda tutwamijeñaku yuma yakumujimba kubadika Yehova. (Luka 4:13) Ilaña hela tukumona kukala kwamuchidinyi, hitukwiteja muntu wudi wejima hela chuma chidi chejima kutukañesha kumutwamijaku Yehova muchihandilu chetuku. Tunakufwila chikupu kumwinka Yehova kalemesha, nikudifukula hohu kudi yena!